Skip to content

Skip to table of contents

 CIBEELA 6

Inzila Bana Njibacincaayo Lukwatano

Inzila Bana Njibacincaayo Lukwatano

“Bana ndukono luzwa kuli Jehova.”Intembauzyo 127:3

Kuzyalwa kwamwana kulakonzya kubotezya akuminya bantu bakwetene. Mbuli bazyali bapya, mulakonzya kugamba kuti ciindi cenu ciingi amanguzu eenu mwaabuzibelesezya kukulanganya mwaneenu. Kutoona kabotu mansiku akucinca kwanzila njomulimvwaayo kulakonzya kweeta buyumuyumu mulukwatano lwanu. Iwe ayooyo ngokwetenaawe mweelede kucinca zimwi zintu kuti mukonzye kulanganya mwaneenu akuti mukonzye kukwabilila lukwatano lwanu. Ino malayilile aazwa muBbaibbele alamugwasya biyeni kuti mulwanaa buyumuyumu oobu?

 1 AMUMVWISISYE NZILA MWANA NJABUCINCAAYO BUUMI BWENU

NZILYAAMBA BBAIBBELE: ‘Luyando lulakazika moyo akufwa luzyalo.’ Luyando “talulilangilili cintu, talufwambi kujata bukali.” (1 BaKorinto 13:4, 5) Mbuli mbutalisya kuba baama, ulalimvwa kuyanda kubikkila maanu kapati kumwanaako. Akambo kaako, mulumaako ulakonzya kulimvwa kalendeleledwe, nkinkaako utalubi kuti uciyanda kuti umubikkile maanu. Ulakonzya kumugwasya camoyo mulamfu acaluzyalo kuti alimvwe kayandikana alimwi kajatikizidwe mukulanganya mwaneenu.

“Nobalumi . . . amukale kabotu abakazi banu.” (1 Petro 3:7) Mvwisisya kuti mwanakazi wako uyoobelesya ciindi ciingi kumwaneenu. Mwanakazi wako wabaa milimu mipya yakucita alubo ulakonzya kukatazikana, kukatala, naa kuyuminwa. Cimwi ciindi, mwanakazi wako ulakonzya kukunyemena pesi yezya kubatama, nkaambo ooyo “uumuka kukalala mubotu kwiinda mulemu.” (Tusimpi 16:32) Tondezya bupampu, alimwi umugwasilizye aawo mpayanda kugwasigwa.Tusimpi 14:29.

NZYOKONZYA KUCITA:

  • Nomataata: Amugwasye banakazi banu kukulanganya mwana, nikuba mansiku. Amucesye ciindi ncomubelesya kucita zimwi zintu kuti mukonzye kujana ciindi ciingi cakubaa banakazi banu amwaneenu

  • Nomamaama: Ciindi balumi banu nobamugwasya kukulanganya mwana, amulutambule lugwasyo lwabo. Ikuti kabaliikucita umwi mulimu munzila iitali kabotu, mutabatukili pe, pesi amubatondezye mbukucitwa munzila yaluzyalo

 2 AMUSIMYE BUZOLWANI BWANU

NZILYAAMBA BBAIBBELE: “Babe nyama yomwe buyo.” (Matalikilo 2:24) Nikuba kuti kwazyalwa mwana mumpuli, utalubi kuti iwe ayooyo ngokwetenaawe mucili “nyama yomwe.” Cita kufumbwa nzyokonzya kuti buzolwani bwanu bukkale kabusimide.

Nibanakazi, amutondezye kulumba kulugwasyo ndomupegwa abaalumi benu. Majwi aako aakulumba alakonzya “kuponya.” (Tusimpi 12:18) Nibaalumi, amubuzye banakazi banu kuti mulabayanda akuti mulababikkila maanu. Amubalumbayizye banakazi benu kunzila njibalanganyaayo mpuli.Tusimpi 31:10, 28.

“Muntu teelede kuyandaula kuligwasya mwini buyo, umwi aumwi uleelede kuyandaula kugwasya mweenzinyina.” (1 BaKorinto 10:24) Ciindi coonse, cita zintu zimubotezya ooyo ngokwetenaawe. Mbuli bantu bakwetene, amubaa ciindi cakuzuwa, cakulumbayizyanya, alimwi cakuswiililana. Utaciti zintu ziyandwaa nduwe luzutu kumakani akoonana, pesi bikkila maanu kuzintu ziyandwaa yooyo ngokwetenaawe. IBbaibbele lyaamba kuti: “Mutawondonganyi, cita muzuminane kucita oobo.” (1 BaKorinto 7:3-5) Nkinkaako, amwaambule atalaa makani aaya kamuli babili cakusyomeka. Kukkazika moyo akumvwisisya kwenu kuyoosimya buzolwani bwenu.

NZYOKONZYA KUCITA:

  • Utalubi kubaa ciindi cakubaamwi ayooyo ngokwetenaawe kamuli babili

  • Cita zintu ziniini zipa kuti ooyo ngokwetenaawe alimvwe kayandwa, zili mbuuli kumulembela kagwalo naa kumupa cipo niciceya

 3 MBOMUKONZYA KUYIISYA MWANEENU

NZILYAAMBA BBAIBBELE: “Kuzwa kuciindi niwakacili mwana ulyeezi magwalo aasalala aakonzya kukusongwaazya mukufutulwa.” (2 Timoteo 3:15) Amucite mabambe akuti muyomuyiisya biyeni mwaneenu. Ulaamanguzu agambya loko akwiiya zintu nikuba kacili mwida. Kacili mwida, mwaneenu ulakonzya kumvwa jwi lyanu akumvwa mbomulimvwa. Ciindi mwaneenu nacili mutete, amumubalile. Nikuba kuti kataliikuzimvwisisya nzyomulikumubalila, eezi zilakonzya kumugwasya kuti abaa ciyandisyo cakubala ciindi naakomena.

Mutabonaanga mwaneenu ucili muniini loko kuti amumvwe kamuliikwaambula atalaa Leza. Weelede kumumvwa kamuliikukomba kuli Jehova. (Deuteronomo 11:19) Nikuba ciindi nomulisenyaamwi, amwaambule atalaa zintu zyakalengwaa Leza. (Intembauzyo 78:3, 4) Nayoobukomena mwaneenu, uyoobona mbomumuyanda Jehova alakwe uyooyiiya kuyanda Jehova.

NZYOKONZYA KUCITA:

  • Komba kuti ujane busongo bwakuyiisya mwanaako

  • Yindulula majwi azintu ziyandikana nzyoyanda kuti mwanaako azizibe ikuti atalisye kwiiya kacili munini