Autasi i Galuega Fau Fale e Viia ai le Atua

NA MĀTAUINA e tagata o se tasi motu o Solomona se Maota mo Sauniga fou a Molimau a Ieova. Sa faapea mai se tasi tamaʻitaʻi: “I lo matou lotu, e fai soo a matou saogā tupe, ae lē taitai lava mafai ona faia ai se falesā fou. E faapefea ona maua tupe a Molimau?” Sa tali atu le molimau na ia fesili i ai: “E matou te tapuaʻi iā Ieova o se aiga i le lalolagi atoa. O la matou faapotopotoga ma o matou uso i le lalolagi atoa, na foaʻi mai mea e manaʻomia mo le Maota fou mo Sauniga. E aʻoaʻoina e Ieova i matou e autasi i mea uma.”

E mātauina le autasi o Molimau a Ieova i a latou faatasitasiga uma, e aofia ai le fauina o le faitau afe o Maota mo Sauniga. O lea autasi i le faia o nei galuega e lē o se mea fou. Na iai i tagata o le Atua mo le faitau afe o tausaga. E faapefea?

Fausia o le Fale Fetafaʻi ma le Malumalu

Na manatu Ieova i le nuu o Isaraelu ina ua ia fetalai iā Mose i le silia ma le 3,500 tausaga ua mavae: ‘Ia latou faia mo aʻu se malumalu.’ (Esoto 25:8) Na fetalai atu atili Ieova e faatatau i le fausaga o lea galuega: “E tusa ma mea uma lava ou te faaali ai iā te oe, pei o le faatusa [po o le ata] o le malumalu, ma le faatusa o ana mea uma lava; ia faapea ona outou faia.” (Esoto 25:9) Ona faamatalaina lea e Ieova le fausiaina o le fale fetafaʻi, o ona teuteuga ma mea e tuu ai i totonu. (Esoto 25:10–27:19) O lea “fale fetafaʻi” po o le fale ie, o le nofoaga autū lea o le tapuaʻiga moni mo tagata Isaraelu uma.

E lē o mautinoa pe toʻafia tonu tagata na galulue i lea galuega, ae na valaaulia uma tagata Isaraelu e lagolagosua i lea galuega. Na fai atu Mose iā i latou: “Inā fai ia e outou se taulaga iā Ieova, e taʻitoʻatasi o lē manatu i ai i lona loto, ia aumai e ia le taulaga iā Ieova.” (Esoto 35:4-9) Na faapefea ona tali mai tagata Isaraelu? Ua taʻua i le Esoto e 36:3 e faapea: “Ua latou ave foʻi nai luma o Mose le taulaga uma lava ua aumaia e le fanauga a Isaraelu mo le galuega o le sauniga o le malumalu e fai ai; na latou au mai ai pea iā te ia ma le loto i lea taeao ma lea taeao.”

E leʻi umi ae iai faaputuga e tele o mea e fai ai le fale fetafaʻi na foaʻi mai e tagata, ma sa latou faaauau ona aumai nisi mea. Na iʻu ina fai atu tufuga o loo faia le galuega iā Mose: “Ua tele lava mea ua au mai e le nuu e sauni ai le galuega na poloaʻi mai ai Ieova ia faia.” Sa poloaʻi atu Mose i tagata Isaraelu e faapea: “Soia le toe faia e se tane po o se fafine se galuega mo le taulaga i le malumalu.” O le ā le iʻuga? “Auā o mea ua faia ua lava ia i galuega uma e fai ai, e totoe lava.”—Esoto 36:4-7.

 Ona o le aao foaʻi ma le lagolagosua o tagata Isaraelu na uma ai le fale fetafaʻi ae leʻi uma le tausaga. (Esoto 19:1; 40:1, 2) Ona o le lagolagosua i le tapuaʻiga moni, na faamamaluina ai e tagata Isaraelu Ieova. (Faataoto 3:9) Mulimuli ane, o le a latou faia ai se galuega e sili atu ona telē. E pei foʻi ona faia muamua, o i latou uma e fia auai i lea galuega, e mafai ona auai e tusa lava pe leai so latou tomai fau fale.

E toetoe lava atoa le lima senituri talu ona fausiaina le fale fetafaʻi, ae amata loa ona fausia e tagata Isaraelu le malumalu i Ierusalema. (1 Tupu 6:1) O le a matagofie le malumalu, ma e faia se faavae mautū i maa ma laupapa. (1 Tupu 5:17, 18) Na avatu e Ieova le ata o le malumalu iā Tavita lea na “maua e ia [e ala] i le agaga.” (1 Nofoaiga a Tupu 28:11-19) Ae na ia tofia le atalii o Tavita o Solomona e na te taʻitaʻia le galuega. (1 Nofoaiga a Tupu 22:6-10) Na lagolagoina ma le loto atoa e Tavita le galuega o le malumalu. Sa ia aumaia ni maa, amo pou, ma isi mea ma foaʻi atu se vaega tele o ana auro ma ario mo le galuega. Na ia faalaeiauina foʻi tagata Isaraelu e limafoaʻi, ma fai atu: “O ai foʻi sē loto e foaʻi ana mea iā Ieova i le aso nei?” Na faapefea ona tali atu tagata?—1 Nofoaiga a Tupu 29:1-5.

