Mateo 18:1-35
18 Mbiʼi rúʼko̱, xa̱bi̱i̱ Jesús nixuʼmamijná ga̱jma̱a̱ nirajxi̱i̱: “Tsáá ñajuunʼ bi̱ itháan gíʼdoo numuu náa naʼtáñajunʼ Xa̱bu̱ Ñajunʼ ndrígóo Dios* bi̱ xtáa mekhuíí rá.”+
2 Ikhú nindxa̱ʼóo mbáa ada̱ nitsijii náa taphu̱ún ikhiin,
3 ga̱jma̱a̱ niʼthún: “Na̱tala gajkhun rí á mu tsériʼkumijnáaʼla ga̱jma̱a̱ tsénindxala xóo e̱ji̱n,+ xáta̱ʼa̱a̱ʼla* náa naʼtáñajunʼ Xa̱bu̱ Ñajunʼ ndrígóo Dios bi̱ xtáa mekhuíí.+
4 Ikha jngóo, bi̱ gánindxu̱u̱ xa̱bu̱ wabaaʼ xóo ada̱ bugi̱, magiʼdoo numuu náa Xa̱bu̱ Ñajunʼ ndrígóo Dios bi̱ xtáa mekhuíí,+
5 ga̱jma̱a̱ bi̱ nagruiguíi mbáa ada̱ xóo bugi̱ ga̱jma̱a̱ mbiʼyuʼ, nagruigúún má mangúún.
6 Mú asndu tsáa bi̱ gáʼni majngrádaaʼ mbáa bi̱ itháan chíʼgíiʼ* bugi̱, bi̱ gíʼdoo fe náa ikhúún, itháan májánʼ gáʼni rí maxtoʼóo mbá itsúu molino* náa aphuu ga̱jma̱a̱ miʼdama̱ʼa̱a̱n náa lamáa* rí itháan mi̱jnu̱ʼ.+
7 ¡Gínáa lá xa̱bu̱ numbaaʼ bi̱ naʼni majngrádiinʼ eʼwíinʼ! Jkhu marigá má rí maʼni majngrádiinʼ xa̱bu̱. ¡Mú gínáa xa̱bu̱ bi̱ gáʼni majngrádiinʼ eʼwíinʼ!
8 Ikha jngóo á mu ñawáanʼ o rajkuáaʼ naʼni rí makiéʼkáanʼ, atrujturígú ga̱jma̱a̱ atadaʼ mitsínguánʼ.+ Numuu rí itháan májánʼ rí mixndu ñawáanʼ o rajkuáaʼ gákhanaaʼ rí maraxtaa ki xóo mbá nájma̱ ñawáanʼ o nájma̱ rajkuáaʼ miʼdama̱ʼa̱a̱n náa aguʼ rí nakha mbiʼ kámuu.*+
9 Ma̱ngaa, á mu idaaʼ naʼni rí makiéʼkáanʼ, atríyaʼ ga̱jma̱a̱ atadaʼ mitsínguánʼ. Numuu rí itháan májánʼ rí mbóó idaaʼ gákhanaaʼ rí maraxtaa ga̱jma̱a̱, ki xóo rí mbá nájma̱ idaaʼ miʼdama̱ʼa̱a̱n náa aguʼ ndrígóo Gehena.*+
10 Tsu̱ma̱á lá, á mu tsíyala gúya̱a̱ mbáa bi̱ itháan chíʼgíiʼ bugi̱, numuu rí ángeles wájun má xúʼko̱ náa inuu Anu̱ʼ* bi̱ xtáa mekhuíí.+
11 *
12 Dí gútala ikháanʼ rá. Á mu mbáa xa̱bu̱ gíʼdiin mbá 100 mugu̱ ga̱jma̱a̱ mbáa dí ikhaa nandáti̱ga̱a̱,+ lá raʼkháa maniñúúnʼ náa kúbá bi̱ mbá 99 mu maʼga gáyáaʼ bi̱ nindáti̱ga̱a̱ xáʼ.+
13 Ga̱jma̱a̱ á mu naxkama̱a̱ maʼdxuu itháan kaʼyoo bi̱ nikujma̱a̱ ki xóo bi̱ mbá 99 bi̱ tándatigi̱i̱n.
14 Xúʼko̱ má eʼni Anu̱ʼ bi̱ xtáa mekhuíí ma̱ngaa: Ikhaa tsíyoo dí mandáti̱ga̱a̱ nimbáa bi̱ chíʼgíiʼ bugi̱.+
15 Ikha jngóo, á mu ndxájuaaʼ nikiéʼkúun náa inaaʼ, ayuʼ gáratamíjná ga̱jma̱a̱ʼ i̱ndó ikhaa+ ga̱jma̱a̱ atani̱ mbaʼyoo rí niʼnitígo̱o̱.* Á mu niʼdxawaanʼ, niʼnga̱a̱ʼ má nitambáyíí ndxájuaaʼ maʼni rí májánʼ xúʼko̱ rá.+
16 Mú, á mu tséʼdxawuun dí naratháán, ayuʼ ga̱jma̱a̱ʼ i̱mba̱a̱ o imbá gi̱jmi̱i̱n, mu xúʼko̱ ma̱ndoo mambanúu xúgíʼ náa inún a̱jmi̱i̱n o ajtsíin xa̱bu̱.+
17 Á mu na̱nguá eʼdxawún, arathún bi̱ nagimbíi̱n.* Ga̱jma̱a̱ á mu tséʼdxawún dí nuthi bi̱ nagimbíi̱n, ikhú atayáá xóo mbáa xa̱bu̱ bi̱ na̱nguá nindxu̱u̱ judío+ ga̱jma̱a̱ xóo bi̱ naruma mbújkho̱o̱ guʼwá ñajunʼ.+
18 Na̱tala gajkhun dí xúgíʼ dí gúruʼwa̱a̱la mbayííʼ gi̱jyooʼ, xúʼko̱ má gáxtoʼóo mekhuíí ma̱ngaa, ga̱jma̱a̱ xúgíʼ dí gúrajkuíiʼla mbayííʼ gi̱jyooʼ, majkuíiʼ má mekhuíí ma̱ngaa.
