Atubukwabilile Bunakristo Bwesu

“Ndinywe bakamboni bangu, mbwaamba Jehova.”—ISAYA 43:10.

1. Ino mbantu bali buti Jehova mbakwelela kulinguwe?

NOMULI ku Ŋanda ya Bwami, amulangisye bantu baliko. Ino mbaani mbomubona abusena oobu bwakukombela? Mulakonzya kubona bana-bana basungweede ibabikkilide maano kuteelelesya busongo bwamu Magwalo. (Intembauzyo 148:12, 13) Cakutadooneka, alimwi mulakonzya kubona basilutwe bamikwasyi ibali mukusoleka kapati kukkomanisya Leza nokuba kuti bali munyika iinyonganya bukkale bwamumukwasyi. Ambweni mulakonzya kubona bayandwa besu bacembeede, aabo cakusyomeka bali mukuzuzikizya nzyobakasyomezya nobakalyaaba kuli Jehova nokuba kuti bajisi mapenzi aaboola akaambo kakucembaala. (Tusimpi 16:31) Boonse balamuyanda kapati Jehova. Alimwi cakamukkomanisya kupanga cilongwe ambabo. Mwana a Leza wakaamba kuti: “Takukwe muntu uukonzya kuza kulindime Taata uwakandituma atamukwela.”—Johane 6:37, 44, 65.

2, 3. Ino nkaambo nzi ncocikonzya kukatazya kuzumanana kuba Banakristo bayumu?

² Sena tacitukondelezyi kuba cibeela cabantu aabo Jehova mbayanda alimwi mbalongezya? Pele, ikuzumanana kulizyiba kuti tuli Banakristo “[mu]ziindi zikataazya” eezyi cilakonzya kuyuma. (2 Timoteo 3:1) Eeci cili masimpe ikapati ku kubana-bana ibali mukukomezyegwa mumikwasyi  ya Bunakristo. Mukubusi umwi wakazumina kuti: “Nokuba kuti ndakali kujanika kumiswaangano ya Bunakristo, tiindakajisi mbaakani zini-zini zyakumuuya alimwi cakutasisa buya tiindakali kulombozya kumubelekela Jehova.”

³ Bamwi, nokuba kuti balayandisya kumubelekela Jehova, balakonzya kunyonganizyigwa akaambo kakuyungwa kapati abeenzyinyina, nyika alimwi atumpenda tubyaabi. Iciindi notuli mukuyungwa kapati, mukuya kwaciindi cilakonzya kutupa kuleka kukukkomanina kuba Banakristo. Mucikozyanyo, ibantu banji munyika mazubaano babona zyeelelo zyamu Bbaibbele zyakulilemeka kuti nzyakaindi naa kuti tazigwasyi munyika yesu yamazubaano. (1 Petro 4:4) Ibamwi bayeeya kuti tacili cintu ciyandika kapati kukomba Leza munzila njatulailila. (Johane 4:24) Mulugwalo lwakwe kubana Efeso, Paulo ulaamba zyanyika eeyi kuti ijisi “muuya” antela bukkale budumide. (Ba-Efeso 2:2) Muuya ooyu ulabayunga kapati bantu kuti batalike kuba amizeezo yabantu bamunyika eeyi batamuzyi Jehova.

4. Mbuti Jesu mbwaakakankaizya mbociyandika kapati kulindiswe kubukwabilila Bunakristo bwesu?

⁴ Nokuba boobo, mbotuli babelesi ba Jehova balyaabide, tulizyi kuti inga kwaba kulibikka muntenda kuli umwi aumwi wesu—mwana naa imupati—ikucileka kuba Munakristo. Ikuzilanga bweelede zintu kuti tuli Banakristo kulakonzya kuyaama buyo kuzyeelelo zya Jehova alimwi azintu nzyalangila kulindiswe. Eeci cileelede akaambo kakuti twakalengwa mucinkozya cakwe. (Matalikilo 1:26; Mika 6:8) Ibbaibbele likozyanya bube bwesu bwa Bunakristo kuzisani izisamwa kutegwa boonse babone. Kujatikizya ciindi ncotupona, Jesu wakacenjezya kuti: “Amubone, ndaboola mbuli mubbi. Uli acoolwe oyo uulangilila akubamba zyakusama zyakwe, kuti ataendi acinswe akubonwa kuusa kwakwe.” * (Ciyubunuzyo 16:15) Tatweelede kusamununa bube bwesu bwa Bunakristo azyeelelo zyakulilemeka zibotu alimwi akutalekela nyika ya Saatani kutweendelezya. Ikuti cili boobo catucitikila, tulakonzya kusweekelwa ‘zyakusama zyesu’ eezyi. Ibukkale oobo bulakonzya kutyompya alimwi akujazya nsoni.