I le taimi na amata ai ona fausia e Solomona le malumalu, sa iā te ia taleni o auro e selau o afe ma taleni o ario e afe o afe. Na matuā tele foʻi apamemea ma uʻamea ua lē fuatia auā ua tele. (1 Nofoaiga a Tupu 22:14-16) Ona o le lagolagosua a Ieova ma le galulue felagolagomaʻi o tagata Isaraelu, na uma ai le galuega i le na o le fitu ma le ʻafa tausaga.—1 Tupu 6:1, 37, 38.

“Le Fale o le Atua Moni”

O le fale fetafaʻi ma le malumalu, na taʻua uma o le “fale o le Atua.” (Faamasino 18:31; 2 Nofoaiga a Tupu 24:7) E leʻi manaʻomia lava e Ieova i se taimi se fale. (Isaia 66:1) Na ia faia na fale ina ia aogā mo tagata. Ioe, i le faapaiaina o le malumalu na faapea atu ai Solomona: “Pe moni ea, e afio le Atua i le lalolagi? Faauta, o le lagi ma le lagi o lagi, e lē ofi ai oe, e lē atili ai ea ona e lē ofi i lenei fale ua ou faia?”—1 Tupu 8:27.

 Sa fetalai Ieova e ala i lana perofeta o Isaia: “E taʻua loʻu fale o le fale tatalo mo nuu uma.” (Isaia 56:7) O taulaga ma tatalo e ofoina atu i le malumalu, faatasi ma sauniga e faia ai, e mafai ai e tagata tapuaʻi o le Atua—o tagata Iutaia ma tagata e lē o ni Iutaia—ona faalatalata atu i le Atua moni. E latou te maua ai se mafutaga ma le puipuiga a Ieova pe a latou tapuaʻi i lona fale po o lona maota. Na faamaonia le moni o lenā tulaga i le tatalo na faia e Solomona i le faapaiaga o le malumalu. E mafai ona e faitau i ona manatu faamomoiloto o loo i le 1 Tupu 8:22-53 ma 2 Nofoaiga a Tupu 6:12-42.

Ua leva ona faaleagaina le malumalu o le Atua moni i aso anamua, peitaʻi ua faapea mai le Afioga a le Atua, e iai se taimi o le a faapotopoto ai tagata o nuu uma ma tapuaʻi atu iā Ieova i se malumalu sili faaleagaga. (Isaia 2:2) O le taulaga lelei atoatoa na avatu e le Alo pele e toʻatasi o le Atua, lea na faaata e taulaga e fai i manu na faia i le malumalu, o le auala lea e faalatalata atu ai iā Ieova. (Ioane 14:6; Eperu 7:27; 9:12) O loo tapuaʻi Molimau a Ieova i le Atua i lenā auala silisili, ma o loo latou fesoasoani i le tele o isi tagata ia faia faapea.

Faugāfale i Aso Nei

I le lalolagi atoa, e auauna Molimau a Ieova i le Atua moni. Ua latou faia aʻe se “nuu malosi,” ma o loo faaauau ona faatupulaʻia. (Isaia 60:22) O le maota autū e feiloaʻi ai Molimau a Ieova, e taʻua o le Maota mo Sauniga. E faitau afe maota o loo faaaogāina i le taimi nei, ae o loo manaʻomia pea ona fausia nisi maota e faitau afe.

E “fai taulaga ma le loto” Molimau a Ieova i le fausia o Maota mo Sauniga. (Salamo 110:3) Ae peitaʻi, e masani ona lē lava le tomai faufale o Molimau a Ieova i na vaipanoa, ae o isi atunuu o loo mafatia i le tele o le mativa, ae o loo iai le faatelega. I le 1999, na faatulaga ai e le Vaega Pule o Molimau a Ieova se polokalame o le fauina o Maota mo Sauniga, e fesoasoani e foʻia ai ia faafitauli. E ala i lea polokalame, ua malaga atu ai i nuu mamao Molimau e iai o latou tomai fau fale, ina ia aʻoaʻoina o latou uso ma tuafāfine i le fauina o Maota mo Sauniga. O na tagata ua uma ona aʻoaʻoina e mafai ona fesoasoani pea i galuega i lenā vaipanoa. O ā iʻuga o lenei taumafaiga faapitoa?

