Gu dusa muthu libandlani malulamiselo ma vegidwego khu Jehovha. Nigu isoso si ngu phasa oyu a dusidwego libandlani si bwe si vhikeya libandla. Si nga gira na wu pwide muthu nyo khaguri na gu ganeya guvivba khu kotani nya edzi muthu nyo khaguri libandlani a tsayisidwego khidzo. Ganiolu, vathu nya nga vovo va ngu tala gu divala gu ganeya khu silo nyo vivbe si giridwego khu oyu a dusidwego. Lisine khu gu ethu kha hiti satshavbo si pategidego. Khu kharato, tiyisega gu khuwe madhota ma wumbidego kometi nya wulamuli ma dzi garadzede gu landreya matshina nya milayo nya Bhibhiliya ma bwe ma lamula khu guya khu gu gola ga Jehovha. (2 Dzik. 19:6) Wa gu seketeya esi si hungidwego khu madhota si nga phasa oyu a dusidwego gu wuya ga Jehovha. Elizabeth, wari khuye: “Gu ema gu ganeya ni gyanana gyathu si hi garadzede ngudzu. Ganiolu, tepo a nga wuya ga Jehovha, ganede gu khuye gu ba a dusidwe libandlani si mu phaside ngudzu nigu hevbude silo nya singi.” w21.09 29 ¶11-12

Dundrugeya vbadugwana khu noni yile. Khu lisine, iyo yi di gu vbweta gu ningeya nya singi ga Jehovha. Ambari ulolo, iyo yi giride esi yi nga si kodza, khu gu ningeya esi yi nga ba yiri naso ga Jehovha. Nigu Jesu a di gu dziti gu khuye, ningelo wule wu diri wa lisima ngudzu ga Jehovha. Avba hi ngu hevbula gilo nya lisima: Jehovha a ngu tsaka ngudzu tepo hi girago satshavbo hi si kodzago gasi gu mu thumeya khu hefemulo ni monyo wathu watshavbo. (Mat. 22:37; Kol. 3:23) Jehovha a ngu tsaka khu gu wona gu dzi garadza gwathu! Isoso so pata tepo hi yi vbezago na hi gu tshumayela, na hi gu hongola mitshanganoni ni gu gira ni gevbini avba nya wukhozeyi waye. U nga thumisa kharini esi u si hevbulago avba nya matimo ma ganeyago khu noni? Dundrugeya khu vandriyathu u nga va tiyisago khu gu va dundrugisa gu khuwe Jehovha a ngu tsaka khu satshavbo va girago gasi gu mu thumeya. Adzina ndriyathu nya nyamayi a dandridego khu tanga a gu mwalo mawugelo nya yadi, nigu a mwalo tshivba nyo gire nya singi thumoni nyo tshumayele nga edzi a nga ba a gira khidzo gale. w21.04 6-7 ¶17, 19-20

Jehovha a ngu yiti tepo nya ydi nyo fuvise litigo leli nyo vivbe. Khu kotani nya gulaphise monyo ga Papayi wathu wa ndzadzini, vathu nya vangi va manide lithomo nya guvelegwe va hevbula khuye va bwe va hendzeledza womi wawe gwaye. Vathu vovo muhuno, va gu gira gipandre nya gitshungu nya gikhongolo nigu va gu bonga Nungungulu kholu a simamago a timiseya. Tepo dzimiliyoni nya vathu dzi na gu ba dzi timisede kala mahegiso dzi na hakhago tshatshazelo, si na wonega guagani gu khiso Jehovha giride gwadi khu gu ba a hungide gu laphisa monyo! Ambari olu Sathane a vangago gutshaniseka ni wuvi, Jehovha a ngo simama gu khala “Nungungulu nyo tsake.” (1 Thim. 1:11) Khu ndziya nyo fane anethu hi nga simama na hi tsakide tepo hi vireyago gu khethu Jehovha a agisa lina laye, a emeya Wufumo waye, a fuvisa guvivba gwatshavbo ni sigaradzo hi tshanganago naso muhuno. Dzi emiseye gu timiseya nigu gima u nga divale gu khuwe Papayi wathu wa ndzadzini anuye a gu timiseya. w21.07 13 ¶18-19

Vathu nya vangi va matshigoni ya Jesu va di tshunganeya. Vathu va di gu wona Jesu nga gyanana gya Karpinteiro nyo khaguri basi. Uye a diri wa Nazareta lidhoropa li nga ba li wonedwa vbavbatshi khu vathu. Ambari Nataniyeli mulandreyi wa Jesu ganede khuye “Ina gu ngu dzi kodza gu duga gilo nya gyadi khu Nazareta?” Uye adzina a di gu dundrugeya khu giprofeto gi gomogo umo ga Mikeya 5:2, gi nga ba gi ganeya gu khigyo Mesiya a di hadzi velegwa Bhetlehema nasiri Nazareta. Muprofeti Isaya ganede gu khuye valala va Jesu va di hadzi gu mba theya kota khu “matshigu nya gu vbanye gwaye.” (Isa 53:8) Nari khatsi vathu va di dzi ningide tepo nya gu hevbule satshavbo si pategago avbo nya mahungo yaya, va di hadzi gu dziti gu khavo Jesu velegidwe Bhetlehema nigu a diri gitugulwana gya pfhumu Dhavhidhe. (Luka 2:4-7) Jesu velegidwe ga wulanga gu nga ba gu profetidwe umo ga Mikeya 5:2. Ganiolu, gigaradzo muni gi nga ba gi romo? Vathu va di vbiredzeya gu lamula, avo va di si siti satshavbo si pategago, khu kotani nya isoso kha va khodwa ga Jesu. w21.05 3 ¶5-6

