So wonega gu khatshi Jesu a di gu thula masotshwa nya Varoma aya ma nga khokhotheya mandza ni migondro yaye avba nya simbo nya tshanisa. Jesu a diri mwalo nandru nyo ka a dinganedwa gu songwa, ganiolu kha diga gu divaleya ava va nga ba va mu wugeya. (1 Ped. 2:23) Gufana ni Jesu, gu vbwetega hi dzi emiseya gu divaleya vambe. (Kol. 3:13) Isoso, so pata valongo vathu va hi wugeyago adzina khu gu mba pwisisa esi hi si khodwago ni mavbanyelo yathu. Avo, adzina va nga ganeleya malipha khethu, va hi tshonegisa ga vambe vathu, va pferuleya mabhuku yathu mwendro gu hi tshanisa. Wulangani nyo goroge hi va vegeya giviti, hi nga lomba Jehovha gasi ava phasa guti lisine. (Mat. 5:44, 45) Dzimbe dzitepo, kha si vbevbugi gu divaleya, ngudzungudzu ha gu pharwa khu ndziya nya mba yadi. Ganiolu, ha gu simama ni giviti, hi si divaleyi, hi na dzi bayisa ethu va mune. (Ndzi. 37:8) Tepo hi hungago gu divaleya, ha gu hatha gu mba dzumeleya silo nyo vivbe si hi gira vathu nya likhulo.— Efes. 4:31, 32. w21.04 8-9 ¶3-4

Ina u na ni nongo mwendro pari yi dusidwego libandlani? Kha si kanakanisi gu khiso isoso si ngu vbedzana tshivba. Nga dundrugeya khu wuvi a wu pwidego Jehovha tepo dzingilozi nyo khaguri, sivbango nya ndranga yaye ya ndzadzini, dzi nga mu diga. (Judha 6) Nga dundrugeya gambe khu wuvi a wu pwidego tepo a nga kanyiswa ni gu wugedwa khu vathu a nga ba a va gola, va na Israyeli. (Ndzi. 78:41) Isoso so yeyedza gu khiso Papayi wathu wa ndzadzini a ngu vbisega nuye tepo muthu nyo khaguri u mu golago a digago gu mu thumeya. Uye a ngu pwisisa wuvi u wu pwago, khu kharato uye a na gu phasa a bwe a gu tiyisa dziteponi dzodzo. Gyo tshuka gyanana nyo khaguri gi diga Jehovha, vavelegi va ngu tala gu dzi wudzisa gu khavo ginani va nga mba gira gasi gu phasa gyanana gwawe gu simama lisineni. Ndriyathu moyo, ganede khuye: “Nyi di gu dzi ninga nandru khesi si nga dugeleya nigu dzimbe dzitepo nyi di gu lora silo nyo thise.” Ndriyathu moyo nya nyamayi a nga dugeledwa khu silo nyo fane, wari khuye a di gu tala khu dzi wudzisa gu khuye: “Khu hayini nyi nga phazama? Ina nyi giride satshavbo si nga ba si romo tshivbani gwangu gasi gu hevbudza lisine gyanana gyangu?” w21.09 26-27 ¶1-2, 4

Vambe vathu va gu pimisa gu khavo sithumi sa Jehovha kha si ninganedwi khu gu hevbudza vambe Bhibhiliya kholu kha va hevbula ga dzixikola nya lisima nya wukhongeyi. Ganiolu, avo va yede gu gevisisa gwadi satshavbo si pategago. Khiso a giridego mulovi nya Ivhangeli ya Luka, uye a di dzi emisede gu gira wugevisisi “gasi guti idzo si nga dugelelago khidzo gu pheyani.” Uye a di gu vbweta gu khuye vahevbuli nya mahungu yaya “vati lisine” maningano ni esi va nga ba va si pwide khu Jesu. (Luka 1:1-4) Vajudha va dhoropani ga Bhereya va di gu fana ni Luka. Tepo va ngapwa mahungu nya yadi maningano ni Jesu, avo va di gevisisa milowo nya Gihebheru gasi gu tiyisega gu khavo esi va nga sipwa lisine. (Mith. 17:11) Khu ndziya nyo fane, vathu muhuno va yede gu gevisisa satshavbo si pategago. Avo va yede gu fananisa sihevbudzo sa vathu va Nungungulu ni esi Milowo yi ganeyago. Avo va yede gambe gu hevbula khesi vathu va Nungungulu va girago muhuno. Va guti gwadi vathu va Nungungulu, kha va na nga khodwa avba nya silo nyo vivbe esi vathu va ganeyago maningano ni sithumi sa Nungungulu. w21.05 3-4 ¶7-8

Ina u ngu dundrugeya ndriyathu nyo khaguri wa libandlani gwago u nga hadzi mu konvhidhari gaya gwago gasi u ta vbungadza naye? Ga dzimbe dzitepo vandriyathu va na tsaka ngudzu ha gu dzi ninga tepo nya gu bhule navo. Vambe si ngu va garadzeya gu khala vbafuvbi ni valongo vawe va gu siri Dzifakazi dza Jehovha tepo va girago mibuzo yi gimbeleyanago ni wukhongeyi nya malipha. Vambe va ngupwa ngudzu guvbisa monyo tepo li vbohago litshigu a ngafa khilo muthu va mu golago. Ha gu dzi ninga tepo nyo khale vbafuvbi ni vandriyathu va tshanganago ni sigaradzo sesi, hi na yeyedza gu khethu hi ngu khatala khavo. (Filp. 2:20) Kha nga hi si wonidego, gu na ni sighelo nya singi si girago vandriyathu nya vangi vapwa wutundzu. Ambari ulolo, kha hi yeli gu divala gu khethu Jehovha a ngu pwisisa gwadi edzi hi dzipwago khidzo. Gu diga isoso, Uye tepo yatshavbo a ngu hi phasa khu gu thumisa vandriyathu. (Mat. 12:48-50) gasi gu yeyedza gu khethu hi ngu bonga Jehovha khu gu ba a hi ningide libandla, hi yede gu gira satshavbo hi si kodzago gasi gu phasa vandriyathu. Ni ga gevbini giemo u gomogo ga igyo, dundruga  gu khuwe kha wuri wenga. Jehovha tepo yatshavbo na ni uwe. w21.06 13 ¶18-20

