Gasi gu hi phasa guti gwadi Gyanana gyaye, Jehovha patide 4 Dziivhangeli dzi ganeyago khu womi wa Jesu ni thumo waye nyo tshumayele omu nya Lito laye. Mabhuku yaya ma gu tshamuseya esi Jesu a ganedego ni gu gira nigu ma ngu hi yeyedza edzi a dzipwidego khidzo. Khu gu phaswa khu mabhuku yaya nya 4, a gu libhuku la Matewu, Marko, Luka ni Johane, hi nga si kodza gu dundrugeya gwadi khu giyeyedzo gya Jesu. Mabhuku yaya ma na ni dzipasu edzi Jesu a hi tshiyedego. Khu kharato, ha gu vbweta guti gwadi Jesu Kristo, hi yede gu ma hevbula. Ha gu gira isoso, hi na si kodza gu landreya gwadi dzipasu dzaye. Gasi gu hi phasega gwadi khu mabhuku yaya, gu vbwetega hi gira nya singi gu vbindra gu ma leri basi. Hi yede gu dzi ninga tepo nyo ma leri hi bwe hi dundrugeya gwadi khayo. (Fananisa ni Josuwa 1:8.) Gira gu mabhuku yaya ma manega ni tshivba. Thumisa mapimo yago gasi gu wona ni gupwa esi si nga ba si girega. Gira dzipesquiza nyo khaguri khu gu thumisa dziferameta nya dzingi nyo hevbule khidzo hi ningwago khu hengeledzano ya Jehovha. w21.04 4-5 ¶11-13

Mazanazana myaga hwane Jesu na a si guti mafuni, Jehovha a di yeyedzide umo nya Lito laye khuye Mesiya a di hadzi ningedwa ga valala khu 30 singerengere nya parata. (Zak. 11:12, 13) Uye a nga hadzi mu ningeya pari yaye. (Ndzi. 41:9) Muprofeti Zakariya anuye lovide khuye: “Bayisa Muhavisi dzi fela gu phalalega dzinvuta.” (Zak. 13:7) Vathu nya myonyo nya yadi va di hadzi gu mba diga gu khodwa ga Jesu khu kotani nya esi si dugeledego. Wulangani nya isoso, gu wona siprofeto sesi na si gu tadzisega avbo ga Jesu na si engedzede gu tiyisa gukhodwa gwawe. Ina muhuno hi na ni gigaradzo gya gimwegyo? Ina. Muhuno vathu va nga ba va tidwa kha nga Dzifakazi dza Jehovha va digide lisine va khala vawugeyi nigu va gu zama gu ndreyisa vambe. Avo va gu phalalegiseya mahungu nya mba yadi ni malipha khu Dzifakazi dza Jehovha, khu gu thumisa dzijornali, Radhiyu, TV ni Interneti. Ganiolu, avo va gu ni myonyo nya yadi kha va tshunganeyi khu kotani nya isoso, wulangani nya isoso, avo va ngu dziti gu khavo Bhibhiliya yi di profetide gu khiyo vathu va di hadzi khala vawugeyi.— Mat. 24:24; 2 Ped. 2:18-22. w21.05 12-13 ¶18-19

Bhibhiliya yi ngu si vega guagani gu khiyo guti nya lisine ga gu engedzeya khu gu gimbiya nya tepo. (Kol. 1:9, 10) Jehovha a gu hi yeyedza lisine vbadugwanavbadugwana, khu kharato hi yede gu vireya khu gu laphisa monyo kala hi li pwisisa gwadi lisine. Tepo Huwo nya gu thangeye yi wonago gu somo si yedego gu vbindrugedza avba nya ma pwisiselo yathu, mwendro edzi silo si girwago khidzo, iyo ya gu gira guvbindrugedza gogo khu gu vbiredza. Dzitshetshe nya dzingi muhuno, dzi ngu vbindrugedza sihevbudzo sadzo khu gu vbweta gu tsakisa ava va girago gipandre nya dzitshetshe dzawe mwendro khu gu vbweta ndruma omu nya litigo leli. Ganiolu, Dzifakazi dza Jehovha dza gu vbindrugedza silo nyo khaguri gasi gu hi phasa gu hidzimeya vbafuvbi ni Jehovha hi bwe hi mu khozeya khu ndziya hi tshiyedwego khu Jesu. (Jak. 4:4) Ethu kha hi vbindrugedzi silo khu kotani nya olu mawonelo nya vathu ma vbindrugedzago, ganiolu ho gu gira isoso kholu ha gu yi pwisisa gwadi Bhibhiliya. Ethu hi ngu li gola ngudzu lisine! — 1 Tes. 2:3, 4. w21.10 22 ¶12

U nga gira ginani wa gu ba upwa wutundzu? Vega gupima gwago avba nya edzi Jehovha a gu phasago khidzo. (Ndzi. 55:22) Wa gu gira isoso, si na gu phasa gu wona gu khuwe u mwalo wenga. Dundrugeya gambe khedzi Jehovha a phasago khidzo vambe vandriyathu va pwago wutundzu. (1 Ped. 5:9, 10) Ndriyathu moyo nyo pwani khu Hiroshi, a thumeyago Jehovha khu tepo nyo laphe enga ndrangani gwawe wari khuye: “Hi ngu dziti gu khethu hatshavbo ha gu dzi garadza gasi gu thumeya Jehovha, nigu isoso si nga tiyisa ava a gu avo vonga va thumeyago Jehovha ndrangani gwawe nya nga eni.” Nigu gombeya tepo yatshavbo, u leri Bhibhiliya u bwe u hongola mitshanganoni. U yede gu bhuleya Jehovha edzi u dzipwago khidzo. Si na ni li lisima gu leri Lito la Nungungulu tshigu ni tshigu, u bwe u dundrugeya khu matimo nyo kongome nya Bhibhiliya ma yeyedzago edzi Jehovha a gu haladzago khidzo. Mambe Makristo ma ngu vegisa hungoni milowo yi tiyisago nya nga Ndzimo 27:10 ni Isaya 41:10. Vambe vari khavo gu engiseya audhiyu nya guleri nya Bhibhiliya ni dzi audhiyu nya mabhuku ma na thumiswago mitshanganoni si ngu va phasa gu pala wutundzu. w21.06 9-10 ¶5-8

