Aʻoaʻoga e Aumaia ai le Faamoemoe
Ua folafola mai e le Atua ni suiga mataʻina mo le lumanaʻi. O le a ia faamuta mafatiaga uma ma avea le olaga i le lalolagi o se fiafiaga mo aiga uma. (Salamo 37:11) Aiseā e tatou te talitonu ai i lenei folafolaga? Auā “e lē o se tagata le Atua e tala pepelo ai o ia.” (Numera 23:19) Seʻi iloilo nisi o mea lelei o le a faia e Lē na foafoaina i tatou.
O le a Aveesea e le Atua Tagata Amioleaga
“Pe a tupu olaola o ē e amioleaga e pei o le vao, ma fuga mai i latou uma o ē e faia mea e tigā ai, ina ia faaumatia i latou e faavavau.”—SALAMO 92:7.
Na tatou aʻoaʻoina i le mataupu ua mavae, ua faateteleina mea leaga o loo tutupu. E lē faateʻia ai i tatou i lenā tulaga. Ua valoia mai i le Tusi Paia i le 2 Timoteo 3:1-5, a o faagasolo “aso e gata ai” o le a faateteleina le leaga o tagata. O le ā le uiga o le faaupuga “aso e gata ai?” E uiga atu i le lalolagi o tagata e lē mananaʻo e usiusitaʻi i le Atua. E lē o toe umi ae faaumatia e le Atua i latou o ē mumusu e suia o latou uiga leaga, ae o le a totoe ai na o ē e usiusitaʻi i le Atua i le lalolagi. “E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:29.
O le a Faaumatia e le Atua Satani
“Ua lē o toe umi ona tuʻimomomoina lea o Satani i lalo o o outou vae, e le Atua o lē e na te aumaia le filemu.”—ROMA 16:20.
O le a filemu le lalolagi atoa pe a aveesea Satani, temoni, ma tagata leaga uma. Ua folafola mai e Lē na foafoaina i tatou: “E leai foʻi se tasi e faamataʻu iā [te oe].”—Mika 4:4.
O le a Aveesea e le Atua le Maʻi ma le Oti
“Ua iai i tagata le faleʻie o le Atua . . . E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”—FAAALIGA 21:3, 4.
O le a lē toe iai mafatiaga ma maʻi auā o le a aveesea e le Atua mea leaga uma na faapogaia e Satani, Atamu, Eva, ma o tatou tulaga lē lelei atoatoa. O le iʻuga, o le a “lē toe iai se oti.” O ē alolofa ma usiusitaʻi i Lē na foafoaina mea, o le a ola e faavavau. Ae o fea o le a latou nonofo ai?
O le a Faia e Lē na Foafoaina i Tatou le Lalolagi ma Parataiso
“O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.”—ISAIA 35:1.
O le a avea le lalolagi ma parataiso pe a faaumatia e le Atua o ē amioleaga. O le a tele paka ma togālaau matagofie, ma o le a fau ma soloi meaʻai. (Salamo 72:16) O le a mamā ma tele meafaiola i le sami, vaituloto ma vaitafe. O le a tatou lē toe faalogoina foʻi le upu “polusione!” O le a nofo le tagata i lona lava fale na ia fausia, o le a lē toe iai lava se tasi e leai sona fale, o sē e fia ʻai pe mativa.—Isaia 65:21, 22.
O le a Toe Faatutū e le Atua Ē ua Maliliu
“E toetutū mai tagata.”—GALUEGA 24:15.
Pe e te fia vaai i ē pele iā te oe ua maliliu? O le a toe faatutū mai e le Atua o Lē e ona le malosi uma lava i latou i se lalolagi Parataiso. O le a e iloa i latou, ma o le a latou mātauina foʻi oe. Seʻi faaāta le tele o le olioli o le a iā te oe ma i latou! Aiseā e tatou te mautinoa ai i lenei faamoemoe? Auā o loo i le Tusi Paia faaaʻoaʻoga o talavou ma tagata matutua o ē na faatutūina mai ma toe faatasi ma o latou aiga. E lē gata i lea, na masani ona faatutūina e Iesu tagata mai i le oti i luma o le toʻatele o molimau.—Luka 8:49-56; Ioane 11:11-14, 38-44.
E te Ono Fiafia Foʻi
ALA MAI!
Se Lalolagi ua Tumu i Faafitauli—Ia Faatumauina le Malosi o Lou Faamoemoe
E mafai ona fesoasoani mai le Tusi Paia e feagai ai ma faafitauli o le olaga ma maua ai se faamoemoe mo le lumanaʻi.
TALIINA O FESILI FAALE-TUSI PAIA
O le ā le Toetū?
E te ono maofa iā i latou o le a toe faatutūina mai i le lumanaʻi.
TALIINA O FESILI FAALE-TUSI PAIA
