Ejjeetto 21:1-25
-
Biiniyaami gaꞌre gattu (1-25)
21 Israeelete manni Mitsipha xaade, “Ninke giddonni mittuno seennesi Biiniyaamootaho oonke” yee xaarino.
2 Konni daafira, Israeelete manni Beeteli daye, qoonqonsa naggi asse hururame wiꞌlanni hashsha geeshsha halaalaanchu Magani albaanni ofolli.
3 Insano, “Israeelete Magano Yihowa, Israeelete aana kuni coy mayra ikki? Techo Israeelete giddonni mitte gaꞌre mayra baꞌanno?” yitu.
4 Layinki barra mannu soodo gute kae, shilqote kakkalonna mittimmate kakkalo shiqishara, hakko kakkalote darga seekki.
5 Israeelete mannino, “Baalante Israeelete gaꞌre giddonni Yihowa albaanni gamba yaara daynokkihu ayeti?” yee xaꞌmi. Insa hatto yitinohu Yihowa albira Mitsipha daynokki manna baala shinona yite kaajjishshe xaartino daafiraati.
6 Konnira Israeelete manni roduuwinsa Biiniyaamootaho iillinorinni dadilli. Insa togo yitu: “Techo Israeelete giddonni mitte gaꞌre baꞌino.
7 Seennenke insara uyneemmokki gede, Yihowa suꞌminni xaarroommo; ikkina gattino labballi galte afidhanno gede ma assinummoro woyya ikka?”
8 Insano, “Israeelete gaꞌre giddonni Yihowa albira Mitsipha dagginokkiti hiitteeti?” yite xaꞌmitu. Iyyaabiisi-giiliyaadinni, songo noo qacha mittu manchino didayno.
9 Manna kiirri woyte Iyyaabiisi-giiliyaadi heeꞌranno manni giddonni mittuno daynokkita affu.
10 Konnira Israeelete songo 12,000 wolqaataamma manna hakkira sokku. Insa togo yite hajajju: “Hadhine Iyyaabiisi-giiliyaadi heedhannore bisetenni gudde; meentonna qaaqquulle nafa gatissinoonte.
11 Labballo baalanna labballu ledo goxe* egennino meento baala coꞌo assitine gudde.”
12 Insano Iyyaabiisi-giiliyaadi heeꞌranno manni giddonni labbaahu ledo goxe* egenninokkire 400 seenne affu. Insa hakkonne seenne haadhe Kanaani gobbara Seelo noo qacha abbitu.
13 Hakkunni gedensaanni, Israeelete songo baala Rimooni kinchiwa noo Biiniyaamootira araaraho manna sokku.
14 Konnira Biiniyaamootu hatte yannara gobbansa higgu. Insano Iyyaabiisi-giiliyaadi seenni giddonni lubbotenni gatinore uytunsa; ikkollana seennu insa baalunkura diꞌꞌiillinonsa.
15 Mannuno Yihowa Israeelete gaꞌre mereero babbadooshshe kalaqino daafira, Biiniyaamootaho iillinorinni lowo geeshsha dadilli.
16 Israeelete songo cimeeyye, “Biiniyaamootu seenni baalu goofino daafira, gatino labballi galte afiꞌranno gede ma assinummoro woyyanno?” yitu.
17 Insano qolte togo yitu: “Israeelete giddonni mitte gaꞌre coꞌo yite baꞌannokki gede, gattino Biiniyaamooti ragge afiꞌra hasiissannonsa.
18 Ikkollana ninke insara seennenke uynammora difajjinanninke; korkaatuno Israeelete manni, ‘Seennesi Biiniyaamootaho aannohu rumaminoha ikko’ yee xaarino.”
19 Hakkiinni insa togo yitu: “Seelo diru kiiro Yihowa ayyaana ayirrinsanni. (Seelo noohu Beetelira aliyyeenninna Beetelinni Sekeemi massitanno doogora soojjaatoonni hattono Lebonara wodiidoonniiti.)”
20 Konnira insa Biiniyaamoota togo yite hajajju: “Hadhine woynete irshi giddo gaaꞌlitine agarre.
21 Seelo seenni sirbara daanna laꞌinanni woyte, woynete irshi giddonni fultine umi umiꞌnera Seelo seenni giddonni diidhine adhe; hakkiinni Biiniyaamootu gobba higge.
22 Annuwinsa woy roduuwinsa dagge, ninkera coyiꞌranturo togo yineemmonsa: ‘Ninkera yitine shaqqille leellishshensa; korkaatuno olunni insa mittu mittunku galte afidhanno gede assa didandiinoommo; qoleno kiꞌne seenneꞌne baxxine uytinoonnikki daafira dixaꞌmantinanni.’”
23 Konnira Biiniyaami manni yinoonninsa gede assi; insa mittu mittunku sirbanni noo seenni giddonni diidhe adhitu. Hakkunni gedensaanni insa raggensawa hadhe katammansa wirro miꞌnite hakko heedhu.
24 Hatte yannara Israeele mittu mittunku gaꞌrensawanna maatensawa hadhe, hakko baychinni billaallitu; mittu mittunku hakkiinni kaꞌe raggensawa higgu.
25 Hatte yannara Israeelete moote dino. Mittu mittunku manchi dancha lawe leellisire assanno.