Ina wa gu tshaniseka khu kotani nya olu u fedwego khu muthu u mu golago? Dzi ninge tepo nya gu tiyise gukhodwa gwago avbo nya gutumba nya gu wuswe ga ava va fudego khu gu hevbula matimo nya Bhibhiliya ya ava va wusidwego khu gufani. Ina wa gu tshaniseka khu kotani nya olu givbango gimwegyo nya ndranga yago gi dusidwego libandlani? Hevbula gasi gu tiyisega gu khuye ndziya eyi Nungungulu a kawukago khiyo tepo yatshavbo khyadi. Ni gevbini gigaradzo u tshanganago nagyo, gi wone kha nga lithomo nyo tiyise gukhodwa gwago. Embeya Jehovha edzi u dzipwago khidzo, u nga khali wenga, ganiolu dzi tshanganise ni vandriyathu. (Mav. 18:1) Gira silo si na gu phasago gu timiseya, ambari sa gu lomba gu gira isoso na wu gu liya khu esi si gu dugeledego. (Ndzi. 126:5, 6) Simama gu hongola mitshanganoni, thumoni nyo tshumayele ni gu hevbula Bhibhiliya. Nigu, simama gu dundrugeya khu silo nyo tsakise esi Jehovha a tumbisago gu gu ninga mindru wa tshigu. Wa gu wona edzi Jehovha a gu phasago khidzo olu, gukhodwa gwago gu na engedzeya gu tiya. w21.11 24-25 ¶17

Khu gevbini gilo gi girago gu vapizane va Jesu va wonwa kha nga “ava nya vadugwana”? Litigo la gu wona vamani na vari avo va gu na ni lisima? Sighanyi, va nya ndruma ni ava va dugeyago omu nya dzindranga nya wufumu. Ganiolu, litigo la gu wona vapizane va Jesu kha nga ava nya vadugwana mwendro va gu mwalo lisima kholu avo va mwalo naso satshavbo sesi. (1 Kor. 1:26-29) Ganiolu, Jehovha kha va woni kharato. Khu ginani Jesu a ganedego khava “nya vadugwana”? Kholu vapizane va nga ba va mu wudziside gu khavo: “Khu mani gwadi-gwadi a gu khongolo Mufumoni wa ndzadzini?” (Mat. 18:1) Vajudha nya vangi va di gu vbweta gu wonwa khu vambe na vari vathu nya lisima ngudzu. Na gu ganeya khu mawonelo yaya, mwama nyo khaguri a hevbudego ngudzu, a di khuye: “Vama va di gu thega va wuga khu gu dwaneya gu zundzwa khu vambe ni gu mana ndruma.” Jesu a di gu dziti gu khuye vapizane vaye va di gu dzi embeya gu khavo va na ni lisima ngudzu guvbindra vambe. Khu khatato, vapizane vaye va di yede gu dzi garadza gasi va  vbindrugedza mapimo yawe. w21.06 21 ¶6, 8; 22 ¶9

Mupostoli Pawulo kha nga lidhota a vegide giyeyedzo nya gyadi. Khu giyeyedzo, Pawulo a ningede wusingalagadzi vandriyathu Vatesalonika tepo va nga ba va wu vbweta. Ganiolu, gupheya a di va zundza khu thumo wawe nyo tumbege, thumo va wu giredego khu lihaladzo ni gu timiseya gwawe. Uye gambe a di gu dundrugeya khu womi wawe, nigu a va embede gu khuye a di gu dziti edzi womi wawe wu nga ba wu si vbevbugi khidzo nigu avo va ngu emisana ni gu wugedwa. (1 Tes. 1:3; 2 Tes. 1:4) Uye gambe embede vandriyathu vava gu khuye, avo va diri giyeyedzo nya gyadi ga mambe Makristo. (1 Tes. 1:8, 9) Avo va tsakide gundzu kholu Pawulo a nga va zundza. Kha si kanakanisi gu khiso Pawulo a di gu va haladza ngudzu va ndriyaye. Khiso si nga gira gu omu nya malangaliya yaye, a ningeya wusingalagadzi wu phasago Vatesalonika. — 1 Tes. 4:1, 3-5, 11; 2 Tes. 3:11, 12. w22.02 15 ¶6

Sathane o thumisa vathangeyi nya wukhongeyi nya malipha gasi va ganeya gu khavo Jehovha vivbedwe khu monyo nigu khuye a hi vangeyago gutshaniseka. Tepo gu fago gyanana, vambe vakona vari khavo khu Nungungulu a nga gi dzega kholu yi di gu vbwetega yimbe ngilozi ndzadzini. Igyogyo givalo nya gikhongolo ngudzu ga Jehovha. Ethu hi ngu dziti gwadi gu khethu Jehovha Papayi nya lihaladzo. Tepo hi emisanago ni madwali nya makhongolo mwendro gu fedwa khu muthu hi mu haladzago, kha hi ningi nandru Nungungulu wathu. Wulangani nya isoso ethu hi ngu khodwa gu khethu litsigu limwedo, Jehovha a na fuvisa madwali ni gu wusa ava va fudego. Hi nga embeya ni wevbini a dzinago gu hi engiseya gu khethu Jehovha, Nungungulu nya lihaladzo. Khu kharato, hi na phasa Jehovha gu ninga hlamulo nya wadi wule a mu hembululago. (Mav. 27:11) Jehovha a ngu pweya wusiwana sithumi saye. Uye kha tsaki khu gu hi wona na hi gu tshaniseka khu kotani nya gu wugedwe, madwali mwendro gu mba vbeleya gwathu. (Ndzi. 22:23, 24) Jehovha a ngu pwisisa guvbisa hi gu pwago, uye o vbweta gu vbedza guvbisa hi gu pwago nigu a na gira isoso. — Fananisa ni Ekisodha 3:7, 8; Isaya 63:9. w21.07 9-10 ¶9-10

