“Mululami Uyookondwa Muli Jehova”
MUCHIZI DIANA ulaaminyaka yiinda ku80. Mulumaakwe wakali kuchiswa bulwazi butegwa Alzheimer alubo katanafwa wakali kukkala kuchibbadela chabantu bachembeede. Diana wakalisimya bana bakwe babili balombe nibakafwa alubo uchiswa bulwazi bwakkensa yaankolo. Pesi bamumbungano yaDiana kuti bamubona kuNg’anda yaBwaami amumulimu wakukambawuka, bamubona kali muntu uubotelwa chiindi choonse.
Mukwesu John wakali mulangizi weendeenda kwaminyaka yiinda ku43. Wakali kuuyandisya loko mulimu ooyu. Mukuya kwachiindi, wakazooyimikila kubeleka mulimu ooyu nkaambo wakeelede kulangania bbululu wakwe wakali kuchiswa. Lino John, ngusikupupulula mumbungano yakulimbabo. Bantu bamuzi John nibamubona kumuswaangano wabbazu naakuti wabbooma, babona katachinchide pe. Uchibotelwa ambulisunu.
Niinzi chipa kuti Diana aJohn bakkale kababotelwa? Zichitika biyeni kuti muntu uukataazikene awuchiswa baambwe kuti balabotelwa? Alubo zichitika biyeni kuti muntu wakasweekelwa chimwi chilongezyo aambwe kuti ulabotelwa? Bbayibbele lyaamba kuti: “Mululami uyookondwa muli Jehova.” (Int. 64:10, NW) Tulakonzya kukamvwisisisya kasimpe aaka kuti twaziba zintu zipa kuti tubotelwe azipa kuti tutabotelwi.
KUBOTELWA KWACHIINDI CHIFWIIFWI
Kuli zimwi zintu zipa kuti tubotelwe. Yeeya atala abantu bayandana bayanda kuchada. Naakuti yeeya chiindi bantu nibaba amwana naakuti nibajana chilongezyo mubukombi. Zintu zili boobo zipa kuti tubotelwe alubo nzilongezyo zizwa kuli Jehova. Nguwe wakatalisya lukwatano akupa kuti bantu kababa abana alubo wakabapa mulimu wakuchita mumbungano yachiKristu.—Matl. 2:18, 22; Int. 127:3; 1 Tim. 3:1.
Zimwi zintu zyeeta kubotelwa, nzyachiindi chifwiifwi. Zilawusisya kuti umwi mulukwatano ulakonzya kutasyomeka naakuti kufwa. (Ezk. 24:18; Hos. 3:1) Bamwi bana tababaswiilili pe bazyali babo kuswaanizya aLeza, chimwi chiindi ngabazoogwisigwa mumbungano. Bana baSamiyele bakali kukomba Jehova munzila iitali kabotu alubo nzyaakachita Davida zyakapa kuti kube mapenzi mumpuli yakwe. (1 Sam. 8:1-3; 2 Sam. 12:11) Zintu zili boobo zyeeta mapenzi akukataazikana. Tazipi kuti tubotelwe pe.
Munzila iikozyenie, zilongezyo muntu nzyali aazyo mumbungano, zilakonzya kumana akaambo kakuchiswa, kuba aamikuli myiingi mumpuli naakuti nikwaba kuchincha mumbunga. Bantu biingi bakaswaana kuchincha kuli boobo balazumina kuti balakuyeeya kukkutisikana akubotelwa nkubakali kujana kabachibeleka mulimu ooyo.
Tulakonzya kubona kuti zintu zipa kubotelwa nzyachiindi chifwiifwi. Zilachita na kuti tubotelwe nikuba kuti zyiimo zyachincha? Iiyi zilachita, nkaambo Samiyele, Davida abamwi, bakali kubotelwa nikuba chiindi nibakali mubuyumu-yumu.
KUBOTELWA KWACHIINDI CHOONSE
Jesu wakalizi kuti kubotelwa chambaanzi. Kachili kujulu, zintu zyoonse nizyakali kabotu wakali “kusekelela lyoonse kubusyu [bwaJehova].” (Tus. 8:30) Pesi naakali anyika wakaswaana buyumu-yumu busiyene-siyene. Nikuba boobo, Jesu wakali kubotelwa akaambo kakuchita kuyanda kwaWisi. (Joh. 4:34) Wakachita biyeni naakali wabaafwiifwi kujayigwa? Tubala kuti: ‘Akaambo kakubotelwa nkwaakabikkilidwe kunembo wakalisimya achisamu chakupenzezya.’ (Heb. 12:2, NW) Nkinkaako, kulayandikana kuti tulange-lange twaambo tubili Jesu ntwaakaamba kuti tupa kubotelwa kwachoonzyo.
Chimwi chiindi, basikwiiya bali 70 bakaboola kuli baJesu kabazwa kukukambawuka. Bakabotelwa nkaambo bakali bachita milimu mipati iiswaanizya kutanda madimoni. Pesi Jesu wakababuzya kuti: “Nokubaboobo mutabotelwi kuti badaimona bamumvwa, pele amubotelwe kuti mazina aanu alilembedwe kujulu.” (Lk. 10:1-9, 17, 20) Kuchita zintu zibotezya Jehova kuyandikana loko kwiinda kubotelwa akaambo kakujana chimwi chilongezyo. Leza taakali kuyoobaluba pe basikwiiya basyomeka alubo eechi chakali chintu cheeta kubotelwa kupati.
