GUY HOLLIS PIERCE, eo e neng e le setho sa Sehlopha se Busang sa Lipaki Tsa Jehova, o phethile tšebeletso ea hae lefatšeng ka Labobeli la la 18 March, 2014. O ne a le lilemo li 79 ha tšepo ea hae ea ho ba e mong oa barab’abo Kreste ba tsositsoeng e phethahala.—Baheb. 2:10-12; 1 Pet. 3:18.

Guy Pierce o hlahetse Auburn, California, U.S.A., ka la 6 November, 1934, ’me a kolobetsoa ka 1955. O nyetse mosali oa hae ea ratehang Penny ka 1977, ’me ba hōlisa bana. Phihlelo eo a bileng le eona ha a ntse a hōlisa bana, e mo thusitse hore e be ntate ea atamelehang. Ka 1982, o ile a nka bopula-maliboho hammoho le Penny, ’me ka 1986 ea e ba molebeli oa potoloho United States, e leng mosebetsi oo a o entseng ka lilemo tse 11.

Ka 1997, Guy le Penny Pierce ba ile ba qala ho sebeletsa e le litho tsa lelapa la Bethele, United States. Mor’abo rōna Pierce o ile a sebetsa Lefapheng la Tšebeletso, ’me ka 1998 a khethoa hore e be mothusi oa Komiti ea Basebetsi ea Sehlopha se Busang. Sebokeng sa selemo le selemo sa Watch Tower Bible and Tract Society of Pennsylvania se neng se tšoeroe ka la 2 October, 1999, ho ile ha phatlalatsoa hore Mor’abo rōna Pierce e se e le setho sa Sehlopha se Busang. Lilemong tsa morao tjena o ile a sebeletsa komiting ea Basebetsi, ea Bongoli, ea Khatiso le ea Bohokahanyi.

Batho ba merabe le litso tse fapaneng ba ne ba rata Mor’abo rōna Pierce kaha o ne a lula a bososela ebile e le sesoasoi. Empa ntho e neng e etsa hore ba bang ba mo rate le ho feta ke lerato la hae, boikokobetso le tsela eo a neng a hlompha melao le melao-motheo e lokileng ka eona, hammoho le tumelo e sa thekeseleng ho Jehova. Guy Pierce o ne a kholisehile ka ho feletseng hore litšepiso tsa Jehova li tla phethahala, ’me a batla ho tsebisa batho bohle ’nete eo.

Mor’abo rōna Pierce o ne a khothetse tšebeletsong ea Jehova, a tsoha hoseng haholo, ’me ka linako tse ling a sebetsa ho fihlela bosiu. O ile a etela linaheng tse ngata ho ea khothatsa bara le barali babo rōna ba Bakreste, ’me kamehla o ne a ipha nako ea ho buisana le litho tsa lelapa la Bethele le batho ba bang ba neng ba batla botsoalle, keletso kapa thuso ea hae. Le hoja ho se ho fetile lilemo, balumeli-’moho le eena ba kileng ba mo etela ba ntse ba hopola kamoo a ileng a ba amohela ka mofuthu kateng, a ba bontša botsoalle esita le ho ba khothatsa ka Mangolo.

Mora enoa oabo rōna ea ratehang o siea mosali le bana ba tšeletseng, hammoho le litloholo le litloholoana. O ne a boetse a e-na le bana ba bangata ba moea. Mor’abo rōna Mark Sanderson oa Sehlopha se Busang o ile a fana ka puo ea lepato ea Mor’abo rōna Pierce, Bethele ea Brooklyn ka Moqebelo oa la 22 March, 2014. Har’a tse ling, o boletse hore Mor’abo rōna Pierce o ne a e-na le tšepo ea ho phela leholimong, ’me a bala mantsoe a Jesu a reng: “Ka tlung ea Ntate ho na le libaka tse ngata tsa bolulo. . . . Ke il’o le lokisetsa sebaka, ke tla boela ke tle ’me ke tla le amohela lapeng ho ’na, e le hore moo ke leng teng le lōna le ka ba teng. Le tseba tsela ea moo ke eang teng.”—Joh. 14:2-4.

Ke ’nete hore re tla hloloheloa Mor’abo rōna Pierce haholo. Empa rea thaba hore ebe o ne a “tseba tsela” e mo isang ‘sebakeng sa hae sa bolulo’ sa ka ho sa feleng.