5, 6. Ino nkaambo nzi kukkalikana kumuuya ncokuyandika kapati?

⁵ Ikulizyiba kabotu kuti tuli Banakristo kulabujatikizya kapati bukkale bwamuntu. Nkaambo nzi ncocili boobo? Ikuti mukombi wa Jehova waleka kubikkila maano kubube bwakwe, ulakonzya kunyonganizyigwa azintu zimwi, aboobo takonzyi kuba abusolozi bubotu naa kuba ambaakani zigaminide. Ibbaibbele cakwiinduluka-induluka lilacenjezya kujatikizya bukkale buli boobo bwakudooneka. Sikwiiya Jakobo wakacenjezya kuti: “Uulimbulula ulikozyene amankwisita aalwizi aaululuka akutontwa amuuwo. Muntu uuli boobo atayeeyi kupegwa cintu ku-Mwami, pe, nkaambo ulijisi myoyo yobile, ulapilauka mukweenda kwakwe koonse.”—Jakobo 1:6-8; Ba-Efeso 4:14; Ba-Hebrayo 13:9.

⁶ Ino mbuti mbotunga twabukwabilila Bunakristo bwesu? Ino ncinzi cikonzya kutugwasya kuyaambele mukuba bapakamene kujatikizya coolwe ncotujisi cakuba bakombi ba Mupatikampatila? Mwalombwa kulanga nzila eezyi zitobela.

 Amubuyumye Bunakristo Bwanu

7. Nkaambo nzi ncocigwasya kapati kukombelezya Jehova kuti atulingule?

⁷ Amuzumanane kubukulusya cilongwe canu a Jehova. Icintu ciyandisi kapati ncajisi Munakristo ncilongwe cakwe a Leza. (Intembauzyo 25:14; Tusimpi 3:32) Ikuti naa twatalika kubudooneka Bunakristo bwesu, tweelede kucilanga-langa kapati mbocibede alimwi ambocili ciyumu cilongwe eeci. Cakweelela sintembauzyo wakakombelezya kuti: “Undilingule, O Jehova, ubone mbombede: Undisunke kumiyeeyo akumoyo.” (Intembauzyo 26:2) Nkaambo nzi kulilingula kuli boobo ncokuyandika? Nkaambo kakuti lwesu tobeni tatukonzyi kulilingula bweelede zintu zili mumyoyo yesu alimwi azintu nzyotulombozya. Alikke Jehova nguukonzya kuzyiba kabotu buntu bwesu bwamukati, nkokuti nzyotuyanda, nzyotuyeeya alimwi ambotulimvwa.—Jeremiya 17:9, 10.

8. (a) Ino mbuti kusunkwa a Jehova mbokukonzya kutugwasya? (b) Mbuti mbomwagwasyigwa kuyaambele kamuli Banakristo?

⁸ Kwiinda mukulomba Jehova kuti atulingule, tumulomba kuti atusunke. Ulakonzya kuzumizya zintu zimwi kucitika izikonzya kuyubununa zini zili mumizeezo alimwi abwini mbuubede moyo wesu. (Ba-Hebrayo 4:12, 13; Jakobo 1:22-25) Tweelede kwiitambula camaanza obile misunko iili boobo akaambo kakuti itupa coolwe cakutondezya mbokuli kuyumu kusyomeka kwesu kuli Jehova. Eeci cilakonzya kutondezya naa tuli bantu “balondosi akuba aciimo cizulide cakutabula cintu.” (Jakobo 1:2-4) Alimwi ciindi notusunkwa, tulakonzya kuyaambele kumuuya.—Ba-Efeso 4:22-24.