Jesu manegide ni mawonelo nya yadi a bwe a simama gu tshumayela ambari tepo vathu va nga ba va si engisi mahungu yaye. Khu ginani? Uye a di gu dziti gu khuye vathu nya vangi va ngu dzina guti lisine, nigu uye a di gu vbweta gu va phasa gu dzumeya mahungu nya Mufumo. Uye gambe a di gu dziti gu khuye vambe kha va na nga dzegeya gu dzumeya mahungu nya Mufumo. Ganiolu khu gu gimbiya nya tepo va di hadzi gu vbindrugedza. Nga wona esi si dugeledego khu vandrangani ga Jesu. Uye vbedzide myaga miraru ni metado na gu tshumayela, ganiolu mwalo ni moyo nya vandriyaye a nga vbindrugedza a khala mupizane waye. (Joh. 7:5) Ganiolu, hwane nyo ba Jesu a wusidwe khu gufani, avo va khade Makristo. (Mith. 1:14) Ethu hi mwalo ndziya nya guti oyu a na dzumeyago gu thumeya Jehovha. Vambe va ngu dzega tepo gasi va hevbula lisine. Ambari vale gupheyani va si li tsakeyigo lisine avo va nga “rungudza Nungungulu” khu kotani nya mavbanyelo yathu. w21.05 18-19 ¶17-18

Tepo Jesu a nga ba ari mafuni, ningide valandreyi vaye sileletelo sivili. Uye a di va ruma gu tshumayela mahungu nya yadi nya Mufumo a bwe a va yeyedza edzi va nga girago khidzo isoso. (Luka 8:1) Khu giyeyedzo, Jesu a embede vapizane vaye esi va yedego gu gira tepo vathu va dzumeyago mahungu nya Mufumo ni tepo va bombago. (Luka 9:2-5) Uye gambe tshamusede vapizane vaye gu khuye va di hadzi tshumayela vathu nya vangi ni ga malanga nya mangi, tepo a nga va embeya gu khuye va di hadzi ningeya “wufakazi ga mayigo yatshavbo.” (Mat. 24:14; Mith. 1:8) Uye embede gambe, vapizane vaye gu hevbudza vathu gu landrisa satshavbo a va hevbudzidego. Jesu a yeyedzide gu khuye thumo wowo nya lisima wu di hadzi simama gu girwa kala matshigoni yathu mwendro “kala guhegisani nya litigo.” (Mat. 28:18-20) Nigu avbo nya giwoniso a ningidego Johane, Jesu si vegide guagani gu khuye a di gu vbweta gu vapizane vaye vatshavbo va phasa vambe gu hevbula maningano khu Jehovha. — Gutu. 22:17. w21.07 2-3 ¶3-4

Tigoni muhuno, vathu nya vangi va gu zama gu dzi gira nya tshukwana gu vbindra vambe ni gu avo kha va khatali khedzi isoso si khuhago khidzo vambe. Khu giyeyedzo, emprezariyu a vbwetago gu dugeleya gu vbindra vambe, adzina a nga gira silo si na khuhago vambe vathu khu ndziya nya mba yadi. Mututumi nyo khaguri a nga bayisa khagwenye mumbe mututumi wa wumbe tsawa khu gu vbweta gu pala. Gihevbuli adzina gi nga rengeleya gasi gi beya avba nya Univhersidhadhe nya ndruma. Ethu kha nga Makristo hi ngu dziti gu khethu isoso si vivbide. Isoso “mithumo ya tumbunugo nya wuthu.” (Gal. 5:19-21) Ganiolu, u ngu dziti gu khuwe vambe gwathu va nga haguleya liphuvbo nya mapalisana libandlani nya mba si tugula? Gwadi gu hi dzi woneya ga isoso kholu liphuvbo nya mapalisana li nga kabanisa libandla. Khyadi ngudzu gu hi wona siyeyedzo sa vama ni vanyamayi nyo tumbege, va dziteponi nya gu lowe nya Bhibhiliya, va nga mba dzumeya gu thegeya omu nya liphuvbo nya mapalisana. w21.07 14 ¶1-2

Lihaladzo nyo tumbege la gu hi kutsa gu phasa vale va vbedego tshivba. Vandriyathu va gu na ni wuwadi muhuno va ngu dzi garadza gasi gu phasa ava va vbedego tshivba libandlani. Avo va gu gira isoso kholu va ngu haladza vandriyawe nigu va ngu dzina gu gira satshavbo va si kodzago gasi gu va phasa. (Mav. 12:25; 224:10) Isoso si ngu pwanana ni wusingalagadzi wa mupostoli Pawulo a nga khuye: “Tiyiselani ava va rerekago, sayisani vadwali, mu hunisela vatshavbo.” (1 Tes. 5:14) Gutala nya dzitepo, ndziya nya yadi nya gu phase muthu a vbedego tshivba, khu gu mu engiseya gwadi hi bwe hi mu tiyisegisa gu khethu hi ngu mu haladza. Jehovha a ngu tsaka ngudzu khu vale va yeyedzago wuwadi ni gu khatala khu sithumi saye. Mavingu 19:17 wari khuye: “Uye a phasago gisiwana a gu fiyarisa PFHUMU Nungungulu, Uye a na mu bweledzela wuwadi waye.” w21.11 10 ¶11-12

