Pala o Marcu 5:1-43
5 Pala codoia arăslea pi coaver rig le paieschi, ando than cai beșenas le gheraseni.
2 Sigo pala so dea-pe tele andai barca, iech manuș ande savo sas iech spirito neujo* avilea angla leste de mașcar le mormintea.
3 Vo trailas mașcar le mormintea hai ji atunci chonic ci daisardea te încărel-les phanglo, nici barem ieche lanțosa.
4 Butivar lesche vast hai lesche pânre sas-le phangle lanțurența tha vo șinelas-len hai chanicas ci sas-les zuralimos te încărel-les po than.
5 Ghies hai riat, delas cingar mașcar le mormintea hai po plaina, hai șinelas pesco mas le barrența.
6 Tha, cana dichlea le Isusos de durial, vo nașlea caring leste hai banghilea tele angla leste.
7 Pala codoia vo delas cingar zurales: „So cames mandar, Isus, Șiavo le Bare Devlesco? Solahar manghe po Del că ci va avela te chinuis man”.
8 Anda codoia că o Isus phendea lesche: „Jia avri anda cado manuș, spirito neujo!”.
9 Hai o Isus pușlea-les: „Savo si chio anav?”. Vo phendea: „Mânro anav si Legiunea*, anda codoia că sam but”.
10 Hai manghelas le Isusos te na bișialel avri le spiritea neuje anda codo than.
11 Code, po plain, sas but bale cai hanas.
12 Cadea că, le spiritea neuje mangle-les: „Bișial amen andel bale, caște jias andre ande lende”.
13 Hai vo mechlea-len. Atunci le spiritea neuje încliste avri* anda o manuș hai găle andre andel bale, hai sea i turma, cam 2 000 bale, nașlea tele pa o plain, pelea tele ando pai hai sea le bale tasile.
14 Codola cai lenas sama le balendar nașle hai phende cadai buchi savorenghe anda o foro hai ando than de pașa leste, hai le manușa avile te dichen so întâmplosardea-pe.
15 Von arăsle co Isus hai dichle le manușes ande savo sas but benga: vo beșelas tele, sas-lo hureado hai sastevesto co șăro. Hai savore daraile zurales.
16 Codola cai dichle cadaia phende lenghe so întâmplosardea-pe le manușesa ande savo sas benga hai le balența.
17 Atunci von astarde te manghen le Isusos te tiliarel anda o than cai beșenas von.
18 Cana o Isus jialas opre andi barca, o manuș ande savo sas benga manghelas-les zurales te mechel-les te jial lesa.
19 Tha vo ci mechlea-les, hai phendea lesche: „Jia chăre ca che neamuri hai phen lenghe sea so cărdea o Iehova anda tute hai sar sicadea tuche mila”.
20 Hai o manuș tiliardea hai astardea te phenel ando Decapole* sea so cărdea o Isus anda leste. Hai savore așile uimime.
21 Pala so o Isus nachlea pale la barcasa pi coaver rig le paieschi, but manușa avile leste cana sas-lo pașa i marea.
22 Atunci avilea iech mașcar le conducători andai sinagoga*, cai bușiolas Iair. Cana dichlea le Isusos, vo pelea tele ca lesche pânre
23 hai manglea-les mai butivar hai phenelas: „Mânri șeiorri țârdel te merel. Av, mangav tut, hai șiu che vast pe late caște sastiol hai te trail”.
24 Atunci o Isus gălea lesa. Hai but manușa găle pala leste hai cadala spidenas-pe pașa leste.
25 Hai code sas iech jiuvli cai de 12 bărșa sas nasfali hai hasarelas rat.
26 Voi sas-li zurales duchadi anda codoia că nachlea prin o vast bute doctorengo, hai hasardea sea pesche love, tha, ando than te simțol-pe mai mișto, voi simțolas-pe sea mai nasul.
27 Cana așundea so phenelas-pe anda o Isus, cărdea pesche drom mașcar le but manușa, avilea pala lesco dumo*, hai șiutea o vast pe lesco hureaimos,
28 că voi phenelas ande pesco ilo: „Dacă șioav o vast numai pe lesco hureaimos, va avela te avav sastiardi”.
29 Pe thaneste, laco șiordimos ratesco așiadea-pe; hai simțosardea că sas-li sastiardi lache bare nasfalimastar.
30 O Isus dea peschi sama sigo că anda leste înclistea* iech zuralimos, hai risardea-pe caring le manușa, hai pușlea: „Con șiutea o vast pe mânro hureaimos?”.
31 Tha lesche discipoli phende lesche: „Diches mișto că le manușa spiden-pe pașa tute hai tu pușes: «Con șiutea o vast pe mande?»”.
32 Cu sea cadala, vo dichelas pașa peste, caște del peschi sama con cărdea cadai buchi.
33 Atunci i jiuvli, cai izdralas daratar anda codoia că jianelas so întâmplosardea-pe lasa, avilea, pelea tele angla leste hai phendea lesche sea o ciacimos.
34 Vo phendea lache: „Mânri șei, chio pachiamos sastiardea tut. Jia hai na mai dara* că sanas sastiardi che bare nasfalimastar”.
35 Cana încă delas duma, chichiva manușa anda o chăr le conducătorosco andai sinagoga avile hai phende: „Chi șei mulea! Sostar te mai șios po drom le Sicaitores?”.
36 Tha o Isus așundea lenghe dumes hai phendea caring o conducătoro andai sinagoga: „Na dara! Numai sicav pachiamos!”.
37 Hai ci mechlea chanicas te jial lesa, numai le Petros, le Iacovos hai le Ioanos, lesco phral.
38 Hai cana arăsle co chăr le conducătorosco andai sinagoga, vo dichlea le bute manușen sar rovenas hai denas cingar zurales duchatar.
39 Pala so gălea andre, vo phendea lenghe: „Sostar roven hai sostar den cingar cadea de zurales? I șeiorri ci mulea, numai sovel!”.
40 Atunci von astarde te asan lestar. Tha pala so bișialdea savoren avri, vo lea le dades hai la deia la șeiorrache, codolen cai sas-le lesa hai gălea andre cai sas i șeiorri.
41 Pala codoia, lea o vast la șeiorraco hai phendea lache: „Talita cumi”, cai, traducime, însemnol: „Șeiorrie, phenav tuche: Uștie opre!”.
42 I șeiorri uștilea opre hai astardea te phirel. (La sas-la 12 bărșa.) Hai pe thaneste lengo ilo thabolas bucuriatar.
43 Tha vo phendea lenghe mai butivar te na phenen chanicasche cadai buchi; hai phendea te den la șeiorra vareso te hal.
Note de subsol
^ Sau „iech beng”.
^ Andi purani armata romano le soldați sas-le chidine ande mai but legiuni. Ande iech legiunea sas mașcar 4 000 ji ca 6 000 soldați. Cade o cuvânto sicavel iech baro număro.
^ Sau „găle avri”.
^ Sau „le deș foruria”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „pala lesche zăia”.
^ Sau „avilea avri”.
^ Lit. „Jia la paceasa”.