Bhibhiliya yi ngu hi ninga siyeyedzo nya sadi nya vathu va kategisidwego khu gu ba va dzumede wusingalagadzi. Wona giyeyedzo gya Joba. Ambari olu uye a nga ba a gola Nungungulu ni gu vbweta gu mu tsakisa uye kha nga ba a vbelede. Khu gu ba a garadzega, uye manegide ni mawonelo nyo khaguri nya mba yadi. Kha nga handro wakone uye hakhide wusingalagadzi nyo kongome khu ga Eliyo ni ga Jehovha. Ginani a giridego Joba? Khu gu dzi nogisa uye a dzumede wusingalagadzi. Uye a di khuye: “Nyi ganede iso nyi nga bani nyi si si pimi . . . nyi ngu dzipwa na nyiri ni nandru, olu nyi ngu ndzi laya, khu guphorola nguma ni kudzudzwane.” (Joba 42:3-6, 12-17) Uye yeyedzide gu dzi nogisa khu gu dzumeya wusingalagadzi a ningidwego khu Eliyu ambari olu Eliyu a nga ba ari muphya ngudzu gwaye. (Joba 32:6, 7) Khu ndziya nyo fane gu dzi nogisa, gu na hi phasa gu dzumeya wusingalagadzi ambari tepo hi pimisago gu khethu kha hi wu vbweti gambe wusingalagadzi, mwendro abari gu uye a hi ningago muphya ngudzu gwathu. Hatshavbo hi yede gu haguleya mihandro nya liphuvbo gasi hi khala vatshumayeli nya vadi ni vahevbudzi nya vadi nya mahungu nya yadi. w22.02 11 ¶8; 12 ¶12

Moyo ni moyo wathu a yede gu gira satshavbo a si kodzago gasi gu andrisa gurula libandlani ni gu yeyedza lihaladzo ga vatshavbo, iso si na phasago gu gu si manegi ni moyo a pwago wutundzu. Malito yathu ni esi hi girago si nga tiyisa vambe! U nga phasa kharini oyu a gu enga lisineni gu dzipwa na gu haladzwa khu vandriyathu libandlani? Zama gu gira wupari ni ava va gu vaphya lisineni. Hi nga pheya khu gu hakha gwadi ava va gu vaphya lisineni tepo va vbohago libandlani. (Rom. 15:7) Ambari ulolo, hi nga gira nya singi guvbindra basi gu va losa. Khu gu gimbiya nya tepo gu vbwetega hi khala dzipari dzawe nya dzikhongolo. Khu kharato, yeyedza wuwadi u bwe u yeyedza gu khuwe u ngu khathala khavo khu lisine. Zama gu pwisisa sigaradzo sawe, ganiolu u nga va giri siwudziso si na va girago vapwa dzitshoni. Dundruga gu khuwe, adzina vambe si nga va garadzeya gu ganeya edzi va dzipwago khidzo. Khu kharato, u nga va gurumedzi gu ganeya edzi va dzipwago khidzo. Va gire siwudziso khu ndziya nya yadi u bwe u engiseya gwadi tepo va hlamulago. Adzina giwudziso nya gyadi u nga girago khegi “u li tide kharini lisine”? w21.06 11 ¶13-14

Lithomo gwathu gu thumeya Jehovha gumogo ni vandriyathu kha nga tshambi moyo ni muhavisi moyo! Omu nya libhuku Organizados para fazer a vontade de Jeová, pajina 165, gu na ni malito ma gu khayo: “Kha nga olu u tsakago khu gupwanana hi gu nago, gu vbwetega u gira gipandre gyago gasi gu si vbeyi.” Khu kharato, gu vbwetega “hi dzi garadzeya gu wona vandriyathu kha nga edzi Jehovha a va wonago khidzo.” Hatshavbo hi na ni lisima mahoni ga Jehovha. Ina anuwe u ngu va wona kharato vandriyathu? Jehovha a ngu si wona ni gu tsaka khu satshavbo hi girago gasi gu khathaleya vandriyathu. (Mat. 10:42) Ethu hi ngu va haladza ngudzu vandriyathu. Khu kharato, hi dzi emisede “gu mba gira ni gimwegyo gilo gi dzi kodzago gu va tshunganedzisa.” (Rom. 14:13) Ho wona vandriyathu na vari va tshukwana gwathu nigu hi dzi emisede gu va divaleya na si khugeya monyoni. U nga dzumeleyi muthu a gu tshunganisa. Ganiolu, “dzi garadze khu gu vbweta silo sile si hi reselago gurula ni gutiyiselana gukhodwani.” — Rom. 14:19. w21.06 24 ¶16-17

Ha gu dzi garadzeya gu hevbula ni gu thumisa wusingalagadzi hi ningwago khu gu thumisa Lito la Nungungulu ni hengeledzano yaye, vbadugwanavbadugwana hi na si kodza gu haguleya makhalelo ya Kristo. Hi na bwe hi muti gwadi Nungungulu. Jesu thumiside gipimaniso nyo khaguri gasi gu tshamuseya edzi mahungu nya Mufumu wa Nungungulu hi tshumayelago ma fanago khidzo ni mbewu nya yidugwana yi dandrago vbadugwanavbadugwana monyoni ga wule a golago gu gira silo nya sadi. Uye a di khuye: “Mbewu ya gu buga yi dandra [mulimi] na si dziti magirelo muni. Mafu khayo ma gu ni tshivba nya gu bugise, guhegula ya gu buga litshina, gu handzamedza mahongwe, gu landrela makonva a gu ayo ma thelago dzimbewu.” (Marko 4:27, 28) Jesu a di gu vbweta gu khuye, gu fana ni simbo wu dandrago vbadugwanavbadugwana, anuye muthu a dzumeyago mahungu nya Mufumo wa Nungungulu si nga dzega tepo gasi a vbindrugedza mavbanyelo yaye. Khu giyeyedzo, tepo gihevbuli gyathu nya Bhibhiliya giyago gi khala pari ya Jehovha, hi na wona guvbindrugedza nya gwadi gi gu girago. (Efes. 4:22-24) Ganiolu, hi yede gu dundruga gu khethu khu Jehovha a dandrisago mbewu yile nya yidugwana. w21.08 8-9 ¶4-5