Hi nga dzi dongiseya kharini olu gasi gu emisana ni esi si na hi dugeleyago mindru watshigu? Ethu hi yede gu tsaka khesi hi gu naso hi bwe hi tsaka khu olu hi gu na ni wupari nyo tiye ni Jehovha. Tepo hi yago hi muti gwadi Nungungulu wathu, hi nga tiyisega gu khethu uye a na hi vhikeya tepo Goge wa Magoge a na hi wugeyago. Malito nya lowo wa muhuno ma gu yeyedza gu khayo khu ginani Dhavhidhe a nga ba a tumba giphaso gya Jehovha. Dhavhidhe tepo yatshavbo a di gu tumba Jehovha, nigu Nungungulu waye, gima kha mu diga. Tepo Dhavhidhe a nga ba ari muphya, dwanide ni mwama moyo nya tshivba nyo pwane khu Gholiya nigu a di mu embeya na tiyide khuye: “Muhuno kamwe PFHUMU Nungungulu a na gu ningela mandzani gwangu.” (1 Sam. 17:46) Khu hwane, tepo Dhavhidhe a nga ba ari pfhumu, Sawule zamide gu mu songa khu dzitepo nya dzingi. Ganiolu, Jehovha “a di ema” ni Dhavhidhe. (1 Sam. 18:12) Kha nga olu Dhavhidhe a nga ba a wonide giphaso gya Jehovha tepwana hwane, uye a di gu dziti gu khuye Jehovha a di hadzi gu mu phasa ga gigaradzo gile. w22.01 6-7 ¶14-15

Ga satshavbo esi Jehovha a giridego dzegide tepo nyo laphe gasi a vbedzisa thumo waye. Uye giride isoso gasi gu dhumisa lina laye a bwe a phasa vambe. Khu giyeyedzo, Jehovha dongisede mafu vbadugwanavbadugwana gasi gu ninga vathu. Bhibhiliya ya gu ba yi ganeya khu isoso yari khiyo uye “vegide mivbingano” a theya “khokweni yakona” a bwe a vega “madingo yaye.” (Joba 38:5, 6) Uye a dzi ningide tepo nyo gevisise thumo waye. (Gen. 1:10, 12) Nga dundrugeya khedzi dzingilozi dzi dzipwidego khidzo tepo dzi nga wona Jehovha na gu vanga silo nya siphya! Khu lisine, idzo dzi tsakide ngudzu. Khu kotani nya olu dzi nga ba dzi tsakide, idzo dzi di “womba mikulungwane.” Ginani hi gi hevbulago? Si dzegide mazanazana nya myaga gasi Jehovha a vanga mafu, dzinyeledzi ni satshavbo sivangwa si vbanyago. Ganiolu, tepo Jehovha a nga khedzisa satshavbo a si vangidego uye a di khuye “satshavbo si diri sadi ngudzu.” — Gen. 1:31. w21.08 9-10 ¶6-7

Avba nya gipimaniso nya dzitalenta, Jesu ganede khu mwama moyo a nga ba a vbweta gu endra. Na si gu hongoli, uwe ranide sithumi saye a ta si ninga dzitalenta nyo khaguri gasi si tshala si velegisa. Uye a di gu dziti gu khuye sithumi saye si na ni makodzelo nyo hambane, khu kharato gimwegyo a di gi ninga 5 dzitalenta, gimbe a gi ninga dzimbili nigu gimbe a di gi ninga mweyo. Sithumi sivili si velegiside dzitsapawu si nga ningwago. Ganiolu, igyo nya wuraru kha gya gira gilo khu dzitsapawu dzile, khu ndziya yoyo igyo gi di tutumiswa khu mune wagyo. Githumi nyo pheye ni egi nya wuvili si wonide thumo va nga ningwa kha nga gilo nya lisima, nigu iso si thumide ngudzu gasi thumeya mune waso. Kha nga handro wakone, iso si tshade si velegisa dzitalenta si nga ningwa. Khu gu ba si thumide khu sighingi iso si manide wuyelo nya yadi. Iso kha sa tsakedwa basi khu mune waso, ganiolu uye a si wonide na si gu ninganedwa khu gu gira yimbe mithumo. w21.08 21 ¶7; 22 ¶9-10

Ga matshigu yaya nyo hegise, Jehovha a ngu laphisa ngudzu monyo. Jehovha kha vbweti ni moyo wathu a mbembiswa. (2 Ped. 3:9) Jehovha a gu ninga lithomo vatshavbo gasi va dzi laya. Ganiolu, uye kha na nga laphisa monyo kala gupindruga. Avo va bombago gu seketeya mufumo wa Nungungulu, va na tshangana ni esi si giregidego Faro matshigoni ya Mosi. Jehovha a di embeya Faro khuye: “Kholu nari gukhwatshi nyi khuside libogo langu; nari pwani nyi thumiside tshivba yangu nyi gu veta khu tungu, uwe ni vathu vago, olu na mu mbembide mu vbela mafuni. Aholu nyi gu digide u vbanya, khu gufela gukheni u wone tshivba yangu, ni gukheni lina Iangu li tidwe tigoni gwatshavbo.” (Ekiso. 9:15, 16) Mayigo yatshavbo ma na dziti gu khayo Jehovha khuye enga Nungungulu nya lisine. (Ezek. 38:23) Gutsekatseka gogu gu khumbugidwego avbo nya lowo wa muhuno go tshamuseya gu khugo gu fana ni Faro, avo va bombago Jehovha kha nga mufumeyi va na fuviswa kala gupindruga. w21.09 18-19 ¶17-18

