Sihevbudzo sa Jesu si di gu hlamadzisa, ganiolu ga vathu va matshiguni ya Jesu isoso basi kha sa nga ba si eneya. Tepo Jesu a nga bomba gu gira giwoniso va nga ba va gi vbweta avo va di diga gukhodwa gwaye. (Mat. 16:4) Milowo yari khiyo ginani? Muprofeti Isaya lovide esi maningano ni Mesiya: “Kha na gulumela mwendro gu dzi khusedza, ambari gu pwadza lito laye mitendrelani.” (Isa. 42:1, 2) Tepo Jesu a nga ba a gira thumo waye nya gu tshumayele kha nga ba a dzi khusedza, uye kha vbaha dzitempeli, uye kha ambala sombo nya lisima nya wukhongeyi nigu kha vbweta gu khuye vathu va thumisa malina nya lisima gasi gu mu rana. Ambari tepo a nga modwa khu pfhumu Herodhi, Jesu kha dzumeya gu gira gilewugiso gasi gu dzi yeyedza. (Luka 23:8-11) Lisine gu Jesu giride silewugiso nyo khaguri, ganiolu nya lisima gwaye gu diri gu tshumayela mahungu nya yadi. Uye embede vapizani vaye gu khuye: “Khiso nyi nga si tela.” — Marko 1:38. w21.05 4 ¶9-10

Ethu ha gu vbwetedzeya ava va dzi emisedego “gu hakha guvbanya nya gupindruge.” (Mith. 13:48) Gasi gu phasa vathu vovo gu khala vapizane hi yede gu va phasa 1) gu pwisisa 2) gukhodwa ni 3) gu thumisa esi va hevbulago umo nya Bhibhiliya. (Kol. 2:6, 7; 1 Tes. 2:13) Vatshavbo libandlani va nga phasa sihevbuli nya Bhibhiliya khu gu si yeyedza lihaladzo va bwe va si gira si dzipwa gaya tepo si tago mitshanganoni. (Joh. 13:35) Oyu a gimbidzisago gihevbulo, adzina si nga lomba gu a dzigaradza ni gu dzega tepo nya yingi gasi gu phasa gihevbuli gu vbindrugedza mavbanyelo ni esi gi nga ba gi si khodwa gale. (2 Kor. 10:4, 5) Si nga dzega migima nya yingi gasi gu phasa muthu gu vbindrugedza silo sesi womini waye a bwe a ninganedwa khu gu bhabhatiswa. Ganiolu, guvbindrugedza silo sesi si ngu phasa ngudzu. w21.07 3 ¶6

Ina hi ngu tiyisega gu khethu, kha nga Dzifakazi dza Jehovha, esi hi hevbudzago lisine ni gu khethu ndziya hi khozeyago khiyo Jehovha khiyo basi yi mu tsakisago? Mupostoli Pawulo a di gu tiyisega gu khuye esi a nga ba a si khodwa lisine. (1 Tes. 1:5) Uye a di gu khodwa ga mahungu a nga ba a hevbula na siri basi kholu ma nga ba ma mu tsakisa, ganiolu uye a di gu gevisisa gwadi Lito la Nungungulu. Uye a di gu tiyisega gu khuye “Milowo yatshavbo nya Guage yi lovidwe khu tshivba ya Nungungulu.” (2 Thim. 3:16) Ginani egi Pawulo a gi hevbudego avba nya wugevisisi a nga ba a wu gira? Umo nya Milowo, Pawulo tugude silo si nga ba si yeyedza gu khiso khu lisine Jesu a diri Mesiya a tumbisidwego, nigu tugude gu khuye vathangeyi nya wukhongeyi nya Vajudha va di gu veta khu lisabi silo sesi. Avo va di gu ganeya gu khavo va gu hevbudza vathu lisine maningano khu Nungungulu, ganiolu va di gu gira silo si nyenywago khu Nungungulu. (Tit. 1:16) Ganiolu, Pawulo a di si fani ni vathangeyi vava nya wukhongeyi. Uye a di si hathi esi a si vbwetago gu si khodwa umo nya Lito la Nungungulu ni esi a si vbwetigo gu si khodwa. Uye a di dzi emisede gu hevbudza nigu thumisa watshavbo wusingalagadzi wa “Nungungulu.” — Mith. 20:27. w21.10 18 ¶1-2

Ethu ho yala ni gu thedzeya mati, ganiolu hi yede guti gu khethu Jehovha khuye a gu na ni gipandre nya gikhongolo  avba nya thumo nyo tshumayele. (1 Kor. 3:6, 7) Vathu vatshavbo va na ni lisima mahoni ga Jehovha. Ni gu uye a ngu hi ninga lithomo nyo thume gomogo ni gyanana gyaye, gasi hi hengeledza vathu nya mafumbo yatshavbo na ma si vbohi mahegiso nya litigo leli. (Agewu 2:7) Thumo nyo tshumayele wo fana ni thumo nya va vbulugisi. Ethu ha gu fana ni tsawa nya vathu wu rumidwego gu ya vbulugisa vathu va gu romo umo nya ngalava yi dzamago. Adzina vadugwana basi va na si kodzago gu vbulugisa muthu nyo khaguri, ganiolu vatshavbo va giride thumo nya lisima. Isoso si ngu fana ni thumo nyo tshumayele. Kha hi dziti gu khethu khu mani a na si kodzago gu vbulugisa muthu nyo khaguri ga litigo leli la Sathane. Ganiolu, hi ngu dziti gu khethu Jehovha a nga thumisa ni wevbini gwathu. Andreas a vbanyago Bolívia wari khuye: “Ni wevbini a hevbulago lisine a hegisa khu gu bhabhatiswa mihandro nya thumo nya tsawa.” Anethu hi yede gu wona thumo nya gu tshumayele khu ndziya yayimweyo. Ha gu gira isoso, Jehovha a na hi kategisa nigu thumo wathu nyo tshumayele wu na hi reseya litsako. w21.05 19 ¶19-20

