Lukwatano lutalisya mpuli mpya. Nikuba kuti ucibayanda alimwi ucibalemeka bazyali bako, ooyo ngokwetenaawe nguwe waba muntu uuyandikana loko mubuumi bwako. Kunzubo zyako zimwi eezi zilakonzya kubayumina kuti bazimvwisisisye. Nikuba boobo, malayilile aazwa muBbaibbele alakonzya kukugwasya kuti ubaa maboneno aali kabotu, kuti ukonzye kukkala kulaa luumuno anzubo zyako mbuli mbumuli kubeleka canguzu kukuyaka muunzi wenu mupya.

NZILYAAMBA BBAIBBELE: “Lemya uso abanyoko.” (BaEfeso 6:2) Kakutakwe ndaba kuti wakomena biyeni, welede kunolemeka bazyali bako. Yeeya kuti ngokwetenaawe alakwe weelede kubaa ndaba abazyali bakwe. ‘Luyando talukwe bbivwe,’ nkinkaako utakatazikanaa bunyina mbwalaabo ooyo ngokwetenaawe abazyali bakwe.—1 BaKorinto 13:4; BaGalatiya 5:26.

NZYOKONZYA KUCITA:

• Utanowambuuli majwi aayasa, mbuli akuti “Inzubo zyako zindilangilaansi ciindi coonse” naa kuti “Baamako tabaziyandi pe nzindicita”

• Yezya kubona zintu munzila njazibonaayo ooyo ngokwetenaawe

NZILYAAMBA BBAIBBELE: “Mwaalumi uleelede kusiya wisi abanyina akukakatila kumwanakazi wakwe, babe nyama yomwe buyo.” (Matalikilo 2:24) Ciindi nomukwatana, bazyali bako balakonzya kulimvwaanga bacilaa mukuli wakukulanganya alimwi balakonzya kuyanda kunoojatikizigwa mulukwatano lwanu kwiinda mbubeelede kucita.

Zili kulinduwe ayooyo ngokwetenaawe kuti muzuminane kuti bazyali banu beelede kugolelaali mulukwatano lwanu alimwi mubabuzye caluyando. Amubazwidaa ntanganana pesi kamutaambuli majwi mabi. (Tusimpi 15:1) Kulicesya, kubomba moyo, akukkazika moyo ziyoomugwasya kusimya buzolwani mbomulaabo abazyali banu alimwi kuti mukkale ‘kamukkazikilana moyo cakuyandana.’—BaEfeso 4:2.

NZYOKONZYA KUCITA:

• Ikuti kokatazikana atalaa kuti nzubo zyako naa zyayooyo ngokwetenaawe ziliikujatikizigwa loko mubuumi bwenu, aambuzyanya ayooyo ngokwetenaawe muciindi zintu nozili kabotu

• Amuzuminane kuti nkani zili boobo muyoozicita biyeni