Ina u ngu dzipwa wutundzu monyoni gwago kholu muthu u mu golago a dusidwego libandlani? Nigu ahati vo tshuka vandriyathu nyo khaguri libandlani va ganeya silo si gu vbedzago tshivba ke, ginani u nga girago? Khu lisine, khandri tepo yatshavbo vathu va na ganeyago silo nya sadi. (Jak. 3:2) Hatshavbo kha ha vbeleya, khu kharato u nga thurugi a tshuka muthu nyo khaguri a si giti gilo nyo ganeye mwendro kamo va gu tshuka va gu embeya silo si na gu vbisago monyo. Dudruga wusingalagadzi wa Pawulo wu gu khuwo: “Phasedzanani mu tsetselelana khu gyanu.” (Kol. 3:13) Simama gu phasa sivbango nya ndranga sa oyu a dusidwego libandlani. Olu avo va ngu vbweta ngudzu giphaso gyago ni gu yeyedzwa lihaladzo guvbindra gale. (Hebh. 10:24, 25) Dzimbe dzitepo vandriyathu nyo khaguri va ngu ema gu bhula ni sivbango nya ndraga sa oyu a dusidwego libandlani nigu avo va gu dzipwa nga khatshi anavo va di duswa libandlani. Kha hi vbweti gu khethu avo va dzipwa khu ndziya yoyo! Hi yede gu zundza ni gu tiyisa vaphya ava vavelegi vawe va digidego gu thumeya Jehovha. w21.09 29 ¶13-14; 30 ¶16

Tepo vandriyathu va dandrigedo khu tanga ni vaphya va bhulago vatshavbo, va gu tiyisana. (Rom. 1:12) Vaphya va gu engedzeya gu tumba nya gu khavo Jehovha a ngu sayisa sithumi saye nyo tumbege, nigu ava va dandridego khu tanga va gu dzipwa na va gu haladzwa. Vandriyathu va dandridego khu tanga va na tsaka ngudzu khu gu gu tshamuseya matshango yawe nya edzi Jehovha a va kategisidego khidzo womini wawe. Khu lisine gumbura nya givili gu ngu vbeya tepo vathu va gumbago, ganiolu vale va simamago na va tumbegide Jehovha a gu wona na va mburide tshigu ni tshigu. (1 Tes. 1:2, 3) Khu ginani hi ganeyago isoso? Khu gu avo tepo yatshavbo va di gu dzumeya gu gimbidziswa khu liphuvbo la Nungungulu, li bwe li va phasa gu haguleya makhalelo nya yadi. Tepo hi tigo gwadi vandriyathu vava nya gu hathege hi bwe hi hevbula nya singi gwawe ho dzegeya gu si wona gu khethu khu lisine avo sinigwa nya lisima. Libandla la gu engedzeya gu tiya tepo vaphya va wonago vandriyathu va dandridego khu tanga kha nga vathu nya lisima, ni tepo vandriyathu va dandridego khu tanga va wonago vaphya kha nga vathu nya lisima. w21.09 7 ¶16-18

Hi yede gu simama gu potsa gu khala vathu nya dzihanyi, ganiolu hi khala vathu nya gu tale khu “wuwadi nya wukhongolo” gu fana ni Nungungulu. (Efes. 2:4) Muthu nya wuhindzi a ngu gira nya singi gasi gu phasa vambe, wulangani nyo va pweye basi wusiwana. Hatshavbo hi nga dzi garadzeya gu wona ava va vbwetago giphaso ndragani gwathu, libandlani mwendro omu hi vbanyago umo. Khu ndziya yoyo, hi na mana mathomo nya mangi nyo yeyedze wuhindzi. Ina womo muthu u mutigo a vbwetago gu thaveledwa? Adzina u nga mu tiyisa khu gu mu phasa gu phula ni gu gira yimbe mithumo. Ina womo ndriyathu nyo khaguri a wuyisedwego libandlani a vbwetago pari nya yadi gasi yi mu thaveleya ni gu mu tiyisa? Ina hi nga thaveleya vambe khu gu va bhuleya mahungu nya yadi? (Joba 29:12, 13; Rom. 10:14, 15; Jak. 1:27) Ha gu vega gupima avba nya esi vambe va si vbwetago, hi na wona gu khethu hi na ni mathomo nya mangi nya gu yeyedze wuhindzi. Tepo hi yeyedzago wuhindzi, ha gu tsakisa Papayi wathu wa ndzadzini kholu uye ‘tade khu wuhindzi!’ w21.10 13 ¶21-22

