Pala o Marcu 3:1-35
3 O Isus gălea pale ande iech sinagoga* hai code sas iech manuș savesco vast sas șuco.
2 Le farisei* sas le iachența pe leste caște dichen dacă avelas te sastiarel codole manușes ando sabato, caște daștin te doșaren-les.
3 Vo phendea le manușesche le vastesa șuco: „Vazde tut opre hai av ando mașcar!”.
4 Pala codoia pușlea-len: „Si mechlo ando sabato te cheres iech buchi lași sau iech buchi nasul, te salvis sau te les iech viața?”. Tha von ci phenenas chanci.
5 Pala so dichlea pherdo holi caring lende, o Isus simțosardea iech bari duch anda codoia că lengo ilo sas zuralo sar o barr, hai phendea le manușesche: „Sicav chio vast*!”. Vo sicadea-les, hai lesco vast sastilea.
6 Atunci le farisei găle avri hai astarde sigo te den duma le manușența le Irodosche caște mudaren-les.
7 Tha o Isus tiliardea caring i marea pesche discipolența. Hai but manușa andai Galileea hai andai Iudeea găle pala leste.
8 Cana așunde so but buchia cherelas, avile leste but manușa chiar vi anda o Ierusalimo, andai Idumeea, pa i coaver rig le Iordanoschi hai andal thana de pașa o Tiro hai o Sidono.
9 Hai phendea pesche discipolenghe te pregătin lesche iech țâni barca, caște na avel spidime le bute manușendar.
10 Anda codoia că sastiardea bute jenen, sea codola cai sas-le zurales nasfale chidenas-pe pașa leste caște șion o vast pe leste.
11 Hai chiar vi le spiritea neuje*, de fiesavi data cana dichenas-les, banghionas tele angla leste hai denas cingar: „Tu san o Șiavo le Devlesco!”.
12 Tha vo phendea lenghe mai butivar te na phenen chanicasche con silo vo.
13 Pala codoia vo gălea opre pe iech plain hai achardea peste codolen saven camlea te alosarel-len, hai von avile leste.
14 Hai vo alosardea 12 murșen, savenghe șiutea o anav „apostoli”. Cadala avenas te jian lesa, hai vo avelas te bișalel-len te phenen i vestea lași
15 hai te del-len o zuralimos te încalaven avri benga.
16 Cadala si le 12 murșa cai alosardea-len: o Simon (savesche phenel-pe Petru),
17 o Iacov, o șiavo le Zebedeiosco, hai o Ioan, lesco phral (cadalenghe phenelas-pe Boanerghes, cai însemnol „le Șiave le Tunetosche”),
18 o Andrei, o Filip, o Bartolomeu, o Matei, o Toma, o Iacov, o șiavo le Alfeosco, o Tadeu, o Simon, cai sas-les iech bari iag ando ilo,
19 hai o Iuda Iscariot, cai mai târzio bichindea le Isusos.
Pala codoia vo gălea andre ande iech chăr.
20 Code chidine-pe pale but manușa, cadea că von ci daștinas nici barem te han.
21 Tha, cana așunde sea cadala, lesche neamuri avile te astaren-les, anda codoia că phenenas: „Hasardea peschi goghi”.
22 Sa cadea, le sicaitori la Legeache* cai avile tele anda o Ierusalimo phenenas: „Ande leste si o Beelzebub* hai încalavel avri le benghen prin o zuralimos cai del-les lesche o conducătoro le benghengo”.
23 Atunci o Isus achardea-len peste hai astardea te del duma lența prin pilde hai phendea lenghe: „Sar daștil o Satan te încalavel avri le Satanos?
24 Dacă ande iech regato le manușa maren-pe hai vazden-pe iech contra averesche, codo regato ci va așela ande pânrănde
25 hai, dacă ande iech chăr si marimos hai le jene anda leste vazden-pe iech contra averesche, codo chăr ci va așela ande pânrănde.
26 Sa cadea, dacă o Satan vazdel-pe contra pesche hai marel-pe pesa, lesco regato ci daștil te așel ande pânrănde, tha silo choslo cu sea.
27 Chonic ci daștil te jial andre ando chăr ieche manușesco zuralo hai te ciorel lesche buchia dacă ci phandel-les mai anglal. Numai pala codoia daștil te ciorel anda lesco chăr.
28 Ciaces phenav tumenghe că sea le buchia va avena iertime le șiavenghe le manușenghe, orisave păcatea cheren hai orisave cușimata* phenen.
29 Tha con cușel o spirito sfânto le Devlesco* ci va avela iertime niciechdata, hai cherel-pe doșalo ieche păcatostar veșnico”.
30 O Isus phendea cadaia anda codoia că phenenas: „Siles iech spirito neujo”.
31 Atunci avilea leschi dei hai lesche phrala. Von așile avri hai bișialde varecas andre caște acharen-les.
32 Pașa leste beșenas but manușa hai varecon phendea lesche: „Dichta că chi dei hai che phrala sile avri hai pușen anda tute”.
33 Tha vo phendea lenghe parpale: „Con si mânri dei hai con si mânre phrala?”.
34 Pala codoia dichlea caring codola cai beșenas pașa leste hai phendea: „Dichta, cadala si mânri dei hai mânre phrala!
35 Con cherel so manghel lestar o Del*, codo si manghe phral, phei hai dei”.
Note de subsol
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „tinzosar chio vast” sau „zinghiar chio vast”.
^ Sau „benga”.
^ Lit. „scribi”.
^ Dich o Dicționaro.
^ Lit. „blasfemii”. Referin-pe ca le dumes nasul sau jiungale phende caring o Del sau le buchia sfânto.
^ Sau „o zuralimos le Devlesco”. Dich o Dicționaro.
^ Lit. „voința le Devleschi”.
