MATAUPU AUTŪ | O LE Ā EA LE AOGĀ E OLA AI?
E Iai le Fesoasoani
“Ia taʻu atu o outou popolega uma [i le Atua], auā o loo manatu mamafa mai o ia iā te outou.”—1 PETERU 5:7.
E mafaufau nisi e sili ai le oti pe afai e manatu ua leai se vaifofō o faafitauli. Peitaʻi, o fesoasoani nei e mafai ona e maua.
Tatalo. O le tatalo e lē o se toomaga e tau ina mapu ai le mafaufau, pe fai foʻi ona ua leai lava se isi e tua i ai le tagata lotomafatia. Peitaʻi, o se auala e fesootaʻi ai ma Ieova le Atua, o lē e manatu mamafa mai iā te oe. E finagalo Ieova ina ia e faailoa atu ou popolega iā te ia. O le mea moni, ua faailoa mai e le Tusi Paia iā i tatou: “Ia tuuina atu iā Ieova ou popolega uma. O ia lava e na te tausia oe.”—Salamo 55:22.
Aiseā e te lē tatalo ai loa i le Atua? Ia faaaogā lona suafa, o Ieova, ma sasaa atu lou loto iā te ia. (Salamo 62:8) E finagalo Ieova ina ia e māfana iā te ia e pei o se uō. (Isaia 55:6; Iakopo 2:23) E mafai ona e tatalo atu iā Ieova i so o se nofoaga ma i so o se taimi.
Ua faapea mai le faalapotopotoga o le American Foundation for Suicide Prevention, “ua mātauina pea i suʻesuʻega, o le toʻatele o i latou na pule i o latou ola, lea e 90% pe sili atu foʻi na aafia i le maʻi tau le mafaufau i le taimi na maliliu ai. Peitaʻi, e masani lava o nei gasegase e leʻi iloa ua aafia ai, pe e leʻi vaaia se fomaʻi po o le leʻi saʻo foʻi ona togafitia.”
O ē e manatu alofa iā te oe. E tāua lou ola i isi e aofia ai ou aiga ma au uō o ē e fia fesoasoani atu iā te oe. Peitaʻi, e iai foʻi isi atonu e te leʻi feiloaʻi lava iai e manatu alofa mo oe. O se faaaʻoaʻoga, e feiloaʻi Molimau a Ieova i nisi ua matuā loto nutimomoia, o nisi na faapea ane ua leiloa le mea o le a fai ma sa mafaufau e pule i o latou ola. O le galuega talaʻi mai i lea fale i lea fale, ua maua ai e Molimau a Ieova le avanoa lelei e fesoasoani ai iā i latou na. E ala i le mulimulituʻi i le faaaʻoaʻoga a Iesu, ua manatu mamafa ai Molimau a Ieova i o latou uso a tagata. E latou te manatu alofa foʻi iā te oe.—Ioane 13:35.
Togafitiga faapitoa. O le iai i se tasi o mafaufauga e fia pule i le ola o se faailoga lea o se maʻi tau i faalogona, e pei o le lotomafatia faaumiumi. E leai se mea e matamuli ai fua pe afai e te maua i se maʻi tau i faalogona, auā e tutusa lava ma le aafia i se maʻi o le tino. Ua faatusa e nisi tagata atamamai le lotomafatia faaumiumi o se fulū masani e mafai ona aafia ai soo se tasi, peitaʻi e mafai lava ona togafitia. *
IA MANATUA: E masani lava e lē mafai ona e taumafai na o oe e manumalo mai le lotomafatia faaumiumi. Ae e mafai ona e taulau pe afai e tāpā se isi e fesoasoani atu.
LE MEA E MAFAI ONA E FAIA NEI: Saʻili atu i se fomaʻi faapitoa e togafitia maʻi tau i faalogona e pei o le lotomafatia faaumiumi.
^ pala. 8 Pe afai e faaauau pea ona iai mafaufauga e pule i le ola, ia iloa po o ā ni fesoasoani o iai, atonu o faalapotopotoga faapitoa e faatāuaina le ola, po o se vaega o le falemaʻi e nafa ma maʻi tau i le mafaufau. O loo galulue i nei nofoaga tagata ua toleniina faapitoa e saunia se fesoasoani manaʻomia.
E te Ono Fiafia Foʻi
ALA MAI!
Aogā e Ola Ai—E Iai se Faamoemoe
E pei o le malamalama i tafatafaʻilagi, o le faamoemoe e fesoasoani e te iloa atu ai mea e lē mafai ona e iloa.