Dhavhidhe khumbugide silo nya lisima ngudzu a ningidwego khu Jehovha kholu a nga mu dzumeya kha nga muhavisi waye. Jehovha a mu gimbidziside “dzindzilani nya gululame” nigu uye seketede Dhavhidhe ga dzitepo nyo tsakise ni edzi nya mba dzadi. Dhavhidhe a di gu dziti gu khuye ambari olu a nga ba a romo ‘panini ga Jehovha nya mwasi nya gu nyuge,’ uye a di hadzi emisana ni sigaradzo womini gwaye. Dzimbe dzitepo uye adzina a vbede tshivba nyo bwe a gira gu khatsi “a gimbila kovani nya gidema nya lufu” nigu a di hadzi manana ni valala. Ganiolu, kha nga olu Jehovha a nga ba ari muhavisi waye, Dhavhidhe a di hadzi gu mba “thava gilo.” Dhavhidhe ‘a di si keneledwi khu gilo’ khu ndziya muni? Uye a diri ni satshavbo a nga ba a si vbweta khu liphuvboni. Litsako laye li di si dzi seketeyi avba nya dzithomba. Dhavhidhe a di gu tsaka khesi Jehovha a nga ba a mu ninga. Egi gi nga ba giri ni lisima gwaye gu diri makategwa ya Jehovha ni gu vhikedwa khuye. Malito ya Dhavhidhe ma gu hi  phasa gu pwisisa gu khayo si na ni lisima gu mba thangisa dzithomba womini gwathu. w22.01 3-4 ¶5-7

Gupheyani Dzifakazi dza Jehovha dzi di gu tshumayela vathu va nga ba va si dzini gu engiseya mahungu yawe. Khu giyeyedzo Nowa huwelede “guvbanya nya gululame gwa Nungungulu,” adzina saye khu 40 mwendro 50 myaga. (2 Ped. 2:5) Nya mba kanakana Nowa a di gu vbweta gu khuye vathu va mu engisa, ganiolu Jehovha kha ganeya gu khuye isoso si di hadzi gu girega. Wulangani nya isoso, tepo Nungungulu a nga ninga sileletelo Nowa nya gu vbahe litaro uye a di khuye: “U na bela litaroni uwe ni sanana sago, mwangadzi wago ni vagadzi va sanana sago.” (Gen. 6:18) Nigu, tepo Nungungulu a nga tshamuseya Nowa dzimedhidha nya ngalava, adzina Nowa tugude gu khuye khandri vatshavbo va nga hadzi gu mu engisa kholu va di hadzi gu mba eneya mule. (Gen. 6:15) Kha nga hi dzitigo, mwalo ni moyo a nga engisago Nowa. (Gen. 7:7) Ina Jehovha pimiside gu khuye Nowa kha gira gwadi thumo nyo tshumayele? Khu lisine ne. Jehovha tsakide ngudzu khu Nowa kholu a giride satshavbo a nga mu ruma. — Gen. 6:22. w21.10 26 ¶10-11

Nga dundrugeya khedzi Rute a dzipwidego khidzo tepo a ngapwa malito yaya. Rute giride satshavbo a nga si kodza gasi gu phasa Nowemi. Khu giyeyedzo, uye a lide naye, a mu thavelede nigu a gimbide matshigu nya mangi naye. Ambari olu Rute a giridego satshavbo soso, Nowemi a di khuye: “PFHUMU Nungungulu a nyi wuyiside na nyiri liphanga.” Esi Nowemi a ganedego si di gira gu khatshi kha nga ba a ninga lisima giphaso a nga ba a ningwa khu Rute. Tepo Nowemi a nga ganeya malito yaya, Rute a diri vbafuvbi gwaye. Nga dundrugeya edzi si mu vbisidego khidzo Rute tepo a ngapwa malito yaya! Ambari ulolo, uye simamide ni Nowemi. (Rute 1:3-18) Si nga gira ndriyathu nya nyamayi a vbedego tshivba a ganeya silo si nga hi gorosago ambari na hi gu gira satshavbo hi si kodzago gasi gu mu phasa. Ganiolu, ethu kha hi yeli gu goroga. Hi yede gu phasa ndriyathu hi bwe hi lomba Jehovha gasi a hi phasa gu mana ndziya nya gu mu thaveleye. (Mav. 17:17) Ndriyathu nyo khaguri a vbwetago giphaso gupheyani adzina a nga bomba giphaso gyathu. Ambari ulolo, lihaladzo nyo tumbege li na hi kutsa gu gira satshavbo hi si kodzago gasi gu khala naye. — Gal. 6:2. w21.11 11-12 ¶18-19

Umo nya Bhibhiliya lito “guaga” lo thula guaga umo nya mavbanyelo yathu ni umo nya wukhongeyi. Lito leli gambe li nga thula gu vega khu bambe silo nyo khaguri. Khu mambe maganelelo, hi na wonwa na hi ri vathu nya guage ha gu manega ni mavbanyelo ma agidego, hi khozeya Jehovha khu ndziya a yi tsakeyago hi bwe hi manega ni wupari nyo tiye naye. Si ngu hi hlamadzisa gu wona gu khethu ambari olu hi nga mba vbeleya, Jehovha a agidego a nga gu dzina gu manega ni wupari nyo tiye ni ethu. Jehovha agide khu dzindziya dzatshavbo. Hi nga hevbula isoso khu esi si ganedwego khu dziserafini mwendro dzingilozi dzi khalago vbafuvbi ni gikhalo gya Jehovha. Dzingilozi nyo khaguri dzi di huweleya khidzo: “Agide, agide, agide Pfhumu Nungungulu nya tshivba yatshavbo.” (Isa. 6:3) Dzingilozi dzedzi dzi nga manega ni wupari nyo tiye ni Nungungulu a agidego, kholu anidzo dzi agide. w21.12 3 ¶4-5