Musoti o vbweta gu mola mwendro gu songa girengo. Uye a nga thumisa milaphwi nyo hambanehambane kha nga edzi yi ganedego khidzo pari nyo vivbedwe khu monyo ya Joba. (Joba 18:8-10) Ginani egi musoti a girago gasi gu ndrindredzeya girengo naphwini waye? Uye o zama gu gi khedziseya gwadi, a wona omu gi hongolago, ati esi gi si golago, a bwe a wona edzi a nga girago khidzo gasi gu gi mana na gi pfhade. Sathane a ngu fana ni musoti yoyu. Uye a gu hi khedziseya gwadi, a wona omu hi hongolago, a bwe ati esi hi si golago. Uye a gu hatha naphwi na gu tumba gu khuye a na hi mola na hi pfhade. Bhibhiliya ya gu hi tumbisa gu khiyo ambari ha gu modwa khu moyo nya milaphwi ya Sathane hi nga si kodza gu vbuluga. Gu diga isoso, iyo yi ngu hi hevbudza edzi hi nga potsago khidzo milaphwi ya Sathane. Gu na ni milaphwi mivili eyi Sathane a yi thumisago ngudzu, gudzikhusedza ni gu mba eneledwa khesi u gu naso. Sathane na ni myaga nya yingi na gu thumisa milaphwi yeyi ni gu a ngu dugeleya. Uye o fana ni musoti nya sinyoni oyu a ndrindredzeyago sinyoni omu nya naphwi waye mwendro omu nya redhi. (Ndzi. 91:3) Ganiolu, ethu kha hi vbweti gu modwa khu Sathane. Khu ginani? Kholu Jehovha hi yeyedzide milaphwi eyi Sathane a yi thumisago.— 2 Kor. 2:11. w21.06 14 ¶1-2

Vandriyathu va dandrigedo khu tanga thomba nya lisima ngudzu. Lito la Nungungulu la gu fananisa ndzudzu wawe nya dzinvi ni gihugo nya wudhumo. (Mav. 20:29) Ganiolu, si ngu vbevbuga gu mba yi wona thomba yeyi. Tepo vaphya va pwisisago gu khavo vandriyathu va dandridego khu tanga va na ni lisima, avo va ngu wuyedwa khu silo nya lisima ngudzu gu vbindra dzithomba nya mafu yaya. Vandriyathu nyo tumbege va dandridego khu tanga va na ni lisima mahoni ga Jehovha. Uye a ngu wona esi si gu romo myonyoni ya vandriyathu vava. A ngu dziti gu khuye vathu nya vadi, nigu a ngu tsaka khu makhalelo yawe nya yadi. Jehovha a ngu tsaka ngudzu tepo vandriyathu va dandrigedo khu tanga va bhuleyago vaphya matshango va ma manidego ndrani nya womi wawe. (Joba 12:12; Mav. 1:1-4) Jehovha gambe a ngu ninga lisima gu timiseya gwawe. (Mal. 3:16) Avo va tshanganide ni sigaradzo womini gwawe, ganiolu va simamide gu tiyisa gukhodwa gwawe ga Jehovha. Gutumba va gu nago khu wumindru, gu tiyide ngudzu olu gu vbindra tepo va nga hevbula lisine. Nigu Jehovha a ngu va haladza kholu ambari olu va ‘gumbidego’ avo va ngo simama gu huweleya lina laye. — Ndzi. 92:12-15. w21.09 2-3 ¶2-3

Gwadi gu tepo yatshavbo hi gevisisa gwadi esi si hi kutsago gu gira silo nyo khaguri. Hi nga dzi wudzisa khethu: ‘Nyo dzipwa gwadi basi tepo nyi pimisago gu kheni nyi tshukwana gu vbindra vambe? Ina nyo dzigaradza libandlani khu gu vbweta gu wonwa na nyiri wa tshukwana wakona gu vbindra vambe? Mwendro nyo gira satshavbo nyi si kodzago khu gu vbweta gu tsakisa Jehovha?’ Bhibhiliya ya gu hi hevbudza gu khiyo kha hi yeli gu dzi fananisa ni vambe. Khu ginani? Kholu ha gu pimisa gu khethu hi tshukwana gu vbindra vandriyathu, hi na khala vathu nyo dzi khusedze. Ganiolu, ha gu dzi woneya ngudzu vbavbatshi ga vandriyathu, hi pimisa khethu avo i tshukwana gu hi vbindra, hi na vbeya tshivba. (Rom. 12:3) Dundruga gu khuwe Jehovha a hi ranide hengeledzanoni yaye, khandri khu kotani nyo mbure, gu ganeya gwadi mwendro gu tidwa ngudzu, ganiolu, khu kotani nya olu hi mu haladzago hi bwe hi engisa gyanana gyaye. — Joh. 6:44; 1 Kor. 1:26-31. w21.07 14-15 ¶3-4

