Mateo 1:1-25
1 I̱yi̱i̱ʼ rígi̱ naʼthí ga̱jma̱a̱ numuu Jesucristo,* a̱ʼdióo David,+ a̱ʼdióo Abrahán.+
2 Abrahán ninindxu̱u̱ anu̱u̱* Isaac,+Isaac ninindxu̱u̱ anu̱u̱ Jacob,+xó má Jacob ninindxu̱u̱ anu̱u̱ Judá+ ma̱ngaa nigiʼdiin eʼwíinʼ e̱ji̱i̱n.
3 Judá ga̱jma̱a̱ Tamar niguáʼdiin a̱jmi̱i̱n e̱jñu̱ún, mbáa nigumbiʼyuu Pérez i̱mba̱a̱ Zérah,+Pérez ninindxu̱u̱ anu̱u̱ Hezrón,+xó má Hezrón ninindxu̱u̱ anu̱u̱ Ram.+
4 Ram ninindxu̱u̱ anu̱u̱ Aminadab,Aminadab ninindxu̱u̱ anu̱u̱ Nahsón,+xó má Nahsón ninindxu̱u̱ anu̱u̱ Salmón.
5 Salmón ga̱jma̱a̱ Rahab+ niguáʼdaa Boaz,xó má Boaz ga̱jma̱a̱ Rut+ niguáʼdaa Obed,xó má Obed ninindxu̱u̱ anu̱u̱ Jesé.+
6 Jesé ninindxu̱u̱ anu̱u̱ rey David,+
David ninindxu̱u̱ anu̱u̱ Salomón+ bi̱ nigiʼdaa ga̱jma̱a̱ a̱ʼgiu̱u̱ Urías.
7 Salomón ninindxu̱u̱ anu̱u̱ Rehoboam,+Rehoboam ninindxu̱u̱ anu̱u̱ Abías,xó má Abías ninindxu̱u̱ anu̱u̱ Asá.+
8 Asá ninindxu̱u̱ anu̱u̱ Jehosafat,+Jehosafat ninindxu̱u̱ anu̱u̱ Jehoram,+xó má Jehoram ninindxu̱u̱ anu̱u̱ Uzías.
9 Uzías ninindxu̱u̱ anu̱u̱ Jotán,+Jotán ninindxu̱u̱ anu̱u̱ Acaz,+xó má Acaz ninindxu̱u̱ anu̱u̱ Ezequías.+
10 Ezequías ninindxu̱u̱ anu̱u̱ Manasés,+Manasés ninindxu̱u̱ anu̱u̱ Amón,+xó má Amón ninindxu̱u̱ anu̱u̱ Josías.+
11 Josías+ ninindxu̱u̱ anu̱u̱ Jeconías+ ma̱ngaa nigiʼdiin eʼwíinʼ e̱ji̱i̱n. Bi̱ nikúwá nákha ni̱jkha̱ kiʼdiin náa xuajin Babilonia.+
12 Índo̱ nikúwá náa Babilonia, Jeconías ni̱jkha̱nú ninindxu̱u̱ anu̱u̱ Sealtiel,xó má Sealtiel ninindxu̱u̱ anu̱u̱ Zorobabel.+
13 Zorobabel ninindxu̱u̱ anu̱u̱ Abiud,Abiud ninindxu̱u̱ anu̱u̱ Eliaquim,xó má Eliaquim ninindxu̱u̱ anu̱u̱ Azor.
14 Azor ninindxu̱u̱ anu̱u̱ Sadoc,Sadoc ninindxu̱u̱ anu̱u̱ Aquim,xó má Aquim ninindxu̱u̱ anu̱u̱ Eliud.
15 Eliud ninindxu̱u̱ anu̱u̱ Eleazar,Eleazar ninindxu̱u̱ anu̱u̱ Mattán,xó má Mattán ninindxu̱u̱ anu̱u̱ Jacob.
16 Jacob ninindxu̱u̱ anu̱u̱ José, ajmbio̱o̱* María ga̱jma̱a̱ María ninindxu̱u̱ ru̱dúu̱*+ Jesús bi̱ nigumbiʼyuu Cristo.+
17 Mbiʼi dí nixtáa Abrahán asndu mbiʼi rí nixtáa David ni̱ʼkha̱ rakúwá mbá 14 xabuanii. Mbiʼi dí nixtáa David asndu mbiʼi rí ni̱jkha̱ kiʼdiin náa xuajin Babilonia ni̱ʼkha̱ rakúwá mbá 14 xabuanii ga̱jma̱a̱ mbiʼi rí ni̱jkha̱ kiʼdiin náa xuajin Babilonia asndu mbiʼi rí nigumaa Cristo ni̱ʼkha̱ rakúwá imbá 14 xabuanii.
