Jesus Kristu—Oinsá mak nia mensajen kona ema?

“Buat neʼebé hatudu katak ema matenek husi Kafarnaum neʼe mak ema boot duni, tanba buat neʼebé nia hatete book nafatin ema nia fuan-laran toʼo ohin loron.” *​—HAKEREK-NAʼIN GREGG EASTERBROOK.

LIAFUAN sira iha forsa duni. Liafuan bele book ema nia laran, fó esperansa, no bele troka ema nia moris. La iha ema ida neʼebé bele book ema nia laran ho liafuan hanesan Jesus Kristu. Ema ida neʼebé rona diskursu neʼebé Jesus hatoʼo iha foho ida, hatete: “Wainhira Jesus koʼalia hotu tiha, ema-lubun hakfodak ho nia doutrina.”—Mateus 7:28.

Toʼo ohin loron, ema barak iha mundu tomak hatene kona-ba liafuan furak balu neʼebé Jesus hatoʼo. Mai ita haree ezemplu balu kona-ba Jesus nia liafuan sira-neʼe.

“Imi labele serbí hamutuk Maromak ho osan.”—Mateus 6:24.

“Neʼe duni, buat hotu neʼebé imi hakarak ema halo ba imi, imi mós halo ba sira.”—Mateus 7:12.

“Fó ba Sezar buat neʼebé Sezar nian, no ba Maromak buat neʼebé Maromak nian.”—Mateus 22:21.

“Diʼak liu fó liu fali simu.”—Apostolu 20:35.

Maibé Jesus la hatoʼo deʼit liafuan matenek. Jesus hatoʼo mensajen neʼebé iha forsa tanba ida-neʼe ajuda ema atu hatene lia-loos kona-ba Maromak, ajuda ema atu hetan moris neʼebé iha folin, no hatudu oinsá mak Maromak nia Reinu sei halo lakon terus hotu. Nuʼudar ita lee mensajen neʼe iha pájina sira tuirmai, ita sei haree oinsá mak Jesus nia liafuan “book nafatin ema nia fuan-laran toʼo ohin loron”.

[Nota–rodapé]