1, 2. Nkaambo nzi ncotweelede kubona mupailo kuti ncoolwe cipati, alimwi ino nkaambo nzi ncotweelede kuzyiba ncoliyiisya Bbaibbele kujatikizya mupailo?

IKUTI twayeezyanisya kububumbo bupati, inyika niniini kapati. Mubwini, kuli Jehova “Iwakalenga ijulu anyika,” imasi aabanamaleya ali mbuli kadosi kamaanzi kazwa munongo. (Intembauzyo 115:15; Isaya 40:15) Nokuba boobo, Ibbaibbele lyaamba kuti: “Jehova uli kufwaafwi kuliboonse bamwiita, boonse bamwiita calusinizyo. Bamuyoowa, ulabacitila mbobayanda; ulaswiilila cililo cabo akubafutula.” (Intembauzyo 145:18, 19) Amuyeeye buyo ncocaamba eeco! Imulengi singuzuzyoonse uli munsi andiswe alimwi ulatumvwa ikuti ‘twamwiita calusinizyo.’ Elo ncoolwe cipati kaka kuti inga twamusikila Leza mumupailo!

² Pele ikuti katuyanda kuti Jehova aiteelele mipailo yesu, tweelede kupaila munzila njakkomanina. Ikutegwa tucite boobo, tweelede kuteelela ncoliyiisya Bbaibbele kujatikizya mupailo. Cilayandika kapati kuti tuzyibe ncaamba Magwalo kujatikizya makani aaya, nkaambo mupailo utugwasya kuba acilongwe a Jehova.

3. Nkaambo nzi kamwi ikayandika ncotweelede kupaila kuli Jehova?

³ Ikaambo kamwi kayandika ncotweelede kupaila kuli Jehova  nkakuti utukulwaizya kuti tucite boobo. Ijwi lyakwe litukulwaizya kuti: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.” (Ba-Filipi 4:6, 7) Mmasimpe inga tiitwayanda kubulanga buyo bubambe oobu bwaluyando mbotwakacitilwa a Mweendelezi Mupati wabubumbo boonse!

4. Mbuti kupaila kuli Jehova lyoonse mbokuyumya cilongwe ncotujisi anguwe?

⁴ Akambi kaambo ncotweelede kupaila nkakuti ikucita boobo lyoonse ninzila iiyumya cilongwe cesu anguwe. Balongwe beni-beni tabaambauzyanyi buyo nobayanda cintu cimwi pe. Muciindi caboobo, ibalongwe beni-beni balabikkilana maanu, alimwi icilongwe cabo cilayuma mbobaambilana zyamumizeezo, nzyobalibilika alimwi ambobalimvwa cakwaanguluka. Munzila imwi, eeci cilikozyenye anotwaamba cilongwe cesu a Jehova Leza. Kwiinda mubbuku lino, mwaiya zinji nzyoliyiisya Bbaibbele kujatikizya Jehova, mbwabede alimwi amakanze aakwe. Mwamuzyiba kuti mmuntu mwini-mwini. Imupailo umupa coolwe cakwaamba zili mumizeezo  alimwi ambomulimvwa mumoyo kuli Bauso bakujulu. Mbomucita boobo, muba acilongwe ciyumu a Jehova.—Jakobo 4:8.

5. Ncinzi citondezya kuti Jehova taiswiilili mipailo yoonse?

⁵ Sena Jehova ulaiswiilila mipailo yoonse? Amulange-lange ncaakaambila bana Israyeli bazangi kuciindi camusinsimi Isaya naakati: “Nekuba kuti mwakomba zikombyo zinji, nsikooyooswiilila. Maanza aanu alizwide bulowa.” (Isaya 1:15) Aboobo micito imwi ilakonzya kupa kuti Leza ataiswiilili mipailo yesu. Aboobo ikutegwa mipailo yesu imvwugwe kabotu a Leza, tweelede kuzuzikizya zyeelelo zimwi iziyandika.

