Pala o Marcu 9:1-50
-
Cana parudea-pe o Isus angla le discipoli (1-13)
-
Iech șiavo ande savo si iech beng silo sastiardo (14-29)
-
„Sea le buchia daștin te aven cărde anda codo cai siles pachiamos” (23)
-
-
O Isus phenel pale că va avela mudardo (30-32)
-
Le discipoli han-pe anda con si o mai baro (33-37)
-
„Con na-i contra amenghe silo amența” (38-41)
-
Manușa cai cheren averen te hasaren pengo pachiamos (42-48)
-
„Te avel lon ande tumende” (49, 50)
9 Hai mai phendea lenghe: „Ciaces phenav tumenghe că chichiva mașcar codola cai beșen cade ci va jianena so si o merimos ji cana ci va dichena mai anglal o Regato le Devlesco cai avilea deja ande pesco zuralimos”.
2 Pala șiov ghiesa, o Isus lea pesa le Petros, le Iacovos hai le Ioanos hai îngărdea-len pe iech plain ucio; code sas-le numai von corcore. Hai vo parudea-pe* angla lende:
3 lesco hureaimos astardea te strălucil sar i lumina hai cărdilea but mai parno sar daștilas te parniarel-les varecon pa i phuv.
4 Pala codoia, sicadile lenghe o Ilie hai o Moise, cai denas duma le Isusosa.
5 Atunci o Petru phendea le Isusosche: „Raia, so mișto că sam cade! Te vazdas trin țărhe: iech anda tute, iech anda o Moise hai iech anda o Ilie”.
6 Tha, o Petru ci jianelas so te mai phenel, anda codoia că vi le trin sas-le darade.
7 Hai cărdilea iech noro, cai șiutea peschi ușial* pe lende hai anda o noro așundea-pe iech glaso cai phenelas: „Cado si mânro Șiavo, codo iubime! Te așunen lestar!”.
8 Tha de iechdata, cana dichle pașa pende, ci mai sas chonic code, avreal o Isus.
9 Ando timpo so jianas tele pa o plain, o Isus poruncisardea lenghe te na phenen chanicasche so dichle ji cana o Șiavo le manușesco ci avelas te uștiel andal mule*.
10 Von încărde ando ilo so phendea lenghe, tha denas duma mașcar pende anda so însemnol te avel uștiado andal mule.
11 Hai von pușle-les: „Atunci sostar phenen le sicaitori la Legeache* că mai anglal trebul te avel o Ilie?”.
12 Vo phendea lenghe: „Si ciaces, că mai anglal avel o Ilie hai va șiola sea le buchia ca lengo than. Tha sostar si scriime anda o Șiavo le manușesco că trebul te nachel prin but ducha hai te avel prasado?
13 Tha me phenav tumenghe, că o Ilie avilea deja hai von cărde lesa so camle, cadea sar si scriime anda leste”.
14 Cana arăsle ca le coaver discipoli, dichle pașa lende bute manușen hai chichiva sicaitori la Legeache cai hanas-pe lența.
15 Sigo cana dichle le Isusos, le but manușa așile uimime hai nașle caring leste caște den-les ghies.
16 Hai vo pușlea-len: „Sostar halean tumen lența?”.
17 Varecon mașcar le but manușa phendea lesche: „Sicaitorina, andem mânre șiaves tute anda codoia că siles iech spirito neujo* cai cărdea-les te na mai del duma.
18 De fiesavi data cana încărel-les tela pesco zuralimos, vo șiudel-les ca i phuv, hai o șiavo cherel spume co mui, izdran lesche danda hai hasarel pesco zuralimos. Manglem che discipolen te încalaven avri o spirito neujo, tha von ci daisarde”.
19 Vo phendea lenghe: „O, manușa cai train ande cadala ghiesa* hai na-i tumen pachiamos! Ji cana va trebula te așiav tumența? Ji cana mai trebul te cherav phares buchi caște ajutiv tumen? Anen-les cade, mande”.
20 Cadea că, von andine le șiaves leste, tha cana dichlea le Isusos, o spirito neujo cărdea le șiaves te izdral zurales. Pala so pelea tele, vo astardea te marel-pe ca i phuv hai cherelas spume co mui.
21 O Isus pușlea lesche dades: „De cana întâmplol-pe lesa cadai buchi?”. Vo phendea lesche: „De țâno șiavorro.
22 Butivar șiudea-les andi iag hai ando pai caște mudarel-les. Tha, dacă daștis te cheres vareso, sicav amenghe mila hai ajutisar amen!”.