Vaphya va ngu garadzega khedzi va nga londrolago khidzo womi wawe. Vahevbudzi ni valongo va gu siri Difakazi dza Jehovha, adzina va nga va kutsa gu hongola univhersidhadhe gasi va si kodza gu mana thumo nya wadi wu na va ningago dzitsapawu nya dzingi. Sihevbulo soso nyo khugege si nga va vbedzeya tepo nya yingi, ganiolu valongo ni dzipari libandlani adzina va nga kutsa vaphya gu londrola womi wawe gasi gu thumeya Jehovha. Ginani gi na phasago muphya a haladzago Jehovha gu hunga silo nya sadi womini gwaye? Uye a nga phasega khu gu hevbula libhuku la Vaefeso 5:15-17 a bwe a dundrugeya khilo. Hwane nya gu ba muphya a hevbude mavhesi yaya, a nga dzi wudzisa gu khuye: ‘Ginani egi Jehovha a gi “golago?” Khu sevbini silo si na mu tsakisago? Nigu khu yavbini makungu ma na nyi phasago gu thumisa gwadi tepo yangu?’ Dundruga gu khuwe “matshigo ya muhuno ma vivbide,” nigu litigo leli li fumedwago khu Sathane li na fuviswa nugunugu. w22.01 27 ¶5

Jakobe khade lini mulandreyi wa Jesu? Hwane nya gu ba Jesu a wusidwe khu gufani, uye a di “wonega ga Jakobe ni ga vapostoli vatshavbo.” (1 Kor. 15:7) Hwane nya gu ba a mananide ni Jesu, Jakobe a di khala moyo nya vapizane vaye. Uye a diri vbale tepo vapizane va nga ba va vireya gu hakha liphuvbo nya guage nyumbani ya vbatshani Jerusalema. (Mith. 1:13, 14) Khu gu landreya, Jakobe tsakide khu gu thuma kha nga givbango nya huwo nya guthangeye ya lizana myaga nyo pheye. (Mith. 15:6, 13-22; Gal. 2:9) Nigu, na gu si vbohi mwaga nya wu 62 matshigoni yathu, uye phasidwe khu liphuvbo nya guage gasi gu loveya lidangaliya Makristo nya gutodzwe. Lidangaliya lolo li gu hi phasa muhuno, gani hi na ni gutumba nya gu vbanye kala gupindruga ndzadzini mwendro mafuni. (Jak. 1:1) Mulovi moyo nya matimo nya Mujudha nyo pwane khu Josefo, lovide gu khuye Muprista moyo nya khongolo nyo pwane khu Ananiya rumide gu khuye Jakobe a songwa. Jakobe simamide na tumbegide ga Jehovha kala afa. w22.01 8 ¶3; 9 ¶5

Avba nya lowo wa muhuno hi nga hevbula gu khethu, kha hi yeli gu vireya gu khethu Jehovha a hi vhikeya ga silo si lingago gukhodwa gwathu. Gufana ni Jesu a nga lingwa kala a yafa, anethu hi yede gu dzi emiseya gu lingwa kala hi yafa sa gu lomba. (Mat. 16:24, 25) Ganiolu, Nungungulu a ngu hi tumbisa gu khuye kha hi na nga tshangana ni sigaradzo nyo vbindre tshivba yathu. (1 Kor. 10:13) Gimbe gilo hi gi hevbulago, khu gu, gufana ni Jesu anethu hi na tshaniswa nya mba na nandru. (1 Ped. 2:19, 20) Ava va hi wugeyago, khandri vo gira isoso khu gu ba hi giride silo nyo vivbe, ganiolu, khu gu kha hi giri gipandre nya litigo leli nigu ethu ha gu emeya lisine. (Joh. 17:14; 1 Ped. 4:15, 16) Jesu a di gu si pwisisa gu khuye khu ginani Jehovha a nga ba a dzumeleya gu a tshaniswa. Ganiolu, vambe vandriyathu nyo tumbege, tepo va tshanganago ni sigaradzo, va ngu dzi wudzisa gu khavo khu ginani Jehovha a dzumeleyago isoso. (Habh. 1:3) Jehovha a ngu si pwisisa gu khuye khu gu ba va pimisa kharato, khandri gu va mwalo gukhodwa, ganiolu, avo vo vbweta gu thaveledwa ogu uye basi a nga va ningago. — 2 Kor. 1:3, 4. w21.04 11 ¶10

Jehovha a na dzumeya wukhozeyi wathu wa gu ba wu pwanana ni gugola gwaye nigu na hi gu mu khozeya khu lihaladzo ni githawo. Ethu hi ngu dziti gu khethu Jehovha a ngu yedwa khu gu khozedwa, nigu ho vbweta gu khethu wukhozeyi wathu wu khala nya tshukwana. Mweyo nya ndzidziya yi nga khozeyago Jehovha tepo hi gombeyago gwaye. Milowo ya gu fananisa milombelo yathu ni libani li dongisedwego gwadi gasi gu ya ningedwa omu nya tabhernakeli ni umo nya tempele. Libani lolo li di gu tsakisa Nungungulu. Khu ndziya nyo fane, milombelo yathu nyo khugeye monyoni yi ngu mu “tsakisa” ambari ha gu thumisa malito nya madugwana. (Mav. 15:8; Dhet. 33:10) Jehovha a ngu tsaka tepo a hipwago na hi gu mu bonga ni gu ganeya edzi hi mu haladzago khidzo. Uye o vbweta gu khuye hi mu embeya esi si hi garadzago, gutumba gwathu ni esi hi si vbwetago. Na wu nga si ganeyi ni Jehovha khu nombelo, u nga pheya khu gu pimisa gwadi khesi u vbwetago gu ganeya. Wa gu gira isoso, u na ningeya “libani” nya ladi ga Papayi wago wa ndzadzini. w22.03 20 ¶2; 21 ¶7

