Skip to content

Skip to table of contents

O Loo Alaga Mai le Atamai​—Po o E Lagona Atu Ea?

O Loo Alaga Mai le Atamai​—Po o E Lagona Atu Ea?

“Pe e lē o alaga ea le atamai, ma leotele mai pea le faautaga loloto? Ua tū ai i le tumutumu o mea maualuluga, i tafatafa ane o le ala, i fetaulaʻiga o auala. . . . i le mea e ui atu i le faitotoʻa o le aai, o loo alaga leotele atu pea le atamai.”​—FAATAOTO 8:1-3.

E TAUTELE le atamai. E mautinoa e tele mea sesē tatou te faia pe a aunoa ma le atamai. Ae o fea e mafai ona maua ai le atamai moni? Na iai i le tusitala o le tusi o Faataoto le atamai e lē mafaatusalia o Lē na foafoaina i tatou. E lē gata i lenā, e toetoe lava o tagata uma ua mafai ona mauaina le atamai o le Atua, e ala mai i se tusi faapitoa, le Tusi Paia. Seʻi tagaʻi foʻi:

  • Ua taʻua i le tusi The World Book Encyclopedia, o le Tusi Paia o “se tusi ua sili atu ona tele kopi ua lomia ma gagana ua faaliliuina ai na i lo se isi lava tusi.” Ua faaliliuina nei le Tusi Paia atoa pe i sona vaega i le toetoe lava 2,600 gagana, ma maua ai e le silia ma le 90 pasene o le fanau a tagata.

  • E iai se isi auala o loo ʻalaga leotele atu ai pea le atamai.’ Ua faapea mai le Mataio 24:14: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga [o lenei lalolagi].”

O lenā “tala lelei,” o le atamai moni. Auā e faasino atu i le auala atamai a le Atua o Lona Malo, lea e foʻia faafitauli o le fanau a tagata. O lenā Malo o le pulega a le Atua lea o le a puleaina le lalolagi aoao. (Tanielu 2:44; 7:13, 14) O le māfuaaga lea na tatalo ai Iesu: “Ia oo mai lou malo. Ia faia lou finagalo i le lalolagi e pei ona faia i le lagi.”​—Mataio 6:9, 10.

O se faaeaga i Molimau a Ieova le folafola atu o le Malo o le Atua i atunuu e 239. Ioe, o loo ʻalaga mai’ e oo lava i “faitotoʻa o le aai” le atamai o le Atua. Po o e lagona atu ea?