23 O Isus phendea lesche: „Sostar phenes: «Dacă daștis»! Sea le buchia daștin te aven cărde anda codo cai siles pachiamos”.
24 Pe thaneste, o dad le șiavesco dea cingar: „Si man pachiamos! Ajutisar man te avel man mai but pachiamos!”.
25 Cana dichlea că but manușa nașenas caring lende, o Isus dea cingar caring o spirito neujo: „Spirito neujo cai cheres le manușen te na den duma hai te aven cașuche, phenav tuche te încles avri anda leste hai te na mai jias andre ande leste!”.
26 Pala so o spirito neujo dea cingar hai cărdea le șiaves te izdral zurales, o spirito neujo înclistea avri* anda leste; hai o șiavo falas-pe că silo mulo, cadea că le mai but mașcar lende phenenas: „Silo mulo!”.
27 Tha o Isus lea-les vastestar hai vazdeas-les, hai o șiavo așilea ande pânrănde.
28 Pala so găle andre ande iech chăr, lesche discipoli pușle-les cana sas-le corcore lesa: „Amen sostar ci daisardeam te încalavas-les avri?”.
29 Vo phendea lenghe: „Le benga sar cadala înclen numai cana manghen tumen le Devlesche”.
30 Von tiliarde de othar hai nachle prin i Galileea, tha vo ci camelas te jianel-pe cai silo
31 anda codoia că camelas te sicavel pesche discipolen. Vo phenelas lenghe: „O Șiavo le manușesco va avela dino andel vast le manușenghe hai von va mudarena-les; tha, chiar cana va avela mudardo, va uștiela andal mule pala trin ghiesa”.
32 Tha von ci hachiarenas so phenelas lenghe vo hai daranas te pușen-les.
33 Hai von arăsle ando Capernaum. Cana sas-lo ando chăr, vo pușlea-len: „Anda soste hanas tumen po drom?”.
34 Tha von ci phenenas chanci, anda codoia că po drom hale-pe anda con si o mai baro mașcar lende.
35 Atunci vo beșlea tele, achardea peste le Deșuduien hai phendea lenghe: „Dacă varecon camel te avel o iechto mașcar tumende, trebul te avel o palutno hai o sclavo savorengo”.
36 Pala codoia lea ieche șiavorres, șiutea-les mașcar lende hai, pala so șiutea pesche vast pe leste, phendea lenghe:
37 „Con primil ieche șiavorres sar cado ande mânro anav primil vi man hai con primil man primil na numai man, tha vi Codoles cai bișialdea man”.
38 O Ioan phendea lesche: „Sicaitorina, dichleam varecas cai încalavelas avri benga ande chio anav hai camleam te așiavas-les, anda codoia că na-i iech mașcar codola cai aven pala amende”.
39 Tha o Isus phendea: „Na mai den tumari zor te așiaven-les, că chonic ci cherel iech miracolo ande mânro anav, hai pala codoia sigo te phenel buchia nasul anda mande.
40 Con na-i contra amenghe silo amența.
41 Hai ciaces phenav tumenghe că con del tumen te pien iech paharo pai anda codoia că san le Cristososche na-i sar te hasarel pesco pochinimos.
42 Tha, dacă varecon cherel ieches mașcar cadala țânorre cai pachial te hasarel pesco pachiamos, avelas mai mișto anda leste te șiol-pe ca leschi cor iech barr asavesco*, sar codo cai silo țârdino ieche măgarostar, hai te avel șiudino andi marea.
43 Dacă vroiechdata chio vast cherel tut te hasares chio pachiamos, șin-les. Si mai mișto anda tute te aves bi ieche vastesco hai te primis viața, sar te aven tut dui vast hai te aves șiudino andi Gheena*, andi iag cai ci daștil te avel mudardi.
44 ——
45 Dacă chio pânro cherel tut te hasares chio pachiamos, șin-les hai șiude-les tutar. Si mai mișto anda tute te aves bango hai te primis viața, sar te aven tut dui pânre hai te aves șiudino andi iag la Gheenachi.
46 ——
47 Dacă chi iach cherel tut te hasares chio pachiamos, șiude-la tutar. Si mai mișto anda tute te avel tut iech corcori iach hai te jias andre ando Regato le Devlesco, sar te aven tut dui iacha hai te aves șiudino andi iag la Gheenachi,
48 cai le cherme ci meren hai i iag ci sili mudardi niciechdata.
49 Că orisavo manuș trebul te avel longhiardo iagasa.
50 O lon silo lașio, tha, dacă o lon hasarel pesco zuralimos te longhiarel, sar va avela pale londo? Te avel lon ande tumende hai te încăren i pacea mașcar tumende”.