6. Ikutegwa Leza aiswiilile mipailo yesu, nceelelo nzi ciyandika ncotweelede kuzuzikizya, alimwi munzila nzi?

⁶ Ceelelo cimwi ciyandika ncakuti tutondezye kuti tulijisi lusyomo. (Amubale Marko 11:24) Imwaapostolo Paulo wakalemba kuti: “Kuti kakwiina lusyomo tacikonzeki kukonda Leza, nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.” (Ba-Hebrayo 11:6) Ikuba alusyomo tacaambi buyo kuzyiba kuti Leza nkwali akuti ulamvwa alimwi akwiingula mipailo. Lusyomo lulasinizyigwa kwiinda muzintu nzyotucita. Tweelede kupa bumboni busalede bwakuti tulijisi lusyomo kwiinda munzila njotupona abuzuba.—Jakobo 2:26.

7. (a) Nkaambo nzi ncotweelede kuba abulemu notwaambaula a Jehova mumupailo? (b) Notupaila kuli Leza, mbuti mbotunga twatondezya kuti tulalicesya alimwi tulisinizyide?

⁷ Alimwi Jehova uyanda kuti aabo bapaila kulinguwe kabacita oobo cakulicesya alimwi camoyo woonse. Sena tatujisi twaambo tunji ncotweelede kulicesyela notwaambaula a Jehova? Ibantu nobajisi coolwe cakwaambaula amwami naa mweendelezi, balacita oobo cabulemu kabalemeka cuuno caatala ncajisi mweendelezi ooyo. Aboobo tweelede kwiinda aawo kuba abulemu notusikila Jehova mumupailo.  (Intembauzyo 138:6) Kayi walo ngu “Leza Singuzuzyoonse.” (Matalikilo 17:1) Notupaila kuli Leza, cakulicesya tweelede kutondezya kweelana ambotumusikila kuti tulibuzyi busena bwesu twalyeezyanisya kulinguwe. Ikulicesya kuli boobo alimwi kuyootukulwaizya kupaila camoyo woonse, ikutali mipailo yakwiile kwiinduluka zintu nzimunya lyoonse.—Matayo 6:7, 8.

8. Mbuti mbotunga twacita zintu kweelana anzyotupailila?

⁸ Iceelelo cimbi ciyandika kutegwa tumvwugwe a Leza nkucita kweelana amipailo yesu. Jehova ulangila kuti tuzicite zyoonse zikonzyeka kucita kweelana anzyotupailila. Mucikozyanyo, ikuti naa twapaila kuti “Utupe sunu zilyo nzitubula,” tweelede kubeleka canguzu imulimo uuli woonse ngotukonzya kucita. (Matayo 6:11; 2 Ba-Tesalonika 3:10) Ikuti twapailila kuzunda kukompama kumwi kwanyama, tweelede kubikkila maanu kuti twabutantamuka bukkale alimwi azintu zinga zyatusololela kukutepaulwa. (Ba-Kolose 3:5) Kunze lyazyeelelo eezyi ziyandika, kuli mibuzyo iijatikizya mupailo njotweelede kwiingula.

9. Ino nkuuli ni nkotweelede kupaila, alimwi nkwiinda muli ni?

⁹ Ino nkuuli ni nkotweelede kupaila? Jesu wakayiisya basikumutobela kupaila kuli “Taateesu ooli kujulu.” (Matayo 6:9) Aboobo mipailo yesu yeelede kupailwa buyo kuli Jehova Leza alikke. Nokuba boobo, Jehova uyanda kuti tucilemeke cuuno ncajisi Mwanaakwe simuzyalwa alikke, Jesu Kristo. Mbubwenya mbotwakaiya mu Cibalo 5, Jesu wakatumwa anyika kuti abe cinunuzyo cakutufwutula kucibi alufwu. (Johane 3:16; Ba-Roma 5:12) Mmupaizi Mupati alimwi a Mubetesi uubikkidwe. (Johane 5:22; Ba-Hebrayo 6:20) Aboobo Magwalo atulailila kupaila mipailo yesu kwiinda muli Jesu. Jesu mwini wakati: “Ndime nzila, ndime bwini, ndime buumi. Takukwe uuza kuli-Taata, pele mulindime.” (Johane 14:6) Ikutegwa mipailo yesu imvwugwe, tweelede kupaila buyo kuli Jehova alikke kwiinda mu Mwanaakwe.

