Esoto 36:1-38
36 “E galulue faatasi Pesaleli ma Oliavu atoa ma tane tomai uma,* o ē ua foaʻi mai i ai e Ieova le atamai ma le malamalama ina ia iloa le auala e faia ai galuega uma i le auaunaga paia, e pei ona poloaʻi mai ai Ieova.”+
2 Ona aami lea e Mose o Pesaleli, o Oliavu ma tane tomai uma, o ē ua foaʻi mai i ai e Ieova le atamai i o latou loto,+ o ē ua taʻitasi ma uunaʻia e lona loto e tauofo e faia le galuega.+
3 Ona latou ave lea o foaʻi uma+ mai iā Mose, ia na aumaia e le fanauga a Isaraelu mo le galuega i le auaunaga paia. Peitaʻi, ua faaauau ona aumaia e tagata iā te ia o foaʻi tauofo i lea taeao ma lea taeao.
4 Ina ua amata le galuega paia, ona ō mai ai lea o tagata tomai uma, ua taʻitasi ma sau
5 ma faapea mai iā Mose: “Ua tele lava mea ua aumaia e tagata nai lo o mea e manaʻomia mo le galuega na poloaʻi mai Ieova e fai.”
6 Ona poloaʻi atu lea o Mose ia faia se faasilasilaga i le togālauapi e faapea: “Outou tane ma fafine, ia aua neʻi toe aumaia ni mea mo le foaʻi paia.” O lea na taofia ai tagata mai i le aumaia o nisi mea.
7 Auā ua lava ma totoe mea ua saunia mo le galuega.
8 Ona faia lea e tagata faigaluega tomai uma+ le faleʻie paia+ i ʻie e sefulu ua fai mai i le ʻie lino ua lelei ona milo ona filo, o filo lanu moana, o fulufulu mamoe lanu violē, o mea ua vali mūmū sesega; ua ia* suʻi ai foʻi teuteu o ata o kerupi.+
9 O le umi o ʻie taʻitasi o le faleʻie e 28 kupita,* ma e 4 kupita le lautele. E tutusa le fua mo ʻie uma o le fale‘ie.
10 Ona ia sosooina lea o ʻie e lima, ma ua ia sosooina foʻi isi ʻie e lima.
11 Mulimuli ane, ua ia faia ni faamaulave i le filo lanu moana i le faatausiʻusiʻuga o le tasi ʻie o le faleʻie e sosoo ai ma le isi ʻie. Ua ia faia foʻi faapea i le faatausiʻusiʻuga o le ʻie pito i tua i le mea e sosoo ai ma le isi ʻie.
12 Ua ia faia faamaulave e 50 i le ʻie e tasi, ua ia faia foʻi faamaulave e 50 i le faatausiʻusiʻuga o le ʻie lea i le isi itu o le mea e sosoo ai, ina ia faafesagaʻi nei faamaulave.
13 Ona ia faia lea o lave auro se 50 ma ua sosoo faatasi ʻie o le faleʻie e faaaogā ai lave, ma avea ai o se faleʻie paia e tasi.
14 Ua ia faia foʻi ʻie i fulufulu ʻoti e ufiufi ai le faleʻie paia. Ua ia faia ʻie e 11 o le faleʻie.+
15 O le umi o ʻie taʻitasi o le faleʻie e 30 kupita ma e 4 kupita le lautele. E tutusa le fua mo ʻie e 11.
16 Ua ia sosooina ʻie e lima, ua ia sosooina foʻi isi ʻie e ono.
17 Ua ia faia faamaulave e 50 i le faatausiʻusiʻuga o le ʻie pito i tua i le mea e sosoo ai, ma ua ia faia foʻi isi faamaulave e 50 i le faatausiʻusiʻuga o le isi ʻie i le mea e sosoo ai ma le isi ʻie.
18 Ona ia faia lea o lave ʻapamemea e 50 e sosoo faatasi ai le faleʻie, ina ia tasi ai.
19 Ua ia faia foʻi se ufiufi mo le faleʻie i paʻu o mamoe poʻa ua vali mūmū, ma se ufiufi i luga aʻe ua faia i paʻu o takesa.+
20 Ona ia faia lea o auivi laupapa mo le faleʻie paia i laau o le setima,+ ua faatutū.+
21 O le uumi o auivi laupapa taʻitasi e sefulu kupita, ma e tasi ma le ʻafa kupita le lautele.
22 O auivi laupapa taʻitasi, ua iai faanifo* e lua e faafeagai le tasi ma le isi. O le auala lenā ua ia faia uma ai auivi laupapa o le faleʻie paia.
23 Ua ia faia auivi laupapa mo le itu i saute o le faleʻie paia, e 20 auivi laupapa ua faasaga i le itu i saute.
24 Ua ia faia foʻi lagolago siliva e 40 e fetaui ma auivi laupapa e 20, e lua lagolago i lalo o le auivi laupapa e tasi ma ona faanifo e lua, ma e faapea foʻi i auivi laupapa e sosoo ai, e tofu ma lagolago e lua i lalo o auivi laupapa ma ona faanifo e lua.+
25 I le isi itu o le faleʻie paia i le itu i mātū, ua ia faia ai auivi laupapa e 20
26 ma o latou lagolago siliva e 40, e lua lagolago i lalo o le auivi laupapa e tasi, ma e faapea foʻi i auivi laupapa e sosoo ai, ua tofu ma lagolago e lua i lalo o auivi laupapa.
27 A o le vaega i tua o le faleʻie paia i le itu i sisifo, ua ia faia ai auivi laupapa e ono.+
28 Ua ia faia auivi laupapa e lua e fai ma lagolago i tulimanu o le faleʻie paia i ona tulimanu e lua i tua.
29 Ua sosoo nei auivi laupapa mai i le pito i lalo seʻia oo i le tumutumu, e gata i le mea ua iai le mama muamua. O le auala lea ua ia faia ai nei tulimanu e lua.
30 E valu auivi laupapa ma o latou lagolago siliva e 16, e lua lagolago i lalo o auivi laupapa taʻitasi.
31 Ua ia faia pou faalava mai i laau o le setima, e lima pou faalava mo auivi laupapa i le tasi itu o le faleʻie paia,+
32 ma e lima pou faalava mo auivi laupapa i le isi itu o le faleʻie paia, e lima pou faalava mo auivi laupapa o le faleʻie paia i le vaega i tua i le itu i sisifo.
33 Ua ia faia le pou faalava ina ia sulu i le ogatotonu o auivi laupapa e mai i le tasi itu e oo i le isi itu.
34 Ua ia ufiufi auivi laupapa i le auro, ua ia faia mama auro e taofi ai pou faalava, ma ua ia ufiufi pou faalava i le auro.+
35 Ua ia faia foʻi se ʻie puipui+ i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo. Ua ia suʻi ai ni teuteu o ata+ o kerupi.+
36 Ona ia faia lea o poutū e fā mai i laau o le setima ma ufiufi ai i le auro, faapea foʻi pine e faia i le auro, ma ua ia tunu le siliva ma fai ai lagolago e fā.
37 Ua ia faia foʻi se ʻie pupuni mo le faitotoʻa o le faleʻie i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo,+
38 ma ona poutū e lima ma ona pine. Ua ia ufiufi tumutumu ma sooga o ia mea i le auro, a o lagolago e lima ua faia i le ʻapamemea.
Faamatalaga Pito i Lalo
^ Epe., “tane uma e atamai o latou loto.”
^ E foliga mai e faasino atu iā Pesaleli.
^ Po o “ua iai pou e tū saʻo.”
