Mateo 8:1-34
8 Índo̱ nigajta̱a̱ náa kúbá, mbiʼin xa̱bu̱ nigún kidxuuʼ.
2 Ikhú ni̱ʼkha̱nú mbáa xa̱bu̱ bi̱ gíʼdoo nandii lepra* ga̱jma̱a̱ nismbáti̱go̱o̱ náa inuu, ikhú niʼthúu̱n: “Tátá, ikhúún nda̱yo̱o̱ rí ma̱ndoo matani̱ thanuʼ, á mu nandaaʼ”.+
3 Ikhú Jesús nikrui̱ya̱ʼ ñawúunʼ ga̱jma̱a̱ nixkrámaaʼ, ikhú niʼthúu̱n: “Aan xúʼko̱, nandoʼ, ga̱ʼni̱i̱ a̱jkia̱a̱nʼ”.+ Núkhu niʼni̱i̱ a̱jkiu̱u̱n xa̱bu̱.+
4 Ikhú Jesús niʼthúu̱n: “Tsu̱ma̱á lá, xáratha̱a̱n nimbáa.+ Mú, ayu̱u̱ʼ gáraxnaxíminaʼ náa ndxajkun+ ga̱jma̱a̱ ayá gídxúʼ tsigijñaʼ rí naʼthí náa xtángoo ndrígóo Moisés,+ mu xúʼko̱ mbuyáá rí niguma thanaaʼ”.
5 Índo̱ ni̱jkha̱nú náa xuajin Capernaúm, ikhú ni̱ʼkha̱ gáʼyoo mbáa bi̱ naʼtáñajúúnʼ soldados* ga̱jma̱a̱ nindo̱ʼo̱o̱ rí mambáyúu.+
6 Niʼthúu̱n: “Tátá, bi̱ nambáyuʼ nandoo kháñuu, naʼni xa̱a̱ʼ.* Kraʼaa kabóoʼ kayuuʼ náa goʼwóʼ ga̱jma̱a̱ namínúuʼ wéñuuʼ”.
7 Ikhú Jesús niʼthúu̱n: “Ma̱ni̱ thanuu má índo̱ gáʼgánú ikhí”.
8 Mú bi̱ naʼtáñajúúnʼ soldados niʼthúu̱n: “Tátá, rakáʼyoʼ mata̱ʼa̱a̱ʼ náa goʼwóʼ. I̱ndó aratá rí maʼni̱i̱ a̱jkiu̱u̱n ga̱jma̱a̱ ikhaa maʼni̱i̱.
9 Numuu rí mangúún nanimbo̱ʼ rí nutañajunʼ ma̱ngaa gúʼdiin soldados bi̱ natañájúúnʼ. Índo̱ mbáa na̱thu̱u̱n ‹¡Ayuʼ!› ikhaa na̱jkha̱, ga̱jma̱a̱ índo̱ i̱mba̱a̱ na̱thu̱u̱n ‹¡Ayi̱!› ikhaa na̱ʼkha̱, ga̱jma̱a̱ índo̱ na̱thu̱u̱n ñumbáá ndrígóʼ ‹¡Atani̱ rígi̱!› ikhaa naʼni”.
10 Índo̱ Jesús niʼdxuun rígi̱ niguanúu tsiánguá, ikhú niʼthún bi̱ nagún kidxuuʼ: “Na̱tala gajkhun rí táxkamaa nimbáa náa Israel bi̱ gíʼdoo mbá fe mba̱a̱ xóo xa̱bu̱ bugi̱.+
11 Na̱tala rí mbaʼin maguwáʼ náa nagájnuu a̱jkha̱ʼ* ga̱jma̱a̱ náa narámaaʼ a̱jkha̱ʼ* ma̱ngaa matri̱gi̱i̱n náa mesa gajmiún Abrahán, Isaac ga̱jma̱a̱ Jacob náa naʼtáñajunʼ Xa̱bu̱ Ñajunʼ ndrígóo Dios* bi̱ xtáa mekhuíí.+
12 Mú bi̱ Dios niʼthún mutañajunʼ nákha ginii, majuixkawíin rexa̱a̱ náa mikína. Ikhí mumbi̱ya̱ʼ ga̱jma̱a̱ mupuduun iñúúnʼ”.+
13 Ikhú Jesús niʼthúu̱n bi̱ naʼtáñajúúnʼ soldados: “Ayu̱u̱ʼ guʼwáaʼ ga̱jma̱a̱ gambanúu rí nitanda̱ʼa̱ xó má fe rí nitasngájma”.+ Núkhu má ikhú niʼni̱i̱ a̱jkiu̱u̱n bi̱ nambáyúu.+
14 Índo̱ Jesús nito̱ʼo̱o̱ náa goʼwóo Pedro, ikhú ndiʼyoo rí dxa̱giu̱u̱+ kaʼmáaʼ náa xiawoo naʼniuu mijkha.*+
15 Ikhú Jesús niguajtuun ñawúunʼ+ ga̱jma̱a̱ núkhu niwi̱ji̱i̱ mijkha. Ikhú nitujxi̱i̱ ga̱jma̱a̱ niʼni mbaʼwi̱i̱.
16 Índo̱ niʼni wakíʼ, niguwáʼ kudiin náa Jesús mbaʼin xa̱bu̱ bi̱ guáʼdiin giñán xkawi̱i̱nʼ,* ga̱jma̱a̱ mbóó má eʼthúún, ikhú nagájnaán giñán xkawi̱i̱nʼ. Ma̱ngaa niʼni thanún xúgíinʼ xa̱bu̱ bi̱ numíniiʼ ga̱jma̱a̱ nandii.
