1. O ā nisi o faataʻitaʻiga o tulafono o loo i le Tusi Paia, ma e faapefea ona tatou maua aogā pe a usitaʻia?

UA AUMAIA e Ieova iā i tatou le tele o faatonuga maʻoti e ala mai i lana Afioga tusia. O se faataʻitaʻiga, e faasā e Ieova feusuaʻiga lē mamā, ifo i tupua, gaoi, ma le onā. (1 Kori. 6:9, 10) E lē gata i lea, na tuuina mai e le Alo o le Atua o Iesu Keriso, lenei faatonuga faigatā ma mataʻina i ona soo: “Ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou. Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:19, 20) Maʻeu se puipuiga e maua mai i tulafono ma faatonuga a le Atua! O le usitaʻia o na faatonuga ua atili ai ona tatou mautinoa iā i tatou lava, saosaolaumea i le soifua mālōlōina lelei ma maua ai le fiafia i le aiga. Ae sili atu i lenā, o lo tatou usitaʻi faamaoni i faatonuga a Ieova lea e aofia ai le faatonuga e talaʻi atu, ua tatou maua ai lona finagalo malie ma lana faamanuiaga.

2, 3. (a) Aiseā ua lē aumaia ai e le Tusi Paia iā i tatou ni tulafono mo vala uma o le olaga? (e) O ā fesili o le a iloiloina i lenei mataupu? (Tagaʻi i le ata i luga aʻe o le matua.)

 ² Peitaʻi, e tele tulaga e lē o iai ni faatonuga maʻoti i le Tusi Paia. O se faataʻitaʻiga, e lē o iai ni tulafono auʻiliʻili i le Tusi Paia i ituaiga laʻei e talafeagai mo se Kerisiano. Ua faapefea ona atagia mai ai le atamai o Ieova? E eseese uma laʻei ma teuga i vaipanoa o le lalolagi, ma e fesuisuiaʻi mai i lea taimi i lea taimi. O lea, pe ana iai i le Tusi Paia se lisi o laʻei ma teuga e talafeagai, atonu ua lē o toe aogā i lenei taimi. I se tulaga talitutusa, e lē o aumaia e le Afioga faagaeeina a le Atua ni tulafono e pulea ai filifiliga a Kerisiano i galuega, soifua mālōlōina, ma faafiafiaga. O lea, e iai i tagata taʻitoʻatasi ma ulu o aiga le faitalia e fai ai a latou filifiliga i mataupu faapena.

³ Po o lona uiga e lē afāina iā Ieova a tatou faaiʻuga pe a feagai ma filifiliga tāua, lea atonu e iai ni aafiaga i o tatou olaga? Pe e finagalo malie lo tatou Tamā i le lagi i so o se filifiliga e tatou te faia, ae ia lē solia ai se tulafono a le Tusi Paia? E faapefea ona tatou faia ni filifiliga e faafiafia ai Ieova i tulaga e lē o iai ni tulafono maʻoti?

4, 5. E faapefea ona aafia i tatou ma isi tagata i a tatou filifiliga?

⁴ E manatu nisi e lē afāina mea e tatou te filifili e fai. Peitaʻi, ina ia tatou faia filifiliga e fiafia ai Ieova, e tatau ona tatou iloilo tulafono ma mataupu silisili o loo i lana Afioga tusia ma faatatau i o tatou olaga. O se faataʻitaʻiga, e tatau ona tatou gaoioi e ōgatusa ma lana tulafono e faatatau i le toto, ina ia maua ai lona finagalo malie. (Kene. 9:4; Galu. 15:28, 29) E fesoasoani le tatalo iā i tatou ina ia faia filifiliga e tusa ai ma tulafono ma mataupu silisili a le Tusi Paia.

⁵ E mafai i a tatou lava filifiliga tāua ona matuā aafia ai lo tatou malolosi ma le lelei faaleagaga. O filifiliga uma e tatou te faia e aafia ai la tatou faiā ma Ieova, a lē o le lelei po o le leaga. O filifiliga lelei e faamalosia ai la tatou faiā ma Ieova, ae o filifiliga sesē e faaleagaina ai lenā faiā. E lē gata i lea, o filifiliga lē lelei e aafia ai le itu faaleagaga o isi, atonu e iʻu ina tautevateva ai, pe saveʻu ai le autasi o le faapotopotoga. O lea, e tāua tele a tatou lava filifiliga.—Faitau le Roma 14:19; Kalatia 6:7.

6. O le ā e tatau ona taʻitaʻia ai a tatou lava filifiliga?

⁶ Ae faapefea mataupu e lē o iai ni faatonuga tuusaʻo mai i le Tusi Paia? I tulaga faapena, o loo iā i tatou lava le tiute tauave e iloilo ai tulaga uma, ma faia se faaiʻuga e lē fuaina i le mea e tatou te fiafia ai, ae e fua i le mea e finagalo i ai Ieova ma ia faamanuiaina.—Faitau le Salamo 37:5.