Gasi hi si kodza gu gira isoso, gu vbwetega hi gombeya, hi leri Bhibhiliya ni gu dundrugeya khesi hi lerigo. Khu kharato, simama gu gira silo sesi nigu lomba Jehovha gasi a gu ninga tshivba. Liphuvbo laye nya guage li na gu phasa gu pala ni gwevbini guwegeleya nya gu dzi fananise ni vambe. Jehovha a na gu phasa gu tugula tepo u pheyago gu khala muthu nya dzi khusedze ni lidiwo, ni gu uye a na gu phasa gu vbindrugedza khu guvbiredza. (2 Dzik. 6:29, 30) Jehovha a ngu wuti monyo wathu. Uye a ngu dziti gu khuye ha gu dwana ni mikutsedzelo nyo vivbe nya litigo leli ni gu mba vbeleya gwathu. Tepo Jehovha a wonago gudzigaradza gwathu gasi gu pala mikutsedzelo yoyo nyo vivbe, lihaladzo laye khu ethu la gu engedzeya. Gasi gu yeyedza edzi a dzipwago khidzo khethu, Jehovha thumiside giyeyedzo nya lihaladzo eli mamayi a li pwago khu gyanana gyaye. (Isa. 49:15) Si ngu tsakisa ngudzu guti gu khethu Jehovha a ngu hi haladza ngudzu tepo a hi wonago na hi dzi garadza gasi gu mu thumeya khu monyo wathu watshavbo. w21.07 24-25 ¶17-19

Ha gu thuma khu sighingi ga yatshavbo mithumo hi ningwago hengeledzanoni ya Jehovha, hi na mana gutsaka nya gu khongolo. Gira thumo nyo tshumayele khu “tshivba” yago yatshavbo u bwe u patega ga mithumo yatshavbo libandlani. (Mith. 18:5; Hebh. 10:24, 25) Gimbiya mitshanganoni na wu dongide gwadi, gasi uya ningeya mihlamulo yi tiyisago. Wona sipandre u ningwago avba nya mitshangano ya vbakari nya semana kha nga gilo nya lisima. Madhota ma gu gu lomba gu u gira thumo nyo khaguri libandlani, u nga hweyi gu wu gira nigu khala muthu nya gu tumbege. U nga pimisi gu khuwe thumo u ningidwego, wu mwalo lisima ni gu u mwalo gighelo nyo vbedze tepo yago khu gu wu gira. Londrola yatshavbo mathomo gasi gu tshukwadzisa makodzelo yago. (Mav. 22:29) Wa gu dzi garadzeya gu thumeya Jehovha, u na khala pari yaye nya yikhongolo nigu u na tsaka ngudzu. (Gal. 6:4) Si na gu vbevbugeya gu tsaka ni ava va nga hakha malungelo u nga ba u ma vbweta. — Gal. 5:26. w21.08 22-23 ¶11

Hi yede gu potsa gu dzikhusedza nigu dzumeya gu hevbudzwa khu Jehovha. Gufana ni madwali ma nga girago monyo nya muthu wu si thumi gwadi, gudzikhusedza gu nga gira si hi garadzeya gu engisa sileletelo sa Jehovha. Khu kotani nya gu dzikhusedze, Vafarisi va bombide gu khodwa gu khavo Jesu a di gu thangedwa khu liphuvbo la Nungungulu nigu a diri Gyanana gya Nungungulu. (Joh. 12:37-40) Khu kotani nya isoso, Vafarisi va luzide lithomo nya gu mane womi nya gupindruge. (Mat. 23:13, 33) Khu kharato, si na ni lisima gu diga Bhibhiliya ni liphuvbo nya guage la Jehovha li vbindrugedza mavbanyelo yathu, mapimiselo yathu li bwe li hi phasa gu hunga makungo nya yadi. Jakobe a di gu dzi nogisa, khu kharato dzumede gu hevbudzwa khu Jehovha, nigu gudzinogisa gu mu phaside gu khala muhevbudzi nya wadi. w22.01 10 ¶7

Ha gu ‘simama gu gombeya,’ hi nga tiyisega gu khethu Papayi wathu wa ndzadzini a ngu hipwa. (Kol. 4:2) Ambari ya gu gira khatshi ya gu hweya gu hlamudwa, Jehovha a gu tumbisa gu hlamula milombelo yathu ‘khu tepo yakona.’ (Hebh. 4:16) Khu kharato, kha hi yeli gu sola Jehovha a gu mba hlamula milombelo yathu khu tepo hi nga ba hi yi vireya. Khu giyeyedzo, gu ngu vbindra myaga nya yingi nya vangi na va gu gombeleya gu khavo Mufumo wa Nungungulu wu vbedza silo sesi nya guvivbe. Jesu ganede gu khuye hi yede gu gombeya khu Mufumo wa Nungungulu. (Mat. 6:10) Ganiolu, ha gu diga gu khodwa ga Nungungulu khu gu khethu gufuviswa nya silo sesi nya guvivbe kha ga vboha ga tepo hi nga ba hi yi vireya, si na yeyedza gu khiso hi sipumbu. (Habh. 2:3; Mat. 24:44) Ha gu vireya Jehovha hi bwe hi gombeya gwaye na hi tumba gu khethu uye a na hlamula milombelo yathu, si na yeyedza wugengeyi. Mahegiso nya silo sesi nyo vivbe ma na vboha khu tepo yi vegisidwego kholu Jehovha hathide litshigu ni ora “gasi silo sesi si girega.” Litshigu leli, gu na ba guri litshigu nya ladi ga yatshavbo. — Mat. 24:36; 2 Ped. 3:15. w21.08 10 ¶10-11