Nya mba hweya ava va engisago va na mana lithomo nya likhongolo nya gu haladze Jehovha ni gu mu khozeya kala gupindruga. Jesu a na lulamisa sigaradzo satshavbo hi vangedwego khu Adhamu ni Evha tepo va nga hunga gu dzi hambanisa ni ndranga ya Jehovha. Jehovha a na wusa dzimiliyoni nya vathu khu gufani a bwe a va ninga lithomo nyo vbanye kala gupindruga paradhesini mafuni na va ri ni womi nyo vbeleye. (Luka 23:42, 43) Tepo ava va thumeyago Jehovha va na khalago vathu nyo vbeleye, avo va na mana “wufumu ni wuzundzo” owu Dhavhidhe a ganedego khuwo. Wa gu ba u romo avba nya tsawa nya va girago gipandre nya “gitshungu nya gikhongolo,” u na ni gutumba nyo tsakise. (Gutu. 7:9) Nungungulu a ngu gu haladza nigu a gu vbweta gu khuye u lumba ndranga yaye. Khu kharato, gira satshavbo u si kodzago gasi u mu tsakisa. Tshigu ni tshigu, vegisa mapimoni gwago ni monyoni gwago situmbiso sa Nungungulu. Ninga lisima lithomo u gu nalo nyo khozeye Papayi wathu wa ndzadzini nigu ninga lisima gu vireya u gu nago nya guta mu dhumise kala gupindruga. w21.08 7 ¶18-19

Muprofeti Jeremiya teponi yaye vathu va di si vbweti gu mu engisa nigu va di mu wugeya. Ambari ulolo, Jeremiya tshumayede khu 40 myaga ni gu vbindra. Khu kotani nya olu a nga ba a ‘khade gihegiso ni gu tshaniswa,’ uye a di vbeya tshivba a bwe a pimisa ni gu tsukula thumo a nga ba a ningidwe. (Jer. 20:8, 9) Ganiolu, Jeremiya kha tsukula. Ginani gi mu phasidego gu simama a bwe a mana gu tsaka thumoni gwaye? Uye a di vega gupima nya silo sivili nya lisima. Nyo pheye, mahungu aya Jeremiya a nga ba a embeya vathu, ma di hadzi gu va ninga “gitumbo ga matshigu ma nga gutago.” (Jer. 29:11) Nya wuvili, Jehovha hathide Jeremiya gasi gu ganeya ga vathu mahungu ya Jehovha. (Jer. 15:16) Anethu hi ngu bhuleya vambe mahungu ma ningago gutumba. Nigu, ha gu ranwa khu lina la Jehovha kha nga Dzifakazi dzaye. Ethu ha gu vega gupima ga silo soso, gani vathu va ngu ma hakha gwadi mahungu hi tshumayelago mwendro ne. Khu kharato, u nga vbeyi tshivba mwendro gu tsukula, gihevbulo gyago gya gu hweya gu nandra khu liphuvboni. Gu gira vapizane so lomba gu hi laphisa monyo. — Jak. 5:7, 8. w21.10 27 ¶12-13

Ambari na hi ri ni tepo nyo laphe na hi gu thumeya Jehovha, hi yede gu simama gu tiyisa gukhodwa gwathu. Khu ginani? Kholu ha gu mba gira isoso gukhodwa gwathu gu na vbola. Kha nga hi si wonidego, gukhodwa ga gu dzi seketeya avba nya silo nya lisine hi gu mba si wona. Si ngu vbevbuga gu divala silo hi gu mba si wona. Khu kharato, Pawulo ganede gu khuye, gu mba na gukhodwa “gighoho gi hi namarelago khu tshivba.” Ginani hi yedego gu gira gasi hi si thegeyi ga napwi wowo? (2 Tes. 1:3) Nyo pheye, tepo yatshavbo lomba Jehovha liphuvbo laye nyo age. Khu ginani? Kholu gukhodwa limwedo nya makhalelo aya liphuvbo nya gu age li hi phasago gu haguleya. (Gal. 5:22, 23) Kha hi na nga si kodza gu simama hi tiyisa gukhodwa gwathu ga Muvangi nya mba phaswa khu liphuvbo nya gu age. Ha gu simama gu lomba liphuvbo nya guage la Jehovha, uye a na hi ninga. (Luka 11:13) Hi nga gira nombelo nyo kongome ga Jehovha khethu: “Engedzeya gukhodwa gwathu.” (Luka 17:5) Gu diga isoso, gira gihevbulo gyago nya muthu enga nya Lito la Nungungulu tepo yatshavbo. — Ndzi. 1:2, 3. w21.08 18-19 ¶16-18