9. Ino nkaambo nzi ncociyandika kusinizya kuti ncoliyiisya Bbaibbele ncakasimpe? Amupandulule.

⁹ Amukasinizye lwanu kasimpe kamu Bbaibbele. Bube bwesu katuli babelesi ba Jehova bulakonzya kuyaansi ikuti kabutayeeme kapati aluzibo lwamu Magwalo. (Ba-Filipi 1:9, 10) Aumwi Munakristo—imwana naa mupati, weelede kusinizya kusikila mpagolela kubona kuti zintu nzyasyoma mmasimpe nkakasimpe kajanika mu Bbaibbele. Paulo wakakulwaizya basyominyina kuti: “Amukasunke zintu zyoonse mbuzibede, kuti mujatisye zibotu.” (1 Ba-Tesalonika 5:21) Ibanakristo bana-bana ibazwa mumikwasyi iiyoowa Leza beelede kuzyiba kuti tabakonzyi kuba Banakristo bakasimpe akaambo buyo kalusyomo lwabazyali babo. Davida usyi Solomoni kumugama, wakamukulwaizya kuti “koziba Leza wauso, akumumanina milimo camoyo woonse.” (1 Makani 28:9) Nzinji zyakali kuyandika kuli Solomoni mwana-mwana ikutali buyo kulangilila bausyi kabayumya lusyomo lwabo muli Jehova. Ilwakwe wakeelede kumuzyiba Jehova alimwi eeco ncaakacita. Wakalomba Leza cakusinizya kati: “Kondipa busongo amaanu, kuti nsololele kabotu aba bantu mukuzwa amukuboola.”—2 Makani 1:10.

10. Nkaambo nzi ncoceelede kubuzya mibuzyo yeelela katujisi mizeezo mibotu?

¹⁰ Lusyomo luyumu luyeeme aluzibo. Paulo wakati: “Lusyomo lulaba mumuntu namvwa Mulumbe.” (Baloma 10:17, Ci) Ino ncinzi ncaakali kupandulula mumajwi aayo? Ncaakali kupandulula ncakuti kwiinda mukubala Jwi lya Leza, tuyumya lusyomo lwesu muli Jehova, izisyomezyo zyakwe alimwi ambunga yakwe. Ikubuzya mibuzyo yeelela kujatikizya Bbaibbele kulakonzya kusololela kubwiinguzi bukkazyika moyo. Kuyungizya waawo, ku Ba-Roma 12:2 tujana lulayo lwa Paulo oolu lwakuti: “Mukasimpikile makani ngaayanda Leza, makani mabotu aatambulika aalondokede.” Ino mbuti mbotunga twacita boobo? Nkwiinda mukujana “luzibo lwinilwini.” (Tito 1:1) Imuuya wa Jehova ulakonzya kutugwasya kumvwisya naaba makani mayumu. (1 Ba-Korinto 2:11, 12) Tweelede kupaila kulomba lugwasyo lwa Leza notuli mukukatazyigwa kuteelela makani amwi. (Intembauzyo 119:10, 11, 27) Jehova uyanda kuti tulimvwisye Jwi lyakwe, kulisyoma alimwi akulitobela. Ulaibikkila maano mibuzyo yeelela iibuzyigwa amizeezo mibotu.

 Amukanze Kumukkomanisya Leza

11. (a) Ino ncilengwa nzi ncotwakazyalwa ancico icikonzya kutupa kucegwa? (b) Mbuti mbotunga twaba basicamba kutegwa tuliyumye notuyungwa abamusela wesu?