10. Nkaambo nzi ncokutayandiki kwiima naa kukkala munzila imwi iilibedelede notupaila?

 ¹⁰ Sena tweelede kwiima naa kukkala munzila imwi iilibedelede notupaila? Peepe. Kunyina Jehova nayanda kuti tukkale munzila imwi iigaminide, kunyina makani naa ijatikizya maboko naa mubili woonse. Ibbaibbele liyiisya kuti tacilubide pe kupaila muziimo zinji ziindene-indene. Eezyi zibikkilizya kukkala, kukotama, kufwugama alimwi akwiimikila. (1 Makani 17:16; Nehemiya 8:6; Daniele 6:10; Marko 11:25) Icini ciyandika mmoyo uuli kabotu, ikutali ciimo cimwi cilibedelede icinga cabonwa abamwi. Mubwini, notucita zintu zyabuzuba abuzuba naa notucitikilwa cintu catali kuyeeyelwa, tulakonzya kupaila mumoyo kufwumbwa waawo mpotubede. Jehova ulaimvwa mipailo eeyo nokuba kuti aabo mbotuli limwi inga kabatakonzyi kuzyiba kuti twapaila.—Nehemiya 2:1-6.

11. Nzintu nzi nzyotulibilika nzyotunga twapailila kakunyina bubi?

¹¹ Nzinzyi nzyotukonzya kulomba mumupailo? Ibbaibbele lipandulula kuti: “Na twakumbila kufumbwa cintu cili buti cili mbuli makanze aakwe, [Jehova] ulatumvwa.” (1 Johane 5:14) Aboobo tulakonzya kulomba cintu cili coonse ceendelana akuyanda kwa Leza. Sena nkuyanda kwakwe kuti tupailile zintu nzyotulibilika? Inzya! Ikupaila kuli Jehova inga caba mbuli kwaambaula amulongwe mwini-mwini. Tulakonzya kumwaambila zyoonse zili kumoyo, ‘ikutula myoyo yesu’ kuli Leza. (Intembauzyo 62:8) Cili kabotu kulindiswe ikulomba muuya uusalala, nkaambo uyootugwasya kucita zintu ziluzi. (Luka 11:13) Alimwi tulakonzya kulomba busolozi kutegwa tusale cabusongo alimwi anguzu kutegwa tuliyumye mumakatazyo ngotujisi. (Jakobo 1:5) Nitwabisya, tweelede kulomba kulekelelwa munguzu zyacituuzyo ca Kristo. (Ba-Efeso 1:3, 7) Pele zintu nzyotuyandika tazyeelede kuba zintu zilikke nzyotulomba mumipailo yesu. Tuleelede kupailila abambi—ibanamukwasyi alimwi abakombima.—Incito 12:5; Ba-Kolose 4:12.

12. Mbuti mbotunga twatondezya kuti makani aajatikizya Taateesu wakujulu ngaayandika kapati mumipailo yesu?

 ¹² Imakani aajatikizya Jehova Leza ayelede kubikkilwa maanu cakusaanguna mumipailo yesu. Mmasimpe tulijisi twaambo tubotu ncotweelede kumutembaula camoyo woonse akumulumba akaambo kabubotu bwakwe boonse. (1 Makani 29:10-13) Jesu wakapa mupailo wacikozyanyo uulembedwe kuli Matayo 6:9-13, ooko nkwaakatuyiisya kupaila kuti zina lya Leza lilemekwe, nkokuti libonwe kuti lilisetekene naa kuti lilasalala. (Amubale) Kuti Bwami bwa Leza buboole akuti kuyanda kwakwe kucitwe anyika mbubwenya mbuli kujulu nzyezitobela kwaambwa. Lilikke Jesu naakamana kwaamba zintu eezyi ziyandika izijatikizya Jehova naakabikkila maanu kuzintu zilibilikwa abantu. Eelyo aswebo notubikka Leza mubusena buyandika kwiinda mumipailo yesu, tutondezya kuti tatubikkili buyo maanu kubukkale bwesu.

