Skip to content

Skip to table of contents

Kubotelwa—Mbube Buzwa Kuli Leza

Kubotelwa—Mbube Buzwa Kuli Leza

BANTU bayanda kubotelwa mubuumi. Pesi tuswaana zyiimo “zikataazya” nkaambo tupona kumazuba aakumamanino. (2 Tim. 3:1) Bamwi balakonzya kutabotelwa akaambo kakutalulama kuli munyika, kuchiswa-chiswa, kubula milimu, kufwidwa azimwi. Chimwi chiindi, babelesi baLeza balakonzya kutalika kutabotelwa. Kuti kutachibotelwi kujana wachita biyeni kuti ubotelwe?

Kuti tusandule mubuzyo ooyu, tweelede kuziba kuti kubotelwa kwachoonzyo niinzi anzibakachita bamwi kuti bakkale kababotelwa nikuba nibakaswaana buyumu-yumu. Alubo tuyooyiya nzitukonzya kuchita kuti tukkale katubotelwa ambutukonzya kuyungizya kubotelwa.

KUBOTELWA NIINZI?

Kubotelwa kwachoonzyo takwaambi kuseka-seka. Muchikozyano, kuti muntu wakolwa, ulakonzya kuseka-seka pesi kuti bwamana bukande bwamukolede, ngawatalika kuyeeya mapenzi ngalaawo alubo kuseka koonse ngakwamana. Eezi zitondeezya kuti muntu ooyu taalikubotelwa chachoonzyo pe.—Tus. 14:13.

Kubotelwa nkuba amoyo uukkalinkene. Alubo ninzila njitulimvwaayo nitwapegwa chimwi chintu naakuti nitulangilila chimwi chintu chibotu. Bube oobu bulakonzya kutondeezegwa muzyiimo zilikabotu naakuti muzyiimo zitali kabotu. (1 Tes. 1:6) Muntu ulakonzya kuswaana zyiimo zimukataazya pesi kataleki pe kubotelwa. Muchikozyano, baapostolo bakapenzegwa akaambo kakukambawuka atala aKristu. Pesi “bakazwa mulubeta balabotelwa kuti kwakategwa baleelede kunyansigwa nkaambo kezina lyakwe.” (Inc. 5:41) Zilaantanganana kuti teebakabotelwa akaambo kakuumwa. Pesi bakabotelwa akaambo kakusyomeka kuli Leza.

Bube oobu bwakubotelwa tatuzyalwi aabo pe alubo tabulichitikili pe abulikke. Nkamboonzi nikutalichitikili kuti tube aabo? Nkaambo kubotelwa kwachoonzyo muchelo wamuuya uusalala uuzwa kuli Leza. Muuya uusalala ulakonzya kutugwasya kuti tube ‘abuntu bupya’ buswaanizya kubotelwa. (Ef. 4:24; Gal. 5:22) Alubo kubotelwa kupa kuti tukonzye kuzunda mapenzi ngituswaana.

ZIKOZYANO NZITWEELEDE KUTOBELEZYA

Jehova wakakanzide kuti aanyika kube zintu zibotu, kutali zintu zibi nzitulikubona. Nikuba boobo, zintu zibi zichitika munyika tazimukachizyi kubotelwa Jehova. Bbayibbele lyaamba kuti: “Inguzu alukondo [kubotelwa], zyoonse zilajanwa nkwabede.” (1 Mak. 16:27) Alubo, zintu zibotu nzibachita bakombi bakwe zipa kuti Jehova ‘abotelwe mumoyo wakwe.’—Tus. 27:11.

