Ejjeetto 13:1-25
13 Israeele galagalte Yihowa albaanni busha coye assitu; Yihowano 40 diro Filisxeemootu angara sayse uyinsa.
2 Hatte yannara, Daani ilama ikkinohu Maanuhe yinannihu Tsoora manchi no; galtesi ilaweelo ikkitino daafira ooso dinose.
3 Yannate gedensaanni, Yihowa sokkaasinchi manchote leelle togo yiise: “Ati ilaweelote; oosono dinohe; xa kayinni godobbe labbaa qaaqqo ilatta.
4 Woyne woy wole dimbisanno ago aganna battaawinoha aye coyeno ita qorophi.
5 Kuneeti! Godobbe labbaa qaaqqo ilatta; kuni qaaqqi anjesinni* kayse Maganoho Naaziricha ikkanno daafira, umosi milaace kissoonke. Isi Israeelete manna Filisxeemete anganni gatisanno.”
6 Hakkiinni mancho hadhe minaannisera togo yite kultu: “Halaalaanchu Magani manchi anewa dayno; manchu dana halaalaanchu Magani sokkaasincho lawanno; isi lowo geeshsha waajjishannoho. Mamiinni daynoro dixaꞌmoomma; isino suꞌmasi dikulinoe.
7 Ikkollana isi togo yiinoe: ‘Kuneeti! Godobbe labbaa qaaqqo ilatta. Woyne woy wole dimbisanno ago aggooti; qoleno battaawinore mittoreno ittooti. Korkaatuno kuni qaaqqi ilami yannanni* kayse reyanno barri geeshsha Maganoho Naaziricha ikkanno.’”
8 Maanuheno togo yee Yihowa eeggifate huucciꞌri: “Yihowaꞌya ballo, ilamanno qaaqqo lossiꞌneemmo gara kulannonke gede, soottohu hakku halaalaanchu Magani manchi galagale dayona.”
9 Hakko daafira halaalaanchu Magani, Maanuhe huuccatto macciishshi; halaalaanchu Magani sokkaasinchino mancho xawoho ofolte heedheenna galagale isewa day; minaannise Maanuhe kayinni ledose dino.
10 Manchono hakkawoyintenni doddanni marte minaannisera, “Kuneeti! Tenne anewa day manchi leellinoe” yite kultu.
11 Hakkiinni Maanuhe kae galtesi ledo haꞌri. Mancho afiti, “Galteꞌya hasaawisittohu ateeti?” yii. Isino, “Ee aneeti” yii.
12 Maanuheno togo yii: “Yootto gede ikkonke! Ikkina qaaqqo magarinni lossa hasiissannonke? Isi loosina maa ikkanno?”
13 Yihowa sokkaasinchino Maanuhe togo yii: “Galtekki kulummose coye baala qorophito.
14 Ise woyneno ikko woynetenni qixxeessinannire baala ittoonke; woyne woy wole dimbisanno ago baala aggoonke. Battaawinore baalano ittoonke. Hajajoommosere baala agadhito.”
15 Maanuheno Yihowa sokkaasincho, “Aja meichu goco gorrine iillinshammohe geeshsha agarinke ballo” yii.
16 Yihowa sokkaasinchi Maanuhe, “Keeshshummoro nafa sagale diꞌꞌiteemmo; kayinni Yihowara shilqote kakkalo assite shiqisha hasiꞌrittoro shiqishi.” Maanuhe manchu Yihowa sokkaasincho ikkinota diafino.
17 Hakkiinni Maanuhe Yihowa sokkaasincho, “Coyiꞌroottori woꞌmanno woyte ayirrinseemmohe gede suꞌmikki ayeti?” yee xaꞌmi.
18 Ikkollana Yihowa sokkaasinchi, “Suꞌmiꞌya dhaggennihona xaꞌmitootie” yiisi.
19 Hakkiinni Maanuhe, aja meichu goco gidu fushshaati ledo haaꞌre kinchu aana Yihowara kakkalo asse shiqishi. Isi* Maanuhenna galtesi laꞌꞌanna dhagge ikkanno coye assi.
20 Giirate buwani kakkalote darginni iimira hige fulita, Yihowa sokkaasinchi Maanuhenna galtesi laꞌꞌanna kakkalote darginni fulino buwani giddoonni iimira haꞌri. Insa hakkawoyintenni alba higge gombisantu.
21 Yihowa sokkaasinchi Maanuheranna galtesira wirro dileellino. Maanuheno manchu Yihowa sokkaasincho ikkinota buuxinohu hakkawoyteeti.
22 Hakkiinni Maanuhe galtesi, “Magano laꞌnoommo daafira reyanke digattanno” yiise.
23 Galtesi kayinni togo yitu: “Yihowa shaankera hasiꞌroommero, shilqote kakkalonna gidu fushshaate angankenni diadhanno; qoleno konne baala coye dileellishannonke; hattono konni coy giddo mittono dikulannonke.”
24 Gedensaanni mancho labbaa qaaqqo iltu; suꞌmano Samsooni yite fushshitu; qaaqquno lophi; Yihowano maassiꞌrisi.
25 Gedensaanni isi Tsooranna Eshitaooli mereero Mahaanehi-daani heeꞌreenna Yihowa ayyaani kakkaysa hanafisi.
