Mateo 28:1-20

  • Jesús nigabi̱i̱ (1-10)

  • Nixnún mbújkha̱a̱ soldados mu muninduwaʼ (11-15)

  • “Gaʼguala ga̱jma̱a̱ gusngún xa̱bu̱” (16-20)

28  Índo̱ nijngoo mbiʼi sábado, ga̱jma̱a̱ na̱jkha̱ rajtsi timbá mbiʼi rí ndayáa xmáná,* María Magdalena ga̱jma̱a̱ imba̱a̱ María nigún náa nijnguáan* Jesús.+ 2  Ikhú niʼxma̱ gakhi̱i̱, numuu dí ángel ndrígióo Jeobá* nigajtaa asndu mekhuíí, ni̱jkha̱ náa iñá wajinʼ, ikhú nirmbíjxi̱ itsí rí kúgoo ga̱jma̱a̱ ma̱ngaa nigi̱ʼi̱ náa tsu̱du̱u̱ itsí.+ 3  Asndu naxpíbíinʼ ángel ga̱jma̱a̱ xtíñuu miʼxídiʼ.+ 4  Ikha jngóo bi̱ nuñewa̱a̱n iñá wajinʼ nimíñúún wéñuuʼ rí asndu niguíʼin ga̱jma̱a̱ niʼni miʼxájtiinʼ. 5  Ikhú ángel niʼthún gu̱ʼu̱: “Xámíñála, nda̱yo̱o̱ má rí Jesús eʼyáaʼla, bi̱ nijuiʼdujmaa náa ixi̱.+ 6  Ndawa̱a̱ gi̱i̱, numuu rí nigabi̱i̱,* xó má ikhaa niʼthí.+ Aguwaʼ, gu̱ya̱a̱ náa nibáaʼ. 7  Rí xúgi̱ rá, aʼguala nacha̱ gúthu̱u̱n xa̱bi̱i̱: ‹Nigabi̱i̱ náa majñu̱únʼ wajinʼ, ni̱jkha̱ má náa Galilea,+ ikhí gúya̱a̱›. Rígi̱ ni̱ʼkhá gátala”.+ 8  Ikhiin nimíñúún mú ma̱ngaa nidxún wéñuuʼ, ikha jngóo nigún ragáñúún gúthúún xa̱bi̱i̱.+ 9  Ikhú Jesús nixkamiin kamba̱a̱, niʼthún: “¡Wajtsala!”. Ikhú gu̱ʼu̱ nixuʼmamijná ga̱jma̱a̱ nismbati̱gu̱u̱n inuu, ikhú nidaraʼáá rajkúu. 10  Ikhú Jesús niʼthún: “Xámíñála, aʼgua̱a̱ʼ gúthu̱u̱n a̱ngui̱nʼ rí magún náa Galilea, ikhí gúyoʼ”. 11  Índo̱ gu̱ʼu̱ kúwá ragúun kamba̱a̱, tikhuun bi̱ nuñewa̱a̱n iñá wajinʼ+ nigún náa xuajin gúthún ndxajkun bi̱ kuya̱ edxu̱u̱ xúgíʼ dí nirígá. 12  Nda̱wa̱á rí niwi̱i̱n ndxajkun bi̱ kuya̱ edxu̱u̱ gajmiún xabuanii mu mbuyáá ndiéjunʼ gúni, ikhú nixnúún soldados mba̱a̱ mbújkha̱a̱ plata 13  ga̱jma̱a̱ nithúún: “Xúgi̱ gútala: ‹Mbruʼun niguwáʼ xa̱bi̱i̱ gúni kuʼwáʼ xuyuuʼ índo̱ ikháanʼ kúwáanʼxu runuʼ›.+ 14  Ga̱jma̱a̱ á mu rígi̱ gáʼdxawun xa̱bu̱ ñajunʼ,* xáxmiéjuanla, ikháanʼ má gúya̱a̱xu̱ dí gútha̱a̱n”. 15  Ikhú nindrigú mbújkha̱a̱ plata ga̱jma̱a̱ nini̱ xó má nijuiʼthúún. Rígi̱ rí nuthi xa̱bu̱ judíos asndu mbiʼi xúgi̱. 16  Ikhú bi̱ mbá 11 xa̱bi̱i̱ Jesús nigún náa Galilea,+ náa kúbá rí Jesús niʼthí mbuyamijná.+ 17  Índo̱ ndiyáá, nismbati̱gu̱u̱n inuu. Mú tikhuun nini̱ a̱jma̱ a̱jkiu̱ún. 18  Ikhú Jesús nikuʼmaminaʼ ga̱jma̱a̱ niʼthún: “Nijuixnájxuʼ xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ.+ 19  Ikha jngóo gaʼguala ga̱jma̱a̱ gusngún xa̱bu̱ bi̱ kúwá náa xúgíʼ xuajin mu mani̱ndxu̱ún xa̱bi̱ʼ.+ Guxuʼmíinʼ iyááʼ+ ga̱jma̱a̱ mbiʼyuu Anu̱ʼ,* mbiʼyuu Ada̱ ga̱jma̱a̱ espíritu santo.* 20  Gusngúnla munimbáníí xúgíʼ rí ikhúún nitañájuanla.+ Ga̱jma̱a̱ garmáʼáan a̱jkia̱la rí ikhúún maxtáá ga̱jma̱á nindxa̱la asndu índo̱ gártumuu* mbiʼi”.*+

Mbaʼa nota

^ Mbiʼi rígi̱ nindxu̱u̱ domingo.
^ O “nijui̱ʼdi̱i̱, nibáaʼ”.
^ Atayáá apén. A5.
^ O “nitujxi̱i̱”, “ndiʼya̱a̱”.
^ O “gobernador”.
^ O “Táteʼ”.
^ O “xi̱ʼ kaʼwu”, “tsiaki̱i̱ ndrígóo Dios”. Atayáá glosario, espíritu santo.
^ Atayáá glosario, índo̱ gártumuu mbiʼi.
^ Atayáá glosario, mbiʼi xúgi̱.

Copyrights ndrígóo i̱yi̱i̱ʼ rígi̱