LE MANATU O LE TUSI PAIA
Faailoga Lanu
O fea na tupuga mai ai lanu eseese o tagata?
“Ona faaigoa lea e Atamu o lana avā iā Eva, auā e avea o ia ma tinā o tagata ola uma”—Kenese 3:20.
MANATU O TAGATA SUʻESUʻE
Ua taʻua e le UNESCO e faapea, o “tagata ola uma lava e tasi lo latou ituaiga ma na tupuga mai i mātua e tasi.”—Declaration on Race and Racial Prejudice, 1978.
LE MANATU O LE TUSI PAIA
Na foafoaina e le Atua tagata e toʻalua, o Atamu ma Eva, ma na ia fetalai atu iā i laʻua: “Ia fanafanau ma ia matuā faatoʻateleina, ia tumu ai le lalolagi.” (Kenese 1:28) O lea, na avea ai Atamu ma Eva ma mātua o tagata uma. Mulimuli ane, ina ua tafiesea e le lolo le toʻatele na aināina le lalolagi, e toʻafā ni ulugalii na faasaoina mai, o Noa ma lana avā ma ona atalii e toʻatolu ma a latou avā. Ua aʻoaʻo mai i le Tusi Paia e faapea, o tatou uma lava e tupuga mai i le fanau a Noa.—Kenese 9:18, 19.
Pe e sili aʻe le tasi ituaiga o tagata i lo le isi?
“Na faia [e le Atua] foʻi nuu uma mai i le tagata e toʻatasi, ina ia nonofo i le fogāeleele uma o le lalolagi.”—Galuega 17:26.
MANATU O NISI
A o faagasolo le senituri lona 20, na aliaʻe mai ai ni vaega o tagata e faailoga lanu. O se faaaʻoaʻoga, na finau mai le ʻau Nasi e sili atu lo latou ituaiga nai lo isi. Peitaʻi, i tusitusiga a le UNESCO o loo taʻua i le amataga o lenei mataupu, na mātauina ai “e tutusa ituaiga uma ona e tasi lo latou tupuaga.”
LE MANATU O LE TUSI PAIA
Ua faapea mai le Galuega 10:34, 35: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.” O lea la, e lē talafeagai le manatu o se tasi e sili aʻe lona ituaiga nai lo le isi.
Na faataatia e Iesu le taʻiala mo Kerisiano ina ua faapea atu i ona soo: “O le ʻauuso uma outou.” (Mataio 23:8) Na tatalo o ia ina ia autasi ona soo ma ia “atoatoa ona tasi i latou,” nai lo le fevaevaeaʻi pe faaituʻau.—Ioane 17:20-23; 1 Korinito 1:10.
Pe e iai se taimi o le a aveesea ai le faailoga lanu?
“O aso e gata ai, e oo ina faatumauina ai le mauga o le fale o Ieova . . . , ma e gasolo ane i ai nuu uma.”—Isaia 2:2.
MANATU O NISI
O le faaauau pea ona iai o le faailoga lanu ua tuufesili ai tagata i le tele o atunuu, pe faamata o iai se faaleleiga i taumafaiga a faalapotopotoga ma faigāmalo e foʻia ai le faailoga lanu. Ua faapea mai nisi e lē taitai mafai ona foʻia le faailoga lanu.
LE MANATU O LE TUSI PAIA
O le a lē faapalepale ai pea Ieova i faiga faailoga lanu e faavavau. I le pulega a lona malo, o le a auauna uma ai ma le autasi tane ma fafine “mai i atunuu uma, ma ituaiga, ma nuu, ma gagana,” i le faaalia lea o le alofa moni mo o latou uso. (Faaaliga 7:9) O le Malo o le Atua e lē o se mea i le loto ae o se pulega lea o le a faia ni suiga tetele i le lalolagi, le nofoaga lea na finagalo le Atua mo tagata uma e latou te mau ai e aunoa ma le faailoga lanu. *
^ pala. 15 Mo nisi faamatalaga, tagaʻi i le mataupu e 3 o lenei tusi O ā Aʻoaʻoga Moni a le Tusi Paia? lomia e Molimau a Ieova.
E te Ono Fiafia Foʻi
LE OLOMATAMATA
Lalolagi e Aunoa ma le Faailogatagata—O Afea?
Ua faaalia i mea moni na tutupu, le fesoasoani a le Tusi Paia i tagata e aveesea lenei uiga o le faailogatagata. O afea o le a aveesea atoatoa ai?