7. E faapefea ona tatou iloa le silafaga a Ieova i mataupu e leai ni tulafono i le Tusi Paia?

⁷ E te ono taumānatu, ʻE faapefea ona tatou iloa le silafaga a Ieova i mataupu e lē o iai ni faatonuga maʻoti mai i lana Afioga? Ua taʻua i le Efeso 5:17: “Ia malamalama po o le ā le finagalo o Ieova.” Pe a leai se tulafono maʻoti i le Tusi Paia, e faapefea ona tatou malamalama i le finagalo o le Atua? E ala i le tatalo atu iā te ia ma talia le taʻitaʻiga a lona agaga paia.

8. E faapefea ona iloa sa malamalama Iesu i le mea na finagalo Ieova e na te faia? Ia faataʻitaʻi.

⁸ Seʻi iloilo le auala na malamalama ai Iesu i mea na finagalo lona Tamā e na te faia. E lua ni mea na tutupu, na tatalo  muamua ai Iesu ona faavavega lea ona saunia meaʻai mo le motu o tagata e toʻatele. (Mata. 14:17-20; 15:34-37) Peitaʻi, na ia musu e liua maa e avea ma falaoa ina ua matelāina ma faaosoosoina e le Tiapolo i le toafa. (Faitau le Mataio 4:2-4.) O le malamalama lelei o Iesu i le silafaga a lona Tamā, na ia iloa ai e lē tatau ona liua maa e avea ma falaoa. Sa iloa e Iesu e leʻi finagalo lona Tamā e faaaogā lona mana mo lona lava lelei. O lona lē faia o lenā mea, na ia faaalia manino mai ai lona faalagolago i le taʻitaʻiga ma le tausiga a Ieova.

9, 10. O le ā e fesoasoani iā i tatou i le faia o filifiliga atamai? Aumai se faataʻitaʻi.

⁹ Pe a tatou mananaʻo e faia filifiliga atamai e pei o Iesu, e manaʻomia ona tatou faalagolago iā Ieova mo le taʻitaʻiga. E manaʻomia ona tatou gaoioi e ōgatusa ma faaupuga atamai nei: “Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala. Aua e te faafiapoto. Ia e mataʻu iā Ieova ma ia e liliuese mai i ala leaga.” (Faata. 3:5-7) O le iloaina o le silafaga a Ieova i le suʻesuʻeina o le Tusi Paia, e mafai ona tatou malamalama ai i le mea e finagalo Ieova e tatou te faia i ni tulaga patino. O lo tatou masani lelei i manatu o Ieova, o le a faigofie ai ona talia i o tatou loto lana taʻitaʻiga.—Eseki. 11:19.

¹⁰ O se faaaʻoaʻoga, seʻi mafaufau i se avā o loo fai sana faatau. Ua ia vaai atu i ni seevae e manaʻo lava i ai, peitaʻi e taugatā. Ona ia mafaufau lea, ʻO ā ni faalogona o loʻu toʻalua pe a ou faaaluina lenei tupe telē?’ Atonu ua ia iloaina le tali o lana fesili e ui e lē o faatasi ma lana tane. Aiseā ua ia iloa ai? Talu ai o le umi o lenā mafutaga ua ia iloa lelei ai le manatu o lana tane e faatatau i le faasoasoaina o tupe. O le iʻuga, ua ia malamalama ai i manatu o lana tane pe a ia faatauina nei seevae. I se tulaga talitutusa, pe a faasolosolo ona tatou masani lelei i le silafaga ma ala o Ieova, o le a tatou malamalama atili ai i mea e finagalo Ieova e tatou te faia i tulaga eseese.

11. O ā fesili e mafai ona tatou fesili ifo ai iā i tatou lava pe a faitau pe suʻesuʻeina le Tusi Paia? (Tagaʻi i le pusa, “ Pe a Suʻesuʻe le Tusi Paia, ia Fesili Ifo.”)

¹¹ E manaʻomia ona faamuamua suʻesuʻega a le tagata lava ia, ina ia malamalama lelei ai i le silafaga a Ieova i mea. Pe a faitau ma suʻesuʻe le Afioga a le Atua, ia fesili ifo, ʻO le ā ua faailoa mai e lenei manatu e faatatau iā Ieova, o ona ala amiotonu ma ona manatu?’ E tatau ona iā i tatou le vaaiga sa i le faisalamo o Tavita: “Ieova e, ia e faailoa mai iā te aʻu ou ala; ia e aʻoaʻo mai aʻu i ou ala. Ia faia aʻu ina ia ou savali i lau upu moni ma aʻoaʻo mai iā te aʻu, auā o oe o le Atua o loʻu faaolataga.Ou te faamoemoe atu iā te oe i le aso atoa.” (Sala. 25:4, 5) A o e mafaufau i se mau faale-Tusi Paia, atonu e te mafaufau i fesili nei: ʻE faapefea ona ou faatatauina nei faamatalaga i loʻu olaga? O fea e mafai ona ou faatatauina ai? I le aiga, galuega, aʻoga, po o laʻu faiva?’ O le taimi lava tatou te iloa ai po o fea tonu e tatou te faatatauina ai lenei faamatalaga, ona faigofie lea ona iloa le auala e faatatau ai.