¹¹ Amusoleke kukkomanisya Leza ikutali muntu. Ncilengwa buya ncotwakazyalwa ancico cakuyanda kuzyibwa kwiinda mukuzulilwa kunkamu imwi yabantu. Aumwi ulayanda kuba abalongwe alimwi eeci cilatukkomanisya akutupa kulimvwa kuliiba. Mubukubusi alimwi anaakomena muntu, kuyungwa abamusela wakwe kulakonzya kukatazya kapati, alimwi kupa kuba akulombozya kapati ikwiiya antela kuyanda kukkomanisya bamwi. Pele balongwe alimwi abamisela yesu talili lyoonse nobabikkila maano kubukkale bwesu. Zimwi ziindi inga bayanda buyo muntu wakubasangana mumilimo iitaluzi. (Tusimpi 1:11-19) Ciindi Munakristo naayungwa abamuselanyina, kanji-kanji usoleka kulisisa mbwabede. (Intembauzyo 26:4) Imwaapostolo Paulo wakacenjezya kuti: “Mutakozyanizigwi aziyanza zyaciindi ecino.” (Ba-Roma 12:2) Jehova ulatupa nguzu nzyotuyandika kutegwa tuliyumye akuti tutayungwi abamwi.—Ba-Hebrayo 13:6.

12. Ino ninjiisyo nzi alimwi ncikozyanyo nzi cikonzya kutuyumya kuzumanana kuyuma mulusyomo ciindi kusyomeka kwesu kuli Leza nokujatikizyidwe?

¹² Eelyo kuyungwa nokulibonya kuti kuyanda kunyonyoona bube bwesu bwa Bunakristo, tweelede kuyeeya kuti ikusyomeka kwesu kuli Leza kulayandika kapati kwiinda kuyeeya kwabantu antela zilengwa zyabanabunji. Majwi aali kubbuku lya Kulonga 23:2 ajisi njiisyo iibeleka yakuti: “Utatobeli buleya kukucita zibi.” Eelyo bana Israyelinyina banji nobakazidooneka nguzu zya Jehova zyakuzuzikizya zisyomezyo zyakwe, cabusicamba Kalebe wakakaka kutobela bantu banabunji. Wakalisinizyide kuti zisyomezyo zya Leza zilasyomeka alimwi wakalongezyegwa kapati akaambo kanzila njaakabweza. (Myeelwe 13:30; Joshua 14:6-11) Sena andinywe mulikanzide kutayungwa abanabunji ikutegwa mucikwabilile cilongwe canu a Leza?

13. Nkaambo nzi ncocili cibotu kubazyibya bamwi kuti tuli Banakristo?

¹³ Amulizyibye kuti muli Banakristo. Ikaambyo kakuti wakalilekelela wakawa kali masimpe notuyanda kukwabilila Bunakristo bwesu. Nobakayaana basikukazya ibakali kubatyompya mumulimo wabo wakucita kuyanda kwa Jehova kuciindi ca Ezara, ibana Israyeli basyomeka bakati: “Tuli bazike ba-Leza wakujulu awaansi.” (Ezara 5:11) Ikuti twabijilwa kapati ambobalimvwa alimwi akukazya kwabantu basilunya, tulakonzya kutyompwa kapati akaambo kakuyoowa. Ikuba amuuya wakuyanda kukkomanisya bantu boonse, kulakonzya kutumanina nguzu. Aboobo mutakongwi pe. Cili kabotu lyoonse kulizyibya kuli bamwi kuti muli umwi wa Bakamboni ba Jehova. Munzila yabulemu pele cabusicamba, mulakonzya kubapanduluda bamwi zyeelelo zyakulilemeka nzyomutobela, nzyomusyoma alimwi ambomuzilanga zintu mbomuli Banakristo. Amubazyibye bamwi kuti mulikanzide kutobela zyeelelo zya Jehova zisumpukide mumakani aakulilemeka. Amucisalazye kuti tamulibambide kuleya munzila yanu ya Bunakristo. Amutondezye kuti mulikkomene akaambo kazyeelelo zyanu zyakulilemeka zibotu. (Intembauzyo 64:10) Ikulitondezya caantangalala kuti muli Banakristo batazungaani kulakonzya kumuyumya, kumukwabilila alimwi nokuba kukulwaizya bamwi kubuzya zya Jehova abantu bakwe.