Vandriyathu va dandridego khu tanga va dzi nogisago va ngu dziti gu khavo tepo va engedzeyago gu gumba, adzina kha va na nga si kodza gu gira nya singi nga gale. Khu giyeyedzo, vawoneleyi nya sipandre tepo va enedzago 70 myaga vo ningwa yimbe mithumo. Ganiolu, isoso si nga va garadzeya kholu avo va ngu tsakiswa ngudzu khu gu phasa vandriyawe. Ambari ulolo, avo va ngu pwisisa gu khavo thumo wowu wu yede gu girwa khu vaphya. Vandriyathu vava va gu yeyedza makhalelo nya nga ya Valevhi dziteponi dza va na Israyeli. Tepo Valevhi va nga ba va enedza 50 myaga avo va di gu ema gu thuma umo nya tabernakeli. Gutsaka ga Valevhi vava va dandridego khu tanga gu di si dzi seketeyi basi avba nya thumo va nga ba va wu gira. Ganiolu, avo va di gu dzi garadzeya gu gira mithumo va nga ba va yi kodza ni gu gira satshavbo va nga ba va si kodza gasi gu phasa vaphya. (Mite. 8:25, 26) Muhuno vawoneleyi nya sipandre va gu enedza 70 myaga va gu ema gu gira thumo wawe nya gu endreye mabandla, ganiolu avo va ngo simama gu phasa ni gu tiyisa libandla lavo. w21.09 8-9 ¶3-4

Jesu ganede khu matimo nya gumbure ngudzu ma gomogo umo ga Luka 15:11-32. Avba nya matimo yaya, gyanana gi di diga gu engisa papayi wagyo gi duga khu ndrangani gi bwe gi dzega lipfhumba “gi pepetsega ni mayigo.” Iyoyo gi diya vbanya womi nya mba wadi, ganiolu tepo gi nga tshangana ni sigaradzo gi di pheya gu dundrugeya gwadi khesi gi nga ba gi giride. Igyo gi wonide gu khigyo womi wagyo wu di khadzisegide gwadi tepo gi nga ba gi romo ga papayi wagyo. Kha nga Jesu a ganedego, igyo gi di “wuyisa mapimo.” Igyo gi di hunga gu bweleya gaya giya lomba divalelo ga papayi wagyo. Khyadi ngudzu olu gyanana gile gi wonidego gu khigyo esi gi hathidego gu gira si diri silo nya mba sadi, ganiolu isoso kha sa nga ba si enede. Igyo gi di yede gu gira gilogyo. Gyanana gile gi nga ba gi dzumede gi yeyedzide gu khigyo gi di dzi layide khu lisine. Gipimaniso gegi nya gyanana gi dzumedego khandri matimo nyo mbure basi. Matimo yaya ma nga hevbudza silo nya lisima ngudzu madhota libandlani gasi gu wona gu khayo ina ndriyathu a dzi layide mwendro ne. w21.10 5-6 ¶14-15

Ginani egi nya gu gima kha gi na nga tsekatsekiswa mwendro gu fuviswa? Mupostoli Pawulo a lovide khuye: “Hongoleni hi bonge, kholu, hi hakhide Mufumo wa ndzadzini, owu wu si kodzigo gu kutsungwa. Hongoleni hi khozela Nungungulu khu magirelo nya gu mu tsakise ni githawo.” (Hebh. 12:28) Hwane nya gu ba gu tsekatsekiswa gogu nyo hegise na gu vbede, mufumo wa Nungungulu khuwo basi wu na simamago kala gupindruga. (Ndzi. 110:5, 6; Dhan. 2:44) Eyi khiyo tepo nya gu vathu va dzi hatheya. Va gu hatha gu simama gu seketeya litigo leli va na fuviswa, ganiolu va gu hatha gu thumeya Jehovha va bwe va vbindrugedza mavbanyelo yavo, avo va na vbanya kala gupindruga. (Hebh. 12:25) Khu thumo nya gu tshumayele, hi nga si kodza gu phasa vathu gu hatha silo si na va phasago. Nigu tepo yatshavbo hi yede gu dundruga malito ya pfhumu yathu Jesu a nga khuye: “Mahungu yaya nya yadi nya Mufumo ma na tshumayedwa mafuni gwatshavbo, gasi ma khala wufakazi ga mayigo yatshavbo, khavbo gu na tago guhegisa.” — Mat. 24:14. w21.09 19 ¶19-20

Madhota, enu mu na ni thumo nyo hathege, nyo tiyise ava valongo vawe va digidego gu thumeya Jehovha. (1 Tes. 5:14) Gasi gu va tiyisa, bhulani navo na yi si pheyi mitshangano ni hwane nya mitshangano. Wuseyani vandriyathu vava mu bwe mu gombeya navo. Gimbiyani navo thumoni nyo tshumayele, mwendro gu va khonvhidhari gasi gu ta patega avbo nya wukhozeyi wanu nya ndranga. Madhota ma yede gu khathaleya ava va garadzegago, ma bwe ma yeyedza lihaladzo ni gupweya wusiwana. (1 Tes. 2:7, 8) Jehovha ‘kha dzini ni moyo wanu a mbemba, aholu a gu vbweta gu khuye mu vbindrugedze’ (2 Ped. 3:9) Ambari muthu a gu gira gighoho nya gikhongolo, womi waye wu ngari ni lisima ga Nungungulu. Dundruga gu khuwe Jehovha livbide tengo nya wukhongolo ngudzu a gu womi wa Gyanana gyaye nya gu gi gole gasi hi divaledwa sighoho sathu. Khu lihaladzo, Jehovha a gu zama gu phasa ava va mu digedego gasi va bweleya gwaye. Uye a gu vireya gu khuye va hakha giphaso gyogyo kha nga hi si wonago avbo nya gipimaniso gya Jesu maningano ni gyanana gi dzimedego. — Luka 15:11-32. w21.09 30-31 ¶17-19