Vandriyathu va dandridego khu tanga va nga phasa hengeledzanoni ya Jehovha khu dzindziya nya dzingi. Lisine gu adzina avo va mwalo tshivba nya nga eyi va nga ba vari nayo gale, ganiolu avo va na ni matshango nya mangi va ma manidego ndrani nya myaga yi vbindridego. Jehovha a nga simama gu va thumisa khu dzindziya nya hambanehambane. Khu giyeyedzo, Bhibhiliya yi ngu ganeya khu siyeyedzo nya sadi nya sithumi nyo tumbege si simamidego gu thumeya Jehovha ambari si nga mba si dandride khu tanga. Khu giyeyedzo, Mosi a di ri ni 80 myaga tepo a nga pheya gu thuma kha nga muprofeti wa Jehovha a bwe a thangeya Vaisrayeli. Tepo Dhaniyeli adzina a nga ba ari ni 90 myaga, Jehovha simamide gu mu thumisa kha nga muprofeti. Nigu adzina Johani a di ri ni 90 myaga ni gu vbindra tepo Jehovha a nga mu thumisa gasi gu lova libhuku la Gutuledwa. Mwama moyo nyo “lulame ni githawo” nyo pwane khu Simiyoni, kha khumbugwi ngudzu umo nya Bhibhiliya, ganiolu Jehovha a di gu muti gwadi. Nigu a mu ningide lithomo nyo wone Jesu na ngari gyanana a bwe a profeta silo nyo khaguri khu Jesu ni mamayi waye. — Luka 2:22, 25-35. w21.09 3-4 ¶5-7

Vavelegi gu vbwetega va dzi woneya gu fananisa gyanana gyawe ni simbe sanana,  mwendro gu vireya gu khavo gi gira silo gi gu mba si kodza gu gira. Silo nya nga isoso si nga gorosa ngudzu gyanana. (Efes. 6:4) Ndriyathu moyo nya nyamayi nyo pwane khu Sachiko wari khuye: “Mamayi wangu a di gu vbweta gu khuye avba nya dziprovha dzangu dzatshavbo nyi dusa 20 vhalori, ganiolu eni isoso nyi di si si kodzi. Ambari olu gu vbindrago myaga nya yingi na nyi hegiside gu hevbula, muhuno nyi ngu dzi wudzisa gu kheni ina nyi ngu gira satshavbo nyi si kodzago thumoni wa Jehovha?” Pfhumu Dhavhidhe ganede gu khuye: “Kha nyi gimbili nyi vbweta silo nya sikhongolo” mwendro gu gira silo si gu mwalo tshivbani gwaye. Khu kotani nya gu dzinogise ni gu dzumeya gu khuye khandri satshavbo a si kodzago gu gira, “manide gurula ni gu hefemula.” (Ndzi. 131:2) Ginani hi gi hevbulago avba nya malito ya Dhavhidhe? Abari gu vavelegi va ngu dzi nogisa kha va na nga vireya gu va gira silo va gu mba si kodza, mwendro gu vireya gu khavo sanana savo si gira silo si gu mba si kodza. Tugula esi sanana sago si si kodzago gu gira ni gu mba si kodza gu gira, u si phasa gu dzi vegeya misuvo si na yi kodzago gu yi vboheya. Wa gu gira isoso, gyanana gyago gi na dzipwa na gi ri ni lisima. w21.07 21-22 ¶5-6

Gu vbwetega hi dundruga gu khethu Jehovha ningide moyo ni moyo wathu gutshulega nyo dzi hatheye gu gira ni gevbini a gi vbwetago. Isoso so thula gu khiso hi tshulegide gu hatha gu mu engisa mwendro gu mba mu engisa. Vambe vaphya va mwalo vavelegi va gu siyeyedzo nya sadi gasi gu si pimedzeya, ambari ulolo va ngu hatha gu thumeya Jehovha va bwe va tumbega gwaye. Ganiolu vambe vaphya, va manegide ni lithomo nyo dandriswe khu vavelegi va dzi garadzidego ngudzu gasi gu va hevbudza lisine, ambari ulolo avo va hathide gu diga Jehovha. Isoso so hi hevbudza ginani? So hi hevbudza gu khiso moyo ni moyo wathu gu vbwetega a hunga gu khuye a na thumeya Jehovha mwendro ne. (Jos. 24:15) Khu kharato, abari gu wo dzipwa nandru khu gu ba gyanana gyago gi digide Jehovha dundruga gu khuwe uwowo khandri nandru wago. Nigu wo tshuka u pimisa isoso, dzi garadzeye gu si dusa khu mapimoni gwago. Si nga gira moyo nya vavelegi a diga lisine a bwe a bhangula ndranga yaye. (Ndzi. 27:10) Isoso si nga dzudza gupima ga sanana si olovedego gu khedza mavbanyelo ya vavelegi vaso si va pimedzeya. Vaphya, abari gu moyo nya vavelegi vago dusidwe libandlani, tiyisega gu khuwe Jehovha a ngu si pwisisa esi u tshanganago naso. Uye a ngu gu haladza ni gu a ngu ninga lisima gutumbega gwago. Dundruga gu khuwe u mwalo nandru khesi vavelegi vago va hungago gu gira. w21.09 27 ¶5-7

Tepo ndriyathu nyo khaguri a duswago libandlani, hi yede gu mu wona kha nga nvuta yi dwalago yi nga thaphedzisago madwali dzimbe dzinvuta. Uye a gu fana ni muthu a dwalago. (Jak. 5:14) Gu fana ni muthu a gu na ni madwali nyo thapeyane, muthu a vegidego mhangoni wupari waye ni Jehovha a nga kutsedzeya vambe gu gira silo nyo vivbe. Khu kharato, dzimbe dzitepo si ngu lomba gu dusa khu libandlani oyu a ghohidego. Gu tsayisa gogu, go yeyedza lihaladzo la Jehovha khu vathu vaye libandlani. Nigu isoso si nga khuha monyo nya gighohi gi bwe gi dzilaya. Ganiolu, oyu a dusidwego libandlani a nga gira silo nyo khaguri. Uye tshulegide gu hongola mitshanganoni gasi a dzi hodzisa khu liphuvboni a bwe a tiyisa gambe gukhodwa gwaye. Uye tshulegide gambe gu hakha mabhuku gasi a ma thumisa avba nya gihevbulo gyaye nya muthu enga ni gu sixitiri JW Broadcasting^®. Nigu, tepo madhota ma wonago gu khayo uye a ngu vbindrugedza mavbanyelo yaye, ayo ma nga mu ninga wusingalagadzi gasi gu mu phasa gu tiyisa wupari waye ni Jehovha nigu isoso adzina si nga mu phasa gu wuyela libandlani kha nga moyo nya Dzifakazi dza Jehovha. w21.10 10-11 ¶11