14. Sena kusampaulwa antela kukazyigwa zileelede kututyompya? Amupandulule.

 ¹⁴ Masimpe, ibamwi balakonzya kumusampaula antela kumukazya. (Juda 18) Ikuti bamwi kabatamuswiilili nomusoleka kubapandulwida zyeelelo zyanu, mutatyompwi pe. (Ezekieli 3:7, 8) Nokuba kuti mwasolekesya buti, kunyina nomuya kubazula bantu ibatayandi kuzulwa. Amuyeeye Farao. Kunyina cipenzyo antela maleele—nokuba kufwidwa mwanaakwe mutaanzi kuzyalwa buya—ikwakali kukonzya kumuzula Farao kuzumina kuti nzyaakali kwaamba Musa zyakazwide kuli Jehova. Aboobo mutalekeli kuyoowa muntu kumutyompya. Ikusyomeka alimwi alusyomo muli Leza kulakonzya kutugwasya kumana buyoofwu.—Tusimpi 3:5, 6; 29:25.

Amwiiye Kuzintu Zyamusyule, Amulibambile Intalisyo Yakumbele

15, 16. (a) Ino lukono lwesu lwakumuuya ncinzi? (b) Mbuti mbotunga twagwasyigwa mukuzinzibala kuyeeya alukono lwesu lwakumuuya kwiinda mukubelesya Jwi lya Leza?

¹⁵ Amulukkomanine lukono lwanu lwakumuuya. Kwiinda mukubelesya Jwi lya Leza, Banakristo bayoogwasyigwa nobazinzibala kuyeeya lukono lwabo lwakumuuya lutaliboteli. Lukono oolu lubikkilizya kasimpe ka Jwi lya Jehova, bulangizi bwabuumi butamani alimwi acoolwe cakwiiminina Leza katuli basikwaambilizya makani mabotu. Sena mwalubona lubazu ndomujisi akati ka Bakamboni bakwe, munkamu yabantu iilelekedwe ibakatumwa mulimo uuvwuna bantu wakukambauka Bwami? Amubone kuti, Jehova mwini nguuzuminizya kuti: “Ndinywe bakamboni bangu.”—Isaya 43:10.

 ¹⁶ Mulakonzya kulibuzya mibuzyo eeyi: ‘Ino luyandika buti lukono lwakumuuya oolu kulindime? Sena ndilakubikkila maano kapati cakunga kucita kuyanda kwa Leza ndikubikka mubusena butaanzi mubuumi bwangu? Sena ikulumba kwangu kucoolwe eeci nkupati kapati cakuti kulakonzya kundiyumya kuzunda misunko iikonzya kundipa kusweekelwa lukono oolu?’ Alimwi lukono lwesu lwakumuuya lulakonzya kutupa kuliiba kwini-kwini kwakumuuya ooko kukonzya kujanika buyo mumbunga ya Jehova. (Intembauzyo 91:1, 2) Ikulanga-langa zintu zikondelezya zyali kucitika mumbunga ya Jehova yamazubaano kulakonzya kutugwasya kumvwisya kuti kunyina muntu antela cintu cikonzya kugusya bantu ba Jehova anyika.—Isaya 54:17; Jeremiya 1:19.

17. Ncinzi cimbi ciyandika kunze buyo lyakusyoma lukono lwesu lwakumuuya?

¹⁷ Masimpe, tatukonzyi kusyoma buyo lukono lwesu lwakumuuya. Aumwi wesu weelede kubamba cilongwe ciyumu a Leza. Paulo naakamana kubeleka canguzu kuyumya lusyomo lwa Banakristo ku Filipi, wakabalembela kuti: “Lino bayandwi bangu, mbuli mbumuswiilila lyoonse, teensi kwaamba kuciindi ncendiwo luzutu pele cakwiinda loko kuciindi ecino ncensiwo, ndakumbila kuti musungwaale kukulibelekela lufutuko lwanu cakuyoowa acakuzyangama.” (Ba-Filipi 2:12) Tatukonzyi kusyoma muntu uumbi ikutegwa tufwutuke.

