Mateo 11:1-30
11 Índo̱ Jesús niguámbóo niʼthún rí muni̱ bi̱ mbá 12 xa̱bi̱i̱, ikhú ni̱jkha̱ náa i̱ʼwáʼ xuajin mu maʼsngáa ga̱jma̱a̱ maʼtáraʼa.+
2 Índo̱ Juan bi̱ Nakumíinʼ iyááʼ xa̱bu̱ kraʼaa náa guʼwá e̱jua̱nʼ+ niʼdxawuun rí naʼni Cristo, ikhú nikuʼmiin xa̱bi̱i̱+
3 mu magún gúrajxi̱i̱: “Lá ikháán nindxa̱a̱ʼ bi̱ ma̱ʼkha̱ o muguáʼthi̱i̱nxu i̱mba̱a̱ dxe̱ʼ”.+
4 Ikhú Jesús niriʼñúún: “Aʼgua̱a̱ʼ gútha̱a̱n Juan rí ndu̱ya̱a̱ ga̱jma̱a̱ rí nudxawíínla:+
5 Rí xúgi̱ bi̱ tsékruigu̱u̱n, nakrui̱gu̱u̱n,+ bi̱ gúʼxíinʼ nandoo nagún, bi̱ tsédxuun nudxuun, bi̱ guáʼdáá nandii lepra+ naguma thanún, bi̱ nikháñún nagabi̱ín* ga̱jma̱a̱ bi̱ mingíníi najuiʼthún ajngáa rí májánʼ.+
6 Gagi xtáa xa̱bu̱ bi̱ tséʼni a̱jma̱ a̱jkiu̱u̱n maʼnimbo̱o̱ kaʼyoʼ”.+
7 Índo̱ xa̱bu̱ bugi̱ kúwá ragúun, Jesús nigíʼdu̱u̱ niʼthún xa̱bu̱ ga̱jma̱a̱ numuu Juan: “Dí nijkua gúya̱a̱ náa ku̱ba̱ʼ mijxooʼ* rá.+ Lá mbá e̱ʼi̱n* rí naʼbajngaa giñánʼ ráʼ.+
8 Mú, dí nijkua gúya̱a̱la. Lá mbáa xa̱bu̱ bi̱ kagúwunʼ xtíin májánʼ* ráʼ. ¡Bi̱ kugíʼ xtíin májánʼ kúwá náa guʼwún reyes!
9 Mú, tsáá nijkua gúya̱a̱. Mbáa profeta* ráʼ. Xúʼko̱, ikhúún na̱tala rí nindxu̱u̱ itháan ki xóo mbáa profeta.+
10 Ikhaa bi̱ nijuiʼthá ga̱jma̱a̱ numuu: ‹¡Gu̱ya̱a̱la! ¡Makuʼmáa bi̱ najngrui̱go̱o̱ kagu̱u̱ ajngóʼ, ga̱jma̱a̱ ikhaa maʼga raríyaʼ kamba̱a̱ náa mi̱dxu̱ʼ!›.+
11 Na̱tala gajkhun rí Juan bi̱ Nakumíinʼ iyááʼ xa̱bu̱, nindxu̱u̱ itháan mba̱a̱ ki xóo xúgíinʼ xa̱bu̱ numbaaʼ.* Mú bi̱ itháan chíʼgíiʼ* náa naʼtáñajunʼ Xa̱bu̱ Ñajunʼ ndrígóo Dios* bi̱ xtáa mekhuíí, itháan mba̱a̱ ki xóo ikhaa.+
12 Asndu mbiʼi rí nixtáa Juan bi̱ Nakumíinʼ iyááʼ xa̱bu̱, mbaʼin xa̱bu̱ nugími̱jna̱ matu̱ʼu̱u̱n náa naʼtáñajunʼ Xa̱bu̱ Ñajunʼ ndrígóo Dios bi̱ xtáa mekhuíí. Ga̱jma̱a̱ mbaʼin bi̱ nugími̱jna̱ muxkamaa, naʼngu̱u̱n nuxkamaa.+
