Iyyueeli 2:1-32
2 “Tsiyooni buudu xurumba ufuuffe!
Olu kaꞌꞌaraatina qullaawu ilaaliꞌya aana raarre.
Gobbate* noo manni baalu huxiꞌro;Yihowa barri gambise daynona! Qoleno mule no!
2 Hakku barri tunsichunna guunjote,Gomichunna xiꞌmote tunsichi barraati;Duuꞌmo saaqqeenna ilaallate aana fulanno xawaabbi gedeeti.
Kiirre tunqannikkitinna wolqaataame daga dagganno;Konni albaanni togoo manna horo anfe diegenninoonni;Konni kaꞌano ilamatenni ilamate geeshsha,Togoo manni diheeꞌranno.
3 Albansaanni nooha giira ittanno;Badhensaanni nooha buwanu shakki assanno.
Albansaanni noo baatto Edeni Gennetete gedeete;Badhensaanni noo baatto kayinni mullicho halallaati;Gate saꞌꞌannori mitturino dino.
4 Dana farado labbanno;Qoleno olu faradi gede ikkite hadaraassanno.
5 Ilaallate guunxora kubbitanno woyte macciishshantanno huuro, saragallu huuro gedeete;Qoleno galawa ittanni xoxxannote wala yitanno giira gedeete;
Insa olaho diraminohu wolqaataamu manni gedeeti.
6 Insanni kainohunni mannu yaadanno.
Mannu baalu albi shibbi yaanno.
7 Bagadaasinete gede rakke siꞌanno;Olantote gede kinchu huxxa gidditanno;Mittu mittunku doogosi amade haꞌranno;Doogonsanni fultukkinni hadhanno.
8 Mimmito diokkitanno;Mittu mittunku manchi doogosi amade haꞌranno.
Mitootu bagadunni* qanseenna ubburo nafa,Wolootu agurte badhera dihigganno.
9 Katamu giddora wiinamunni eꞌanno; kinchu huxxi aanano doddanno.
Minna gidditanno; mooraanchu gede maskootete widoonni eꞌanno.
10 Baatto albansaanni huxidhanno; gorduno shafamanno.
Arrishshonna aganu tunsino;Beeddaheno xawa agurtino.
11 Yihowa olantosi albaanni huurosi gotti assanno; olantosi kiirre ditunqannite.
Qaalesi wonshannohu wolqaataamohona;Yihowa barri jawahonna waajjishannoho.
Ay dandee uurranno?”
12 “Xaano ikkiro,” yaanno Yihowa,“Xoontine, wiꞌlitinenna diddine woꞌmu wodaniꞌnenni anewa higge.
13 Wodanaꞌne ikkinnina uddanoꞌne dartinoonte;Maganiꞌne Yihowawa higge;Korkaatuno isi mararannohonna* maarannoho, hanqoho muddamannokkihonna ammanamino baxillisi batiꞌraho;Abbara hedino baono aguranno.*
14 May afino? Miteekke hanqisinni hige, hedinoreno agure,*Maganiꞌnera Yihowara gidu fushshaatenna agattote fushshaate shiqishidhinanni gede,Maassiꞌraꞌnera dandaanno.
15 Tsiyooni buudu xurumba ufuuffe!
Xoommanni gede lallabbe; manna woshshitine gamba asse.*
16 Manna gamba asse; songono qulleesse.
Geerra* gamba asse; oosonna unuuna qananni noo qaaqquulleno gamba asse.
Idaychu giddiidi kifilenni, idaychono holginni fultona.
17 Yihowa soqqamaano ikkitinori kakkalaasineBarandunna kakkalote dargi mereero heedhe wiꞌlito; togo yito:
‘Yihowa, mannakki marari;Daga gashshitannonsa gede assite,Raggekki arrassantanno gede assitooti.
Mannu “Maganinsa mamalla no?” mayra yaanno?’
18 Hakkiinni Yihowa gobbasira laalaatanno;Mannasino mararanno.
19 Yihowa mannisira dawaro qolanno:
‘Kuneeti gide, haaro woynenna zayte soyemmoꞌne;Kiꞌneno lowo geeshsha duubbinanni;Xaate dagate mereero mishantinanni gede diasseemmoꞌne.
20 Aliyyenni daye horrannoha kiꞌnewiinni shorreemmo;Moolanna mullicho gobba widira qole billaalliseemmosi;Albisi soojjaati baari* widira,Badhiidisi galchimi baari* widira higanno.
Bowanyesi iima higge fultanno;Xidhosino iima higge fula diagurtanno;Maganu jajjabba coye assannohona.’
21 Baatto, waajjitooti.
Hagiidhi; tashshi yoohe; Yihowa jajjabba coye assannona.
22 Kiꞌne dubbu saada, waajjitinoonte;Halalla nooti hayissote baatto lattannona;Haqqeno laaltanno;Balasete haqqenna woynete haqqeno dancha gede laaltanno.
23 Kiꞌne Tsiyooni ooso, Maganiꞌne Yihowanni hagiidhe, tashshi yooꞌne;Isi wocawaaru xeena ikkanno geeshshiha aannoꞌnena;Kiꞌnerano xeena ganannoꞌne;Bashshonte gede wocawaaru xeenanna badheessu xeena aannoꞌne.
24 Ayiddummete gidu woꞌmanno;Kooffichohono haaro woynenna zayte woꞌmite duꞌnantanno.
25 Qoleno mereeroꞌne soommoti jawa olantoꞌya yaano,Kanchafaru hoshsha, qoola afiꞌrinokki kanchafari, duuwannokki kanchafarinna shakki assanno kanchafariGideꞌne itino dirira kiiseemmoꞌne.
26 Duubbina geeshsha ittinanni;Qoleno Maganiꞌneha Yihowa suꞌma guwissinanni;Isi kiꞌnera yee maalale loosino;Manniꞌya layinkita horo disaalanno.
27 Kiꞌneno ani Israeelete mereero noommota,Hattono Maganoꞌne Yihowa ikkoommotanna ane agurranna wolu horo nookkita affinanni!
Manniꞌya layinkita horo disaalanno.
28 Hakkunni gedensaanni, maala uddiꞌrinohu baalu aana ayyaanaꞌya duneemmo;Labballi oosoꞌnenna seenniꞌne masaalo coyiꞌranno;Geerriꞌne haaqee haaqiiꞌranno;Wedelliꞌneno ajuuja laꞌꞌanno.
29 Hakko barra labballu borojjootiꞌyanoMeya borojjootiꞌyano gatikkinni ayyaanaꞌya duneemmonsa.
30 Gordohonna baattote aana maalaꞌlinannire* leellisheemmo;Mundee, giiranna wiliile leeltanno.
31 Jawunna waajjishannohu Yihowa barri daara albaanni,Arrishsho tunsichoho, aganu mundeete soorramanno.
32 Yihowa suꞌma woshshannohu baalu gatanno;Yihowa yiinonte gede, Tsiyooni Ilaali aananna Yerusaalamete gatanno manni yaano,Yihowa woshshannohu gate saꞌꞌanno manni heeꞌranno.”