Adzina kha wu si kodzi gu tshumayela mahungu nya yadi ni gu hevbudza nga gale khu kotani nya madwali mwendro kholu u gu mwalo tshivba. Ambari ulolo, u nga tsaka khu esi u si kodzago gu gira. Wona giyeyedzo gya Pfhumu Dhavhidhe. Uye ni vama vaye va di yede gu dwana ni Vaamaleki, ava va dzegidego dzindranga ni dzithomba dzawe. Ganiolu, 200 vama va di garade ngudzu khu gu dwana, khu kharato va di tshala ni mirwalo. Dhavhidhe ni vama vaye va pade nyimbituno va bwe va dzega silo nya lisima si nga ba si lumba valala vawe. Khu kharato, Dhavhidhe a di ruma gu khuye dzithomba dzile dzi kabaniswa khu pimo moyo ga vale va nga ba va hongode nyimbituno ni vale va nga ba va tshade ni mirwalo. (1 Sam. 30:21-25) Khiso sasimweso si giregago avba nya thumo nyo gire vapizane. Gutsaka hi gupwago khu gu gira thumo nyo tshumayele gu yedwe gu pwidwa khu vatshavbo va dzi garadzeyago gu gira thumo wowu. Jehovha ngu wona gu dzi garadza gwathu ni lihaladzo hi gu nalo khuye ni gu uye a ngu hi tshatshazeya khu isoso. Ni gu gambe a ngu hi hevbudza gu tsaka khu esi hi si kodzago gu gira thumoni nyo tshumayele. (Joh. 14:12) Hi nga tiyisega gu khethu Nungungulu a na tsaka khu thumo wathu ha gu mba niga gu timiseya! w21.10 28 ¶16-17

Tepo hi gumbago, adzina hi nga thava hi pimisa gu khethu Jehovha kha na nga hi wona gambe nga vathu nya lisima nga gale. Lisine gu adzina olu hi mwalo gambe tshivba nya ga iyo hi nga ba hiri nayo gale, ganiolu hi nga thumisa guti ni matshango hi gu nawo gasi gu phasa vaphya gu gira gwadi mithumo yawe hengeledzanoni ya Jehovha va bwe va dzumeya malungelo nya maphya. Vandriyathu va dandridego khu tanga va yede gu dzi nogisa gasi gu phasa vaphya. Muthu a dzi nogisago khu wule a wonago vambe na vari ni lisima gu vbindra uye. (Filp. 2:3, 4) Vandriyathu va dandridego khu tanga va yeyedzago likhalelo leli, va ngu pwisisa gu khavo gilo nyo khaguri gi nga girwa khu dzindziya nyo hambanehambane nigu dzindziya dzodzo na dzi gu seketedwa umo nya Bhibhiliya. Khu kharato, avo kha va khavireyi gu khavo vatshavbo va gira mithumo nga edzi avo va nga ba va gira khidzo. (Muh. 7:10) Ambari olu va gu na ni matshango nya mangi gasi gu bhuleya vaphya, vandriyathu va dandridego khu tanga va dzi nogisago va ngu dziti gu khavo “makhalelo nya mafu yaya ma ngu vbindra.” Khu kharato, adzina si nga lomba gu va hevbula gu dzi pwananisa ni giemo nya giphya. — 1 Kor. 7:31. w21.09 8 ¶1, 3

Jehovha gima kha lombi vakhozeyi vaye gu gira silo nya mba handzega. Uye agide, gasi gu dundrugisa va na Israyeli khu mahungu yaya gu diri ni libhareti mwendro lâmina nya Ouro avba nya gihugo gya Mupristi nya khongolo. Avba nya lâmina yeyi gu di lovidwe gu pwani “guaga ga gu lumba Jehovha.” (Ekiso. 28:36-38, NM) Malito ma nga ba ma lovidwe ma di hadzi gu gira ni wevbini a tiyisega gu khuye Jehovha a agide khu lisine. Ganiolu, ahati Muisrayeli a gu mba si kodza gu wona libhareti khu kotani nya olu a gu mba vboha vbafuvbi ga mupristi nya khongolo ke? Ina a di hadzi gu dziti gu khuye Jehovha agide? Ina. Vatshavbo Vaisrayeli va di pwide mahungu yaya tepo nayo wu nga lerwi ga vama, vanyamayi ni sanana. (Dhet. 31:9-12) Nari khatshi anuwe u diri vbale, na wu pwide malito yaya: “Eni kheni Pfhumu Nungungulu wanu, [nigu] . . . agani kholu eni nyi agide.” “Agani mahoni gwangu, kholu Eni Pfhumu Nungungulu nyi agide.”— Levhi 11:44, 45; 20:7, 26. w21.12 3 ¶6-7

Vambe adzina va nga garadzega khedzi va nga manago khidzo esi si va keneleyago. Avo adzina va gu vbanya ga litigo li tadego khu wusiwana si garadzago gu mana thumo. Adzina si nga va garadzeya gu mana thumo gasi gu khataleya ndranga yawe, mwendro oyu a nga ba a khataleya ndranga adzina fude. Khu kharato, ndranga kha yi si kodzi gu mana dzitsapawu gasi gu renga esi si vbwetegago. Hi na wuyedwa ngudzu ha gu tumba Jehovha ha gu ba hi emisana ni sigaradzo. Dundruga gu khuwe Jehovha, a gu tumbisa gu khuye a na hi khataleya khu nyamani ha gu thangisa silo sa liphuvboni. (Mat. 6:32, 33) Uye tepo yatshavbo a ngu tadzisa gitumbiso gegi. (Dhet. 8:4, 15, 16; Ndzi. 37:25) Abari gu Jehovha a ngu khataleya sinyoni ni sifilori, khu lisine kha hi yeli gu garadzega khu silo nyo hodze mwendro nyo ambale! (Mat. 6:26-30; Filp. 4:6, 7) Kha nga olu lihaladzo li kutsago vavelegi gu ninga sanana sawe esi si si vbwetago, lihaladzo la gu kutsa Papayi wathu wa ndzadzini gu khataleya vathu khu nyamani. w21.12 17 ¶5; 18 ¶8