19 Ma̱ngaa na̱tala gajkhun, á mu ajmáanʼla dí ikháanʼ, nambánala rí munda̱ʼa̱ mbá rí gíʼdoo numuu mbayííʼ gi̱jyooʼ, Anu̱ʼ bi̱ xtáa mekhuíí maxnála.+
20 Numuu rí náa kúwá a̱jmi̱i̱n o ajtsíin ga̱jma̱a̱ numuu mbiʼyuʼ,+ ikhí xtáá ikhúún, náa majñu̱únʼ ikhiin”.
21 Ikhú Pedro ni̱jkha̱ kanuu ga̱jma̱a̱ niʼthúu̱n: “Tátá, á mu ndxájuʼ nakiéʼkúun náa inuʼ, nguáthá nuthu gíʼmúún ma̱ni̱ mba̱a̱ a̱jkiu̱nʼ ka̱yo̱o̱, lá asndu juwan nuthu ráʼ.”
22 Jesús niriʼñuu: “Na̱nguá, tsétha̱n’ rí kááʼ juwan nuthu, ikhúún natha̱nʼ rí asndu 77 nuthu.+
23 Ikha jngóo, Xa̱bu̱ Ñajunʼ ndrígóo Dios bi̱ xtáa mekhuíí nambríguii ga̱jma̱a̱ mbáa rey bi̱ nindoo maʼni̱i̱ cuenta gajmíi̱n ñumbáá ndrígióo.
24 Índo̱ nigíʼdu̱u̱ niʼni̱i̱ cuenta, niguwáʼ kuya̱a̱ mbáa bi̱ gíʼmaa 10,000 talentos.*
25 Numuu rí ñumbáá bugi̱ na̱nguá gíʼdoo dí maʼni numa̱a̱ ga̱jma̱a̱, ikha jngóo rey niʼthí dí maxtangujua̱a̱ ikhaa, a̱ʼgiu̱u̱, e̱ji̱i̱n ga̱jma̱a̱ xúgíʼ rí gíʼdoo mu maʼni numa̱a̱ rí gíʼmaa.+
26 Ikhú ñumbáá nismbáti̱go̱o̱ ga̱jma̱a̱ niʼtákáñuu: ‹Gaʼngo̱o̱ a̱jkia̱a̱nʼ xtayoʼ, ma̱ni̱ numa̱a̱ʼ má xúgíʼ›.
27 Rígi̱ niʼni dí rey magáwíinʼ a̱jkiu̱u̱n kaʼyoo, niniñuuʼ maʼga̱a̱ ñumbáá bugi̱ ga̱jma̱a̱ niʼni mba̱a̱ a̱jkiu̱u̱n kaʼyoo ga̱jma̱a̱ numuu dí gíʼmaa.+
28 Mú índo̱ ñumbáá bugi̱ nigájnáa ikhí, nixkamaa i̱mba̱a̱ ñumbáá ga̱jma̱a̱, bi̱ gíʼmaa 100 denarios* náa inuu. Ikhú nixngáwu̱u̱n ga̱jma̱a̱ niʼthúu̱n: ‹¡Atani̱i̱ xúgíʼ dí gíʼmáán!›.
29 Ga̱jma̱a̱ ñumbáá bugi̱ nismbáti̱go̱o̱ inuu ga̱jma̱a̱ niʼtákáñuu: ‹Gaʼngo̱o̱ a̱jkia̱a̱nʼ xtayoʼ, ma̱ni̱ numa̱a̱ʼ má›.
30 Mú ikhaa táʼndoo gáʼdxawun. Nikuʼma muxuda̱a̱ʼ guʼwá e̱jua̱nʼ asndu índo̱ gámbóo raʼni numa̱a̱ rí gíʼmaa.*
31 Índo̱ eʼwíinʼ ñumbáá nidxawíín dí nirígá, nditháan tánigu̱u̱nʼ ga̱jma̱a̱ nigún gútháán rey xúgíʼ dí nirígá.
32 Ikhú rey nikuʼma maguwáʼ kuya̱a̱ ga̱jma̱a̱ niʼthúu̱n: ‹¡Ñumbáá xkawi̱i̱ʼ ñajuaanʼ! Ikhúún ni̱ni̱ mba̱a̱ a̱jkiu̱nʼ ka̱ya̱a̱ʼ índo̱ niratákáñuʼ.
33 Ndíjkha rí tágáwíinʼ a̱jkia̱a̱nʼ xtayáá ndxájuaaʼ xó má ikhúún nigáwíinʼ a̱jkiu̱nʼ ka̱ya̱a̱ʼ rá.›+
34 Ikhú rey nikiʼnáa ga̱jma̱a̱ nixnájxi̱i̱ náa ñawúúnʼ bi̱ nuñewa̱a̱n guʼwá e̱jua̱nʼ asndu náa gáʼni numa̱a̱ xúgíʼ rí gíʼmaa.
35 Xúʼko̱ má gáʼni Anu̱ʼ bi̱ xtáa mekhuíí ga̱jma̱a̱ nindxa̱la+ á mu tséni̱ mba̱a̱ a̱jkia̱la ku̱ñu̱u̱n a̱ngia̱la”.+