Ha gu vbwetedzeya umo wu guromo gutsaka hi na gu mana. Muthu a vegago gupima avbo nya silo a si wonago “khu maho,” a ngu eneledwa khesi a gu naso nigu a ngu tsaka khu giemo a gomogo ga igyo. Ganiolu, muthu a simamago gu vireya silo a gu mwalo naso, gima kha na nga tsaka. Khu kharato, ginani hi gi hevbulago? Gasi hi mana gutsaka, hi yede gu vega gupima ga silo hi gu naso ni ga misuwo hi kodzago gu hi vboheya. Ina si ngu kodzega gutsaka khu esi basi hi gu naso? Vathu nya vangi vo pimisa gu khavo kha si kodzegi, kholu ethu hi ngu gola gu hevbuleya gu gira silo nya siphya. Ganiolu, khu lisine si ngu kodzega. Khu lisine hi nga tsaka khu silo hi gu naso olu. Khu ginani hi ganeyago kharato? Gasi gu mana hlamulo, wona gipimaniso gya Jesu gi ganeyago khu dzitalenta hi gi manago umo ga Matewu 25:14-30, nigu vega gupima ga esi hi nga si hevbulago maningano ni edzi hi nga engedzeyago khidzo gutsaka ndrani nya giemo gyathu. w21.08 21 ¶5-6

Jehovha a ngu khathala ngudzu khu vale “va khuvekidego ni vale va vbedego tshivba.” Hatshavbo, nasiri madhota basi hi nga gira nya singi gasi gu tiyisa vandriyathu. Mweyo nya dzindziya hi nga va tiyisago khiyo, gu yeyedza gu khethu hi ngu khathala khavo. Jehovha a gu vbweta gu khuye hi va yeyedza gu khethu a ngu va haladza. (Mav. 19:17) Vbavbandze nya isoso, hi nga phasa gambe vandriyathu khu gu hi dzi nogisa hi bwe hi si dzi khusedzi khu makodzelo hi gu nawo. Kha hi vbweti gu dzi yeyedza ga vambe kholu isoso si nga va gira vapwa lidiwo. Wulangani nya isoso, hi yede gu thumisa guti hi gu nago ni makodzelo gasi gu tiyisa vandriyathu. (1 Ped. 4:10, 11) Hi nga hevbula edzi hi nga pharago khidzo vambe ga edzi Jesu a pharidego khidzo vapizane vaye. Jesu mwama nya lisima a vbanyidego mafuni. Ambari ulolo, uye a diri “ni monyo nya gurule nuwo nya gu dzi sodzise.” (Mat. 11:28-30) Wulangani nya isoso, tepo Jesu a nga ba a hevbudza a di gu thumisa maganelelo nyo vbevbuge ni sipimaniso si nga ba si khuha myonyo nya vathu. — Luka 10:21. w21.07 23 ¶11-12

Dzi emiseye gu bhula ni ava va dandrigedo khu tanga. Adzina saye avo kha va kodzi gu wona gwadi, nigu va mwalo tshivba nya gu ganeye ni gu gimbiya, ganiolu avo va ngu dzina gu gireya nya singi Jehovha nigu va dzi girede “lina nya gu dzundzege” mahoni ga Jehovha. (Muh. 7:1) Tepo yatshavbo dundruga gu khuwe khu ginani Jehovha a wonago vandriyathu nyo dandre khu tanga kha nga vathu nya lisima. Simama gu yeyedza githavo khu vandriyathu va dandridego khu tanga. Gira esi a giridego Elisewu. Uye simamide gu khala ni Eliya ga matshigu yaye nyo hegise. Elisewu ganede dzitepo nya dzingi ga Eliya khuye: “Gima kha nyi na nga gu diga.” (2 Kor. 2:2, 4, 6) Yeyedza gu khuwe u ngu khathala khu vandriyathu va dandridego khu tanga khu gu va gira siwudziso nya sadi. (Mav. 1:5; 20:5; 1 Thim. 5:1, 2) U nga va gira siwudziso nya nga esi: “Tepo u nga ba uri muphya, ginani gi nga gu gira u tiyisega gu khuwe u di li mane lisine?” “Siemo u tshanganidego naso si gu phaside kharini gu dzipwa vbafuvbi ni Jehovha?” “Ginani gi gu phasidego gu simama gu thumeya Jehovha khu gu tsaka”? (1 Thim. 6:6-8) Khu ndziya yoyo va engiseye gwadi tepo va tshamuseyago matshango yawe. w21.09 5 ¶14; 7 ¶15

Wa gu gira satshavbo si gomogo tshivbani gwago gasi gu engisa gileletelo nya gu tshumayele ni gu gira vapizane, wa gu yeyedza lihaladzo lago khu Nungungulu. (1 Joh. 5:3) Nga dundrugeya khesi: Lihaladzo lago khu Jehovha li gu kutside gu tshumayela khu ndranga ni ndranga. Ina si gu vbevbugede gu landrisa gileletelo nya gu tshumayele vathu? Adzina ne. Litshigu nya pheye u nga hongola thumoni nya gu tshumayele, ina u khade hwanga tepo u nga beya ga ndranga nyo pheye? Kha si kanakanisi gu khiso u di gupwa hwanga! Ganiolu, u ngu dziti gu khuwe owu i thumo Jesu a vbwetago gu khuye u wu gira nigu u engiside gileletelo gyaye. Nigu, khu gu gimbiya nya tepo si gu vbevbugede gu gira thumo nya gu tshumayele. Ahati gu gimbidzisa gihevbulo nya Bhibhiliya ke, ina u ngu khala hwanga khu gu dundrugeya khiso basi? Adzina. Ganiolu, wa gu gombeya ga Jehovha u mu lomba gasi a gu phasa gu tiya hwambo gasi u gimbidzisa gihevbulo nya Bhibhiliya, uye a na gu phasa gu haguleya gudogoreya nya gu gire vapizane. w21.07 3 ¶7