12. E faapefea ona fesoasoani lomiga ma sauniga iā i tatou ina ia iloa ai le silafaga a Ieova i mataupu eseese?

¹² O se tasi o auala e tatou te masani lelei ai i manatu o Ieova, o le uaʻi totoʻa atu lea i taʻiala faale-Tusi Paia mai i lana faalapotopotoga. O se faaaʻoaʻoga, ua fesoasoani mai iā i tatou le Tusi Taʻiala  mo Saʻiliʻiliga a Molimau a Ieova, ma le Lomiga Faale-Tusi Paia I LE INITANETI ina ia tatou aʻoaʻoina ai le silafaga a Ieova e faatatau i tulaga eseese e manaʻomia ona fai ai a tatou lava filifiliga. Ua tatou maua foʻi le tele o aogā mai i le faalogologo lelei i sauniga ma faia so tatou sao. O le manatunatu loloto i mea ua tatou aʻoaʻoina, o le a tatou malamalama lelei ai i le silafaga a Ieova ma taumafai e faaōgatusa i ai o tatou manatu. O le faaaogā lelei o sauniuniga a Ieova mo le fafagaina faaleagaga o i tatou, o le a faasolosolo ai ona malamalama lelei i ona ala. O le iʻuga, o le a mafai ona tatou faia filifiliga lelei e faamanuia mai ai lo tatou Tamā alofa.

13. Aumai se faaaʻoaʻoga e faaalia ai o le iloaina o le silafaga a Ieova, e mafai ai ona tatou faia ni filifiliga lelei.

¹³ Ia manatunatu i se faaaʻoaʻoga e faaalia mai ai o le iloaina o le silafaga a Ieova, e mafai ona tatou faia ai ni filifiliga lelei. I le avea ai ma tagata talaʻi o le Malo, atonu tatou te faanaunau ai e avea i tatou ma paeonia sauatoa. E manaʻomia la ona faafaigofie o tatou olaga, ina ia taunuu ai lenā sini. Ae atonu tatou te ono popole foʻi pe tatou te maua le fiafia moni, pe a faaitiitia a tatou mea faitino. O le mea moni, e leai se faatonuga i le Tusi Paia e tatau ona tatou paeonia, e mafai lava ona tatou auauna iā Ieova o ni tagata talaʻi faamaoni. Peitaʻi, ua faamautinoa mai e Iesu, e mafai ona maua e i latou e faia faataulaga mo le Malo le tele o faamanuiaga. (Faitau le Luka 18:29, 30.) E lē gata i lea, ua faailoa mai e le Tusi Paia, e fiafia le finagalo o Ieova pe a tatou faia “taulaga tauofo” o viiga, ma faia ma le fiafia le mea sili e faaauiluma ai le tapuaʻiga moni. (Sala. 119:108; 2 Kori. 9:7) Pe e lē fesoasoani nei manatu faale-Tusi Paia faatasi ma le tatalo mo le taʻitaʻiga a Ieova, e tatou te malamalama lelei ai i lana silafaga? O le manatunatu loloto i nei manatu, e fesoasoani iā i tatou e faia se filifiliga e aogā iā i tatou ma maua ai faamanuiaga mai i lo tatou Tamā o i le lagi.

14. E faapefea ona e iloa le ituaiga o laʻei ma teuga e fiafia i ai Ieova?

¹⁴ Seʻi mafaufau i se isi faaaʻoaʻoga: Seʻi faapea ua e fiafia i se ituaiga o ofu e ono tausuai ai nisi i le faapotopotoga. E ui i lea, ua e iloa e leai se tulafono patino a le Tusi Paia e faasā ai le faaaogāina o lenā ofu. O le ā le silafaga a Ieova i le mataupu? O le fautuaga faagaeeina lenei a le aposetolo o Paulo: “Ou te manaʻo foʻi i fafine ina ia  teuteu iā i latou i ofu e talafeagai, ia onomea ma ia mafaufau lelei, ia lē faia i le lauulu fili ma auro, po o penina po o ofu e sili ona taugatā, ae ia tatau ma fafine o ē ua faapea mai latou te matataʻu i le Atua, e ala i a latou galuega lelei.” (1 Timo. 2:9, 10) E faatatau atu foʻi lenei fautuaga i tane Kerisiano. I le avea ai ma auauna faamaoni a Ieova, e lē gata e tatou te mafaufau i mea tatou te fiafia ai, ae o le aafiaga foʻi o isi ona o a tatou laʻei ma teuga. O le alofa ma le lotomaulalo, e uunaʻia ai tatou e faatāua manatu o uso talitonu, ina ia ʻalofia ai le soona uaʻi mai po o le faatigā iā i latou. (1 Kori. 10:23, 24; Fili. 3:17) O le manatua o manatu o le Tusi Paia e fesoasoani iā i tatou e malamalama ai i le silafaga a Ieova i lenei mataupu, ma taʻitaʻia ai i tatou i le faia o filifiliga e faafiafiaina ai o ia.

