Dureessu manchinna Aliaazaari, Yesuusi rosiisanni horoonsiˈrino lawishshi giddo kalaqe coyiˈrino misilaanooti. (Luqaasi 16:19-31) Xaggete giddo kulloonniri kuri mannooti lame babbaxxitino gaamora lawishshaho: (1) Yesuusi waro noori naaxxaleeyye Yihudu ammaˈno murrootiranna (2) minshinsarono Yesuusi roso macciishshe adhinohu suwashshu wodani noonsa mannira.

Konni birxichira

•  Dureessu manchinna Aliaazaari daafira Yesuusi mayino?

•  Tini xagge addinta ikkino coye kultannote?

•  Tini xagge, cubbaataammu sioolete giirantanno yine rosiinsannihu ammaˈnote rosi adda ikkinota leellishshanno?

•  Dureessu manchinna Aliaazaari daafira kultanno masalo tirose maati?

 Yesuusi Luqaasi fooliishsho 16 aana, heeshshonsa gudisante soorrantinorita lamu manni xagge coyiˈrino.

 Yesuusi coyiˈrino xagge haranchunni togo yitannote: Qawaaxxiˈre heeˈrannohu mittu dureessu manchi no. Qoleno isi waalchira abbine worroonnihu Aliaazaari yinannihu mittu huucciˈraanchi no; kuni buxichu manchi dureessu itanna gatanno giggilo yoranno. Gedensoonni Aliaazaari reyenna sokkaasine haadhe Abirihaami mule massite wortusi. Dureessano reyenna madaarri. Masalote giddo, lamunku manchi reyite heedhe nafa ikkanni noore affinohu gede assine kulloonni. Dureessu manchi giirate buwani giddo fooggalanni heeˈre, Aliaazaari qubbichunni waa kise arrawo qiissannosi gede soyasira Abirihaami huucciˈrino. Abirihaami kayinni dureessu manchi huucciˈrinore dihaaˈrino; qoleno lamunku manchi heeshsho gudisante soorrantinotanna lamunku mereero tayinse saˈˈa dandiinannikkihu lowo booni kalaqaminota kulinosi.

 Deeˈni. Yesuusi tenne masalo coyiˈrinohu rosiisannori heeˈreennaati. Batinyu egennaammino tini xagge masalo woy lawishsha ikkitinota coyidhanno. Lawishshaho, 1912nni attammoonnihu Luterihu Qullaawu Maxaafira noohu mittu cinaanchu birxichi tini xagge lawishsha ikkitinota kulanno. Hakkiinni saeno, Kaatoliki Jerusaalem Bayibilira noohu mittu lekkaalliidi qaagiishshi, “Tini xagge addinta heeˈre sainoha aye manchono kultannota diˈˈikkitino; hatteentenni lawishshaholla” yaanno.

 Yesuusi tenne coyiˈri woyite, reyini gedensaanni heeˈnanni heeshsho daafira rosiisanni no? Isi, mitu manni reyihu gedensaanni sioolete giiramannota hattono Abirihaaminna Aliaazaari gordoho noota kulanni no? Coyi hatto ikkinokkita leellishshannoti duucha taje no.

 Lawishshu gedera:

•   Dureessu manchi addinta giirate giddo giiramanni nooha ikkiro, giira Aliaazaari qubbichira noo waa fooraranno gede diassitanno?

•   Hakku wayi foorara hoogiro nafa, angichoho cophi yiino wayi giirate giddo fooggalanni noo manchira maa kaaˈlanno?

•   Yesuusi hattee masalo coyiˈri yanna geeshsha gordo haˈrinohu mittuno nookkita isi xawise coyiˈrino; ikkina, Abirihaami hiitto ikke gordoho heeˈrannoyya?—Yohaannisi 3:13.

 Dileellishshanno. Mitootu tini addu xagge ikka hooggurono, danchu manni gordo haˈrannotanna bushuullu sioolete giirantannota leellishanno lawishshaati yitanno. a

 Hatto yee heda gara ikkitino? Diˈˈikkitino.

 Reyino manni sioolete giiramanno yaanno rosi, Qullaawu Maxaafi reyitinori daafira kulannori ledo sumuu diyaanno. Lawishshaho, Qullaawu Maxaafi danchu manni baalunku gordo haˈre hagiidhanno woy bushu manni sioolete giiramanno diyaanno. Hatteentenni togo yaanno: “Lubbotenni noori reyitannota affino; reyitinori kayinni, mittoreno diaffanno.”—Rosiisaancho 9:5.

 Tini masalo lame babbaxxitino gaamora noo manni heeshsho gudisante soorrantara kaˈinota leellishshanno.

 Dureessu manchi, ‘woxe baxxannorira’ Ayihudete ammaˈno massagaanora lawishsha ikkinota huwata dandiinanni. (Luqaasi 16:14) Insa Yesuusi rosiisanna macciishshitinoha ikkirono, kulanno sokka adha gibbino. Kuri ammaˈnote murrooti silxaane afiˈrinokkiha woy roso rosinokki manna mishshanno.—Yohaannisi 7:49.

 Aliaazaari yinihu Yesuusi rosiisinore macciishshe adhinohunna Ayihudenniri ammaˈnote massagaano mishshanno mannira lawishshaho.

 Lamenti gaamo noo gari woˈmunni woˈma soorramino.

•   Ayihudenniri ammaˈnote murrooti Maganu albaanni ayirrinyu noonke yite heddanno. Ikkollana, insa Yesuusi duduwanno sokka adha gibbeenna Maganu insano ammaˈnonsano facci asse aguri woyite insa isi albaanni reyitinohu gedeeti. Qoleno Yesuusinna rosaanosi sabbakkanno sokka insa giirate gede ittinonsa.—Maatewoosi 23:29, 30; Soqqamaasinete Looso 5:29-33.

•   Ammaˈnote massagaano mulaagisse agurteenna heeˈrannohu beebbaataamu manni kayinni xa Magano afanna isi ledo jaalooma kalaqiˈra dandaanno faro afiˈrino. Batinyu togoo manni Yesuusi rosiisinoha Qullaawa Borro aana xintamino roso maahoyye yee adhe horo afiˈrino. Xa insa Maganu albaanni ayirrinye afiˈre hegerera hagiidha dandaanno.—Yohaannisi 17:3.