13 Numuu rí asndu mbiʼi rí nixtáa Juan, Xtángoo ndrígóo Moisés ga̱jma̱a̱ Profetas nitariya̱ʼ má dí marigá.+
14 Nandala o tsíyala mu̱ni̱mbala, mú ikhaa nindxu̱u̱ ‹Elías bi̱ wíji̱ ma̱ʼkha̱›.+
15 Bi̱ gíʼdoo cháʼwuun, gagíʼ edxu̱u̱ maʼdxuun.
16 Tsáá gáni̱ mbríguii gajmiún xa̱bu̱ bugi̱ rá.+ Ni̱ndxu̱ún xóo e̱ji̱n bi̱ tri̱gi̱i̱n náa xuáá, bi̱ nutún a̱ngiu̱ún bi̱ nutsíin gajmiún:
17 ‹Nidi̱i̱xu* mú ikháanʼ túsiala. Nini̱xu ajmúú gíná, mú ikháanʼla túmbi̱ya̱ʼ›.*
18 Numuu rí índo̱ Juan ni̱ʼkha̱, tákuiʼtsu ga̱jma̱a̱ tágáan mú xa̱bu̱ nithi: ‹Gíʼdaa giñán xkawi̱i̱ʼ›.*
19 Ga̱jma̱a̱ índo̱ ni̱ʼkha̱nú A̱ʼdióo Xa̱biya̱, bi̱ nakuiʼtsu ga̱jma̱a̱ bi̱ naʼga̱a̱n,+ ga̱jma̱a̱ xa̱bu̱ nithi: ‹Mbáa xa̱biya̱ bi̱ nakuiʼtsu egoo ga̱jma̱a̱ mbáa bi̱ naʼga̱a̱n wéñuuʼ vino, bi̱ nambájxu̱u̱ gajmíi̱n bi̱ nuruma mbújkho̱o̱ guʼwá ñajunʼ, mangiin xa̱bu̱ bi̱ nuni̱ aʼkhá›.+ Asndu xú káʼnii má, mú ku̱ma̱ nakujmaa ga̱jma̱a̱ xúgíʼ rí naguma”.+
20 Ikhú nigíʼdu̱u̱ nikiʼnáa kaʼyoo xuajin náa niʼni mbaʼa milagro, numuu rí tátanga̱a̱ a̱jkiu̱ún xa̱bu̱:
21 “¡Corazín, gínáála ikháán! ¡Gínáála ikháán Betsaida! Numuu rí á mu milagro rí niguma náa ikháán niguma náa xuajin Tiro ga̱jma̱a̱ Sidón, ikhiin niʼníí má nigúwúúnʼ xtíin mi̱du̱* ga̱jma̱a̱ nitri̱gi̱i̱n náa idiʼ mu musngajma rí nitanga̱a̱ a̱jkiu̱ún.+
22 Na̱tala rí índo̱ mbiʼi rí mixtanda̱ʼa̱a̱ cuenta itháan gakhi̱i̱ gúmíniiʼ ikháanʼ ki xóo Tiro ga̱jma̱a̱ Sidón.+
23 Ga̱jma̱a̱ ikháán Capernaúm,+ lá naku̱ma̱a̱ʼ rí makráʼáán asndu mekhuíí ráʼ. Ikháán markawa̱a̱ʼ asndu náa Iñá wajinʼ.*+ Numuu rí á mu milagro rí niguma náa ikháán niguma náa Sodoma, xuajin rúʼko̱ kaʼnííʼ rígá xúgi̱.
24 Natha̱nʼ rí mbiʼi rí mixtanda̱ʼa̱a̱ cuenta matamíniiʼ itháan ikháán ki xóo Sodoma”.+
25 Mbiʼi rúʼko̱ Jesús niʼthí: “Anu̱ʼ,* na̱ni̱ mba̱a̱n náa inún xa̱bu̱, Tátá bi̱ kaʼyoo mekhu ga̱jma̱a̱ ku̱ba̱ʼ, numuu rí nitarkaʼwu rígi̱ náa xa̱bu̱ bi̱ nduyáá ga̱jma̱a̱ bi̱ nakru̱ʼu̱u̱n, nitani̱ mbuyáá rígi̱ e̱ji̱n majkhiinʼ.+
26 Xúʼko̱, Anu̱ʼ, numuu rí májánʼ nitayáá matani̱ xígi̱ kaʼnii”.
27 Ma̱ngaa niʼthí: “Anu̱ʼ nixnájxu̱ʼ xúgíʼ dí rígá.+ Nimbáa tséʼninuwiinʼ Ada̱ i̱ndó Anu̱u̱.+ Xúʼko̱ má Ada̱ i̱ndó ikhaa eʼninuwiinʼ Anu̱u̱, ga̱jma̱a̱ Ada̱ ma̱ndoo maʼsngúún eʼwíinʼ xóo nindxu̱u̱ Anu̱u̱.+
28 Xúgiáanʼ ikháanʼ bi̱ nuñajunʼ gakhi̱i̱ ga̱jma̱a̱ bi̱ néʼngala, aguwaʼla náa ikhúún ga̱jma̱a̱ ikhúún ma̱ni̱ mbuya̱a̱jxa̱la.
29 Gudala yugo ndrígóʼ ma̱ngaa gajmañala xóo e̱ni̱ ikhúún, numuu rí tsékiʼnún ga̱jma̱a̱ ni̱ndxu̱ʼ mbáa xa̱bu̱ wabaaʼ.+ Náa ikhúún muxkamaa rí maʼni̱i̱ a̱jkia̱la.
30 Numuu rí yugo ndrígóʼ na̱nguá gakhi̱i̱ mi̱dxu̱ʼ xtaaʼ ga̱jma̱a̱ rí ka̱gu̱ na̱nguá mikiwu̱n”.
Mbaʼa nota
^ O “natujxíín”, “nduya̱a̱”.
^ O “desierto”.
^ O “diin”.
^ Náa ajngáa griego naʼthí, “xtíin nandaʼ”.
^ O “gaʼyee”, “bi̱ naʼthí dí marigá”.
^ Náa ajngáa griego naʼthí, “bi̱ nigumiin náa gu̱ʼu̱”.
^ O “lajuíin”.
^ O “Nidi̱i̱xu flauta”.
^ O “túxna̱a̱ tsuxtala”.
^ O “giñán guéenʼ”.
^ O “Táteʼ”.