Ina u di nga tshuka u pharwa khu ndziya nya mba yadi khu muthu nyo khaguri mwendro kamo khu ndriyathu libandlani? Wona giyeyedzo gya Josefa a nga pharwa khu ndziya nya mba yadi khu vandriyaye. Uye a di simama na pharegide thumoni wa Jehovha nigu Jehovha a mu tshatshazede khu gu timiseya gwaye. Khu gu gimbiya nya tepo, Josefa a di divaleya ava va nga ba va mu girede silo nyo vivbe a bwe a wona edzi Jehovha a nga ba a mu kategisa khidzo. (Gen. 45:5) Gu fana ni Josefa, ha gu vega sigaradzo sathu mandzani ga Jehovha hi bwe vireya gu khethu a si lulamisa khu tepo yakona, hi na dzipwa na hi tiyide. (Ndzi. 7:17; 73:28) Wa gu ba u pharwa khu ndziya nya mba yadi mwendro gu tshangana ni simbe sigaradzo, tiyisega gu khuwe Jehovha womo “vbafuvbi ga vale myonyo yawe yi vbisegago.” (Ndzi. 34:18) Uye a ngu tsaka ngudzu kholu u laphisago monyo ni olu u vegago sigaradzo sago gwaye. (Ndzi. 55:22) Uye khuye mulamuli nya mafu yatshavbo nigu a ngu wona satshavbo si giregago mafuni. (1 Ped. 3:12) Khu kharato, wa gu tshangana ni sigaradzo nya sikhongolo u tandregago gu si lulamisa, u yede gu vireya Jehovha kala a gira gilogyo. w21.08 11 ¶14; 12-13 ¶16

Ha gu thumisa womi wathu gasi gu gira silo si tsakisago Jehovha si na yeyedza wugengeyi. Hi yede gu thangisa esi si gu na ni lisima. Dzimbe dzitepo, gasi gu thumisa tepo yathu khu ndziya nya yadi, adzina si na lomba gu hi hatha gilo gimwego avba nya silo sivili adzina si nga mba hosega. Khu giyeyedzo, nga wona esi si dugeledego tepo Jesu a nga wuseya Mariya ni Marta. Marta a di gu tsakide ngudzu khu gu hakha Jesu ndrangani gwaye nigu a di vbweta gu dongiseya gwadi guhodza nyo tshambe. Ganiolu, Mariya a di londrola lithomo lile khu gu khala ni Jesu a engiseya esi a nga ba a ganeya. Esi Marta a nga ba a gira kha sa nga ba si vivbide, ganiolu Jesu ganede gu khuye “Mariya hathide gipandre nya gyadi.” (Luka 10:38-42) Khu gu gimbiya nya tepo adzina Mariya divaledwe khu gu hodza gu nga phudwa litshigu lile, ganiolu hi nga tiyisega gu khethu uye gima kha divala esi a si hevbudego ga Jesu. Kha nga Mariya a vbedzidego tepo nyo khaguri ni Jesu, anethu hi nga vbedza tepo nyo khaguri ni Jehovha. w22.01 27 ¶5-6

Ga giemo gile, Akabhi a dzi nogiside mbeli ga Jehovha, ganiolu esi si giregidego khu gu landreya si yeyedzide gu khiso Akabhi kha nga ba a dzi layide khu lisine. Uye kha zama ni gu dusa wukhozeli wa Bhahali khavba nya mufumo waye nigu uye kha kutsa vambe gu khozeya Jehovha. Hwane nya gu ba Akabhi a fude, Jehovha yeyedzide idzo a nga ba a mu wona khidzo mwama wule. Agewu muprofeti wa Nungungulu a di khuye uye a di “vivbedwe khu monyo.” (2 Dzik. 19:1, 2) Nga dundrugeya, nari khatsi Akabhi a di dzi layide khu lisine, muprofeti Agewu na sa ganeya khuye uye a diri mwama nya gu vivbedwe khu monyo a nga ba a nyenya Jehovha. Somo guagani gu khiso, ambari olu Akabhi a nga ba a gira gu khatsi a di kuhidwe khu malito yaya, uye kha dzi laya khu lisine. Ginani hi nga gi hevbulago khu giyeyedzo gya Akabhi? Tepo Eliya a nga ganeya ga Akabhi gu khuye ndranga yaye yi di hadzi gu tsayiswa, uye a dzi nogiside. Isoso si diri silo nya sadi. Esi Akabhi a giridego khu gu landreya si di gu yeyedza gu khiso uye kha nga ba a dzi layide. Gudzilaya nya lisine kha si thuli basi gu ganeya gu khethu nyi ngu dzi laya khesi hi giridego. w21.10 3-4 ¶5, 7-8

