YERUZIYANI kuti mutenda munthowa ndi usiku. Mwamabuchibuchi mutuvwa kuti munthu munyaki watikulondoni. Asani mwama, mbwenu nayu watuma. Asani muphinda, mbwenu nayu waphinda. Pavuli paki, mutamba kutchimbiriya kunyumba ya munyinu yo yepafupi. Asani munyinu wakujuliyaniku ndi kukuserezani munyumba, mtima winu uzika.

Panyaki vo takamba pachanya yapa vechendakuchitikiyenipu. Kweni pe vinthu vinyaki vo mufipa navu mtima. Mwakuyeruziyapu, kumbi mutesesa kuti muleki ubudi wo muchita, kweni mutondeka? Kumbi mwaja pa ulova kwa nyengu yitali ndipu mutondeka kusaniya ntchitu? Kumbi mufipa mtima ndi kukota ndipuso masuzu ngo mwazamukumana nangu? Pamwenga pe chinthu chinyaki cho mufipa nachu mtima?

Kaya mwe ndi suzu wuli, kumbi mungakondwa cha kuja ndi munyinu yo mungamukambiyaku vo vitikufipisani mtima ndipuso yo wangakuwovyani? Kumbi mwenayu munyinu waviyo? Hinya, mwenayu. Ndi Yehova. Nge mo lemba la Yesaya 41:8-13 likambiya, Yehova wenga mubwezi waku Abrahamu. Namwi wangaŵa mubwezi winu. Muvesi 10 ndi 13, Yehova wakambiya ateŵeti ŵaki kuti: “Ungachitanga mantha cha, chifukwa nde nawi. Ungafipanga mtima cha pakuti ndini Chiuta waku. Ndikukhwimisengi, hinya, ndikuwovyengi, Ndikukolesengi nadi ndi janja langu lamaryi laurunji.’ Pakuti ini, Yehova Chiuta waku, ndako janja laku lamaryi, Ini nditikukambiya kuti, ‘Ungachitanga mantha cha. Ini ndikuwovyengi.’”

Kumbi mazu yanga ngatikuchiskani cha? Yeruziyani kuti Yehova wakambiya imwi mazu yanga. Lemba ili ling’anamuwa kuti mwakorana manja ndi Yehova uku mutenda cha. Asani vingaŵa viyo, janja laki lamaryi latingi likongi janja linu lamazye. Kweni, lemba ili ling’anamuwa kuti Yehova watamphisa ‘janja laki lamaryi laurunji’ ndi kuko ‘janja linu lamaryi’ kuti wakutuzeni mu suzu. Penipo wachita viyo, watikukhwimisani ndi mazu ngakuti: “Ungachitanga mantha cha. Ini ndikuwovyengi.”

Kumbi muwona Yehova kuti ndi Mubwezi winu ndipuso Awusemwi wo atikuyanjani? Kumbi mugomeza kuti wakuwovyeningi asani mwakumana ndi masuzu? Iyu watikufipiyani mtima ndipu wakhumbisisa kukuwovyani. Asani mwakumana ndi masuzu, Yehova wakhumba kuti mungadandawulanga cha chifukwa watikuyanjani ukongwa. Iyu ‘ntchovyu cho chisanirika mwambula kusuza mu nyengu yasuzu.’—Sumu 46:1.

Ŵanthu anyaki atijimba mlandu chifukwa cha mijalidu yiheni yo achitanga kali ndipu akayikiya  asani Chiuta wakuŵagowoke. Asani ndimu viliri ndi imwi, ŵanaŵaniyani vo munthu wakugomezeka Jobu wangukamba. Iyu wanguzomera kuti wachitanga maubudi pa unyamata. (Jobu 13:26) Davidi nayu wangukamba so viyo. Iyu wangupempha Yehova kuti: “Mungakumbukanga cha maubudi nga pa unyamata wangu ndi mphulupulu zangu.” (Sumu 25:7) Pakuti te ambula kufikapu, tosi ‘te akupereŵe pa unkhankhu waku Chiuta.’—Ŵar. 3:23.