E oo ane iā Fepuari 2006, ua vaaia e Molimau a Ieova i atunuu e lē lava lo latou tamaoaiga, ni Maota fou mo Sauniga e silia i le 13,000 ua uma ona fauina. Seʻi faitau i ni tala a ē o loo faaaogāina nei Maota mo Sauniga.

“O le aofia masani a le faapotopotoga e 160. I le sauniga muamua i le Maota fou mo Sauniga, na oo atu le aofia i le 200. I le taimi nei, i le ono masina mulimuli ane ai, ua oo atu la latou aofia i le 230. O nei maota ua fauina i fausaga faigofie ae e aogā, o loo manino mai ai le faamanuia a Ieova.”—Ovasia matagaluega i Ekutoa.

“Ua tele tausaga o tuufesili mai tagata iā i matou: ‘O afea ea e iai se tou Maota mo Sauniga e pei o ata ia matou te vaai ai i tou lomiga?’ E matou te faafetai iā Ieova, o lea ua iai sa matou maota talafeagai e tapuaʻi ai. Sa masani ona faia a matou sauniga i le faleoloa o se uso, ma o la matou aofia masani e 30. I la matou sauniga muamua i le Maota fou mo Sauniga, e 110 tagata na auai.”—O se faapotopotoga i Uganda.

 “Na lipotia mai e ni tuafāfine paeonia sauatoa se toʻalua e faapea, ua manaia lava le galue i le oganuu talu ona iai le Maota fou mo Sauniga. Ua tele tagata ua uaʻi mai i le galuega i le fale i le fale, faapea ai foʻi i tulaga faasamasamanoa. E 17 suʻesuʻega faale-Tusi Paia o loo faia e nei tuafāfine, ma o le toʻatele o loo auai i sauniga.”—Ofisa o le lālā i Solomona.

“Na faapea mai se faifeʻau e nofo latalata i le Maota, ua faaopoopo mai le mamalu i lo matou vaipanoa ona o se Maota fou mo Sauniga, ma o se mea ua mitamita ai tagata o lenei vaiaai. O le toʻatele o tagata e vaaia lenei Maota mo Sauniga, e fai a latou tala i le matagofie o lea Maota. Ua mafai ai foʻi ona avea ma avanoa lelei e molimau atu ai le ʻauuso. Ua toʻatele foʻi tagata e fia iloa e faatatau i le ʻauuso i le lalolagi atoa. O le toʻatele o ē na lē auai i sauniga i tausaga ua mavae, ua uunaʻia e toe auai e lē aunoa.”—Ofisa o le lālā i Myanmar.

“Na valaaulia e se tuafafine se tamāloa loto fiafia i le galuega fau fale sa faia i lona vaipanoa. Mulimuli ane na faapea mai le tamāloa: ‘Sa ou manatu o le a lē faatagaina aʻu i totonu e tagata o loo galulue. Na faateʻia aʻu ina ua faafeiloaʻi aʻu ma le alofa e Molimau. Na galulue mamafa uma fafine ma tamāloloa ma e lē faamaumauina se taimi. Sa iai le lotogatasi ma le agaga fiafia.’ Sa talia e le tamāloa se suʻesuʻega faale-Tusi Paia ma auai i sauniga. Na ia toe faapea mai: ‘Ua suia loʻu mafaufau. Ou te lē toe tuua le Atua, o lenei ua ou mauaina o ia.’”—Ofisa o le lālā i Kolomepia.

 E Tāua la Tatou Lagolagosua

O le fausiaina o Maota mo Sauniga o se vaega tāua o la tatou auaunaga paia. E avatu le faamālō i le auala o loo lagolagoina ai e Molimau a Ieova i le lalolagi atoa lenei galuega—i tupe ma isi mea. Ae tatau ona tatou manatua e tāua foʻi isi vala o la tatou auaunaga paia. E mai lea taimi i lea taimi, e aafia ai Kerisiano i mala faalenatura ma manaʻomia ai la tatou fesoasoani. O le lomia o lomiga faale-Tusi Paia, o le vaega autū lea e lagolagoina ai la tatou auaunaga paia. E toʻatele i tatou ua molimauina aafiaga lelei o se lomiga faale-Tusi Paia po o se tusi, pe a saʻo le tagata e ave i ai. E faaopoopo ai i lenā, e tāua le lagolagosua e avatu i misionare ma isi o loo i le auaunaga faataimi atoa. O nei Kerisiano ua faataulagaina o latou ola, o loo faia sa latou vaega autū i le faaauilumaina o le galuega talaʻi i nei aso o le iʻuga.

