Mateo 10:1-42
10 Ikhú nigímbíin bi̱ mbá 12 xa̱bi̱i̱, nixnúún tsiaki̱i̱ mu muxkawíin giñán xkawi̱i̱nʼ*+ ma̱ngaa rí muni̱ thanún xúgíinʼ xa̱bu̱ bi̱ guáʼdáá asndu xkáʼnii má nandii.
2 Xígi̱ mbiʼñún bi̱ mbá 12 apóstoles* ndrígióo:+ Timbáa, Simón bi̱ nutháán Pedro+ ga̱jma̱a̱ giʼtio̱o̱ bi̱ mbiʼyuu Andrés,+ Santiago a̱ʼdióo Zebedeo ga̱jma̱a̱ ndxájuu bi̱ mbiʼyuu Juan,+
3 Felipe ga̱jma̱a̱ Bartolomé,+ Tomás+ ga̱jma̱a̱ Mateo+ bi̱ naruma mbújkho̱o̱ guʼwá ñajunʼ, Santiago a̱ʼdióo Alfeo ga̱jma̱a̱ Tadeo,
4 Simón bi̱ xtiékoo ga̱jma̱a̱ Judas Iscariote, bi̱ nda̱wa̱á nixnájxi̱i̱ Jesús.+
5 Índo̱ Jesús nikuʼmiin bi̱ mbá 12 xa̱bi̱i̱, niʼthún muni̱ rígi̱:+ “Xáʼguala náa kúwá xa̱bu̱ bi̱ na̱nguá ni̱ndxu̱ún judíos ga̱jma̱a̱ xáʼguala náa xuajin ndrígóo Samaria.+
6 Guʼgua gúʼñíinʼ xa̱bu̱* Israel+ bi̱ ni̱ndxu̱ún xóo mugu̱ bi̱ nindáti̱gi̱i̱n.
7 Guʼgua rutaráʼa, gu̱tha̱, ‹Xa̱bu̱ Ñajunʼ ndrígóo Dios* bi̱ xtáa mekhuíí na̱ʼkha̱ rajngiyuu* má›.+
8 Gu̱ni̱ thanún bi̱ naʼniún nandii,+ gunigabi̱ín* bi̱ nikháñún, gu̱ni̱ thanún bi̱ guáʼdáá lepra, guxkawíin xa̱bu̱ wéñiiʼ.* Nimina̱ánʼla, ikha jngóo guxna̱ála mangáanʼ.
9 Xúdéʼgua oro, plata ni má cobre náa xtíin rí kaxtoʼóo smídala,+
10 ni xúdéʼgua ganitsu, ni má i̱mba̱ edi̱i̱ xtíñala, ni má i̱mba̱ edi̱i̱ raxtála,* ni má ragótiala,+ numuu rí bi̱ nañajunʼ kaʼyoo rí makhánáá rí mi̱khu̱.+
11 Índo̱ gáta̱ʼa̱la náa mbá xuajin mba̱a̱ o chíʼgíiʼ,* guʼyáaʼ asndu náa muxkamaa bi̱ kaʼyoo maʼdxun ajngáa, gaguanála ikhí asndu índo̱ gágajnála maʼgua i̱mba̱ níʼkhá.+
12 Índo̱ gáta̱ʼa̱la náa mbá guʼwá, gurajxi̱ín* bi̱ kúwá ikhí.
13 Á mu nundriguáanʼ, mambáñún má ikhiin,+ á mu na̱nguá, xámbáñun má.