Uthenga wo usanirika pa Yesaya chaputala 41, pakwamba ungulembeke ŵanthu aku Chiuta akali. Yiwu anguchita ubudi ukulu ukongwa mwakuti Yehova wanguŵayeruza kuti aluti ku ukapolu ku Babiloni. (Yes. 39:6, 7) Kweni Chiuta wangulayizga kuti wazamutaska wo azamulapa ndi kuwere kwaku iyu. (Yes. 41:8, 9; 49:8) Mazuŵa nganu napu, Yehova watanja ndipuso walenge lisungu ŵanthu wo alapa.—Sumu 51:1.

Ŵanaŵaniyani vo vinguchitikiya Takuya. * Iyu wanguyesesa kuti waleki kuwonere vinthu vakusikuwa ndipuso kuseŵeresa viŵalu vakubisika. Kweni nyengu zinyaki wachitanga so. Kumbi wavwanga wuli mumtima? Iyu wangukamba kuti: “Ndajiwonanga kuti nde munthu mweneku cha. Kweni asani ndaromba kwaku Yehova kuti wandigowoke, wandiwovyanga.” Kumbi Yehova wamuwovyanga wuli? Ŵara a mumpingu waki angumukambiya kuti peposi po wachitiyengi jalidu ili waŵakambiyengi. Takuya wanguti: “Chenga chipusu cha kuŵakambiya, kweni asani ndaŵakambiya, ndachiskikanga ukongwa.” Nyengu yinyaki ŵara angukambiya wakuwonere dera kuti wakumani nayu. Wakuwonere dera wangumukambiya kuti: “Vachitika waka cha kuti ndizi kunu. Ndaza chifukwa ŵara ndiwu andipempha kuti ndizikumana nawi. Asankha iwi kuti ndichezi nawi.” Takuya wangukamba kuti: “Ini ndini ndananganga, kweni Yehova ndiyu wanguchitapu kanthu kuti wandiwovyi kuporote mwa ŵara.” Takuya wanguleka jalidu laki ndipu wangwamba kuchita upayiniya wanyengu zosi. Sonu wateŵete pa beteli. Nge mo Chiuta wanguchitiya ndi m’bali uyu, namwi wangakuwovyani.

Ŵanthu anandi afipa mtima chifukwa chakusoŵa ntchitu. Anyaki ntchitu zawu zimala ndipu asuzika kusaniya ntchitu yinyaki. Kumbi mungavwa wuli asani kosi ko mupenja ntchitu atikukambiyani kuti palivi? Asani ivi vachitika, anyaki awona kuti mbambula kukhumbika. Kumbi Yehova wangakuwovyani wuli? Wangakuwovyani kuti musaniyi ntchitu mwaliŵi cha, kweni wangakukumbusani vo Davidi wangukamba. Iyu wanguti: “Ndenga mwana, ndipu sonu ndakota, kweni ndechendawonepu munthu murunji wasiyika, pamwenga ŵana ŵaki apemphesa chakurya.” (Sumu 37:25) Yehova watikuwonani kuti mwe akukhumbika ukongwa, ndipu ndi ‘janja laki lamaryi laurunji,’ wangakuwovyani kuti musaniyengi vo mukhumbikiya kuti mulutirizi kumuteŵete.