Gale yoyo dzigumbi dzi di gu vegwa gifungo gasi dzi tidwa gu dza gu lumba mani. Khu ndziya nyo fane, matshigoni yathu mifumo yi na vireya gu khiyo vatshavbo va yeyedza oyu va mu seketeyago nigu mifumo yeyi yi na vbweta gu khiyo vatshavbo va yeyedza khu mithumo gu khavo va ngu seketeya politika. Ethu ke, hi na dzumeya gifungo gegi hi seketeya mifumo nya vathu? Uye a na bombago gu hakha gifungo gegi a na tshangana ni sigaradzo nya singi ambari gu vega womi waye mhangoni. Libhuku la Gutuledwa la gu ganeya gu khilo vale va gu na ni gifungo “khavo basi va dzumedziswago gu renga mwendro gu rengisa silo.” (Gut. 13:17) Ganiolu, vathu va Nungungulu va ngu siti esi si na dugeleyago avo va gu na ni gifungo gi khumbugwago omu ga Gutuledwa 14:9, 10. Wulangani nya gu va hakha gifungo, avo va na lova mandzani gwavo khavo: ‘Eni nya gu lumba Jehovha.’ (Isa. 44:5) Eyi tepo nya gu hi dzi gevisisa gwadi hi wona gu khethu ina hi ngu tumbega ga Jehovha mwendro ne. Abari gu hi ngu tumbega gwaye, Jehovha a na tsaka khu gu ganeya khuye ha gu lumba uye. w21.09 18 ¶15-16

Gasi hi tadzisa gwadi thumo wathu nya gu tshumayele hi nga phasega khu gu dzumeya giphaso gya vambe. Mupostoli Pawulo, hevbudzide Thimoti edzi a nga tshumayelago khidzo ni gu hevbudza a bwe a mu kutsa gu gira sasimweso ga vambe. (1 Kor. 4:17) Gufana ni Thimoti anethu hi na hevbula nya singi ga vandriyathu va vidzidwego libandlani lathu. Nigu, hi yede gu gombeya hi lomba giphaso ga Jehovha. Tepo yatshavbo u pategago avba nya thumo nyo tshumayele lomba giphaso ga Jehovha. Mwalo a nga si kodzago gu gira thumo wowu nya mba phaswa khu liphuvbo nya guage la Nungungulu. (Ndzi. 127:1; Luka 11:13) Gira nombelo nyo kongome. Khu giyeyedzo, lomba Jehovha gasi a gu phasa gu mana muthu a vbwetago gu engiseya mahungu yathu ni gu hevbula khu Nungungulu. Hi yede gambe gu dzi ninga tepo nyo hevbule Bhibhiliya. Lito la Nungungulu lari khiyo: “Pima gugola gwa Nungungulu; ni gu pima esi nya sadi, nya gutsakise, si vbeledego mahoni gwa Nungungulu.” (Rom. 12:2) Gu hevbula Bhibhiliya si ngu hi phasa gu muti gwadi Jehovha, khu kharato, tepo hi tshumayelago maningano khu Nungungulu vathu va ngu si kodza gu wona gu khavo ethu hi ngu khodwa ga esi hi hevbudzago. w21.05 18 ¶14-16

Adzina wa gu hevbula Bhibhiliya ni muthu nyo khaguri, khu kharato wa gu dzi garadza gasi gu khala muhevbudzi nya wadi nigu u ngu gombeleya ngudzu gihevbuli gyago. Ganiolu, igyo kha gi thumisi esi gi hevbulago nigu olu wa gu vbweta gu ema gu hevbula nagyo Bhibhiliya. Mwendro adzina u si si kodzi gu hevbula ni muthu Bhibhiliya kala aya bhabhatiswa. Ina u yede gu dzipwa nandru, u pimisa gu khuwe Jehovha kha kategisi thumo wago nyo tshumayele? Wona edzi Jehovha a wu wonago khidzo thumo wathu. Jehovha a ngu vega gupima avba nya gu dzi garadze gwathu ni gu timiseya gwathu. Ga Jehovha, thumo wathu nyo tshumayele wa gu dugeleya tepo hi thumago khu sighingi kholu hi mu haladzago, ambari vathu va gu mba tsakeya. Pawulo lovide khuye: “Nungungulu khwadi kha divaledwi khu thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo.” (Hebh. 6:10) Jehovha a ngu dundruga gu dzi garadza gwathu ni lihaladzo lathu, ambari na hi gu mwalo gihevbulo nya Bhibhiliya gi bhabhatisidwego. Khu kharato, u nga thumisa esi Pawulo a ganedego umo nya lowo wa muhuno. — 1 Kor. 15:58. w21.10 25 ¶4-6

