Iyyueeli 3:1-21
3 “Kuneeti hakko dironna hatte yannara,Yihudunna Yerusaalamete qafado qoleemmo woyte,
2 Daga baalanta gamba asse,Iyyoosaafiixi* Xeicho* dirriseemmo.
Manniꞌyanna raggeꞌya Israeelete daafira,Insa ledo hakko yekkeerameemmo;Korkaatuno insa mannaꞌya dagate mereero billaallissino;Baattoꞌyano beeqqitino.
3 Manniꞌyara hixa tuqqitanno;Foora manchora yite labbaa beetto uytanno;Woyne agate yite meya beetto hirtanno.
4 Xiroosi, Sidooninna Filisxeemete qoqqowo,Ane ledo may nooꞌne?
Assoommoꞌnere assitine qoltinara heddinoonni?
Bado qoltinaera heddinoonniha ikkiro,Anino keeshshummokkinni baychonko bado qoleemmoꞌne.
5 Korkaatuno birraꞌyanna culkaꞌya adhitinoonni;Ayirrado uduunneꞌyano abbitine galmiꞌnera wodhitinoonni;
6 Gobbansanni xeertidhara yitine,Yihudunna Yerusaalamete manna Girikootaho hirtinoonni;
7 Kuneeti insa hirtinoonninsa baychinni higganno gede kakkayseemmo;Assitinoonnireno asse qoleemmoꞌne.
8 Labballi oosoꞌnenna seenneꞌne Yihudu mannira hireemmo;Insano xeertote heedhanno dagara yaano Saaba mannira hirtanno;Yihowa umisi tenne coyiꞌrinona.
9 Dagate mereero tenne lallabbe:
‘Olaho qixxaabbe! Wolqaataamma manna kakkayisse!
Olanto baala shiqqe dagge qasso!
10 Maarashaꞌne tuntine bisete, haantoꞌneno urdete soorridhe.
Wolqiweelu manchino, “Ani wolqaataamoho” yoo.
11 Kiꞌne qooxeessaho heedhinoonni daga baala, daggine kaaꞌlamme; mitteenni gamba yiiyye!’”
Yihowa, wolqaataammakki* hakkiira dirrisi.
12 “Daga kaꞌe Iyyoosaafiixi Xeicho* daggo;Qooxeessaho noo daga baalate yoo yaammora ani hakko ofolleemmona.
13 Mido iillitinona haanto kaysidhe.
Kooffichu woꞌminona amme; dirritine kadde.
Woyne eeltanno darga woꞌmite duꞌnantino; bunshensa baasa batidhinona.
14 Lowo daga, lowo daga, yoo yinanni xeichira* gamba yitino;Yoo yinanni xeichira* Yihowa barri gambise dayinona.
15 Arrishshonna aganu tunsanno;Beeddaheno xawa agurtanno.
16 Yihowa Tsiyooni doobbiichu gede ittananno;Yerusaalameteno huurosi gotti assanno.
Gordunna baatto shafantanno;Yihowa kayinni mannisira golo ikkanno;Israeelete mannira qiisho ikkanno.
17 Kiꞌneno ani qullaawu ilaaliꞌyara Tsiyooni heeꞌreemmoha Maganoꞌne Yihowa ikkoommota affinanni.
Yerusaalame qullaawa darga ikkitanno;Xaate wosinu* ise giddoonni hige disaꞌꞌanno.
18 Hakko barra ilaallatenni coommitanno woyne coccoꞌanno;Tulluwatenni ado duꞌnantanno;Yihudu xashshuwa baalate way woꞌmanno.
Yihowa mininni bue burqitanno;Shitiimi* Lagichano* hayikkissanno.
19 Gibitse kayinni mullicho gobba ikkitanno;Edoomino gobbansara beebbaataamu manni mundee dunteYihudu manna farritto assidhino daafira,Zarage halalla ikkitanno.
20 Ikkollana Yihudu woꞌmanka woyte,Yerusaalameno ilamatenni ilamate geeshsha, mannu heeꞌrannowa ikkitanno.
21 Alba keeraanchote gede asse kiiroommokkita mundeensa,* keeraanchote gede asse kiireemmo;Yihowano Tsiyooni heeꞌranno.”
Lekkaalliidi Qaagiishshuwa
^ “Yihowa Daanyaho” yitanno tiro afiꞌrino.
^ Woy “Xeichaamo Xawo.”
^ Woy “bagadaanokki.”
^ Woy “Xeichaamo Xawo.”
^ Woy “xeichaamu xawira.”
^ Woy “xeichaamu xawira.”
^ Woy “manni gobba manni.”
^ “Waaccote haqqe” yitanno tiro afiꞌrino.
^ Woy “Moola Laga.”
^ Woy “mundeete shedensa.”