Sara yo waja ku Colombia wanguwona mo Yehova wangumuwovye. Iyu wagwiranga ntchitu yapachanya, ndipu walondiyanga ndalama zinandi. Kweni yamupasanga mpata cha. Iyu wakhumbanga kuchita vinandi pakuteŵete Yehova. Mwaviyo,  wanguleka ntchitu ndipu wangwamba kuchita upayiniya. Kweni ntchitu yo wapenjanga kuti wagwirengi maora ngamanavi wanguyisaniya liŵi cha. Mwaviyo, wangwamba bizinesi yakugulisa ayisikilimu. Kweni ndalama zingumumaliya ndipu wanguleka bizinesi. Sara wangukamba kuti: “Pangujumpha vyaka vitatu kwambula kusaniya ntchitu yinyaki. Ndiwonga Yehova chifukwa wangundiwovya kukunthiyapu.” Pa nyengu iyi, Sara wangusambira kupambanisa pakati pa vinthu vambula kukhumbika ndi vinthu vakukhumbika. Wangusambira so kuleka kufipiya mtima vamawa. (Mat. 6:33, 34) Pavuli paki, ko wagwiranga ntchitu pakwamba angumudana kuti wakayambi so ntchitu yaki. Iyu wanguŵamuka kuti wangachiyamba so ntchitu yo asani angamuzomereza kugwira kwa mazuŵa ngamanavi kweniso asani amuŵerusengi liŵi mazuŵa nga mawunganu. Chinanga kuti Sara wasaniya ndalama zinandi cha nge mo wachitiyanga kali, kweni ntchitu yaki yitimupasa mpata kuti walutirizi kuchita upayiniya. Iyu wangukamba kuti: “Ndiwona kuti Yehova watindiwovya.”

Chinthu chinyaki cho tifipa nachu mtima nkhukota. Ŵanthu anandi asani apumuwa pa ntchitu afipa mtima ndi mo angasaniriya ndalama. Afipa so mtima ndi matenda ngo azamutama asani azikota. Watenere kuti wenga Davidi yo wanguŵeyere Yehova kuti: “Munganditayanga cha mu ukoti wangu; mungandisiyanga cha asani nthazi zangu zamala.”—Sumu 71:9, 18.

Kumbi ntchinthu wuli cho chingawovya ateŵeti aku Yehova kuti aleki kufipa mtima asani akota? Yiwu atenere kulutiriza kugomeza Chiuta kuti waŵapasengi vakukhumbika. Asani akujapu umoyu wapachanya, angakukhumbika kusintha kuti aje ndi umoyu wambula kukhumbika vinandi ndi kukhorwa ndi vinthu vimanavi. Angawona kuti kurya mphangwi nkhwamampha kuphara kurya nyama. Kurya mphangwi kungawovya so kuti aleki kutamatama. (Nthanthi 15:17) Asani mutesesa kukondwesa Yehova, wakuwovyeningi mu nyengu ya ukoti winu.

Mwakuyeruziyapu, José ndi Rose achita uteŵeti wanyengu zosi kwa vyaka vakujumpha 65. Nyengu yinyaki, yiwu aphweriyanga awisi aku Rose, wo akhumbikanga kuŵaphwere nyengu yosi. Kweniso, José wenga ndi khansa ndipu angumupanga opaleshoni. Kumbi Yehova wangutamphisa janja laki lamaryi kuti waŵawovyi? Hinya. Kumbi wanguchita wuli? Wanguŵawovya kuziya mwaku Tony ndi muwolu waki Wendy. Banja ili linguŵapasa nyumba kuti ajengemu. Tony ndi Wendy akhumbanga kupereka nyumba iyi kwa apayiniya a nyengu zosi kwambula lenti. Pa nyengu yo Tony wenga ku sekondale, kanandi wawonanga José ndi Rose achiluta mu uteŵeti. Iyu waŵawoniyanga pawindu mukilasi. Waŵayanjanga chifukwa cha phamphu lo ŵenga nalu ndipu ivi vingumuwovya kuti nayu wayanjengi uteŵeti. Pakuwona kuti banja ili lateŵete Yehova umoyu wawu wosi, Tony ndi Wendy anguŵapasa nyumba kuti ajengemu. Yiwu awovya José ndi Rose kwa vyaka 15. José ndi Rose sonu ŵe ndi vyaka pafupifupi 85. Yiwu awona kuti Tony ndi Wendy ntchawanangwa chakutuliya kwaku Yehova.

Chiuta watamphisa so ‘janja laki lamaryi laurunji’ kwaku imwi. Kumbi namwi mutamphisengi janja linu kwaku Yehova yo watikulayizgani kuti: “Ungachitanga mantha cha. Ini ndikuwovyengi”?