Lihaladzo ni wuwadi wa Jesu si wonegide ga edzi a nga ba a phara khidzo vapizane vaye. Uye a di gu dziti gu khuye va na ni makodzelo ni siemo nyo hambane. Khu kharato, khandri vatshavbo va nga hadzi si kodza gu khathaleya mithumo nyo fane mwendro gu dugeleya khu ndziya yayimweyo thumoni nyo tshumayele. Ambari ulolo, Jesu a di gu ninga lisima makodzelo ya moyo ni moyo wawe. Jesu muthu nya gu pwisise nigu isoso si wonegide tepo a nga ningeya gipimaniso nya dzitalenta. Avba nya gipamaniso gegi, pfhumu yi di ninga “muthu ni muthu guya khu makodzelo yaye.” Avba nya sithumi sivili, gimwegyo gi lukraride gu vbindra gimbe, ganiolu, pfhumu yi di zundza sithumi satshavbo sasivili khu malito nyo fane khiyo: “U thumide, githumi nya gyadi, nya gutumbege!” (Mat. 25:14-23) Jesu tepo yatshavbo a ngu yeyedza lihaladzo ni wuwadi ga moyo ni moyo wathu. Uye a ngu dziti gu khuye hi na ni makodzelo nyo hambane ni siemo nyo hambane, ni gu a ngu tsaka tepo hi dzi garadzago. Ethu hi yede gu pimedzeya Jesu. w21.07 23 ¶13-14

Dzimbe dzitepo Pfhumu Dhavhidhe kha yeyedza wuhindzi. Khu giyeyedzo, Nabhali, mwama moyo a nga ba ari ni makolo ni dzihanyi, a di ganeya khu ndziya nya mba yadi ni Dhavhidhe a bwe a bomba gu ninga guhodza Dhavhidhe ni vathu vaye. Khu kharato, Dhavhidhe a di goroga ngudzu a bwe a hunga gu songa, Nabhali ni vatshavbo va ndrangani gwaye. Ganiolu, Abhigayili, ngadza Nabhali a diri muthu nya wadi ni gu laphisa monyo nigu uye khu gu vbiredza a di hongola a ya ninga guhodza Dhavhidhe. Khu kharato, Dhavhidhe kha songa Nabhali gumogo ni va ndrangani gwaye. (1 Sam. 25:9-22, 32-35) Tepo Dhavhidhe a nga ba a gorogide ngudzu, a di ganede gu khuye Nabhali ni va ndrangani gwaye va di yede gu songwa. Nigu khu hwane nya tepo, Dhavhidhe ganede khuye mwama wule wa avba nya gipimaniso gya Natane a di yede gu songwa. Ganiolu, Dhavhidhe a diri mwama nya wadi, khu kharato khu ginani a nga lamula mwama wule nya gighanyi khu ndziya nya mba yadi? Dundrugeya khedzi Dhavhidhe a nga ba a dzipwa khidzo. Ga tepo yile livhalo la Dhavhidhe li di gu dzipwa nandru. Muthu a gu lamula vambe  khu ndziya nya mba yadi so yeyedza gu khiso wupari waye ni Jehovha kha wa tiya. w21.10 12 ¶18; 13 ¶20

Malito nya lowo wa muhuno, ma gu hi hevbudza gu khayo hi nga pimedzeya Jehovha oyu a gu giyeyedzo nya gyadi nya guage. Hi yede guaga mavbanyeloni yathu. Isoso, si nga gira gu khatshi kha si kodzegi kholu ethu kha ha vbeleya. Mupostoli Pedro giride sihoso nyo khaguri, ganiolu giyeyedzo gyaye gyo yeyedza gu khigyo ethu hi nga khala vathu nyo ‘age.’ Tepo vathu nya vangi va dundrugeyago khu muthu nya guage, va gu wona muthu nya gu gima kha hegi, a ambalago sombo nya wukhongeyi, nigu nya mba olovelega. Ganiolu, muthu nya guage kha khala kharato. Jehovha, oyu a agidego a gu wonwa kha nga “Nungungulu nya gutsake.” (1 Thim. 1:11, NM) Avo va mu khozeyago va gu wonwa kha nga vathu ‘nyo tsake.’ (Ndzi. 144:15) Jesu tsayiside vathu va ambalago sombo nyo hathege nigu gira silo nya sadi khu gu vbweta gu wonwa khu vambe. (Mat. 6:1; Marko 12:38) Makristo nya lisine ma ngu dziti gu khayo so thula ginani guaga khu kotani nya esi Bhibhiliya yi ganeyago. Hi ngu dziti gu khethu Jehovha a ngu hi haladza, nigu uye gima kha na nga hi lomba gu gira gilo hi gu mba gi kodza. w21.12 2 ¶1, 3

Nungungulu khu wu wadi, a ngu hi ninga silo nya singi, nigu gimwegyo nya silo soso makodzelo nya gu mu khozeye. Ha gu yeyedza gu khethu hi ngu haladza Jehovha tepo hi landrisago “milayo yaye.” (1 Joh. 5:3) Moyo nya milayo eyi Jehovha a vbwetago gu khuye hi yi landrisa, khu owu Jesu a hi ningidego nya gu gire vapizane hi bwe hi va bhabhatisa. (Mat. 28:19) Uye gambe hi rumide gu khuye hi yede gu haladzana khu gyathu. (Joh. 13:35) Jehovha a na dzumeleya ava va engisago milayo yaye gasi va gira gipandre nya ndranga yaye. (Ndzi. 15:1, 2) Haladza vambe. Lihaladzo likhalelo nya lisima la Jehovha. (1 Joh. 4:8) Jehovha a hi yeyedzide lihaladzo na hi si gu muti. (1 Joh. 4:9, 10) Ethu hi nga mu pimedzeya khu gu hi haladza vambe. (Efes. 5:1) Mweyo nya dzindziya hi nga yeyedzago khiyo lihaladzo khu vathu, khu gu va hevbudza maningano ni Jehovha na yi ngo romo tepo. (Mat. 9:36-38) Ha gu gira isoso, hi na va phasa guti esi va yedego gu gira gasi va khala sivbango nya ndranga ya Nungungulu. w21.08 5-6 ¶13-14