Muhuno, ethu ha gu landra giyeyedzo nya wukhozeyi, hi tshiyedwego khu Makristo ya lizana myaga nya gu pheye. Khu giyeyedzo, ethu hi sasamedzidwe khu ndziya yayimweyo ma nga ba ma sasamedzidwe khiyo Makristo ya lizana myaga nya gu pheye. Hi na ni vawoneleyi nya gipandre, madhota ni va phasedzeyi nya libandla. (Filp. 1:1; Tit. 1:5) Nigu, gu fana ni Makristo ya lizana myaga nya gu pheye, ethu hi ngu ninga githawo milayo ya Jehovha maningano ni gu hengeya malawu, mitshadho ni esi Nungungulu a ganeyago maningano khu novba, nigu hi ngu vhikeya libandla ga ava va gu mba vbweta gu landrisa milayo ya Nungungulu. (Mith. 15:28, 29; 1 Kor. 5:11-13; 6:9, 10; Hebh. 13:4) Bhibhiliya gambe yi ngu si vega guagani gu khiyo gu na ni “gukhodwa gumogo basi” gu tsakedwago khu Nungungulu. (Efes. 4:4-6) Khu lisine, lithomo gwathu gu gira gipandre nya vathu va Jehovha ni guti lisine khu uye ni makungo yaye. Khu kharato, moyo ni moyo wathu yede gu dziemiseya gu simama a bangeleya avba nya lisine nari ni gukhodwa nya gutiye. w21.10 22-23 ¶15-17

Pfhumu Josafati emisanide ni giemo nyo garadze. Libuthu nya likhongolo nya Vaamoni ni Vamowabhi ni vama va dugeyago gigomoni gya Seyiri, va di ta wugeya Josafati va mu dwanisa, va vega mhangoni vandrangani gwaye ni vathu vatshavbo. (2 Dzik. 20:1, 2) Ginani egi Josafati a giridego? Uye a di vbweta giphaso gya Jehovha ni tshivba. Nombelo wa Josafati wu khumbugwago omu ga 2 Dzikoronika 20:5-12, wa gu yeyedza edzi uye a nga ba a tumba khidzo Papayi waye nya lihaladzo wa ndzadzini. Jehovha ganede ni Josafati khu gu thumisa Mulevhi nyo pwane khu Jahaziyeli a mu embeya malito ma gomogo avba nya lowo wa muhuno. Khu gu tumba Nungungulu, Josafati a di engisa sileletelo a ningidwego. Tepo a nga ya manana ni valala, uye a di thangisa vaembi nya dzindzimo va nga ba va mwalo siphisa nasiri masotshwa ma kodzago gwadi gu dwana. Jehovha a giride esi a nga tumbisa Josafati; Uye a di pala valala vaye. — 2 Dzik. 20:18-23. w21.11 15-16 ¶6-7

Tepo hi tshanganago ni sigaradzo, Jehovha a na simama gu hi phasa ha gu tumbega gwaye. (2 Kor. 4:7-9) Hi nga tiyisega gu khethu Jehovha a na simama gu hi yeyedza lihaladzo nyo tumbege kholu Bhibhiliya yari khiyo: “Maho ya Pfhumu Nungungulu, ma gu khedza vale va mu ningago githawo, ni ga vale va tumbago wuhindzi waye. (Ndzi. 33:18-22) Na hi si gu pheyi gu thumeya Jehovha, uye a di gu hi yeyedza lihaladzo eli a yeyedzago vathu vatshavbo, ganiolu tepo hi nga khala vakhozeyi vaye, Jehovha a di yeyedza gambe lihaladzo nyo tumbege. Khu gu kutswa khu lihaladzo lolo, Jehovha a gu hi wugareya khu mawogo yaye. Uye tepo yatshavbo a na ba a romo vbafuvbi gwathu nigu a na tadzisa satshavbo a nga hi tumbisa. Uye a gu vbweta gu khuye hi khala dzipari dzaye kala gupindruga! (Ndzi. 46:1, 2, 7) Khu kharato, ni gevbini gigaradzo hi tshanganago nagyo, hi nga tiyisega gu khethu Jehovha a na hi ninga tshivba  hi yi vbwetago gasi hi simama na hi tumbegide gwaye. w21.11 7 ¶17-18

Gutala nya ethu hi ngu vati vathu avo gutala nya dzitepo va vegedego likhulo sithumi-kwanu, dzikolega xikwatunu ambari sivbango ndrangani khu myaga nya yingi. Dudrunga gu khuwe vandriye va Josefa nya 10 va mu vegede likhulo, esi si nga va gira va mu nyenya. (Gen. 37:2-8, 25-28) Ganiolu, Josefa kha va phara khu ndziya nya mba yadi. Tepo a nga bari ghovernadhori uye adzina na phozide ga vandriyaye, ganiolu uye a di va yeyedza wuhindzi. Josefa kha vega giviti. Wulangani nya isoso, a di landrisa wusingalagadzi wu guromo ga Levhi 19:18. (Gen. 50:19-21) Mukristo a vbwetago gu tsakisa Nungungulu a yede gu pimedzeya Josefa, oyu a divaledego vandriyaye wulangani nya gu va vegeye likhulo. Jesu a ganede gu khuye hi yede gu divaleya avo va hi ghoheyago. (Mat. 6:9, 12) Khu ndziya nyo fane, mupostoli Pawulo gengedzide Makristo khuye: “Vandruye, mu nga dzi phodzelini mwabune.” — Rom. 12:19. w21.12 11-12 ¶13-14