Isaya a diri muprofeti nigu adzina mwangadzi waye nuye a di gu profeta kholu a gu ranwa gu pwane “muprofeti nya nyamayi.” (Isa. 8:1-4) Kha nga patwa, Isaya ni mwangadzi waye va thangiside wukhozeyi wa Jehovha womini wawe watshavbo. Muhuno, vatshavbo va tshadhidego anavo va nga pimedzeya giyeyedzo gya Isaya ni mwangadzi waye khu gu va gira satshavbo va si kodzago thumoni wa Jehovha. Avo va nga tiyisa gutumba gwawe ga Jehovha khu gu hevbula siprofeto nya Bhibhiliya vatshavbo va bwe va wona edzi si tadzisegago khidzo. (Tit. 1:2) Gwadi gu va dundrugeya khedzi va nga pategago khidzo avba nya gu tadzisege nya siprofeto nyo khaguri nya Bhibhiliya. Avo va nga patega avba nya gu tadzisege nya giprofeto gya Jesu maningano ni gu tshumayela mahungu nya yadi na gu si vbohi mahegiso. Tepo mwama ni ngadzi va hevbulago siprofeto nya Bhibhiliya va bwe va tiyisega gu khavo iso tepo yatshavbo si ngu tadzisega, va na dzi emiseya gu gira satshavbo va si kodzago gasi gu thumeya Jehovha. w21.11 16-17 ¶9-10

Jesu a di gu garadzega khu mamayi waye, oyu adzina a nga ba a ri noni. Jesu a di gu haladza Mariya, nigu a di gu vbweta gu tiyisega gu khuye womo a na tshalago a mu khathaleya khu nyamani ni liphuvboni. Khavbovbo, a di lomba Johane gu a tshala a gira isoso. Gu khugeya litshigu lile, Johane a di hadzi gira khatshi gyanana gya Mariya, a bwe a mu khathaleya nga khatshi mamayi waye. Mariya khathalede Jesu gu khugeya na ngari gyanana a bwe a khala vbafuvbi gwaye tepo a nga hadzi gufa! Khu lisine Jesu a diri ni sighelo nya singi nyo haladze ngudzu Mariya. Ginani hi nga gi hevbulago khu malito ya Jesu? Wupari hi gu nawo ni vandriyathu nya Makristo, wu nga vbindra wupari hi gu nawo ni valongo vathu. Valongo vathu va nga hi wugeya mwendro gu hi diga, ganiolu, Jesu tumbiside gu khuye, ha gu simama gu tiyisa wupari wathu ni Jehovha hi bwe hi dzi pata ni hengeledzano Yaye hi na “bweledzedwa lizana dzinyondro” guvbindra esi hi nga si luza. Vandriyathu nya vangi va na khala sanana sathu, vamamayi vathu ni vapapayi vathu. (Marko 10:29, 30) Ethu ha gu gira gipandre nya ndranga ya liphuvboni yi gu ni gukhodwa ni lihaladzo, lihaladzo khu Jehovha ni vandriyathu. Wo dzipwa kharini khu isoso?— Kol. 3:14; 1 Ped. 2:17. w21.04 9-11 ¶7-8

Lihaladzo nyo tumbege la gu hi kutsa gu gira nya singi gasi gu phasa vambe. Kha nga gale, vandriyathu nya vangi muhuno va ngu hunga gu yeyedza lihaladzo nyo tumbege ga vandriyawe ambari na va si vati. Khu giyeyedzo, tepo va dzitigo gu khavo gu dugelede mhango nya tumbunugo, avo va gu dzegeya gu gira gilogyo gasi gu phasa. A gu tshuka ndriyathu nyo khaguri libandlani a hamuga dzitsapawu, nya mba hweya avo va gu vbwetedzeya dzindziya nya gu mu phase. Gu fana ni vandriyathu va lizana myaga nyo pheye va Makedhoniya, vandriyathu vava va gu dzi garadzeya gu gira nya singi. Avo va gu thumisa tepo yawe ni dzithomba dzawe gasi gu phasa vandriyathu va tshanganago ni gigaradzo nyo hamuge dzitsapawu. (2 Kor. 8:3) Madhota ma ngu zundza vandriyathu libandlani tepo ma wonago edzi va dzi garadzeyago khidzo gu phasa vambe. Tepo va zundzwago va ngu mana tshivba nya gu simame va phasa vambe.— Isa. 32:1, 2. w21.11 11 ¶14; 13 ¶21

Hatshavbo hi ngu vbweta gu ningwa wusingalagadzi. Ga siemo nyo khaguri ethu adzina hi nga lomba wusingalagadzi ga muthu hi mu ningago githawo. Ga simbe siemo, ndriyathu a garadzegago khethu adzina a nga hi embeya gu khuye hi ngu vbweta gu thegeya mugighohoni. A gu gu gira silo si na hi girago hi dzi laya. (Gal. 6:1) Mwendro adzina hi nga hakha wusingalagadzi tepo muthu nyo khaguri a hi kawukago hwane nya gu ba hi giride gighoho nya gikhongolo. Ni gevbini gighelo gi hi girago hi mana wusingalagadzi, egi gi vbwetegago khu gu hi engisa wusingalagadzi hi ningwago. Gu gira isoso, si na hi phasa nigu hi na vbulugisa womi wathu. (Mav. 6:23) Lowo wathu wa muhuno wa gu hi kutsa gu “engisa magana ya va nya guti.” A mwalo muthu atigo satshavbo, tepo yatshavbo womo muthu a gu na ni guti mwendro makodzelo gu hi vbindra. (Mav. 12:15) Khu kharato, tepo hi engisago wusingalagadzi ha gu yeyedza gu khethu hi ngu dzi nogisa. Isoso sa gu yeyedza gu khiso hi ngu dziti gu khethu hi ngu hegedwa, nigu hi ngu vbweta giphaso gasi gu vboheya misuwo yathu. Pfhumu Solomoni lovide gu khuye: “Avbo gu guromo madhota nya mangi, makungo ma gu duga gwadi.”— Mav. 15:22. w22.02 8 ¶1-2