13. Ncinzi Magwalo ncaatondezya kujatikizya kulampa kwamipailo iitambulika?

¹³ Ino mipailo yesu yeelede kulampa buti? Kunyina Bbaibbele nolyaamba mboweelede kulampa mupailo wamuntu omwe naa wakubuleya. Ilakonzya kiili buyo mifwaafwi iipailwa kamutanalya naa milamfwu njotupaila tolikke notwaambila Jehova zyoonse zili kumoyo wesu. (1 Samuele 1:12, 15) Pele Jesu wakabanyemena bantu bakali kulibona kuti baliluleme, ibakali kupaila mipailo milamfwu kuti babonwe abantu. (Luka 20:46, 47) Imipailo iili boobo tiimukkomanisyi pe Jehova. Iciyandika kapati ncakuti tupaile camoyo woonse. Aboobo ikulampa kwamipailo iitambulika kulakonzya kwiindana kweelana aziyandika alimwi abukkale.

14. Ncinzi Bbaibbele ncolyaamba nolitukulwaizya ‘kupaila lyoonse,’ alimwi ino ncinzi cuumbulizya kujatikizya makani aaya?

¹⁴ Ino tweelede kupaila ziindi zyongaye? Ibbaibbele litukulwaizya ‘kupaila lyoonse,’ ‘kujatisya kukomba’ alimwi ‘akukomba cakutaleka.’ (Matayo 26:41; Ba-Roma 12:12; 1 Ba-Tesalonika 5:17) Itwaambo ootu tatwaambi kuti tweelede kupaila kuli Jehova ciindi coonse abuzuba. Muciindi caboobo,  Ibbaibbele litukulwaizya kupaila lyoonse, ikulumba Jehova lyoonse akaambo kabubotu bwakwe mbwatutondezya alimwi akuyandaula busolozi, luumbulizyo alimwi anguzu zyakwe. Sena tacuumbulizyi ikuzyiba kuti Jehova tatubikkili bulamfwu bwamupailo naa kutwaambila ziindi notunga twaambaula anguwe mumupailo? Ikuti katulumba ncobeni kujatikizya coolwe camupailo ncotujisi, tuyoojana ziindi zinji zyakupaila kuli Taateesu wakujulu.

15. Nkaambo nzi ncotweelede kwaamba kuti “Ameni” kumamanino kwamipailo yesu tobeni alimwi ayakubuleya?

¹⁵ Nkaambo nzi ncotweelede kwaamba kuti “Ameni” kumamanino kwamupailo? Ibbala lyakuti “ameni” lyaamba kuti “akube boobo.” Izikozyanyo zyamu Magwalo zitondezya kuti cilayandika kwaamba kuti “Ameni” kumamanino kwamipailo njotulipailila tobeni naa yakubuleya. (1 Makani 16:36; Intembauzyo 41:13) Kwiinda mukwaamba kuti “Ameni” kumamanino kwamupailo wesu, tusinizya kuti nzyotwaamba twazyaamba camoyo woonse. Notwaamba kuti “Ameni”—mumoyo naa cakupozya kumamanino kwamupailo waabuleya wapailwa aumbi, tutondezya kuti tulazizuminizya nzyaamba.—1 Ba-Korinto 14:16.

16. Ndusyomo nzi ndotujisi kujatikizya mupailo?

¹⁶ Sena Jehova mmasimpe ulayiingula mipailo? Inzya ulayiingula! Tulijisi twaambo tusinizya ncotweelede kusyoma kuti ‘Uuswiilila mipailo’ ulayiingula mipailo iipailwa camoyo woonse atuulunzuma twabantu. (Intembauzyo 65:2) Jehova ulakonzya kwiingula mipailo yesu munzila ziindene-indene.