14 Á mu náa mbá guʼwá o xuajin tséndriguáanʼla ni má tsédxawanla, índo̱ gágajnáanʼla ikhí, guxprígúu yujndaʼ rajkuála.+
15 Na̱tala dí mbiʼi rí mixtanda̱ʼa̱a̱ cuenta, itháan gakhi̱i̱ gúmíniiʼ xa̱bu̱ buʼko̱, ki xóo xuajin Sodoma ga̱jma̱a̱ Gomorra.+
16 Nakuʼmáanʼla xóo mugu̱ náa majñu̱únʼ lobos.* Wipiáanʼla gúni̱ xóo wipiin abu̱nʼ, ga̱jma̱a̱ ganindxa̱la xóo palomas bi̱ nda̱a̱ aʼkhúún.+
17 Guñewumíjna̱la náa xa̱bu̱, numuu rí muxnajxáanʼla náa guʼwá ñajunʼ+ ga̱jma̱a̱ muxpajtiáanʼla+ náa guʼwá rí bi̱ judíos nuxnáá gamajkhu Dios.+
18 Ga̱jma̱a̱ numuʼ maʼga kiʼdáanʼ náa inún xa̱bu̱ ñajunʼ ga̱jma̱a̱ náa inún reyes.+ Mu xúʼko̱ xúgíinʼ ikhiin mbuyáá ga̱jma̱a̱ numuʼ.+
19 Índo̱ gúxnajxa̱ánʼla, xáxmiéjuanla dí gútha̱ o xú káʼnii gútala, numuu rí índo̱ gáʼganú mbiʼi maguaʼdáá má dí mu̱tha̱.+
20 Numuu dí raʼkháa i̱ndó ikháanʼla gútha̱, tsiaki̱i̱ ndrígóo Ana̱la* gáʼthí ga̱jma̱á numala.+
21 Ma̱ngaa ndxájuu má xa̱bu̱ gáxnájxi̱i̱ mu muxiyáa, ga̱jma̱a̱ xabuanii muxnajxi̱i̱n e̱jñu̱ún ga̱jma̱a̱ e̱ji̱n muxnajxi̱i̱n anu̱ún mu makhañún.+
22 Xúgíinʼ xa̱bu̱ mawiñu̱u̱nʼ kuyala ga̱jma̱a̱ numuu mbiʼyuʼ.+ Mú bi̱ gáʼngo̱o̱ asndu índo̱ gártumuu mbiʼi, buʼko̱ bi̱ makríya̱a̱ʼ.+
23 Índo̱ gúni gínáanʼla náa mbá xuajin gaʼguala náa i̱mba̱ xuajin,+ numuu rí na̱tala, rí asndu xóó tsériña̱a̱nʼla* náa xúgíʼ xuajin rí kaʼyoo Israel índo̱ gátanga̱a̱ A̱ʼdióo Xa̱biya̱.
24 Bi̱ naʼnigajma̱a̱ ragíʼdoo itháán numuu ki xóo bi̱ naʼsngáa, ni má ñumbáá ki xóo bi̱ naʼtáñajuunʼ.+
25 Mbáa bi̱ naʼnigajma̱a̱ magiʼthu̱u̱n magumaa xó má bi̱ naʼsngáa, ga̱jma̱a̱ ñumbáá xóo bi̱ naʼtáñajuunʼ.+ Á mu minaaʼ tátá nitháán Gixa̱a̱.*+ ¡Iwáá lá bi̱ kúwá náa goʼwóo xúthún xá!
26 Ikha jngóo, xámíñála kuñu̱u̱n, numuu rí nda̱a̱ nimbá rí kúgoo rí xáʼga̱nú makujmaa, ni má nda̱a̱ nimbá rí ngu̱ʼwa̱ rí xáʼga̱nú maʼni pa̱jnu.+
27 Rí na̱tala náa mikína, gu̱tala índo̱ gáʼni mbiʼi, rí na̱tala ngo̱ʼo̱o̱, gu̱tala pa̱jnu,+ xúrkaʼwu.
28 Xámíñála kuñu̱u̱n bi̱ i̱ndó nuxiyáa xuyala, mú xáʼngu̱u̱n gúriya kaʼyála rí makuwáanʼ nda̱wa̱á.+ Gamiñala kuya̱a̱ bi̱ magudiáanʼla mbá kayuuʼ náa Gehena.*+
29 Lá tséxtangujui̱i̱n a̱jmi̱i̱n ñu̱ʼu̱ ga̱jma̱a̱ mbá mbújkha̱a̱ dí rambáa numuu* ráʼ. Mú Anu̱lú ndaʼyoo índo̱ mbáa dí ikhiin naxpátríguíi* mbayííʼ.+