Kha nga olu Jesu a haladzago ngudzu Jehovha, uye a dzi ningede khu kotani yathu, nigu gasi a tsakisa Papayi waye. (Joh. 14:31) Jesu yeyedzide gu khuye a di gu haladza vathu khedzi a nga ba a vbanya khidzo tepo a nga ba a romo mafuni. Tshigu ni tshigu, uye a di gu yeyedza lihaladzo ni pweya-wusiwana ambari tepo vambe va nga ba va mu wugeya. Ndziya nya lisima a nga yeyedza khiyo lihaladzo laye khu vathu khu gu va hevbudza maningano ni Mufumo wa Nungungulu. (Luka 4:43, 44) Jesu yeyedzide gambe lihaladzo laye khu Nungungulu ni vathu khu gu dzumeya gu tshaniswa ni gu songwa khu kotani nya sighoho sathu. Khu gu ba a giride isoso, si ngu kodzega gu hatshavbo hi mana womi nya pindrugedwa. Ethu hi dzi hendzeledzide ga Jehovha hi bwe hi bhabhatiswa kholu hi ngu haladza Papayi wathu wa ndzadzini. Khu kharato, gu fana ni Jesu, hi yede gu yeyedza lihaladzo khu Jehovha khedzi hi pharago khidzo vathu. Mupostoli Johane lovide gu khuye: “Mwalo a dzi kodzago gu haladza Nungungulu a si mu wonigo, a gumba haladza ndriyaye a mu wonago.”— 1 Joh. 4:20. w22.03 10 ¶8-9

Ambari olu hi tsakago khu gu gombeya ni gu hevbula Bhibhiliya, khandri tepo yatshavbo si vbevbugago gu gira isoso. Ethu ha gu khala na hi pharegide nyo bwe hi hamuga ni tepo nyo gire mithumo ya liphuvboni. Thumo wathu nyo dzivbanyise, gu khataleya ndranga ni yimbe mithumo hi yedego gu gira si nga hi beya ngudzu tepo. Khu kharato, adzina hi nga pimisa gu khethu hi mwalo tepo nyo gombeye, nyo hevbule Bhibhiliya mwendro nyo dundrugeye khesi hi hevbulago. Gu na ni gimbe gilo gi nga hi beyago tepo yathu. Ha gu mba dzi woneya, ethu hi nga pharega khu silo adzina si nga mba hosega, ganiolu si hi beyago ngudzu tepo nyo bwe si hi garadzeya gu tiyisa wupari wathu ni Jehovha. Khu giyeyedzo, khya lisima ngudzu gu vbungadza. Sivbungadzo hi hathago adzina khyadi, ganiolu ha gu vbedza tepo nyo laphe na hi gu gira isoso, kha hi na nga mana ni tepo nyo gire silo sa liphuvboni. Khu kharato, hi yede gu vega sivbungadzo wulangani waso. — Mav. 25:27; 1 Thim. 4:8. w22.01 26 ¶2-3

Tepo Jehovha a nga embeya Vaisrayeli gu khuye va di yede gu haladza muthu-kwanu, kha nga ba a vbweta gu ganeya gu khuye avo va di yede gu haladza basi vambe Vaisrayeli. Uye a di va embeya gambe gu khuye va yede gu haladza valuveli va nga ba va vbanya vbakari gwawe. Malito yaya momu umo ga Levhi 19:33, 34. Jehovha a di gu vbweta gu khuye Vaisrayeli va phara muluveli ‘kha nga wa na gyawe,’ va “mu haladza” gukhwatshi khu edzi va dzi haladzago khidzo. Khu giyeyedzo, nayo wu di gu ganeya gu khuwo Vaisrayeli va di yede gu diga valuveli nya sisiwana va roledzeya umo nya mathembwe yawe. (Levhi 19:9, 10) Litshina leli nya nayo nya gu yeyedze lihaladzo khu valuveli, li ngu thuma ga Makristo muhuno. (Luka 10:30-37) Khu ndziya muni? Gu nani dzimiliyoni nya vathu mafuni gwatshavbo va fulugago va ya vbanya ga mambe mayigo, nigu vambe adzina va gu vbanya vbafuvbi gwago. Si na ni lisima gu phara vama vava, vanyamayi ni sanana khu ndziya nya githawo. w21.12 12 ¶16

Ha gu landrisa sileletelo sa Jehovha olu hi na tiyisega gu khethu mindru watshigu a na hi vbulugisa. So lomba gu hi manega ni gukhodwa hi bwe hi tumba Jehovha gasi hi si kodza gu lomba patrawu wathu gu khethu a hi ninga matshigu nyo khaguri gasi hi hongola mitshanganoni nya gipandre mwendro Kongresu, mwendro gu vbindrugedza longoloko nya ma thumelo gasi hi si kodza gu hongola mitshanganoni yatshavbo nya libandla ni thumoni nyo tshumayele. Ahati a gu tshuka patrawu wathu a bomba gilombo gyathu hi bwe hi luza thumo ke? Ina hi na tumba gu khethu Jehovha gima kha na nga hi diga ni gu khethu uye a na hi khataleya? (Hebh. 13:5) Vandriyathu nya vangi va gu romo thumoni nya tepo yatshavbo va ngu ganeya khedzi Jehovha a va phasidego khidzo tepo va nga ba va tshangana ni sigaradzo. Jehovha tumbegide. Ha gu ba hi ri ni Jehovha gi mwalo gilo gi nga hi girago hi thava esi si na giregago mindru watshigu. Nungungulu wathu gima kha na nga hi diga ha gu thangisa Mufumo waye womini gwathu. w22.01 7 ¶16-17

