Esoto 19:1-25

  • I le mauga o Sinai (1-25)

    • Avea Isaraelu ma malo o ositaulaga (5, 6)

    • Faapaiaina le nuu e feiloa‘i i le Atua (14, 15)

19  O le masina lona tolu talu ona ō ese le fanauga a Isaraelu mai i Aikupito, o lea lava aso, ua latou taunuu ai i le toafa o Sinai.  Ua latou ō ese mai i Refiti+ ma ō atu i le toafa o Sinai, ma tolauapi ai i le toafa. Ua tolauapi ai i inā Isaraelu i luma o le mauga.+  Ua alu aʻe Mose i le mauga ina ia tū ai i luma o le Atua moni, ua valaau Ieova iā te ia mai i le mauga,+ e faapea: “O le tala lenei e te fai atu i le aiga o Iakopo, o le fanauga lea a Isaraelu,  ‘Ua outou vāai i le mea na ou faia i tagata Aikupito,+ ina ia ou ave ai outou i apaʻau o aeto ma aumaia outou iā te aʻu.+  Afai tou te matuā faalogo i loʻu leo ma tausi i laʻu feagaiga, ona avea lea o outou ma o‘u nuu faapitoa* mai i isi nuu uma,+ auā o aʻu e ona le lalolagi atoa.+  E avea outou ma malo o ositaulaga ma nuu paia mo a‘u.’+ O upu nei e te fai atu ai i le fanauga a Isaraelu.”  Ona alu lea o Mose ma aami toeaina o le nuu, ma faailoa atu iā i latou nei upu uma na poloaʻi mai ai Ieova iā te ia.+  Ua tali faatasi mai le nuu atoa: “O mea uma ua fetalai mai ai Ieova ua matou malilie e fai.”+ Ona faaoo atu lea e Mose o le tali a le nuu iā Ieova.  Ua fetalai mai Ieova iā Mose: “Faauta! ou te alu atu iā te oe i se ao uliuli, ina ia lagona ai e le nuu pe a ou tautala atu iā te oe, ma ia latou faatuatua ai pea iā te oe.” Ua taʻu atu foʻi e Mose upu a le nuu iā Ieova. 10  Ua fetalai mai Ieova iā Mose: “Ia e alu i le nuu, ia faapaia i latou i le asō ma a taeao, ma e ao foʻi ona latou tatā o latou ofu. 11  Ia latou nofosauni mo le aso lona tolu, auā o le aso lona tolu e afio ifo ai Ieova i le mauga o Sinai, a o vaavaai atu i ai le nuu atoa. 12  Ia e faia ni tuaoi mo le nuu i itu uma o lenei mauga ma faapea atu, ‘Ia aua neʻi outou ō aʻe i le mauga, ma aua neʻi paʻi atu se tasi i le auvae mauga. O so o se tasi e paʻi i le mauga, e fasiotia lava o ia. 13  Aua neʻi paʻi se lima iā te ia, ae e fetogia o ia i maa pe fanaina i se aū. E tusa lava po o se manu po o se tagata, e lē ola o ia.’+ Ae a ili atu le pū,*+ ona latou ō mai lea e faalatalata mai i le mauga.” 14  Ona alu ifo lea o Mose i le nuu mai i le mauga, ua ia faapaiaina le nuu; ma ua latou tatā o latou ofu.+ 15  Ua ia fai atu i le nuu: “Ia sauniuni mo le aso lona tolu. Aua neʻi outou faia ni feusua‘iga.”* 16  I le taeao o le aso lona tolu, ua pāpā faititili, ua emo uila, ma ua iai se ao mafiafia+ i luga o le mauga, ma le leo foʻi o le pū ua matuā leotele, ona gatete ai lea o tagata uma i le togālauapi.+ 17  Ua aumai e Mose le nuu mai i le togālauapi ina ia faafeiloaʻi ma le Atua moni, ma ua latou laulaututū i luma o le auvae mauga. 18  Ua ufitia le mauga o Sinai i le asu, ona ua afio mai Ieova i luga o le mauga i le afi;+ ma ua faaauau ona alu aʻe le asu e pei o se asu o se ogaumu, ma ua matuā lūlūina ai le mauga atoa.+ 19  A o faasolo ina matuā leotele le leo o le pū, ona tautala atu lea o Mose, ma ua tali mai le siʻufofoga o le Atua moni iā te ia. 20  Ua afio ifo Ieova i le tumutumu o le mauga o Sinai. Ua valaau mai Ieova iā Mose e alu atu i le tumutumu o le mauga, ona alu aʻe ai lea o Mose.+ 21  Ua fetalai mai Ieova iā Mose: “Ia e alu ifo ma lapataʻi le nuu, ia aua neʻi o latou taumafai e ō mai faamalosi e vāai iā Ieova, ina ne‘i feoti ai le toʻatele o i latou. 22  Ia faapaia foʻi e ositaulaga i latou lava, o ē e masani ona faalatalata mai iā Ieova, ina ia aua neʻi fasiotia* i latou e Ieova.”+ 23  Ua fai atu Mose iā Ieova: “Ua lē mafai ona ō mai le nuu i luga o le mauga o Sinai, auā ua uma ona e lapataʻia i matou e faapea, ‘Ia faia ni tuaoi mo le mauga ma ia faapaiaina.’”+ 24  Peitaʻi, ua fetalai mai Ieova iā te ia: “Ia e alu ifo, ona oulua ō mai faatasi ai lea ma Arona, ae aua neʻi taumafai ositaulaga ma le nuu e ō aʻe faamalosi i luga iā Ieova, ina neʻi fasiotia e ia i latou.”+ 25  Ona alu ifo lea o Mose i le nuu ma taʻu atu iā i latou.

Faamatalaga Pito i Lalo

Po o “aʻu oloa tāua.”
Epe., “pū e faia i seu o le mamoe poʻa.”
Epe., “Aua neʻi e alu i se fafine.”
Epe., “osofaʻia.”