Masalimo 71:1-24
71 Yimwi Yehova, ini ndabisama mwaku yimwi.
Ndingalengesekanga cha.+
2 Nditaskeni kweniso ndiwomboni mu urunji winu.
Lazgisani gutu linu* kwaku ini ndipu nditaskeni.+
3 Muje jalawi langu lakuvikilirikaLo ndingaseremu nyengu yeyosi.
Lamulani kuti nditaskiki,Pakuti yimwi ndimwi jalawi langu ndipuso malu ngangu ngakuvikilirika.+
4 Yimwi Chiuta wangu, nditaskeni ku janja la munthu muheni,+Nditaskeni kuti akukandirizga ankhaza aleki kundiko.
5 Pakuti yimwi ntchilindizga changu, yimwi Yehova Ambuya Fumu Yikulu;Ndigomezga yimwi kutuliya pa unyamata wangu.+
6 Ndithemba yimwi kutuliya po ndikuwiya;Yimwi ndimwi mukundituzga munthumbu ya ama.+
Ini nditikuthamikani nyengu zosi.
7 Ndaja nge chakuziziswa ku ŵanthu anandi,Kweni yimwi ndimwi malu ngangu ngakuthaŵiyaku ngakukho.
8 Mumulomu mwangu mwazaza mazu ngakukuthamikani;+Zuŵa losi lamphumphu ndikamba vakukwaskana ndi unkhankhu winu.
9 Munganditayanga cha mu ukoti wangu;+Mungandijowonga cha asani nthazi zangu zamala.+
10 Arwani ŵangu atindinena,Ndipu wo apenja kundibaya, achita wupu,+
11 Yiwu atiti: “Chiuta wamujowo.
Mutchimbizeni ndipu mumuko, pakuti palivi wakuti wamutaski.”+
12 Yimwi Chiuta, mungajanga kutali cha ndi ini.
Yimwi Chiuta wangu, yendesani kuti mundiwovyi.+
13 Ŵanthu wo atindisuskaAchiti soni kweniso anangiki.+
Ŵanthu wo atindipenje sokaAbulumutizgiki ndi soni kweniso ayuyuliki.+
14 Kweni ini ndilutirizgengi kulindizga;Ndisazgiyengeku kukuthamikani.
15 Mulomu wangu ukonkhoskengi urunji winu,+Zuŵa losi lamphumphu ukonkhoskengi ntchitu zinu za utaski,Chinanga kuti zilipu zinandi ndipu ndingazivwisa cha.*+
16 Ndizengi ndi kukamba vakukwaskana ndi ntchitu zinu zanthazi,Yimwi Yehova Ambuya Fumu Yikulu;Ndizumbuwengi urunji winu, winu pe.
17 Yimwi Chiuta, mwandisambiza kutuliya pa unyamata wangu,+Ndipu mpaka sonu ndeche kupharazga ntchitu zinu zakuziziswa.+
18 Chinanga ndingakota ndipuso ndingachita nyivu,* mungandijowonga cha yimwi Chiuta.+
Ndizomerezeni kuti ndikambiyi mugonezi wo utuza vakukwaskana ndi janja linu*Ndipuso kuti ndikambiyi ŵosi wo atuza vakukwaskana ndi nthazi zinu.+
19 Urunji winu yimwi Chiuta, ufika kuchanya;+Yimwi mwachita vinthu vikulu;Ndiyani wayanana namwi yimwi Chiuta?+
20 Chinanga kuti mwandichitiska kuti ndikumani ndi masuzgu nganandi ndipuso masoka,+Ndisisipuweni so;Ndizuwuweni mundimba* za charu chapasi.+
21 Musazgiyeku ukulu wanguKweniso ndizingilizeni ndipuso mundipembuzgi.
22 Pavuli paki ndipu ndikuthamikeningi pa chakumbiya cha vingwi,Chifukwa cha kugomezgeka kwinu yimwi Chiuta.+
Ndimbengi sumu zakukuthamikani* mwakugwiriskiya ntchitu bangu,*Yimwi Mtuŵa waku Isirayeli.
23 Milomu yangu yidanirizengi mwalikondwa ndichimba sumu zakukuthamikani,+Pakuti yimwi mwataska umoyu wangu.*+
24 Lilimi langu likambengi* vakukwaskana ndi urunji winu zuŵa losi lamphumphu,+Pakuti wo akhumba kuti ndinangiki achitengi soni kweniso alengesekengi.+
Mazu Ngam'mphata
^ Pamwenga kuti, “Sindamani ndipu muvwisiyi.”
^ Pamwenga kuti, “ndingaziŵerenga cha.”
^ Anyaki akamba kuti, “mbuha.”
^ Pamwenga kuti, “nthazi zinu.”
^ Pamwenga kuti, “mundimba za maji.”
^ Pamwenga kuti, “Ndikupangiyeningi sumu.”
^ Anyaki akamba kuti, “bangwi.”
^ Pamwenga kuti, “yimwi mwandiwombo.”
^ Pamwenga kuti, “lilungurukengi.”