Gutumba hi gu nago khu madhota gu nga lingwa kharini? Hi nga ganeya gu khethu muthu oyu a dusidwego libandlani pari yathu. Ethu adzina hi nga garadzega khethu madhota kha ma wona satshavbo si pategago mwendro adzina hi nga dzi wudzisa gu khethu esi madhota ma hungidego gu gira Jehovha a di hadzi gu hunga khu ndziya yamweyo. Ginani gi nga hi phasago gu simama gu manega ni mawonelo nya yadi khesi si hungwago? Hi yede gu dundruga gu khethu gu dusa muthu libandlani, malulamiselo ya Jehovha ni gu isoso si ngu phasa libandla adzina saye ni gighohi. Gighohi gya gu dzumeledwa gu simama libandlani, gi nga kutsedzeya vambe gu ghoha navo. (Gal. 5:9) Nigu kha gi na nga wona gu khigyo esi gi giridego gighoho nya gikhongolo, gu diga isoso kha gi na nga wona lisima nya gu vbindrugedze mapimiselo yagyo ni mithumo yagyo gasi gu gi tsakedwa khu Jehovha. (Muh. 8:11) Gwa gu hungwa gu pwani muthu nyo khaguri a yedwe gu duswa libandlani, hi na tiyisega gu khethu madhota ma si khathalede gwadi. w22.02 5-6 ¶13-14

Gu laphisa monyo ni wuwadi si na vbwetega tepo muthu nyo khaguri a bombago wusingalagadzi nya Bhibhiliya gupheyani. Lidhota kha li yeli gu goroga a gu tshuka ndriyathu nya mwama mwendro nya nyamayi a hakhago wusingalagadzi a si wu dzumeyi mwendro gu wu thumisa. Khu kharato, ga milombelo yalo, lidhota li nga lomba Jehovha gasi gu phasa oyu a ningidwego wusingalagadzi ni gu mu phasa gu pwisisa gighelo nya wusingalagadzi wowo ni gu wu thumisa. Ndriyathu a ningidwego wusingalagadzi, adzina a nga vbweta tepo gasi gu dundrugeya khesi a embedwego. Lidhota la gu ganeya khu wuwadi ni gu laphisa monyo, si na vbevbugeya ndriyathu gu engisa wusingalagadzi. Khu lisine, tepo yatshavbo wusingalagadzi wu yedwe gu seketedwa umo nya Lito la Nungungulu. Ethu kha hi vbweti basi gu wusingalagadzi wathu wu gu phasa, ganiolu wu “resa gutsaka monyoni.” — Mav. 27:9. w22.02 18 ¶17; 19 ¶19

Tepo hi gombeyago ga Jehovha gasi a hi ninga tshivba nya gu timiseye gigaradzo mwendro gu gira gilo a gi nyenyago, adzina si nga gira khatshi a gu hweya gu hlamula milombelo yathu. Khu ginani Jehovha a gu mba hlamula yatshavbo milombelo yathu khu ndziya hi nga ba hi yi vireya? Uye a gu wona milombelo yathu yi khugeyago monyoni kha nga giyeyedzo nya gukhodwa gwathu. (Hebh. 11:6) Tepo hi gombeyago ga Jehovha gasi a hi phasa gu mu tsakisa, uye a gu vbweta gu hi wona na hi dzi garadzeya gu gira isoso. (1 Joh. 3:22) Khu kharato, tepo hi lombago Jehovha gasi a hi phasa gu ema gu gira gilo a gi nyenyago, adzina saye si na lomba gu hi laphisa monyo hi bwe hi dzi garadzeya gu vbindrugedza. Jesu a hi phaside gu pwisisa gu khethu yimbe milombelo yathu kha yi na nga hlamudwa khavba ni avba. Uye a di khuye: “Simamani gu lomba, mu na ningwa; simamani gu vbwetedzeya, mu na si mana; simamani gu khokhotha, mu na tuledwa; kholu ni wevbini a lombago, a ngu ningwa; ni wevbini a vbwetedzeyago, a ngu si mana; ni wevbini a khokhothago, a na tuledwa.”— Mat. 7:7, 8. w21.08 10 ¶9-10

Gasi u engedzeya gukhodwa gwago ga Muvangi, u yede gu simama gu hevbula Bhibhiliya. (Jos. 1:8) Dundrugeya gambe khu siprofeto si gomogo umo nya Bhibhiliya ni edzi si pwanago khidzo. Gu gira isoso, si nga engedzeya gu tiyisa gukhodwa gwathu nya khethu gu ni Muvangi nya guti ni lihaladzo, nigu mahungu ma guromo umo nya Bhibhiliya ma guta khiyo gwaye. (2 Thim. 3:14; 2 Ped. 1:21) Tepo u hevbulago Bhibhiliya, wona edzi wusingalagadzi wu gomogo mule wu nga gu phasago khidzo. Khu giyeyedzo, Bhibhiliya yi hi gengedzide gale gu khiyo gu gola dzitsapawu khandri gwadi nigu gu nga hi gira hi “bela guvivbani.” (1 Thim. 6:9, 10; Mav. 28:20; Mat. 6:24) Khu lisine, wusingalagadzi nya Bhibhiliya wu gu khuwo kha hi yeli gu gola dzitsapawu khwadi ngudzu. Ina gu na ni mambe matshina nya Bhibhiliya ma gu phasidego? Ha gu dundrungeya khu watshavbo wusingalagadzi wu guromo umo nya Bhibhiliya, hi na wona gu khethu Muvangi wathu a ngu hi haladza. Nigu, isoso tepo yatshavbo sa gu hi kutsa gu lomba wusingalagadzi waye gu vbanyani gwathu. (Jak. 1:5) Kha nga handro wakona, womi wathu wu na tsakisa ngudzu.— Isa. 48:17, 18. w21.08 18 ¶12-13