Khu mwaga nya wu 33 Matshiguni yathu, Jesu a di hongola thembweni ga Getsemani. Nari eyi, uye a di gombeya ga Jehovha khu monyo waye watshavbo. (Luka 22:39-44) Ga tepo yile “Jesu a di gira minombelo khu gu garadzega ni gu liya.” (Hebh. 5:7) Jesu a gombede khu ginani ga wutshigu waye nyo hegise na a si gufi? Uye gombede a lomba tshivba gasi a simama na tumbegide ga Jehovha a bwe a gira gu gola gwaye. Jehovha pwide nombelo wa Gyanana gyaye nigu rumede ngilozi gasi yi ya gi tiyisa. Jesu a di gu dziti edzi si gu na ni lisima khidzo gu simama na tumbegide a bwe a agisa lina la papayi waye. Jehovha engisede silombo sa Jesu. Khu ginani? Kholu Jesu a di gu garadzega khu gu simama na tumbegide ga Papayi waye ni gu agisa lina laye. Abari gu gilo nya lisima gwathu gu gira sasimweso, Jehovha a na hlamula milombelo yathu tepo hi lombago giphaso. — Ndzi. 145:18. w22.01 18 ¶15-17

Vathu nya vangi muhuno kha va khodwi avba nya esi hi hevbudzago, kholu ethu kha hi dzi bedzedzeyi umo nya politika. Avo vo pimisa gu khavo hi yede gu vhota pfhumu nyo khaguri, ganiolu ethu hi ngu dziti gu khethu ha gu hatha muthu kha nga mufumeli wathu, hi na ba hi pfhurareya Jehovha. (1 Sam. 8:4-7) Vathu gambe va nga pimisa gu khavo ethu hi yede gu vbaha dzixikola, dziospitali ni gu gira yimbe mithumo gasi gu phasedzeya gitshungu. Avo va ngu bomba mahungu hi hevbudzago, kholu ethu ha gu dzi garadza avbo nya thumo nya gu tshumayele, vbavbandze nyo dzi garadzeye gu lulamisa sigaradzo nya litigo leli. Ginani hi nga girago gasi hi si tshunganeyi? (Mat. 7:21-23) Gilo nya lisima gwathu gu gira thumo owu Jesu a nga hi ninga. Kha hi vbweti gu pfhala khu gu lulamisa sigaradzo nya litigo leli. Ethu hi ngu haladza vathu nigu hi ngu khatala khavo, ganiolu hi ngu yiti ndziya nya yadi nyo phase khiyo muthu kwanu, a gu gu mu hevbudza maningano ni Mufumo wa Nungungulu ni gu mu phasa gu khala pari ya Jehovha. w21.05 7 ¶19-20

Ambari olu dzipfhumu nya dzingi muhuno dzi ganeyago gu khidzo dza gu thumeya Nungungulu, idzo kha dzi dzini gu diga wufumo dzi gu nawo. Khu kharato, gu fana ni dzipfhumu dza matshigoni ya Jesu, idzo dza gu yeyedza gu khidzo kha dzi seketeyi oyu a hathidwego khu Jehovha a gu Kristo, khu gu wugeya sithumi saye nyo tumbege. (Mith. 4:25-28) Ginani egi Jehovha a ganeyago? Libhuku la Ndzimo 2:10-12 lari khilo: “Gasi olu, enu vafumeli gengelani; dzumelani gu kawukwa, enu valamuli nya litigo! Khozelani Pfhumu Nungungulu khu githawo mu tsaka ni gu ndrendremela mbeli gyaye. Khidzimani mawundruni ga mwamana gasi a si gorogi, mu si mbembi na mu ngari ndzilani, kholu hwane nya gikhatinyana a na tala khu likhulo. Va kategide vatshavbo vale va thavelago gwaye.” Khu lihaladzo, Jehovha a ngu ninga lithomo valala vava nya gu va vbindrugedza mavbanyelo yawe, va seketeya mufumo wa Nungungulu. Ganiolu, tepo ya gu vbeya. (Isa. 61:2) Eyi khiyo tepo nya gu vathu vati lisine va bwe va hatha gu thumeya Jehovha. w21.09 15-16 ¶8-9

Pawulo a di gu vbweta gu ganeya gu khuye hi yede gu tsaka khu iso hi gu naso khu nyamani. (Filp. 4:12) Gilo nya lisima ngudzu gwathu wupari wathu nyo tiye ni Nungungulu na siri dzithomba. (Habh. 3:17, 18) Wona esi Mosi a embedego Vaisrayeli hwane nya gu ba va vbedzide 40 myaga giwulani. Uye a di khuye: “Pfhumu Nungungulu wago, a gu kategiside ga thumo watshavbo nya mandza yago . . . Ndrani nya myaga yatshavbo yoyo nya magumana; gimwalo ni gimwegyo gi gu kiyeledego.” (Dhet. 2:7) Ndrani nya 40 myaga yoyo, Jehovha va ningide mana gasi gu hodza, sombo sawe kha sa hagala, khu kharato va simamide gu ambala sombo va nga khuga naso khu Egipto. (Dhet. 8:3, 4) Jehovha a na tsaka ha gu hevbuleya gu tsaka khesi hi gu naso. Uye o vbweta gu khuye hi bonga ambari khu silo nya sidugwana a hi ningago hi bwe hi si wona kha nga giningwa gitago khiyo gwaye. w22.01 5 ¶10-11