Harmagedhoni, ethu kha hi na nga hunga oyu a yedego gu hakha wuhindzi wa Jehovha ni oyu a gu mba yela gu wu hakha. (Mat. 25:34, 41, 46) Ina ethu hi na tumba malamulelo ya Jehovha mwendro hi na diga gu mu thumeya khu gu mba dzumeleyana ni esi a si hungago? Khu lisine, hi yede gu tumba Jehovha olu gasi hi ta si kodza gu mu tumba mindru wa tshigu. Nga dundrugeya edzi hi na dzipwago khidzo mafuni nya maphya. Ndrani nya tepo yoyo, gu na ba gu ri mwalo wukhongeyi nya malipha nigu gu na ba gu ri mwalo dzinogosi nya wukanganyisi mwendro wufumo wu wugeyago vathu ni gu va tshanisa. Gigaradzo nya madwali, gu gumba ni gu fedwa khu sigodwa sathu kha si na nga gira gambe gipandre nya womi wathu. Sathane ni madhemoni va na khothedwa khu 1000 myaga, satshavbo si giregago khu kotani nya gu wugeli wawe kha si na nga manega gambe. (Gutu. 20:2, 3) Hi na bonga gundzu khu gu ba hi tumbide ndziya eyi Jehovha a girago khiyo silo! w22.02 6-7 ¶16-17

Jesu dzi garadzede gu andrisa gurula nigu kutside vambe gu lulamisa sigaradzo sawe. Uye va hevbudzide gu khuye va yede gu andrisa gurula ni vandriyawe va gu ba va vbweta gu khavo Jehovha a hakha wukhozeyi wawe. (Mat. 5:23, 24) Nigu dzitepo nya dzingi uye phaside vapostoli vaye gu diga gu ganedzisana khu gu vbweta guti gu khavo khu mani a gu khongolo vbakari gwawe. (Luka 9:46-48; 22:24-27) Gasi gu andrisa gurula gu vbwetega hi gira nya singi gu vbindra basi gu potsa mayunga. Gu vbwetega hi pheya khethu gu andrisa gurula ni vambe hi bwe hi kutsa vandriyathu gu lulamisa sigaradzo sawe. (Filp. 4:2, 3; Jak. 3:17, 18) Hi nga dzi wudzisa gu khethu: ‘Nyi yede gu dzi emiseya gu gira ginani gasi gu andrisa gurula ni vambe? Tepo vandriyathu va nyi khunguvanyisago, ina nyi ngu va vegeya giviti? Ina nyo vireya gu kheni mumbe muthu a nyi hidzimeleya gasi gu ta andrisa gurula mwendro nyo pheya kheni, ambari na nyi gu dziti gu kheni khuye a nga vanga gigaradzo? w22.03 10-11 ¶10-11

Bhibhiliya yi profetide gu khiyo vathu va Nungungulu va di hadzi gu ‘dzi ningeya’ gasi gu thumeya Jehovha na va gu landrisa sileletelo sa Jesu. (Ndzi. 110:3) Khu lisine, giprofeto gegi gi ngu tadzisega muhuno. Mwaga ni mwaga, sithumi nyo tumbege sa Jehovha si ngu vbedza dzimiliyoni nya dziora thumoni nyo tshumayele. Avo khava livbwi gilo gasi gu gira thumo wowu, ganiolu va gu gira isoso khu gu dzina. Avo gambe va ngu phasa vandriyawe khu gu va ninga esi si va keneleyago, va va tiyisa ni gu phasa gu tiyisa gukhodwa gwawe. Madhota ni vaphasedzeyi nya libandla va ngu vbedza dziora nya dzingi na va gu donga sipandre ni gu wuseya vandriyawe gasi gu va tiyisa. Ginani gi kutsago vathu va Jehovha gu gira yatshavbo mithumo yeyi? Lihaladzo. Avo va ngu haladza Jehovha ni vathu. (Mat. 22:37-39) Jesu yeyedzide gu khuye a di gu khathala khesi sa vambe guvbindra esi saye. Ethu ho zama gu gira satshavbo hi si kodzago gasi gu mu pimedzeya. (Rom. 15:1-3) Ha gu gira isoso hi na mana mihandro nya yadi. w22.02 20 ¶1-2

Tigoni ga Israyeli vathu nya vangi va di gu thuma kha nga valimi nigu tshigu ni tshigu hwane nya thumo va di yede gu livba sithumi sawe. Githumi gya gu mba livbwa hwane nya thumo, adzina gi di hadzi gu hamuga dzitsapawu nya gu hodzise ndraga yagyo litshigu lolo. Jehovha a di khuye: “Uye gisiwana a gu lirela gu hakha gasi gu vbanya khiso.” (Dhet. 24:14, 15; Mat. 20:8) Muhuno sithumi so livbwa guvbeyani nya ngima moyo mwendro mivili, na siri tshigu ni tshigu. Ambari ulolo, litshina nya nayo li gomogo umo ga Levhi 19:13 li ngo thuma kala muhuno. Vambe vapatrawu va ngu londrowa sithumi sawe khu si hakhisa dzitsapawu nya dzidugwana nya gu kha dzi faneyi thumo va wu thumago. Avo va ngu dziti gu khavo sithumi sesi adzina si ngu vbweta ngudzu dzitsapawu, khu kharato si na simama gu va thumeya ambari va gu si hakhisa dzitsapawu nya dzidugwana. Khu ndziya nyo khaguri vapatrawu vava ‘va gu khala ni hakhelo ya sithumi sawe.’ Mukristo a girago dzinogosi yede gu tiyisega gu khuye a ngu thumisana gwadi ni sithumi saye gani. w21.12 10 ¶9-10