18. Ino mbuti milimo ya Bunakristo mboikonzya kuyumya bube bwesu bwa Bunakristo?

¹⁸ Amujate bubi mumilimo ya Bunakristo. Cilaambwa kuti “mulimo nguuendelezya bube bwamuntu.” Banakristo bamazubaano bapedwe mulimo uuyandika kapati wakukambauka makani mabotu aa Bwami bwa Leza bukkazikizyidwe. Paulo wakaamba kuti: “Mbuli mbwendi apostolo wabamasi, ndalemeka eyi milimo yangu njiyonya.” (Ba-Roma 11:13) Mulimo wesu wabukambausi ulatwaandaanya kunyika eeyi alimwi ikutola lubazu kwesu mulinguwo kulabujatikizya kapati bube bwesu bwa Bunakristo. Ikujata bubi mumilimo imwi iicitika mumbungano ya Bunakristo mbuli miswaangano ya Bunakristo, ibubambe bwakuyaka maanda aakukombela, kugwasya ibapengede alimwi amilimo iimwi, kulakonzya kubuyumya kapati bube bwesu bwa Bunakristo.—Ba-Galatiya 6:9, 10; Ba-Hebrayo 10:23, 24.

Ikuzyibwa Caantangalala Kuti Tuli Banakristo Nkokuleta Zilongezyo

19, 20. (a) Ino nimpindu nzi nywebo nzyomwajana kwiinda mukuba Munakristo? (b) Ncinzi citupa kubuzyiba kabotu bube bwesu?

¹⁹ Amukkale ansi kuyeeya zilongezyo zitalivwulili alimwi abubotu mbotujana akaambo kakuti tuli Banakristo bakasimpe. Tulijisi coolwe cakuzyibwa cigaminina a Jehova. Imusinsimi Malaki wakati: “Abo ibakali kuyoowa Jehova bakali kwaambaula umwi aumwi kumweenzyinyina, nkabela Jehova wakaswiilila, wakamvwa, nkabela ibbuku lyakwiibalusya lyakalembwa kulinguwe nkaambo kabaabo ibakali kuyoowa Jehova akuyeeya izina lyakwe.” (Malaki 3:16) Leza ulakonzya kutubona kuti tuli balongwe bakwe. (Jakobo 2:23) Ibuumi bwesu bulabota akaambo kakuba amakanze aasalede, ibuumi buli ampindu ikwiinda mukuba ambaakani zibotu alimwi izigwasya. Kunze lyaboobo, twakapegwa bulangizi bwabuumi butamani kumbele.—Intembauzyo 37:9.

²⁰ Amubone kuti mbomubede alimwi ambomuyandika kulakonzya kwaambwa kweelana ambwakubona kuyandika kwanu Leza, ikutali kweelana ambobamuyeeyela bantu. Ibambi balakonzya kutubeteka kweelana azyeelelo zyabantu zitasyomeki. Pele luyando lwa Leza akubikkila maano kwakwe mpaayeeme bwini mbotuyandika bwakuti tuli bakwe. (Matayo 10:29-31) Mpoonya, luyando lwesu ndotujisi kuli Leza lulakonzya kutupa kubuzyiba kabotu bube bwesu alimwi akuba abusolozi bubotu mubuumi bwesu. “Muntu aakuyanda Leza, oyu muntu ulazibwa nguwe.”—1 Ba-Korinto 8:3.

Bupanduluzi buyungizidwe

Sena Muciyeeyede?

• Nkaambo nzi ncociyandika kapati ku Banakristo kubukwabilila bube bwabo bwakumuuya?

• Mbuti mbotukonzya kubuyumya kapati bube bwesu bwakumuuya?

• Notuyanda kusala ngotweelede kukkomanisya, ino ntwaambo nzi tukonzya kutugwasya kusala bweelede?

• Ino mbuti ikulizyiba kabotu mbotubede mbokunga kwabujatikizya buumi bwesu bwakumbele mbotuli Banakristo?

[Mibuzyo yaciiyo]

[Zifwanikiso izili apeeji 21]

Ikujata bubi mumilimo ya Bunakristo kulakonzya kubuyumya bube bwesu bwa Bunakristo