17. Nkaambo nzi ncocinga caambwa kuti Leza ubelesya bangelo ababelesi bakwe anyika ikwiingula mipailo yesu?

¹⁷ Jehova ubelesya bangelo bakwe alimwi ababelesi bakwe anyika ikwiingula mipailo. (Ba-Hebrayo 1:13, 14) Kuli zyakacitika zinji oomo bantu bakapaila kuli Leza kulomba lugwasyo lwakuti bateelele Bbaibbele mobakaswaigwa aumwi  wababelesi ba Jehova kwiinde buyo ciindi cisyoonto. Izicitika zili boobu zipa bumboni bwabusolozi bwabangelo mumulimo wakukambauka makani aajatikizya Bwami. (Ciyubunuzyo 14:6) Ikutegwa aingule mipailo yesu njotupaila notuli mupenzi, Jehova ulakonzya kukulwaizya Munakristoma kutugwasya.—Tusimpi 12:25; Jakobo 2:16.

18. Mbuti Jehova mbwabelesya muuya wakwe uusalala alimwi a Jwi lyakwe ikwiingula mipailo yababelesi bakwe?

¹⁸ Alimwi Jehova Leza ubelesya muuya wakwe uusalala  a Jwi lyakwe Ibbaibbele ikwiingula mipailo yababelesi bakwe. Ulakonzya kwiingula mipailo yesu notulomba lugwasyo lwakuliyumya mumasukusyo kwiinda mukutupa busolozi alimwi anguzu kwiinda mumuuya wakwe uusalala. (2 Ba-Korinto 4:7) Bunji bwaziindi ibwiinguzi kumipailo yesu yakulomba busolozi, buzwa mu Bbaibbele oomo Jehova mmwatupa lugwasyo lwakusala camaanu. Imagwalo aagwasya alakonzya kujanwa notucita ciiyo ca Bbaibbele cesu tobeni alimwi anotubala mabbuku aa Bunakristo mbuli bbuku lino. Itwaambo twamu Magwalo ntotweelede kulanga-langa tulakonzya kutumvwa kumuswaangano wa Bunakristo naa kwiinda mutwaambo twaambwa amwaalu uubikkila maanu kubukkale bwesu mumbungano.—Ba-Galatiya 6:1.

19. Ncinzi ncotweelede kuyeeya ikuti zimwi ziindi mipailo yesu yalibonya mbuli kuti tayiingulwi?

¹⁹ Ikuti kwalibonya mbuli kuti Jehova wamuka ikwiingula mipailo yesu, teensyi kaambo kakuti tacikonzyi kwiingula pe. Muciindi caboobo, tweelede kuyeeya kuti Jehova ulayiingula mipailo kweelana akuyanda kwakwe alimwi muciindi ceelede ncasalide. Ulizizyi kapati nzyotuyandika alimwi ambozyeelede kulanganizyigwa kwiinda mbotuzizyi. Bunji bwaziindi utulekela kuti ‘tuzumanane kukumbila, kuyandaula alimwi akukonkomona.’ (Luka 11:5-10) Ikuzumanana kucita boobo kutondezya Leza kuti kulombozya kwesu nkupati alimwi akuti lusyomo lwesu ndwakasimpe. Kunze  lyaboobo, Jehova ulakonzya kwiingula mipailo yesu munzila njotutakonzyi kuzyiba swebo. Mucikozyanyo, ulakonzya kwiingula mupailo wesu kujatikizya sukusyo limwi kwiinda mukutupa nguzu zyakuliyumya andilyo muciindi cakuligusya buya.—Amubale Ba-Filipi 4:13.

20. Nkaambo nzi ncotweelede kucibona kuti ncoolwe cilibedelede kupaila lyoonse?

²⁰ Elo tulalumba kapati kaka kuti Mulengi wabubumbo oobu butalikomeneni mmulongwe kuli baabo boonse bamwiita munzila yeelede mumupailo! (Amubale Intembauzyo 145:18) Katupaila lyoonse mbwaanga ikucita boobo ncoolwe icilibedelede. Ikuti naa twacita oobo, calukkomano tunoojisi bulangizi bwakuyumya cilongwe cesu lyoonse a Jehova, Uuswiilila mipailo.