Tulakonzya kutobelezya chikozyano chaJehova kwiinda mukutakataazikana zyiindilide kuti zintu zyaba munzila njitwatalangililide. Alubo, tatweelede kukkala katuuside pesi  tweelede kubikkila maanu kuzintu zibotu nzitulikujana lino anzitubambilidwe kunembo. *

MuBbayibbele, muli zikozyano zyabantu bakali kubotelwa nikuba kuti bakali kuswaana buyumu-yumu. Abrahamu wakalisimya nikuba kuti wakaswaana masunko akali kweetwa abamwi. (Matl. 12:10-20; 14:8-16; 16:4, 5; 20:1-18; 21:8, 9) Nikuba kuti wakali kuswaana buyumu-yumu, pesi wakali kubotelwa. Niinzi chakamugwasya kuchita oobo? Wakali abulangilizi bwakuyoopona munyika mpya yeendelezegwa aMesiya. (Matl. 22:15-18, NW; Heb. 11:10) Jesu wakati: “Uso Abrahamu wakabotelwa kubona buzuba bwangu.” (Joh. 8:56) Tulakonzya kutobelezya chikozyano chaAbrahamu kwiinda mukuyeeyesesya atala azilongezyo nzituyoojana.—Rom. 8:21.

Mwaapostolo Pawulu aSila, bakali kuzibikkila maanu zisyomezyo zyaJehova, mbuuli Abrahamu. Bakali alusyomo lusimide alubo bakali kubotelwa nikuba kuti bakali kuswaana buyumu-yumu. Muchikozyano, nibakawumwa akubikkwa muntolongo, “akati kamasiku bakali . . . kukomba akwiimbila Leza nyimbo.” (Inc. 16:23-25) Kuba abulangilizi kwakagwasya Pawulu aSila kuti babotelwe chiindi nibakali kupenzegwa akaambo kazina lyaKristu. Tulakonzya kutobelezya chikozyano chaPawulu aSila kwiinda mukubikkila maanu kuzilongezyo nzitujana akaambo kakubelekela Leza chakusyomeka.—Flp. 1:12-14.

Mazubaano bakwesu munyika yoonse balalisimya alubo balabotelwa nikuba kabaswaana buyumu-yumu. Muchikozyano, mu2013 kuPhilippines kwakawa mvula mpati yakali aguwo iitegwa Super Typhoon Haiyan, yakamwaya maanda aaBakamboni biinda ku1 000. Mukwesu George uukkala kuTacloban ulaakati kabantu bakamwayikilwa maanda wakati: “Nikuba kuti twakachitikilwa penzi lili boobu pesi tulikubotelwa. Tandikonzyi pe kupandulula mbutulikubotelwa.” Kuyeeyesesya atala azintu Jehova nzyaakatuchitila, kupa kuti tukkale katubotelwa nikuba katuli mubuyumu-yumu. Niinzi chimwi Jehova nchatupede chipa kuti tubotelwe?

TWAAMBO TUPA KUTI TUBOTELWE

Kaambo kapati kapa kuti tubotelwe nkakuti, tuli abweenzuma bulikabotu aLeza. Tulizi kuti Leza Mwaami waNyika yoonse. NguTaateesu nguLeza wesu, alubo Mweenzuma!—Int. 71:17, 18.

Tulamulumba Leza nkaambo wakatupa buumi azintu zipa kuti tubotelwe. (Muk. 3:12, 13) Kuba abweenzuma bulikabotu aJehova kupa kuti tuzibe makanze Leza ngalawo atala andiswe. (Kol. 1:9, 10) Eezi zipa kuti tube amakanze mubuumi. Pesi bantu biingi tabakwe makanze mubuumi. Kalikutondeezya kuti tusiyene biyeni abamwi bantu, Pawulu wakalemba kuti: “Liso tiilyazibona akutwi tiikwazimvwa, alimwi kunyina muntu wakaziyeeya zintu eezyo Leza nzyabambilide baabo bamuyanda. Nkaambo Leza waziyubunwida ndiswe zintu eezyi kwiinda mumuuya wakwe.” (1 Kor. 2:9, 10, NW) Kuziba nzyayanda Jehova amakanze aakwe kupa kuti tubotelwe.

Atulange-lange zimwi Jehova nzyaakatuchitila. Tulabotelwa nkaambo Jehova ulatulekelela kuti twabisya. (1 Joh. 2:12) Tuli abulangilizi bwakuyoopona munyika mpya akaambo kakuti Leza uli aluzyalo. (Rom. 12:12) Nikuba lino, Jehova utupede bakombima bali abube bulikabotu. (Int. 133:1) Bbayibbele litusyomezya kuti Jehova ulatukwabilila kuti tutanyonganisigwi aSaatani amadimoni aakwe. (Int. 91:11) Kuyeeyesesya atala azilongezyo eezi, kupa kuti tukkale katubotelwa.—Flp. 4:4.