Vama, mu nga hevbula gilo nyo khaguri avbo nya giyeyedzo gya Josafati. Uwe u na ni rwalo nyo khataleye ndranga yago, khu kharato wa gu dzi garadzeya gu thuma gasi gu yi vhikeya ni gu yi seketeya. Tepo u tshanganago ni sigaradzo, adzina u nga pimisa gu khuwe u na si kodza gu si lulamisa wabune. Ambari ulolo, kha wu yeli gu dzi tumba. Wulangani nya isoso, gombeya ga Jehovha na wuri wenga u bwe u gombeya ni mwangadzi wago khu monyo wago watshavbo. Vbwetedzeya wusingalagadzi wa Jehovha khu gu hevbula Bhibhiliya ni mabhuku ma duswago khu hengeledzano ya Nungungulu u bwe u thumisa wusingalagadzi u na wu manago. Vambe adzina kha va na nga tsaka kholu u hungidego gu gira silo si seketedwago omu nya Bhibhiliya. Avo adzina va nga gu embeya gu khavo dzitsapawu ni dzithomba si na vhikeya uwe ni ndranga yago. Ganiolu, dundruga giyeyedzo gya Pfhumu Josafati. (2 Dzik. 20:1-30) Uye a di tumba Jehovha a bwe a yeyedza isoso khu mithumo. Jehovha kha diga mwama yoyu nyo tumbege nigu uye kha na nga gu diga nuwe. — Ndzi. 37:28; Hebh. 13:5. w21.11 16 ¶8

Ethu hi giridwe khu mufananiso wa Nungungulu, khu kharato hi ngu dzina gu wona vathu na va gu pharwa khu ndziya nya yadi. (Gen. 1:26) Ganiolu,  olu nya gu kha ha vbeleya hi nga lamula silo khu ndziya nya mba yadi ambari tepo hi pimisago gu khethu hi nguti satshavbo si pategago. Khu giyeyedzo, nga dundrugeya khedzi Jona a gorogidego khidzo tepo Jehovha a nga hunga gu yeyedza wuhindzi vathu va Ninivha. (Jona 3:10–4:1) Ganiolu, dundrugeya khesi si dugeledego kholu Jehovha ava yeyedzidego wuhindzi. 120 000 Vaninivha va vbulugisidwe! Hi ngu wona gu khethu khu Jona a nga lamula vathu khu ndziya nya mba yadi nasiri Jehovha. Jehovha kha gurumedzegi gu tshamuseya vathu sighelo si mu girago a hunga makungo nyo khaguri. Lisine gu Jehovha, a dzumelede sithumi saye sa gale gu ganeya edzi si nga ba si dzipwa khidzo maningano khesi a nga ba a hunga gu gira. (Gen. 18:25; Jona 4:2, 3) Nigu, dzimbe dzitepo uye a di gu va tshamuseya esi a nga ba a hunga gu gira. (Jona 4:10, 11) Ambari ulolo, Jehovha kha vbweti mawonelo yathu na si gu gire gilo nyo khaguri ambari hwane nya gu ba a giride. — Isa. 40:13, 14; 55:9. w22.02 3-4 ¶5-6

Ha gu wona vambe na vari tshukwana gwathu hi na “dzi sodzisa” mwendro gu dzi vega vbavbatshi. (Filp. 2:3) Ha gu manega ni makhalelo yoyo, kha hi na nga gira vambe va tshunganeya. Vatshavbo vandriyathu va na ni gilo nyo khaguri va gi girago gwadi gu hi vbindra. Isoso hi nga si wona ha gu vega gupima avba nya makhalelo yawe nya yadi. Gu vbwetega hi engisa wusingalagadzi owu mupostoli Pawulo a ningidego Vakorinto: “Khu mani a nga gu ninga gu khala khongolo ga vakwanu? Iso u gu naso khandri u di ningwa, gani? Khu ginani u dzi gugumugisago gukhwatshi esi u gu naso khandri u di ningwa khu Nungungulu.” (1 Kor. 4:7) Khu kharato, gu vbwetega hi dzi woneya gasi hi si giri vambe va hi hlamala mwendro gu hi wona na hiri va nya vadi vakona guvbindra vambe. Khu giyeyedzo, ndriyathu nya mwama a gu ba a kodza gu vega gwadi dziganelo mwendro ndriyathu nya nyamayi a kodza gu tula sihevbulo nya singi nya Bhibhiliya, gu vbwetega a yisa wuzundzo watshavbo ga Jehovha khesi a girago. w21.06 22 ¶9-10

Si ngu garadzeya Dzifakazi nya dzingi gu mana vathu mudzidrangani gasi gu bhula navo. Vahuweleyi nya vangi va gu vbanya ga malanga umo dzinyumba dzi khalago na dzi segidwe nigu dzipredhiyu dzakone dzo khala na dzi ri ni dzighadhi. Adzina ghadhi yi nga himbedzeya ni wevbini a vbwetago gu beya na sa ranwa khu moyo nya ava va vbanyago ndrangani momo. Vambe vahuweleyi kha va mani muthu mudzidrangani mwendro umo nya malanga va tshumayelago va gu mana vathu nya vadugwana. Avo va ngu gimbiya mipfhuka nyo laphe gasi gu mana muthu moyo nigu dzimbe dzitepo kha va mu mani! Wa gu ba u tshangana ni gimwegyo nya sigaradzo sesi, u nga vbeyi tshivba. Zama gu vbwetedzeya vathu khu dzitepo nyo hambane. Ethu hi na si kodza gu mana vathu nya vangi ha gu tshumayela khu dzitepo si vbevbugago gu va mana mudzidrangani. Lisine gu khu mahegiso va na wuya ndrangani. Vandriyathu nya vangi va ngu tshumayela ni siyambo mwendro ni wutshigu kholu va ngu si kodza gu mana vathu nya vangi. Gu diga isoso, ga tepo yeyi vathu va rude mapimo nigu va ni tepo nyo bhule. w21.05 15 ¶5, 7