30 Mú ikháanʼla asndu kíxnuu xúgíʼ xtátsúun edxa̱la.
31 Ikha jngóo, xámíñála, ikháanʼ kuaʼdáá itháan numala ki xóo mbaʼin ñu̱ʼu̱.+
32 Asndu tsáa má bi̱ gáʼthí rí májánʼ ga̱jma̱a̱ numuʼ náa inún xa̱bu̱,+ xúʼko̱ má mangúún ma̱ta̱ rí májánʼ ga̱jma̱a̱ numuu náa inuu Anu̱ʼ bi̱ xtáa mekhuíí.+
33 Mú, á mu mbáa naʼthí rí tséniniúnʼ náa inún xa̱bu̱, xúʼko̱ má gátha rí tséniʼníiʼ mangúún náa inuu Anu̱ʼ bi̱ xtáa mekhuíí.+
34 Xákumala rí ni̱ʼkhá ka̱yo̱ʼ dí tsímáá náa numbaaʼ, i̱ndó sia̱nʼ* ni̱ʼkhá ka̱yo̱ʼ.+
35 Numuu rí ni̱ʼkhá gáni rí magiʼdoo xkujndu ada̱ ga̱jma̱a̱ anu̱u̱, dxáʼgú ga̱jma̱a̱ ru̱dúu̱,* guʼgúúnʼ ga̱jma̱a̱ dxa̱giu̱u̱.+
36 Ikha jngóo, bi̱ makiʼníin kuyáá xa̱bu̱, mani̱ndxu̱ún bi̱ kúwá má náa goʼwóo.
37 Bi̱ nandoo kaʼyoo itháan anu̱u̱ o ru̱dúu̱ rakáʼyoo mani̱ndxu̱u̱ xa̱bi̱ʼ, ga̱jma̱a̱ bi̱ nandoo kaʼyoo itháan dxámiuu o wáxióo rakáʼyoo mani̱ndxu̱u̱ xa̱bi̱ʼ.+
38 Bi̱ nandoo ma̱ʼkha̱ kidxuʼ mú tsíyoo rí maguma gínáa,* xándoo mani̱ndxu̱u̱ xa̱bi̱ʼ.+
39 Bi̱ nandoo maxtáa, makhañúu, mú bi̱ gákháñuu ga̱jma̱a̱ numuʼ, matanga̱a̱ maxtáa mbu̱júu̱.+
40 Bi̱ nagruiguáanʼla ikháanʼ nagruigúún má mangúún, ga̱jma̱a̱ bi̱ nagruigúún ikhúún nagruiguíi bi̱ nikuʼmún ma̱ngaa.+
41 Bi̱ nagruiguíi mbáa profeta,* numuu dí nindxu̱u̱ profeta bi̱ nagruiguíi, ikha jngóo mada̱a̱ʼ xóo mbáa profeta.+ Bi̱ nagruiguíi mbáa xa̱bu̱ májáanʼ, numuu dí nindxu̱u̱ xa̱bu̱ májáanʼ bi̱ nagruiguíi, ikha jngóo mada̱a̱ʼ xóo mbáa xa̱bu̱ májáanʼ.
42 Na̱tala gajkhun, rí mada̱a̱ʼ má tsiaki̱i̱ asndu tsáa bi̱ gáxnúu iyaʼ maga̱a̱n mbáa xa̱bi̱ʼ”.*+
Mbaʼa nota
^ Xígi̱ mbiʼñún xa̱bu̱ bi̱ Jesús niraʼwíin.
^ Náa ajngáa griego naʼthí, “guʼwá”.
^ O “mijngii”.
^ O “guxujxíín”, “gu̱ni̱ mbuya̱a̱”.
^ O “chádala”.
^ O “lajuíin”.
^ Índo̱ nurajximíjna̱á xa̱bu̱ judíos nuthi “tsímáála gáraxtaa”.
^ Xujkhúʼ bugi̱ ni̱ndxu̱u̱ xóo iña̱ʼ mú itháan mba̱a̱.
^ O “Tátiala’”.
^ O “tséngujñáanʼla”.
^ O “nakatíga̱a̱”.
^ O “espada”.
^ O “nánée”.
^ O “gaʼyee”, “bi̱ naʼthí dí marigá”.
^ Náa ajngáa griego naʼthí, “bi̱ chíʼgíiʼ”.
