Pala o Marcu 4:1-41
-
LE PILDE ANDA O REGATO (1-34)
-
O manuș cai șiol semințea andi phuv (1-9)
-
Sostar dea duma o Isus andel pilde (10-12)
-
Sar trebul hachiardi i pilda le manușesa cai șiol semințea andi phuv (13-20)
-
I lampa ci garavel-pe tela iech coșo (21-23)
-
„Cadea sar phiraven tumen averența, sa cadea va phiravena-pe vi von tumența” (24, 25)
-
O manuș cai șiol sămânța andi phuv hai sovel (26-29)
-
I cuchin muștareschi (30-32)
-
„O Isus phendea but pilde” (33, 34)
-
-
O Isus așiavel iech bari barval (35-41)
4 O Isus astardea pale te sicavel le manușen pașa i marea hai but manușa chidine-pe pașa leste. Anda codoia, vo trebuisardea te jial opre ande iech barca hai beșlea tele ande late; duriardea-pe iech țâra catar o malo, ando timpo so le coaver manușa așile po malo, pașa i marea.
2 Hai astardea te sicavel-len but buchia andel pilde; ando timpo so sicavelas-len, vo phendea lenghe:
3 „Așunen! Dichta că iech manuș gălea te șiol semințea andi phuv.
4 Cana șiudelas le semințea, chichiva arăsle te peren pașa o drom, hai avile le ciriclea hai hale-len.
5 Aver arăsle te peren ande iech than barralo hai astarde te barion sigo, anda codoia că code ci sas but phuv.
6 Tha, cana vazdea-pe o cham, cado thabardea-len hai șuchiardea-len, anda codoia că ci sas-len rădăcina.
7 Aver arăsle te peren mașcar le canră; le canră barile hai tasade-len, hai von ci dine rodo.
8 Tha aver arăsle te peren pi phuv lași, astarde rădăcina, barile hai dine rodo: iech 30, aver 60 hai aver 100”.
9 Tha vo mai phendea: „Cas si can te așunel!”.
10 Cana așilea corcoro, codola Deșudui hai le coaver discipoli astarde te pușen-les anda le pilde cai phendea-len.
11 Vo phendea lenghe: „Tumenghe sas mechlo te hachiaren le buchia garade hai sfânto anda o Regato le Devlesco, tha anda codola de avreal sea cadala așen numai pilde,
12 că, chiar cana dichen, cu sea cadala te na dichen chanci hai, chiar cana așunen, cu sea cadala te na hachiaren chanci; cadea, von ci va risarena-pe niciechdata hai ci va avena iertime”.
13 Hai mai phendea lenghe: „Dacă ci hachiaren cadai pilda, sar va hachiarena sea le coaver pilde?
14 O manuș cai șiol i sămânța andi phuv si codo cai phenel o cuvânto le Devlesco.
15 Le semințea cai arăsle te peren pașa o drom sile sar le manușa ande save si șiuto o cuvânto, tha, sigo pala so așunen o cuvânto, avel o Satan hai lel o cuvânto cai sas șiuto ande lende.
16 Sa cadea, le semințea cai arăsle te peren ando than barralo si codola cai, sigo pala so așunen o cuvânto, pachian-les bucuriasa.
17 Cu sea cadala, na-i len rădăcina ande lende. Von așen iech timpo, tha, sigo pala so avel iech pharimos sau varecon așel lenghe contra anda codoia că așunen o cuvânto, hasaren pengo pachiamos.
18 Mai si vi le semințea cai arăsle te peren mașcar le canră. Cadala si codola cai așunen o cuvânto,
19 tha le pharimata cadala viațache, o athaimos le barvalimasco hai aver buchia cai camen-len cheren penghe than ande lengo ilo, tasaven o cuvânto hai cheren-les te na del rodo.
20 Tha le semințea cai arăsle te peren pi phuv lași si codola cai așunen o cuvânto, pachian ande leste hai den rodo, hai cheren iech 30, aver 60 hai aver 100”.
21 Hai mai phendea lenghe: „Si andini iech lampa caște avel garadi tela iech coșo sau tela o pato? Na-i andini caște avel șiuti pi meseili?
22 Că na-i chanci garado caște na avel arachlo hai na-i chanci cai varecon camel te încărel-les mișto garado te na arăsăl prinjiando.
23 Cas si can te așunel!”.
24 Vo mai phendea lenghe: „Așunen mișto le buchia cai si tumenghe phende! Cadea sar phiraven tumen averența, sa cadea va phiravena-pe vi von tumența*, hai pala tumaro phiraimos va primina vi mai but.
25 Că codoles cai siles va mai dela-pe lesche, tha codoles cai na-i les va lela-pe lestar vi so siles”.
26 Hai mai phendea: „O Regato le Devlesco si sar cana iech manuș șiudel semințea pi phuv.
27 Andi riat sovel, de teharin uștiel, hai ande cado timpo le semințea astaren rădăcini hai barion, bi te jianel vo sar.
28 I phuv del rodo țâra po țâra: mai anglal o firo, pala codoia o spico hai, ji la urmă, i cuchin pherdi ando spico.
29 Tha, cana o rodo silo paco, o manuș lel i secera, anda codoia că avilea o timpo te chidel i recolta”.
30 Hai mai phendea: „Sar mai daisaras te phenas că si o Regato le Devlesco sau prin savi pilda daisaras te sicavas so si?
31 Vo silo sar iech cuchin muștareschi, cai si i mai țâni mașcar sea le semințea cana si șiuti andi phuv.
32 Tha, bariol hai arăsăl mai bari sar sea le coaver plante andai bar. Cherel ranica cadea de bare că le ciriclea le cerosche daștin te aven hai te beșen ca leschi ușial*”.
33 O Isus phendea but pilde sar cadala caște sicavel o cuvânto, chichi daștinas von te hachiaren.
34 Si ciaces, ci delas duma bi te folosil pilde, tha cana sas-lo corcoro pesche discipolența vo ajutilas-len te hachiaren sea le buchia.
35 Ande codo ghies, cana mechlea-pe i riat, vo phendea lenghe: „Te nachas pi coaver rig le paieschi”.
36 Pala so mechle le manușen te tiliaren, von îngărde le Isusos andi barca*; hai sas vi aver bărci cai jianas lența.
37 Atunci pi marea avilea iech bari barval brâșândesa hai le valuri marenas* andi barca, hai i barca sas pașă te mechel-pe tele ando pai.
38 Vo sovelas palal andi barca pe iech perna. Atunci von uștiade-les hai phende lesche: „Sicaitorina, ci diches că meras?”.
39 Vo uștilea opre, dea cingar caring i barval hai phendea caring i marea: „Aș! Aș po than!”. I barval așilea po than hai cărdilea iech bari liniștea.
40 Tha vo phendea lenghe: „Sostar daran cadea de but? Nici acana na-i tumen pachiamos?”.
41 Tha von daraile zurales hai phenenas iech averesche: „Con si cado manuș? Chiar vi i barval hai le paia așunen lestar”.