Chimwi chiindi Jesu wakali kwaambuula aankamu yabantu. Umwi mwanakazi muJuda wakabotelwa akaambo kakuyiisya kwaJesu, mpawo wakaamba kuti kweelede kuti banyina bamuyiisi ooyu balabotelwa. Pesi Jesu wakamululamika kwiinda mukumubuzya kuti: ‘Peepe, babotelwa mbaabo baswiilila jwi lyaLeza akuchita nzilyaamba!’ (Lk. 11:27, 28, NW) Kuba muzyali uuli aabana baswiilila kupa kubotelwa pesi kuba aabweenzuma bulikabotu aJehova akumuswiilila kupa kuti tujane kubotelwa kutamani.
Nisimpe, kuziba kuti Jehova ulatuyanda kupa kuti tujane kubotelwa kwamukati kamoyo. Nikuba kuti tuswaana masunko pesi taatukachizyi kuti tujane kubotelwa ooku. Kubbazu limwi, kuti twakkala katusyomekede chiindi nituli mumasunko, tunoobotelwa. (Rom. 5:3-5) Kuyungizya waawo, Jehova ubapa muuya uusalala bantu bamusyoma alubo kubotelwa muchelo wamuuya. (Gal. 5:22) Makani aaya apa kuti tumvwisisisye nzyaawamba majwi aali muli Intembauzyo 64:10, aati: “Mululami uyookondwa muli Jehova.”
Niinzi chigwasya John kuti akkale kabotelwa?
Majwi aaya ayendelana azyakaambwa aDiana aJohn baambwa kumatalikilo bakali kubotelwa nikuba chiindi nibakali muzyiimo ziyumu. Diana wakati: “Ndakajana mayubilo kuli Jehova mbuuli mwana mbachita kumuzyali wakwe.” Diana umvwa biyeni akaambo kakuchita zintu zibotezya Leza? Wakati: “Ndilimvwa kandilongezedwe nkaambo ndilakonzya kukambawuka chiindi achiindi alubo ndilabotelwa.” John wakazumanana kukambawuka kuzwa naakayimikila kubeleka mulimu wakweendeenda waamba zyakamugwasya. Wakati: “Kuzwa mu1998 nindakasaanguna kuyiisya kuChikolo chaMinisterial Training, ndakali kulipa chiindi chiingi chakuchita chiiyo changu andikke kwiinda chiindi.” Kaamba mbalimvwa amukayintu wakwe wakati: “Kuba aamaboneno aalikabotu atala akubelekela Jehova kufumbwa nkutwakali kukumbilwa muminyaka yayinda, kwakatugwasya kuti kutuubile kupona kweendelana akuchincha kwazyiimo. Tatulisoli muzintu nzitwakachita.”
Bamwi bakabona mbaali aachoonzyo majwi aali muli Intembauzyo 64:10. Muchikozyano, atulange-lange zyakachitika kuli imwi mpuli yakabeleka kuBbeteli kwaminyaka yiinda ku30 kuUnited States. Bakakumbilwa kuti bakabeleke kabali mapayona bayandikana. Bakaamba kuti: “Kukataazikana kulalichitikila akulikke kuti wasweekelwa chintu nchuyandisya,” alubo bakayungizya kuti: “Pesi tazyaambi kuti takumani pe.” Nibakasika, bakatalisya kuliswaanizya ambungano mumulimu wakukambawuka. Mpuli eeyi yakati: “Twakali kukomba katwaamba atala azimwi zintu. Kubona nkombyo zyesu mbuzyakali kusandulwa kwakatusungwaazya akupa kuti tubotelwe. Nitwakasika, bamwi mumbungano bakatalisya kupayona alubo twakalongezegwa kwiinda mukujana zyiiyo zyaBbayibbele zibili zichita kabotu mubukombi.”
‘KUKONDWA AKUSEKELELA LYOONSE’
Kwaamba choonzyo, chimwi chiindi kukkala katubotelwa kulatuyumina. Nikuba boobo, Jehova wakapa kuti kulembwe majwi aasungwaazya ngitujana muli Intembauzyo 64:10. Nikuba chiindi nitukataazikene, tulakonzya kuba aalusyomo lwakuti bantu ‘baluleme’ alubo bakkala kabasyomekede nikuba zyiimo zyabo nizichincha, ‘bayookondwa muli Jehova.’ Kuyungizya waawo, tulangilila kuzuzikizigwa kwachisyomezyo chaJehova chili atala ‘ajulu pya anyika mpya.’ Kuzwa waawo, kutamaninina koonse kuyoogwisigwa. Bakombi baLeza boonse ‘bayookondwa akusekelela lyoonse’ muzintu nzyayoochita anzyayoopa bantu.—Is. 65:17, 18.
Yeeya nzyaawamba makani aaya: bantu nibayoobotelwa kabali aamibili iimaninide akubuka kabali aamanguzu buzuba abuzuba. Nikuba kuti bantu bakali kukataazikakana mumizeezo chiindi pesi kukataazikana ooku tabachikakuyeeyi pe. Tuli aachoonzyo chakuti zintu “zyakusaanguna tazikooyooibalukwa limbi nikuba kuyeeyegwa.” Kuyoochitika chigambyo chakubusigwa kwabantu chiyoopa kuti bantu bakakkale aamwi azibbululu zyabo. Mamiliyoni aabantu bayoolimvwa mbuuli bazyali bamusimbi wakali aaminyaka iili 12, Jesu ngwaakabusya. Bbayibbele lyaamba kuti: ‘Bakabotelwa loko.’ (Mk. 5:42) Muchiindi eecho, bantu aanyika ‘bayoolulama’ chakumaninina alubo ‘bayookondwa muli Jehova.’
