Mateo 2:1-23
2 Nda̱wa̱á rí Jesús nigumaa náa Belén+ náa mbayuuʼ Judea, mbiʼi rí nixtáa raʼtáñajunʼ Herodes*+ xóo rey. Ikhú niguwáʼ náa Jerusalén tikhuun xa̱bu̱ xawan* bi̱ niguwáʼ xígií náa nagájnuu a̱jkha̱ʼ,
2 ga̱jma̱a̱ nirajxi̱: “Náá xtáa ada̱ bi̱ mani̱ndxu̱u̱ rey ndrígu̱ún judíos rá.+ Numuu rí ndi̱ya̱a̱xu̱ a̱ʼgua̱a̱n ndrígóo nákha nikúwáanʼxu náa nagájnuu a̱jkha̱ʼ, ikha jngóo nagúwaʼxu mu musmbatígu̱xu̱ inuu”.
3 Índo̱ niʼdxuun rígi̱ rey Herodes, ikhú nixmiéjuunʼ, xúʼko̱ má xa̱bu̱ Jerusalén ma̱ngaa.
4 Ikhú rey Herodes nindxaʼwúún xúgíinʼ ndxajkun bi̱ kuya̱ edxu̱u̱ ga̱jma̱a̱ bi̱ nusngáa xtángoo náa xuajin. Nirajxu̱u̱n náá phú mina̱a̱ʼ gágumaa Cristo.*
5 Ikhiin niriʼña: “Náa Belén+ mbayuuʼ Judea, numuu rí xúʼko̱ niʼnirámáʼ profeta:*
6 ‹Ikháán Belén, dí rígá náa ku̱ba̱ʼ ndrígóo Judá, na̱nguá má nindxa̱a̱ʼ mbá xuajin chíʼgíiʼ* kayuuʼ náa majñu̱únʼ xa̱bu̱ ñajunʼ bi̱ kúwá náa Judá, numuu rí náa ikháán magajnúu mbáa xa̱bu̱ ñajunʼ bi̱ mañewu̱u̱n xuajñunʼ Israel›”.+
7 Ikhú Herodes nindxaʼwúún ngu̱ʼwa̱á xa̱bu̱ xawan mu mbaʼyoo nguáná phú nikujmaa a̱ʼgua̱a̱n.
8 Ikhú nikuʼmiin magún Belén, ga̱jma̱a̱ niʼthún: “Aʼguala ga̱jma̱a̱ guʼyáaʼ ada̱ náa mbá xúgíʼ xuajin. Índo̱ gúxkamaa gáguwaaʼla gúthu̱nʼ mu mangúún maʼgá gásmbatígo̱ʼ náa inuu”.
9 Nda̱wa̱á dí rey niʼthún rígi̱, ikhú nirajtuun kamba̱a̱ nigún. Ga̱jma̱a̱ a̱ʼgua̱a̱n bi̱ ndiyáá náa nagájnuu a̱jkha̱ʼ,*+ ni̱jkha̱ kagui̱i̱n asndu náa xtáa ada̱.
10 Índo̱ ndiyáá rígi̱, ikhú nidxún wéñuuʼ.
11 Índo̱ nitu̱ʼu̱u̱n náa guʼwá ndiyáá ada̱ ga̱jma̱a̱ María bi̱ nindxu̱u̱ ru̱dúu̱.* Ikhú nismbati̱gu̱u̱n ga̱jma̱a̱ nixnáá gamajkhu. Ma̱ngaa nirawíi rí kuda muxnáá, xóo oro, olíbano* ga̱jma̱a̱ mirra.*
12 Numuu rí Dios niʼthún náa mbá xnuʼndaa+ rí xátangi̱i̱n gúyáá Herodes, ikha jngóo nirajtuun i̱mba̱ kamba̱a̱ magúun xuajñún.
13 Nda̱wa̱á rí nigúun, ikhú mbáa ángel ndrígóo Jeobá* niʼthúu̱n José náa mbá xnuʼndaa:+ “Arajxu̱u̱nʼ, atagáyáaʼ jcháa ada̱ ga̱jma̱a̱ ru̱dúu̱, ayuʼ náa Egipto, aguanáaʼ ikhí asndu índo̱ ikhúún gáthanʼ midxa̱a̱ʼ, numuu dí Herodes mbayáaʼ ada̱ mu maxíyáa”.