15, 16. (a) O ā faalogona o Ieova pe a faaauau ona tatou mafaufau i mea lē mamā taufeusuaʻiga? (e) Pe a filifilia a tatou faafiafiaga, e faapefea ona tatou iloa le mea e faafiafiaina ai Ieova? (i) E faapefea ona faia filifiliga tāua?

¹⁵ Ua faailoa mai e le Tusi Paia e faanoanoa Ieova pe a uia e tagata ala leaga, ma ʻleaga i taimi uma o latou manatu ma faanaunauga uma.’ (Faitau le Kenese 6:5, 6.) O lenei vala ua tatou iloa ai e sesē le mafaufau i feusuaʻiga lē mamā, ona e taʻitaʻia atu ai i le faia o se agasala matuiā lea e faasāina e le Tusi Paia, ma e lē ōgatusa ma le silafaga a Ieova. Na tusi le soo o Iakopo: “O le atamai mai i lugā, e muamua ona mamā, e filemu, e magafagafa, e gauaʻigofie, e tumu i le alofa mutimutivale ma fua lelei, e lē faailoga tagata, e lē faatagāfai.” (Iako. 3:17) O le mataala i lea vala, e uunaʻia ai i tatou e teena faafiafiaga lea e faaosofia ai manatu ma faanaunauga lē mamā. O Kerisiano e iai le utaga mamao e lē tau fesili pe talafeagai ona ia faaaogāina se tusi, se ata tifaga, po o se taaloga e iai ni mea e inosia e Ieova. Ua manino mai i lana Afioga lona finagalo i na mataupu.

¹⁶ E tele mataupu e ono eseese ai a tatou filifiliga, ae e mafai lava ona faafiafiaina ai Ieova. Ae pe a faia filifiliga tāua, e iai taimi e manaʻomia ai ona tatou saʻilia fautuaga mai i toeaina, po o isi Kerisiano taʻumatuaina. (Tito 2:3-5; Iako. 5:13-15) Peitaʻi, e lē talafeagai ona talosaga atu i isi e faia a tatou filifiliga. E tatau i Kerisiano ona toleni ma faaaogā o latou mafaufau ua uma ona aʻoaʻoina. (Epe. 5:14) E tatau iā i tatou uma ona faatatauina upu faagaeeina nei a Paulo: “Auā e tauave e le tagata lava ia lana avega.”—Kala. 6:5.

17. E faapefea ona tatou maua aogā mai le faia o filifiliga e faafiafiaina ai Ieova?

¹⁷ Pe a ōgatusa a tatou filifiliga ma manatu o Ieova, o le a tatou mafuta vavalalata atu iā te ia. (Iako. 4:8) O le a tatou olioli i le mauaina o lona finagalo malie ma ana faamanuiaga. O le iʻuga, o le a faamalosia ai lo tatou faatuatua i lo tatou Tamā i le lagi. O lea, ia taʻitaʻia i tatou i tulafono ma mataupu silisili i le Tusi Paia, ona e faaalia mai ai le silafaga a le Atua i mataupu. O le mea moni, e iai lava se mea fou e tatou te aʻoaʻoina e faatatau iā Ieova. (Iopu 26:14) O a tatou taumafaiga filigā, e mafai ai ona tatou maua le atamai, poto, ma le faautaga loloto e faia ai filifiliga atamai. (Faata. 2:1-5) O manatu ma fuafuaga a tagata lē lelei atoatoa e iai le taimi e lē aogā ai, peitaʻi e talafeagai le faamanatuga lenei a le faisalamo: “E tumau le pule [“faaiʻuga,” NWT] a Ieova e oo i le faavavau; e tumau foʻi manatunatuga o lona finagalo mai i lea tupulaga i lea tupulaga.” (Sala. 33:11) E manino mai, e mafai ona tatou faia filifiliga e sili ona lelei, pe a ōgatusa o tatou manatu ma gaoioiga ma le silafaga a lo tatou Atua atamai o Ieova.