O le Tusi Muamua o Tupu 5:1-18
5 Ina ua faalogo Hiramo le tupu o Turo+ ua faauuina Solomona e fai ma tupu e sui i lona tamā, ona ia aauina atu lea o ana auauna iā Solomona, auā na avea pea Hiramo ma uō a Tavita.*+
2 Ona auina atu lea e Solomona o le feʻau iā Hiramo,+ e faapea:
3 “Ua e silafia lelei e leʻi mafai e loʻu tamā o Tavita ona faia se fale e faamamaluina ai le suafa o Ieova lona Atua, ona o taua na tauina faasaga iā te ia mai i itu uma, seʻia tuuina ona fili e Ieova i lalo o ona alofivae.+
4 A o lenei, ua tuuina mai e Ieova loʻu Atua le mapusaga mo aʻu i itu uma lava.+ E leai sē o tetee mai, ma e leai foʻi se mea leaga o tupu.+
5 O lea ua ou manatu ai e faia se fale e faamamaluina ai le suafa o Ieova loʻu Atua, e pei ona folafola e Ieova iā Tavita loʻu tamā, e faapea, ‘O lou atalii o lē o le a ou faanofoina i lou nofoālii e sui iā te oe, o ia lea e faia le fale mo loʻu igoa.’+
6 O lenei, ia e poloaʻi atu i ou tagata ina ia tā mai mo aʻu o laau o arasi mai i Lepanona.+ O le a galulue faatasi aʻu auauna ma au auauna, ma ou te totogiina au auauna e tusa ma le totogi e te faatulagaina mai, auā ua e silafia lelei e leai se tasi o i matou e iloa tā i lalo laau e pei o tagata Saitonu.”+
7 Ina ua faalogo Hiramo i upu a Solomona, ona ia matuā olioli ai lea, ua ia faapea ane: “Ia viia Ieova i le asō, auā ua ia foaʻi mai iā Tavita se atalii atamai e pule i lenei nuu e matuā toʻatele!”+
8 Ona sau lea o le feʻau a Hiramo iā Solomona, e faapea: “Ua ou faalogo i lau feʻau na auina mai. O le a ou faia mea uma e te manaʻo i ai, i le saunia o laau o arasi ma laau o perosi.+
9 O le a ave ifo e aʻu auauna laau mai i Lepanona i le sami, ma o le a ou saisaiina faatasi laau ma faatafea atu i le sami i le nofoaga e te faailoaina mai iā te aʻu. Ou te tatalaina laau i inā, ona e aveina lea. A o oe, ia e aumaia meaʻai ou te talosaga atu ai mo loʻu aiga.”+
10 Ona avatu lea e Hiramo o laupapa mai i laau o arasi, ma laupapa mai i laau o perosi na manaʻo i ai Solomona.
11 Ua avatu foʻi e Solomona iā Hiramo o saito e 20,000 kori,* e fai ma meaʻai mo lona aiga, ma le 20 kori o suāuu o olive lelei.* O mea ia na avatu pea e Solomona iā Hiramo i lea tausaga ma lea tausaga.+
12 Ua foaʻi mai foʻi e Ieova iā Solomona le atamai e pei ona Ia folafola mai iā te ia;+ sa filemu foʻi le vā o Hiramo ma Solomona, ma ua la faia se maliega.*
13 Ua aumaia e le tupu o Solomona mai iā Isaraelu uma, o i latou na faatonuina e faia galuega mamafa; e toʻa 30,000 i latou na faatonuina.+
14 Ua ia aauina auauaʻi atu i latou i Lepanona e toʻa 10,000 i masina taʻitasi. E latou te nonofo i Lepanona mo se masina, ae e lua masina e ō ai i o latou aiga; na pule foʻi Atoniramo+ iā i latou o ē na faatonuina e faia galuega mamafa.
15 Sa iā Solomona o ē e faia galuega masani* e toʻa 70,000, o ē e tipi maa+ i le mauga e toʻa 80,000,+
16 faapea foʻi pule lagolago+ a Solomona e toʻa 3,300, o ē na galulue o ni fomeni e vaavaaia tagata na faia galuega.
17 Ua poloaʻia i latou e le tupu ina ia aumaia maa tetele ma maa taugatā,+ e fai ai le faavae+ o le fale i maa ua tipiina.+
18 Ona tipiina lea o maa e le ʻaukamuta a Solomona ma le ʻaukamuta a Hiramo, atoa ma tagata Kavali,+ ua latou sauniunia foʻi laupapa ma maa e fai ai le fale.