O i latou na fesoasoani i le galuega o le malumalu na matuā faafiafiaina. (1 Nofoaiga a Tupu 29:9) I aso nei, o la tatou lagolagosua i le tapuaʻiga moni e ala i a tatou foaʻi, e faapena foʻi ona aumaia ai le fiafia. (Galuega 20:35) E tatou te maua lea fiafia pe a tuu la tatou foaʻi i le pusa o meaalofa mo Maota mo Sauniga, ma pe a foaʻi foʻi mo le galuega i le lalolagi atoa, lea e lagolagoina ai isi galuega e fesootaʻi atu i le talaʻia o le tala lelei o le Malo. I se auala matagofie, ua autasi ai Molimau a Ieova i aso nei i le tapuaʻiga moni. Tau ina ia tatou maua uma le fiafia i le lagolagoina o lea tapuaʻiga!

[Pusa/Ata i le itulau 20]

AUALA UA FILIFILIA E NISI E FAIA AI FOAʻI

MEAALOFA MO LE GALUEGA I LE LALOLAGI AOAO

E toʻatele tagata ua faaagaga se vaega tupe e lafo i pusa o loo faailogaina o “Meaalofa mo le Galuega i le Lalolagi Aoao.—Mataio 24:14.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina saʻo atu foaʻi tauofo o tupe i le Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, po o le ofisa o le lālā o Molimau a Ieova o loo vaavaaia lou atunuu. E ao ona tusia le igoa “Watch Tower” i se siaki pe a fia faia se foaʻi i lenā auala. E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe e teuina i lalo o se āiāiga faapitoa ma le Watch Tower mo le faaaogāina i le lalolagi aoao. Ae e mafai ona toe faafoʻi atu lenā foaʻi i lē e ana le tupe pe a ia talosagaina. Mo nisi faamatalaga, faamolemole faafesootaʻi le Treasurer’s Office i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe, ae e iai isi auala e faia ai foaʻi ina ia fesoasoani mo le auaunaga i le lalolagi aoao. E aofia ai mea nei:

Inisiua: E mafai ona avea le Watch Tower ma faalapotopotoga e uili atu i ai le taui po o lē e mauaina le inisiua o le ola o se tasi, po o taui e maua pe a litaea po o le penisione.

Teugātupe i le Faletupe: O teugātupe i le faletupe, pepa o teugātupe, po o teugātupe e maua e le tagata pe a litaea, e mafai ona tuu faamavaega mo le Watch Tower, e tusa ai ma faatulagaga manaʻomia a le faletupe o le atunuu.

Tupe Faafaigaluega (Stock) ma Pepa Faamaonia mo Tupe (Bond): O nei mea e mafai ona foaʻi faameaalofa tuusaʻo atu i le Watch Tower.

Fanua ma Fale: E mafai ona foaʻi atu au meatotino e pei o fanua po o fale, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua o le a foaʻi atu.

Tupe Faameaalofa e Iai Tuutuuga (Gift Annuity): O tupe faameaalofa e iai tuutuuga ua faatulaga e se tasi e avatu i se faalapotopotoga faaletulafono o loo faaaogāina e Molimau a Ieova. Ae e maua e lē e ana le foaʻi faameaalofa, po o se tasi ua ia tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lāfoga e totogi e le tagata na faia le foaʻi, i le tausaga tonu na faamautū ai lea fuafuaga.

Uili ma Mavaega: E mafai ona faaui atu meatotino po o se vaega tupe i le Watch Tower e ala i se uili ua faia e tusa ai ma le tulafono, pe avea foʻi le Watch Tower ma lē e mauaina le taui o se feagaiga o se teugātupe ua tuu faamavaega. O se teugātupe ua tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lāfoga.

E pei ona faailoa mai i le faaupuga “foaʻi faameaalofa” o nei ituaiga o foaʻi, e manaʻomia ai ona fuafua lelei e lē e ana le foaʻi. Ina ia fesoasoani i ē o loo naunau e fesoasoani i le galuega a Molimau a Ieova i le lalolagi aoao e ala i nisi o foaʻi faameaalofa, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Na tusia le polosiua ina ia saunia ai faamatalaga i auala eseese e mafai ona fai ai meaalofa i le taimi nei po o le taimi foʻi e maliu ai. Pe a uma ona faitauina le polosiua ma talanoa faatasi ma a latou loia po o tagata faufautua tau i lāfoga, ua mafai ai e le toʻatele ona lagolagoina gaoioiga fesoasoani faalelotu a Molimau a Ieova i le lalolagi aoao, ma maua ai foʻi aogā tau lāfoga. E mafai ona maua lenei polosiua mai le Charitable Planning Office.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu pe telefoni atu foʻi i le tuatusi o loo taʻua i lalo, po o le faafesootaʻi o le ofisa o le lālā o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefoni: (845) 306-0707

[Ata i le itulau 18]

O a tatou taumafaiga autasi ua mafai ai ona faia Maota matagofie mo Sauniga i le lalolagi atoa

[Ata i le itulau 18]

Maota fou mo Sauniga i Ghana