Hwane nyo ba Jesu a tshanisidwe ngudzu uye a dipwa lidora. Uye a di gu vbweta giphaso gya vambe gasi gu tshima lidora. Jesu kha pimisa gu khuye gu ganeya edzi a nga ba a dzipwa khidzo, so yeyedza khiso khandri wa gilo. Anethu hi yede gu ganeya edzi hi dzipwago khidzo. Gutala nya dzitepo womini wathu hi ngu hatha gu mba bhuleya vambe esi hi si vbwetago. Ganiolu, ha gu ba hi vbweta giphaso, kha hi yeli gu khala hwanga gu lomba. Khu giyeyedzo, ha gu ba hi gumbide mwendro gu ba hi dwala, hi nga lomba pari gasi yi hi ninga bholeya hi hongola bazaritunu mwendro xipitali. Ho ba ha sa tsaka mwendro gu dzipwa na hi vbede tshivba, hi nga lomba lidhota mwendro Mukristo a vidzidwego gasi a hi engiseya mwendro gu hi embeya “magana nya yadi” ma na tsakisago monyo wathu. (Mav. 12:25) Dundruga gu khuwe vandriyathu va ngu hi haladza nigu va gu vbweta gu hi phasa “gikhatini nya wuvi.” (Mav. 17:17) Ganiolu avo kha va si kodzi gu wona myonyo yathu. Avo kha va na nga siti esi hi si vbwetago ha gu mba va embeya. w21.04 11-12 ¶11-12

Nya vangi gwathu si ngu va garadzeya tepo giemo gi vbindrugedzago. Vathu nyo khaguri va nga ba va thuma avbo nya thumo nya tepo yatshavbo khu tepo nyo laphe, va vbindrugedzide thumo. Vambe si lombide gu va diga gu gira thumo wawe va nga ba va wu gola khu kotani nya tanga yawe. Si olovegide gu hi vbeya tshivba tepo hi tshanganago ni gu vbindrugedza gogu. Si ngu hi vbevbugeya gu dzi pwananisa ni giemo nya giphya tepo hi zamago gu wona giemo gyathu nga edzi Jehovha a gi wonago khidzo. Uye a ngu gira silo nya si khongolo muhuno, nigu hi na ni lithomo nya gu thume gumogo naye. (1 Kor. 3:9) Lihaladzo la Jehovha khethu kha li na nga vbindrugedza. Wa gu tshuka u kuhwa khu gu vbindrugedza nyo khaguri gu giridwego hengeledzanoni, u nga vbedzi tepo na wu gu pimisa khu satshavbo sighelo si nga girisa gu gu manega gu vbindrugedza gogo. Wulangani nya gu vireye gu khuwe womi wago wu khala nga edzi wu nga ba wu khade khidzo ga “dzinango dza gale”, lomba Jehovha gasi a gu phasa gu wona silo nya sadi avba nya gu vbindrugedza gu giridwego. (Muh. 7:10) Simama ni mawonelo nya yadi khu silo. Khu kharato, hi na simama na hi tsakide ni gu tumbega ambari giemo gyathu gya gu vbindrugedza. w22.03 17-18 ¶11-12

Jehovha a gu yeyedza lihaladzo nyo tumbege ga vamani? Bhibhiliya ya gu hi embeya gu khiyo ethu hi nga gola silo nya singi nya nga “wulimi,” “vbinyu ni mafura,” “gu kawukwa,” “guti.” Esi silo nyo khaguri basi. (2 Dzik. 26:10; Mav. 12:1; 21:17; 29:3) Kha si kodzegi gu yeyedza lihaladzo nyo tumbege ga silo, ganiolu hi nga li yeyedza basi ga vathu. Ganiolu, Jehovha kha yeyedzi lihaladzo laye nyo tumbege ni ga wevbini muthu. Uye a gu yeyedza basi lihaladzo laye nyo tumbege ga vale va gu na ni wupari nyo tiye naye. Nungungulu wathu a ngu tumbega ga dzipari dzaye. Nungungulu wathu a na ni makungo nya gu samadzise khu moyo ni moyo nya sithumi saye nigu uye gima kha na nga diga gu si haladza. Jehovha yeyedzide lihaladzo ga vatshavbo vathu. Jesu embede mwama moyo nya gu pwane khu Nikodhemo gu khuye: “Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge”. — Joh. 3:1, 16; Mat. 5:44, 45. w21.11 3-4 ¶6-7

Womi tigoni momo wu ngu lemeya nigu ga matshigu ma landreyago adzina si na lomba gu hi timiseya sigaradzo nya sikhongolo. (Mat. 24:21) Hi virede khu maho nyo fuviye litshigu leli sigaradzo sesi si na fuviswago nigu gima kha hi nanga si dundruga gambe! (Isa. 65:16, 17) Khu kharato, hi yede gu simama gu timiseya. Khu ginani? Kholu Jesu a di khuye: “Khu gu timisela gwanu, mu na vbanyisa mihefemulo yanu.” (Luka 21:19) Gu dundrugeya khu vambe va si kodzidego gu timiseya sigaradzo nya nga esi sathu si na hi phasa nethu gu timiseya. Khu mani a gu giyeyedzo nya gyadi nya gu timiseye? Khu Jehovha Nungungulu. Si ngu gu hlamadzisa? Dundrugeya khesi: Litigo leli lo fumedwa khu Dhiyabulosi nigu li tade khu sigaradzo. Jehovha a na ni tshivba nya gu fuvise sigaradzo sesi khu gitepwana basi, ganiolu uye a gu vireya litshigu a li vegisidego gasi a gira isoso. (Rom. 9:22) Na li si gu vbohi litshigu leli, ginani egi Uye a girago? A gu simama gu timiseya. w21.07 8-9 ¶3-4