Gu dzi laya nya lisine kha si thuli basi gu ganeya gu khethu hi ngu dzi laya khesi hi giridego. Ugo ga gu pata gambe gu vbindrugedza mapimiselo yathu ni edzi hi dzipwago khidzo, nigu guvbindrugedza gogo gu yede gu hi kutsa gu gira gilogyo, a gu gu diga mavbanyelo nyo vivbe hi bweleya ga Jehovha. (Ezek. 33:14-16) Gilo nya lisima egi gighohi gi yedego gu gira gu wusedza wupari wagyo ni Jehovha. Ginani u yedego gu gira ya gu tshuka pari yago nya yikhongolo yi gira gighoho nya gikhongolo? Hi na ghoha pari yathu ha gu zama gu siya gighoho yi giridego. Nigu ambari ha gu siha, kha si na nga phasa gilo kholu Jehovha a ngu si wona satshavbo. (Mav. 5:21, 22) Wa gu vbweta gu phasa pari yago, yi kutse gu hongola yi ya bhula ni madhota, ganiolu ya gu bomba uwe kamo u nga hongola uya bhuleya madhota. Wa gu gira isoso u na yeyedza gu khuwe wa gu vbweta gu phasa pari yago. w21.10 7 ¶19-21

Hatshavbo hi nga pimedzeya giyeyedzo gya Jesu khu gu thangisa esi sa vambe guvbindra esi sathu. Bhibhiliya yari khiyo: Uye a di “dzi gira khumbi.” (Filp. 2:7) Khumbi mwendro githumi gi ningwago lisima, gi nga gira esi gi si kodzago gasi gu tsakisa mune wagyo. Kha nga olu hi gu sithumi sa Jehovha, ethu ha gu thumeya vandriyathu nigu ho vbweta gu khala vathu va girago esi si phasago vambe. U nga dzi wudzisa gu khuwe: ‘Ina nyi ngu dzi emiseya gu dzi hiya silo nyo khaguri gasi gu phasa vambe? Ina nyi dzi emisede gu dzi ningedza tepo va vbwetago va voluntaryo gasi gu ya agisa wulanga gu na giredwago avbo kongresu mwendro gu lungisa silo nyo khaguri Salawuni nya Mufumo?’ Hi nga ganeya gu khethu u tugude gilo u yedego gu tshukwadzisa, ganiolu u wona gu khuwe gimwalo gi gu kutsago gu vbindrugedza. Wa gu ba uri ga giemo gegi, gombeya ga Jehovha khu monyo wago watshavbo. Embeya Jehovha edzi u dzi pwago khidzo, u bwe u mu lomba gasi a gu “ninga gusuva ni guthuma guhaladza gwaye.” — Filp. 2:13. w22.02 23 ¶9-11

Jesu yeyedzide wuwadi khu gu dzi vbevbugisa ambari dziteponi nya sigaradzo. (Mat. 11:29, 30) Khu giyeyedzo, tepo nyamayi moyo nya Mufenisiya a nga mu lomba gu hawulugisa gyanana gyaye, uye kha hakha gilombo gyaye, ganiolu tepo nyamayi wule a nga yeyedza gukhodwa nyo tiye, uye khu wuwadi a di hawulugisa gyanana gyaye. (Mat. 15:22-28) Ambari olu a nga ba a yeyedza wuwadi, Jesu kha nga ba a diga gu ningeya wusingalagadzi. Dzimbe dzitepo, uye a di gu yeyedza wuwadi khu gu ningeya wusingalagadzi nyo kongome ga vale a nga ba a va haladza. Khu giyeyedzo, tepo Pedro a nga zama gu vbedza tshivba Jesu gu gira guhaladza ga Jehovha, Jesu a di mu kawuka mbeli ga vambe vapizane. (Marko 8:32, 33) Uye kha gira isoso gasi gu vega vbavbatshi Pedro, ganiolu gasi gu mu hevbudza ni gu gengedza vambe vapizane gasi va si manegi ni matshandza. Kha si kanakanisi gu khiso Pedro pwide dzitshoni, ganiolu uye wuyedwe khu gu kawukwa. Gasi hi khala vathu nya vadi ga vale hi va haladzago, dzimbe dzitepo hi yede gu va ninga wusingalagadzi. Tepo u girago isoso, pimedzeya Jesu khu gu seketeya wusingalagadzi wago omu nya matshina nya milayo ma gomogo omu nya Lito la Nungungulu. w22.03 11 ¶12-13

Ethu ha gu khozeya Jehovha tepo hi mu rungudzago. (Ndzi. 34:1) Ha gu rungudza Jehovha tepo hi bhuleyago vambe khedzi hi mu haladzago khidzo ni gu samadziswa khu makhalelo yaye ni mithumo yaye. Hi na manega ni silo nya singi nya sadi nyo ganeye maningano ni Jehovha ha gu mu bonga. Ha gu dundrugeya khu satshavbo silo nya sadi esi Jehovha a hi giredego, hi na manega ni sighelo nya singi nya gu mu dhumise. Thumo nyo tshumayele wu ngu hi ninga lithomo nya gu “rungudze Nungungulu . . . rungudzo yoyo i mhamba hi ningeyago, yi ningedwago khu magana ma rungudzago.” Gu fana ni olu hi yedego gu dundrugeya gwadi khesi hi na ganeyago na hi nga si gombeyi ga Jehovha, khyadi ngudzu gu dundrugeya gwadi khesi hi na ganeyago ni vathu hi na va manago thumoni nyo tshumayele. Ho vbweta gu khethu ‘rungudzo wathu nya mhamba’ yi khala iyo nya tshukwana. Esi khiso si hi girago hi ganeya na hi tsakide tepo hi tshumayelago. w22.03 21 ¶8