Ina muhuno hi na ni gigaradzo gya gimwegyo? Ina, hi nagyo. Vathu nya vangi va ngu goroga khu kotani nya Dzifakazi dza Jehovha, kholu idzo kha dzi pategi umo nya mibuzo ni ga sihena si gu mba pwanana ni Bhibhiliya, nya nga gu dundruga matshigu nya gu velegwe ni gu hodza khisimuso. Vambe va ngu goroga ngudzu tepo Dzifakazi dza Jehovha dzi gumba patega umo nya mibuzo yi gimbelanago ni wufumo ni tepo idzo dzi gu mba landriseya sihena nya madzingelo si dwanisanago ni sihevbudzo nya Bhibhiliya. Vathu vovo vo pimisa gu khavo Nungungulu a ngu tsaka khedzi va mu khozeyago khidzo. Ganiolu oyu a hathago gu landriseya sihena nya litigo leli, vbavbandze nyo landrise sihevbudzo nya Bhibhiliya kha tsakisi Jehovha. (Marko 7:8, 9) Ginani hi nga girago gasi hi si tshunganeyi? Hi yede gu haguleya lihaladzo nyo tiye khu milayo ni matshina nya milayo ya Jehovha. (Ndzi. 119:97, 113, 163-165) Ha gu ba hi haladza Jehovha hi na potsa ni gevbini gihena gi gu mba mu tsakisa. Nigu kha hi na nga dzumeleya ni gevbini gi khala nya lisima gwathu gu vbindra lihaladzo lathu khu Jehovha. w21.05 6 ¶15-16

Hi nga thumisa kharini wusingaladzi wa mupostoli Pawulo? Hi yede gu simama hi tiyisa gukhodwa gwathu khu gu hi hevbula Bhibhiliya tshigu ni tshigu, hi gombeya hi bwe hi khala na hi pharegide khu thumo owu Jehovha a hi ningidego. (2 Thim. 4:4) Ha gu ba hi ri ni gukhodwa, kha hi na nga garadzega tepo hi na pwago mahungu nya mba yadi maningano ni Dzifakazi dza Jehovha. (Isa. 28:16) Lihaladzo lathu khu Jehovha, Lito laye, ni vandriyathu, si na hi phasa gu mba tshunganeya khu kotani ya vale va emidego gu thumeya Jehovha. Dziteponi dza Jesu nya vangi va tshunganede va bwe va si khodwi gwaye, ambari ulolo, nya vangi va khodwe gwaye. Ga vathu vovo, gu diri ni givbango gimwegyo nya tribhunali nya Gijudha ni “vathu nya vangi ngudzu nya tsawa nya vaphasi nya mhamba.” (Mith. 6:7; Mat. 27:57-60; Marko 15:43) Khu gufana, mazanazana nya vathu muhuno kha va dzumeleyi gilo gi va gira va tshunganeya. Khu ginani? Kholu avo va nguti ni gu haladza lisine li gomogo omu nya Milowo. Kha nga li ganeyago Lito la Nungungulu “avo va golago nayo wago va gu vbanya gurulani nya gukhongolo; gimwalo gi va khunguvanyisago.” — Ndzi. 119:165. w21.05 13 ¶20-21

Mupostoli Pawulo a di gu dziti gu khuye nari khatshi kha phaswa khu Jehovha na sa si kodza gu gira esi a nga gira. Jehovha thumiside liphuvbo laye nya guage gasi gu ninga tshivba Pawulo, khu kharato mupostoli yoyu nyo tumbege a si kodzide gu gira thumo nyo tshumayele ambari a nga ba a wugedwa, a khothedwa ni gu tshangana ni simbe sigaradzo. Ambari Thimoti a nga ba ari muphya wa gu mu fananisa ni Pawulo, a nuye vbwetide giphaso gya Jehovha gasi gu gira thumo nyo tshumayele. Thimoti gimbide ni Pawulo umo nya maendro nya wu misiyonariyu. Gu diga isoso, Pawulo lombide Thimoti gu gira mambe maendro gasi gu wuseya ni gu tiyisa mabandla. (1 Kor. 4:17) Adzina Thimoti a di gu dzi wona na si ninganedwi khu gu gira isoso. Adzina khiso si giridego Pawulo a ganeya khuye: “Kha gu vbwetegi ni moyo a gu yeyisa khu gu khuye u ngari gikhwathana.” (1 Thim. 4:12) Nigu ga tepo yoyo, Thimoti a di gu emisana ni muba waye givilini a gu — ‘Madwali nya mba kala.’ (1 Thim. 5:23) Ganiolu Thimoti a di gu dziti gu khuye liphuvbo nya guage la Jehovha li di hadzi gu mu ninga tshivba a nga ba a yi vbweta gasi gu tshumayela mahungu nya yadi ni gu thumeya vandriyaye. — 2 Thim. 1:7. w21.05 21 ¶6-7

Litshina li gomogo ga Jakobe 1:19 li na phasa vale va ningeyago wusingalagadzi. Jakobe lovide gu khuye: “Muthu ni muthu a na vbiredze gupwa, a hwela gu ganela, a hwela gu goroga.” Lidhota li nga pimisa gu khilo li ngu siti satshavbo si pategago, ganiolu li ngu siti satshavbo kamo? Libhuku la Mavingu 18:13 la gu hi dundrugisa gu khilo: “Uye a vbiredzelago gu hakha na si gu yingisi, a gu yeyedza wupumbu ni gu dzi thela dzitshoni.” Khyadi ngudzu gu lomba muthu yoyo a gu tshamuseya giemo gyaye. Khu kharato, lidhota li yede gu engiseya gwadi na li si ganeye. Lidhota adzina li nga wudzisa gu khilo: “So gimbiya kharini womini gwago?” “Nyi nga gu phasa kharini?” Madhota ma gu dzi garadzeya guti satshavbo si pategago, ayo ma na si kodza gu phasa ni gu tiyisa vandriyawe. Gu ningeya wusingalagadzi wu phasago kha si pati basi gu leri milowo nyo khaguri mwendro gu ningeya mawonelo. Vandriyathu va gu vbweta gu dzipwa na hi gu va khathaleya, ni gu dziti gu khavo hi ngu va pwisisa ni gu ethu hi ngu dzina gu va phasa. w22.02 17 ¶14-15