 MBUTUKONZYA KUKKALA KATUBOTELWA

MuKristu ubotelwa, kujana wachita biyeni kuti akkale kabotelwa? Jesu wakati: “Ndamwaambila makani aaya, kuti kubotelwa kwangu kube kulindinywe, akwalo kuti kubotelwa kwanu kukazyulile.” (Joh. 15:11) Majwi aaya atondeezya kuti tulakonzya kukkala katubotelwa. Kukkala katubotelwa kulikozyenie akusosela mulilo. Kuti mulilo uzumanane kuyaka, weelede kusoselwa. Nkinkaako, kubikkila maanu kuzintu zyabukombi kupa kuti tukkale katubotelwa. Utalubi kuti muuya uusalala nguwo utugwasya kuti tubotelwe. Muuya uusalala, kukomba akuyeeyesesya atala anzitubala muBbayibbele, ziyoopa kuti tubotelwe.—Int. 1:1, 2, NW; Lk. 11:13.

Alubo kuchita zintu ziyandwa aJehova kupa kuti tubotelwe. (Int. 35:27, NW; 112:1, NW) Nkamboonzi nikuli boobo? Tweelede ‘kulemeka Leza akubamba milawu yakwe, nkaambo kuchita oobo ncheelelo chamuntu woonse.’ (Muk. 12:13) Eezi zitondeezya kuti twakalengelwa kuti tuchite zintu ziyandwa aLeza. Nkinkaako, kukomba Jehova kupa kuti tubotelwe. *

ZILONGEZYO ZYEETWA AKAAMBO KAKUBOTELWA

Kubotelwa kupa kuti tujane zilongezyo zyiingi. Muchikozyano, kukkala katubotelwa nikuba nituswaana buyumu-yumu, kupa kuti Taateesu wakujulu abotelwe. (Dt. 16:15, NW; 1 Tes. 5:16-18) Alubo, kubotelwa kuyoopa kuti tutabikkili maanu kubunoti pesi tubikkile maanu kuBwaami bwaLeza. (Mt. 13:44) Zilongezyo nzitujana akaambo kakubikkila maanu kuzintu zyabukombi, zipa kuti tukkutisikane, tukkale katubotelwa akuti tubuzye bamwi atala azilongezyo eezi.—Inc. 20:35; Flp. 1:3-5.

Umwi sikuyanduulisisya kuUniversity yakuNebraska iili kuUnited States wakalanga-langa buumi bwabantu alubo wakati: “Kubotelwa akukkutisikana kupa kuti ube abuumi bulikabotu.” Eezi zileendelana amajwi aali muBbayibbele aati: “Moyo uukondwa musamu mubotu.” (Tus. 17:22) Nkinkaako, kukkala katubotelwa kupa kuti tupone buumi bulikabotu.

Nikuba kuti tukkala munyika iizwide mapenzi, pesi tulakonzya kukkala katubotelwa kuti twakumbila muuya uusalala kuti utugwasye kwiinda mukukomba, kubala akuyeeyesesya atala anzitubala muBbayibbele. Alubo, kuyeeyesesya atala azilongezyo nzitwakajana, kutobelezya zikozyano zyabamwi akuchita zintu ziyandwa aLeza kupa kuti tukkale katubotelwa. Kuti twachita oobo, tunooli tulikuchita kweendelana azyaambwa mulugwalo lwaIntembauzyo 64:10, lwaamba kuti: “Baluleme basekelele Jehova akuyuba mulinguwe.”

^ par 10 Muliimwi magazini, tuyoolanga-langa bube bwakuba amoyo mulamfu muzyiiyo eezi zyaambuula atala ‘amichelo yamuuya.’

^ par 20 Kuti ujane zimwi zintu zikonzya kupa kuti ukkale kubotelwa, langa kabbokesi katii, “ Zimwi Zintu Zipa Kuti Ukkale Kubotelwa.”