Miinju qarri woxe hoogatto gede asseennahe angate anje amaddinohe? Fayya, kalaqamu dano, dagate gaancinna olu shiima yanna giddo ikonoome ganara dandaanno. Hedeweelcho woxu eo hooga heeshsho ruukkitanno gede assitannoha ikkirono, aante nooti Qullaawu Maxaafi aana xintantino amaale shiimu woxinni heeˈrate maa assa dandaattoro afatto gede kaaˈlitannohe.

 Qullaawu Maxaafi biddishsha: “Afiˈranna hoonge rosoommo.”—Filiphisiyusi Sokka 4:12.

 Albihu geeshshi woxi hoogihero nafa, xa nooherinni heeˈra kayinni rosa dandaatto. Albi gede ikkite heeˈra dandaattokkita mulenni ammante adhite mitore biddi assiˈrittoro, aterano maatekkirano angate anje dandee heeˈra roore shota ikkitannoˈne.

 Gashshootu woy wole uurrinshuwa uyitanno kaaˈlo nooro buuxate woˈnaali. Duucha woyite togoo kaaˈlora kuˈlaato massiˈrate uyinanni yanna harancho ikkitino daafira, keeshshittokki mari.

 Qullaawu Maxaafi biddishsha: “Malu hoogiro hendoonniri ikkikkinni gatanno; malu seyiro kayinni halchinoonniri woˈmanno.”—Lawishsha 15:22.

 Minaamakkinna oosokki ledo tenne hajo daafira hasaabbe. Dancha gede hasaabbine xaadisidhiniro, maatete giddo noohu baalunku maa woyyeessa hasiissannoro afe kaaˈlama dandaanno. Baalunku nooˈnere daddaˈlannohanna afimalsannokkiha ikkiro, nooˈne woxe hayyotenni horoonsiˈra dandiitinanni.

 Qullaawu Maxaafi biddishsha: “Ikkanno geeshshi woxi noosironna hoongosiro ofolle dimalanno?”—Luqaasi 14:28.

 Shiimu woxinni heeˈra gidde ikkitanno woyite, nooˈne woxe baala maa maaho fushshitinanni heedhinoonniro afa roore hasiissannote. Baajeette fushshiˈrate, umo aganu aganunni mageeshshi woxe afiˈrattoro hedde borreessi. Hakkiinni, aganu kiiro woxe fushshiishannohe coye baalanka (kuri giddo mito xaate agurattoha ikkirono) borreessi. Hedeweelchu coyira suuqiˈratto woxeno aganu giddo fushshatto woxi ledo borreessate woˈnaali.

 Dancha amaale: Fushshitinanni fulo borreessatto woyite, shiimmaaddu coyira fulanno woxeno borreessa deˈooti. Shiimmaaddu coyira fulanno woxi gamba yee mageeshshi woxe ikkannoro afittoro dhagge ikkahera dandaanno. Lawishshaho, mittu manchi woxe maa maaho fushshanni nooro shallagita, maastika hidhate calla diru dirunku lowo xibbe doolaare fushshannota wodanchino.

 Qullaawu Maxaafi biddishsha: “[Roore] woyyanno coye baddine affinoonnire [ikke].”—Filiphisiyusi Sokka 1:10.

 Aganu giddo afiˈratto woxenna fushshatto woxe heewisiisi; xa afiˈratto woxinni heeˈra dandaatto gede, hiikkuri coyibbara fushshatto woxe ajisha woy horonta agura dandaattoro hedi. Konni woroonni noo coyibba keente lai:

•   Hodhishsha. Lamu kaameeli (woy motore) nooheha ikkiro, mitto hira dandaattokka? Noohe kaameeli dureeyye hidhitaa gedeeha ikkiro, hakkoye hirte hooffahura higattokka? Woy umikki hodhishsha horo agurte, dagate hodhishsha horoonsiˈra woy sayikiletenni haˈra dandaattokka?

•   Boohaarsha. Woxunni hidhinannita interneetete, saatelayitete woy televizhiinete pirogiraame yannate geeshshano ikkiro horoonsiˈra agura dandaattokka? Shiimu woxinni horoonsiˈnanni pirogiraame afiˈra dandaatto?

•   Korreentetenna wayi fulo. Waaho, korreentetenna nadaajete fulanno woxe ajisha dandiitinanni gara maatete ledo hasaabbe. Caabbicho xoyissanna biso shiimu wayinni hayishshiˈra hakkeya garire assitannokkiha lawara dandaanno; kayi togoo rosichi lowo woxe gatisara dandaanno.

•   Sagale. Hoteelete ita aguri. Hatteentenni, sagale mine qishiˈra woyyate. Hiittoo sagale qishiˈrattoro balaxxe hedi; qoleno dandaamannoha ikkiro, sagale qishiˈrate hasiisannore haammachishshe hidhite lowo barrira ikkitanno sagale qishiˈri; intanna gattanno sagaleno huntooti. Hasiisannohekki coye hidhattokki gede, dikko fulattora albaanni hidhatto coye borreessiˈri. Qarqariˈnera laaltanno laalonna akaakilte waaga roore ajjanno daafira ise hidhi. Una ikkitannokki sagale hidhitooti. Bayicho qixxeessidhe umikki akaakilteno kaasiˈra dandaattoha ikkara dandaanno.

•   Uduunne. Faashine harunsate yite ikkikkinni uduunnu akkalannohe woyite calla hidhi. Waaga dirrinse hirranni uduunne woy hakkeyi geeshsha akkalinokkiha salbaace uduunne afiˈrate woˈnaali. Meecciˈrootto uduunne mooshshitanno maashinera worantenni arrishshote haqqi; hatto assakki korreentete fulanno woxe ajishshanno.

•   Hira. Mitto uduunnicho hidhattora albaanni, togo yite ateneeto xaˈmi: ‘Konni uduunnichira ikkanno woxi nooe? Kuni addinta hasiisannoe uduunnichooti?’ Mini uduunne, elekitirooniksete uduunne, woy makeena soorriˈrantenni nooheha horoonsidhanni keeshsha dandaattokka? Wole widoonni kayinni, hasiisannohekki woy horoonsidhanni noottokki uduunne fushshite hira dandaatto? Hatto assa bikku heeshsho heeˈratenna woxe codhate kaaˈlitahera dandiitanno.

 Dancha amaale: Afiˈratto eo hedeweelcho ajase, gawajjitannotanna woxe guddannota mite gade lawishshaho sijaara aga, kasaara gaˈnanna doogimale aga aguratto gede kakkayissahera dandiitanno. Togoo gade agurakki woxekki gatissannoha calla ikkikkinni heeshshokki woyyeessitanno.

 Qullaawu Maxaafi biddishsha: “Ayyaanaamittete coye goodhinori hagiirraammaho.”—Maatewoosi 5:3.

 Qullaawu Maxaafi togo yee kaajja amaale amaalanno: “Egenno woxu gedee caaleeti. Egenno kayinni egennaammu lubbo gargaratenni roortanno.” (Rosiisaancho 7:12) Togoo egenno afiˈnannihu Qullaawu Maxaafi giddonniiti; batinyu manni Qullaawu Maxaafi biddishsha harunsansa woxu coyira quwa sae yaadannokki gede kaaˈlitinonsata wodanchino.—Maatewoosi 6:31, 32.