14 Núkhu má mbruʼun rúʼko̱ José nigijxi̱i̱, nigáyúu kayáa ada̱ ga̱jma̱a̱ ru̱dúu̱, nigún náa Egipto,
15 ga̱jma̱a̱ niguanún ikhí asndu índo̱ nikháñuu Herodes. Xúgi̱ kaʼnii nimbánuu rí Jeobá* niʼtáriyaʼ náa mbáa profeta: “Nindxa̱ʼwa̱a̱ ma̱ʼkha̱a̱ a̱ʼdióʼ náa Egipto”.+
16 Índo̱ Herodes ndiʼyoo rí xa̱bu̱ xawan nininduwaaʼ, nikiʼnáa wéñuuʼ. Ikhú niríya̱a̱ʼ cuenta rí xóo nitháán xa̱bu̱ xawan mbiʼi rí nikujmaa a̱ʼgua̱a̱n, ikhú nikuʼma muradíin xúgíinʼ e̱ji̱n bi̱ ndiʼkhú nigumiin asndu bi̱ guáʼdáá a̱jma̱ tsigúúnʼ, bi̱ kúwá náa Belén ga̱jma̱a̱ náa xuajin dí tri̱ga̱ mijngii.+
17 Xúʼko̱ nimbánuu rí niʼtáriyaʼ profeta Jeremías:
18 “Náa xuajin Ramá niwán mbá aʼwá, rí mbáa nambi̱ya̱ʼ ga̱jma̱a̱ nagáwíinʼ a̱jkiu̱u̱n. Nindxu̱u̱ Raquel+ bi̱ nambi̱ya̱ʼ ga̱jma̱a̱ numún e̱ji̱i̱n, na̱nguá eniñaminaʼ muni̱i̱ a̱jkiu̱u̱n numuu rí ikhiin ní ndawi̱i̱n”.+
19 Índo̱ Herodes nikháñuu, ikhú ángel ndrígóo Jeobá* nikujmaa náa xnuʼndoo+ José, índo̱ xtáa náa Egipto,
20 ga̱jma̱a̱ niʼthúu̱n: “Atujxa̱a̱ʼ, ayu̱u̱ʼ jcháa ada̱ ga̱jma̱a̱ ru̱dúu̱ náa ku̱ba̱ʼ ndrígóo Israel, numuu rí nikháñún má bi̱ nandún muxíyáa ada̱”.
21 Ikhú José nitu̱jxu̱u̱, nitanga̱a̱ kayáa ada̱ ga̱jma̱a̱ ru̱dúu̱ náa ku̱ba̱ʼ ndrígóo Israel.
22 Mú nimíñuu gáʼga̱a̱ náa Judea índo̱ niʼdxawuun dí Arquelao a̱ʼdióo Herodes xtáa raʼtáñajunʼ ikhí. Ga̱jma̱a̱ ni̱jkha̱ náa mbayuuʼ Galilea,+ numuu rí náa mbá xnuʼndaa Dios niʼthúu̱n maʼga ikhí.+
23 Ikhú ni̱jkha̱ gáxtáa náa mbá xuajin rí mbiʼyuu Nazaret.+ Xúʼko̱ nimbánuu rí nitariyaʼ profetas rí “magumbiʼyuu Nazareno”.*+
Mbaʼa nota
^ O “xa̱bu̱ bi̱ nduyáá xóo trigi̱i̱n a̱ʼgua̱a̱n mu muthi ndiéjunʼ gárigá nda̱wa̱á”.
^ O “Mesías”, “bi̱ Kixtiyáaʼ”.
^ O “gaʼyee”, “bi̱ naʼthí dí marigá”.
^ O “lajuíin”.
^ O “oriente”.
^ Mirra nindxu̱u̱ ejndaʼ rí ndataun.
^ O “nánée”.
^ Olíbano nindxu̱u̱ wajyaʼ rí ndataun.
^ Mbáa náa ajngáa hebreo nandoo gáʼthúu̱n “nakráʼáan”.