17 Nirígá rígi̱ mu mambanúu rí niʼtáriyaʼ profeta* Isaías: “Ikhaa nigu̱u̱ nandiulú ga̱jma̱a̱ xúgíʼ ga̱ʼkhu̱ rí kuaʼdáá”.+
18 Índo̱ Jesús ndiʼyoo rí mbaʼin xa̱bu̱ eruguama̱ʼa̱a̱n, ikhú niʼtáñajúúnʼ rí magún i̱mba̱ ridoo.+
19 Ikhú nikuʼmaminaʼ mbáa bi̱ naʼsngáa xtángoo ga̱jma̱a̱ niʼthúu̱n: “Maestro, maʼgá ga̱jma̱á nindxa̱a̱ʼ asndu náá má gídxúʼ”.+
20 Mú Jesús nigawuuʼ: “Igi̱* guáʼdáá iñúúnʼ ga̱jma̱a̱ ñu̱ʼu̱ bi̱ jngrui̱gu̱u̱n rijma̱a̱ guáʼdáá xújúúnʼ, mú A̱ʼdióo Xa̱biya̱ asndu ragíʼdoo náa magíʼ edxu̱u̱”.+
21 Mbáa xa̱bi̱i̱ niʼthúu̱n: “Tátá, atatsíñúnʼ maʼgáaʼ gádíi anu̱ʼ* ginii”.+
22 Jesús niriʼñuu: “Ayi̱ kha mu̱ʼgua̱, atatsíñúúnʼ wajinʼ mudumijnáá”.+
23 Índo̱ Jesús nitsimuu náa barco ikhú xa̱bi̱i̱ nitsimún mangiin mu magún gajmiún.+
24 Índo̱ Jesús xtáa raʼgu,+ nda̱a̱ tsu̱ma̱ nixnúu mbá giñámbiʼ náa lamáa* rí asndu iyaʼ rí naʼbaxu̱u̱ nismbataʼa náa barco.
25 Ikhú nigún gúxkajui̱i̱ ga̱jma̱a̱ nitháán: “¡Tátá, atambáyuxu̱! ¡Makañúlú rá!”.
26 Mú ikhaa niʼthún: “Náá ni̱jkha̱ fe ndrígala, náá numuu rí namíñala”.+ Ikhú nitu̱jxu̱u̱ ga̱jma̱a̱ nixprígúu giñánʼ ma̱ngaa lamáa, ikhú ni̱ʼkha̱ gáʼni wíí.+
27 Ikhú xa̱bi̱i̱ niguanún tsiánguá ga̱jma̱a̱ nitamijná: “Tsáá phú nindxu̱u̱ xa̱bu̱ bugi̱ rí asndu giñánʼ ga̱jma̱a̱ lamáa nunimbu̱ún kuyáá rá”.
28 Índo̱ ni̱jkha̱nú náa i̱mba̱ ridoo lamáa, náa mbaaʼ rí kaʼyoo Gadara, ikhú a̱jmi̱i̱n xa̱bu̱ bi̱ guáʼdiin giñán xkawi̱i̱nʼ bi̱ naguwáʼ xígií náa najuaʼdi̱ín wajinʼ, niguwáʼ gútsijníín Jesús.+ Ra̱ʼkhá tháán jmangu̱u̱nʼ rí nimbáa tsénújngoo náa kamba̱a̱ rúʼko̱.
29 Ikhú nigíʼdi̱i̱ nindxa̱ʼwa̱: “A̱ʼdióo Dios, náá numuu rí na̱dxa̱ʼ náa ikháanʼxu rá.+ Lá na̱dxa̱ʼ gátani̱ gínáanʼxu̱+ maski ajndu xóó tséjkha̱nú mbiʼi ráʼ.”+
30 Ga̱jma̱a̱ mijngii má ikhí kajtiin mbaʼin a̱ga ruphiʼtsu.+
31 Ikhú xa̱bu̱ wéñiiʼ nigíʼdi̱i̱ nitakáñíí Jesús: “Á mu nataxkawáanʼxu, atatsíñuxu matu̱ʼu̱xu náa a̱ga buʼko̱”.+
32 Ikhú ikhaa niʼthún: “¡Aʼguala!”. Ikhú nigájna̱án náa xa̱bu̱ ga̱jma̱a̱ nitu̱ʼu̱u̱n náa a̱ga. Ga̱jma̱a̱ ikhú a̱ga nijngutíguíin náa mitsídánʼ, nijnguíʼíin náa lamáa ga̱jma̱a̱ ikhú nikháñún.
33 Xa̱bu̱ bi̱ nuñewu̱u̱n a̱ga nijngujuíin ragáñúún. Nigún náa xuajin gúthi xúgíʼ dí nirígá ma̱ngaa rí niguáʼníí xa̱bu̱ bi̱ guáʼdiin giñán xkawi̱i̱nʼ.
34 Ikhú mbá xúgíinʼ xa̱bu̱ xuajin nigún gúyáaʼ Jesús ga̱jma̱a̱ índo̱ nixkamaa nitakáñíín rí magajnáa náa mbaaʼ rúʼko̱.+
