Bainhira kongregasaun iha Roma rona katak Paulo mai, sira haruka irmaun balu atu halo viajen maizumenus kilómetru 64 hodi bá hasoru Paulo. Oinsá mak sira-nia hahalok domin neʼebé la hanoin an deʼit book Paulo? “Bainhira haree tiha sira, Paulo fó agradese ba Maromak no sai aten-brani.” (Aps 28:15) Maski Paulo mak sempre fó laran-manas ba kongregasaun neʼebé nia vizita, maibé kuandu nia sai dadur, nia mak simu fali laran-manas.​—2Ko 13:10.

Ohin loron, katuas área sira vizita kongregasaun sira atu fó laran-manas ba irmaun-irmán sira. Hanesan Maromak nia povu hotu, dala ruma sira mós sente kole, laran-taridu no mós laran-kraik. Bainhira katuas área no ninia feen vizita Ita-nia kongregasaun, saida mak Ita bele halo atu ajuda sira sai aten-brani, atu nuneʼe bele “anima no hametin malu”?​—Rom 1:11, 12.

• Tuir grupu haklaken. Katuas área anima haklaken-naʼin sira atu halo sakrifísiu hodi nuneʼe sira bele hetan benefísiu iha semana neʼebé nia vizita. (1Ts 1:2, 3; 2:20) Karik Ita bele foti pioneiru estra durante fulan neʼebé nia vizita. Karik Ita bele husu atu haklaken hamutuk ho katuas área ka ho ninia feen ka konvida sira ida atu tuir Ita-nia estuda. Sira kontente atu serbisu hamutuk ho irmaun-irmán oioin, inklui haklaken-naʼin foun sira ka sira neʼebé ladún iha matenek atu haklaken.

• Hatudu laran-luak. Ita bele ka lae fó hela-fatin ba sira ka konvida sira han hamutuk? Neʼe hatudu katak Ita hadomi sira. Sira la husu buat barak husi ita.​—Lc 10:38-42.

• Rona no aplika ninia matadalan no konsellu sira. Katuas área ajuda ita atu bele aumenta liután ita-nia serbisu ba Jeová. Dala ruma, nia fó ita konsellu neʼebé makaʼas. (1Ko 5:1-5) Nia sente kontente bainhira haree irmaun-irmán sira halo tuir no hakruʼuk an.​—Ebr 13:17.

• Fó sai agradese. Hatete ba katuas área no ninia feen katak ita hetan duni benefísiu husi sira-nia hakaʼas an. Ita bele hatete kedas ba sira ka bele mós hakerek karta.​—Kol 3:15.