Abari gu wa gu gumba, tiyisega gu khuwe Jehovha a ngu drundruga satshavbo esi u mu giredego. Uwe u pategide khu sighingi thumoni nya gu tshumayele. U tshanganide ni sigaradzo nya sikhongolo ngudzu. U ngu engisa u bwe u emeya milayo nya Bhibhiliya, u khataleya mithumo nya lisima hengeledzanoni ya Jehovha u bwe u trenari vambe. Uwe tepo yatshavbo wa gu gira esi u sikodzago gasi gu dzi pwananisa ni gwevbini gu vbindrugedza gu girwago hengeledzanoni ya Jehovha. Uwe gambe u phasedzede ni gu tiyisa ava va gomogo thumoni nya tepo yatshavbo. Jehovha a ngu gu haladza ngudzu kholu u tumbegide. Uye a gu tumbisa gu khuye: “Gima kha digi avo va khodwago gwaye.” (Ndzi. 37:28) Nigu uye a gu tumbisa ava va dandridego khu tanga gu khuye: “Kala mu buga dzinvi eni nyi na simama nyi mi sayisa.” (Isa. 46:4) Khu kharato u nga pimisi gu khuwe olu u dandridego khu tanga u mwalo lisima hengeledzanoni ya Jehovha. Khu lisine uwe u nani lisima ngudzu. w21.09 3 ¶4

Jehovha a gu yeyedza wuhindzi kholu uye a nguti ngudzu. Bhibhiliya yari khiyo: “Guti gutago khu ga Nungungulu” gu tade “khu wuhindzi, wa gu ninga mihandro nya mithumo nya yadi.” (Jak. 3:17) Gu fana ni papayi nya lihaladzo, Jehovha a ngu dziti gu khuye a gu yeyedza wuhindzi, sanana saye si ngu phasega. (Isa. 49:15) Khu kotani nya wuhindzi wa Jehovha, vathu vaye ambari olu va nga mba vbeleya, va na ni gutumba ga mindru watshigu. Kha nga olu Jehovha a gu na ni guti nya gukhongolo, uye tepo yatshavbo a gu yeyedza wuhindzi tepo a wonago gighelo nya gu gire isoso. Ganiolu, Jehovha gambe a ngu yiti tepo eyi a si yeligo gu yeyedza wuhindzi. Jehovha a nguti ngudzu, khu kharato uye a ngu pwisisa guhambana gu gomogo avba nya gu yeyedze wuhindzi ni gu pweya gisiro muthu a ghohidego. Nga dundrugeya khu Mukristo a hungago kha gwenye gu manega ni mavbanyelo nyo nyenyeze mahoni ga Jehovha. Ginani hi yedego gu gira ga giemo gegi? Jehovha embede Pawulo gasi a loveya libandla gu khuye mu nga “thangini”  wupari naye. (1 Kor. 5:11) Sighohi si gu mba dzilaya si yede gu duswa libandlani. Si na ni lisima gu gira isoso gasi gu vhikheya vandriyathu nyo tumbege hi bwe hi aga kha nga Jehovha. w21.10 9-10 ¶7-8

Ha gu khozeya Jehovha tepo hi seketeyago thumo nya Mufumo khu miningelo yathu. Vaisrayeli va di yede gu ningeya miningelo Jehovha tepo va nga ba va hongola mibuzutunu. (Dhet. 16:16) Avo va di yede gu gira miningelo yawe guya khu giemo gyawe. Khu ndziya yeyi, va di gu yeyedza gu khavo va ngu bonga khu satshavbo esi Jehovha a nga ba ava gireya. Hi nga yeyedza kharini gubonga ni lihaladzo lathu khu Jehovha khu satshavbo esi a hi gireyago? Mweyo nya ndziya khu gu gira miningelo gasi gu seketeya libandla lathu ni thumo nya mafu yatshavbo khavba hi si kodzago khavbo. Mupostoli Pawulo ganede gu khuye: “Kholu muthu a gu nigela khu ligolo, satshavbo esi a na ningelago si na hakhwa khu matsenya, na siri egi muthu a gu mwalo nagyo.” (2 Kor. 8:4, 12) Jehovha a ngu tsaka ngudzu khesi hi kodzago gu ningeya, ambari nari sidugwana. — Marko 12:42-44. w22.03 24 ¶13

Khu lisine, madhota kha ma na nga si kodza gu vbedza satshavbo sigaradzo esi vathu va Jehovha va tshanganago naso. Ambari ulolo, Jehovha o vbweta gu khuye madhota ma gira satshavbo ma si kodzago gasi gu tiyisa ni gu vhikeya vathu vaye. Kha nga olu madhota ma gu na ni thumo nya wungi tepo yatshavbo, ma nga yi mana hayi tepo nyo ninge vandriyathu giphaso egi va gi vbwetago? Landra giyeyedzo gya mupostoli Pawulo. Pawulo tepo yatshavbo a di dzi emisede gu zundza ni gu tiyisa vandriyaye. Si na ni lisima gu madhota ma pimedzeya giyeyedzo gyaye khu gu ma haladza ni gu gireya wuwadi vandriyawe. (1 Tes. 2:7) Pawulo a embede vandriyaye gu khuye a di gu va haladza ni gu khuye Jehovha nuye a di gu va haladza. (2 Kor. 2:4; Efes. 2:4, 5) Pawulo a di gu phara vathu va libandlani gwaye kha nga dzipari dzaye nigu a di gu vbedza tepo navo. Uye yeyedzide gu khuye a di va tumba khu gu va bhuleya maningano ni esi si nga ba si mu garadza ni gu mba vbeleya gwaye. (2 Kor. 7:5; 1 Thim. 1:15) Ambari ulolo, Pawulo kha vega gupima avba nya sigaradzo saye. Vbavbandze nya isoso, uye a di gu vbweta gu phasa vandriyaye. w22.03 28 ¶9-10