18 Xúʼko̱ kaʼnii ni̱jkha̱nú nigumaa Jesucristo. Índo̱ María bi̱ ninindxu̱u̱ ru̱dúu̱ xtáa mbayáa José, ikhú tsiaki̱i̱ ndrígóo Dios*+ niʼni rí maguewáan ada̱.*
19 José bi̱ mani̱ndxu̱u̱ ajmbio̱o̱, nindxu̱u̱ mbáa májáanʼ xa̱bu̱ ga̱jma̱a̱ tándoo dí María magajnúu gamajkuu náa inún xa̱bu̱. Ikha jngóo nindxa̱ʼwáminaʼ rí maniña̱a̱ʼ* ngu̱ʼwa̱á.+
20 Nda̱wa̱á rí nindxa̱ʼwáminaʼ rígi̱, ikhú mbáa ángel ndrígóo Jeobá* nikujmaa náa xnuʼndoo ga̱jma̱a̱ niʼthúu̱n: “José,* xámíñáaʼ mi̱dxu̱ʼ jcháa María náa guʼwáaʼ mu maʼni a̱ʼgia̱a̱ʼ, numuu rí ada̱ bi̱ kaguewáan, nigiwa̱nʼ ga̱jma̱a̱ tsiaki̱i̱ ndrígóo Dios.+
21 Ikhaa magiʼdaa mbáa ada̱ ga̱jma̱a̱ gíʼmaa maraxna mbiʼíí Jesús*+ numuu rí ikhaa maʼni kríya̱a̱ʼ xuajñuu náa aʼkhá”.+
22 Nirígá xúgíʼ rígi̱ mu mambanúu rí Jeobá* niʼtáriyaʼ náa mbáa profeta:*
23 “¡Gu̱ya̱a̱la! Dxáʼgú* maguewáan ada̱, magiʼdaa mbáa dxámá ga̱jma̱a̱ magumbiʼyuu Emmanuel”,+ rí nandoo gáʼthúu̱n “Dios xtáa ga̱jma̱á ni̱ndxu̱lú”.+
24 Índo̱ ndijui̱i̱ José, ikhú ni̱jkha̱ kayáa María náa goʼwóo mu maʼni a̱ʼgiu̱u̱ xó má niʼthúu̱n maʼni ángel ndrígóo Jeobá.*
25 Mú tábóoʼ* ga̱jma̱a̱ asndu índo̱ nixtáa ada̱.+ Ga̱jma̱a̱ ikhaa nixná mbiʼyuu Jesús.+
Mbaʼa nota
^ O “Jesús bi̱ nindxu̱u̱ Mesías”. Cristo ga̱jma̱a̱ Mesías nandoo gáʼthúu̱n “bi̱ kixtiyáaʼ”.
^ O “tátée”.
^ O “jmba̱yi̱i̱”.
^ O “nánée”.
^ O “maʼni endi̱i̱”.
^ O “maxnúu divorcio”.
^ Náa ajngáa griego naʼthí, “José, a̱ʼdióo David”.
^ Gi̱i̱ nakujmaa timbá miʼtsú mbiʼyuu Dios rí nindxu̱u̱ Jeobá, náa Escrituras Griegas Cristianas nakujmaa mbá 241 nuthu. Atayáá apén. A5.
^ Náa ajngáa hebreo mbiʼyuu Jesús kiʼnirámáʼ xóo Jesúa, o Josué, rí nandoo gáʼthúu̱n “Jeobá nindxu̱u̱ bi̱ naʼni káwáánʼlú”.
^ O “gaʼyee”, “bi̱ naʼthí dí marigá”.
^ Náa ajngáa griego naʼthí, “bi̱ xóó tsébóoʼ ga̱jma̱a̱ xa̱bu̱”.
^ O “táguguaa”.
