Pala o Marcu 13:1-37
13 Cana o Isus înclelas avri* anda o templo, iech mașcar lesche discipoli phendea lesche: „Sicaitorina, dich so șucar si cadala barra hai sea o templo!”.
2 Tha o Isus phendea lesche: „Diches cado baro templo? Ci va așela cade barr pe barreste, anda codoia că sea va avena perade”.
3 Ando timpo so beșelas po Plain le Măslinengo hai dichelas caring o templo, o Petru, o Iacov, o Ioan hai o Andrei pușle-les cana sas-le corcore lesa:
4 „Phen amenghe: Cana va avena cadala buchia hai savo va avela o semno cai sicavel că avilea o timpo te pheren-pe* sea cadala buchia?”.
5 Atunci o Isus phendea lenghe: „Len sama te na athavel tumen chonic.
6 Va avena but jene ande mânro anav hai va phenena: «Me som codo», hai va athavena bute manușen.
7 Vi mai but, cana va așunena anda marimata* hai vești anda marimata, te na daran. Cadala buchia trebun te întâmplon-pe, tha încă ci va avela o sfârșito.
8 Va vazdela-pe them contra them hai regato contra regato; va avena izdraimata phuveache anda iech than ande aver; sa cadea, va avela bochalimos. Cadala sicaven că astarde le ducha.
9 Tha tumen len sama tumendar! Le manușa va îngărena tumen angla le tribunalea hai va marena tumen andel sinagogi* hai va avena îngărde angla le guvernatori hai le regi anda mânri doș*, caște așunen vi von anda mande.
10 Mai but, trebul ca mai anglal i vestea lași te avel phendi le manușenghe anda sea le neamuri.
11 Tha, cana va îngărena tumen angla le tribunalea, te na daran hai te na gândin tumen de mai anglal so va phenena. So va dela-pe tumenghe ande codo ceaso, codoia te phenen, că na tumen san codola cai den duma, tha o spirito sfânto le Devlesco*.
12 Mai but, o phral va dela co merimos pesche phrales hai o dad pesche șiaves, le șiavorre va vazdena-pe contra o dad hai i dei, hai va dena-len co merimos.
13 Savore manușa va urâna tumen anda mânro anav. Tha con va așela zuralo ando pachiamos ji co sfârșito va avela salvime.
14 Tha, cana va dichena i buchi melali cai anel distrugerea că beșel ande iech than sfânto (codo cai citil trebul te folosil peschi goghi caște hachiarel), atunci codola andai Iudeea te nașen ca le plaina.
15 Con si opre po chăr* te na avel tele caște jial andre hai te lel vareso anda o chăr
16 hai con si po câmpo te na risarel-pe parpale caște lel pesco hureaimos de mașcar le buchia cai așile-les code.
17 Vai le jiuvleandar cai sile phare hai le jiuvleandar cai den thud penghe șiavorren ande codola ghiesa!
18 Manghen tumen le Devlesche sea o timpo te na avel ivend cana va întâmplola-pe cadaia,
19 că ande codola ghiesa va avela iech necazo, sar ci mai sas de cana astardea i lumea, cai cărdea-la o Del, ji acana hai ci va mai avela vroiechdata.
20 Vi mai but, dacă o Iehova ci avelas te țâniarel* codola ghiesa, chonic ci avelas salvime. Tha, anda o drago codolengo alosarde, cai vo alosardea-len, codola ghiesa va avena țâniarde.
21 Dacă atunci varecon va phenela tumenghe: «Dichta! O Cristoso si cade!» sau «Dichta! Si code!», te na pachian.
22 Anda codoia că va vazdena-pe Cristoși hohamne hai profeți hohamne hai va cherena semnea hai miracolea caște athaven, dacă daștil-pe, codolen alosarde.
23 Cadea că, len sama! Phendem tumenghe sea le buchia de mai anglal.
24 Tha ande codola ghiesa, pala cado necazo, o cham va caliola, o șionoto ci va mai dela peschi lumina,
25 le cerhaia va perena tele anda o cerii, hai le zuralimata cai sile andel ceruri va izdrana.
26 Atunci va dichena le Șiaves le manușesco sar avel po-l nori ande pesco baro zuralimos hai bari pachiv*.
27 Atunci vo va bișialela pesche îngeren hai va chidela ande iech than codolen alosarde lestar anda sea le riga la lumeache*, anda sea le thana la phuveache hai le cerosche.
28 Sichion acana anda cadai pilda anda o cașt cai cherel smochine: Cana lesche ranica sile covle hai zelena hai astaren te cheren patrina, jianen că o milai si pașă.
29 Sa cadea, cana va dichena cadala buchia, te jianen că o Șiavo le manușesco si pașă, co udar.
30 Ciaces phenav tumenghe că cadai generația* ci va nachela ji cana ci va întâmplona-pe sea cadala buchia.
31 O cerii hai i phuv va nachena, tha le dumes cai phenav-len me ci va nachena niciechdata.
32 Tha codo ghies sau o ceaso chonic ci jianel-len, nici le îngeri anda o cerii, nici o Șiavo, tha o corcoro cai jianel-len si o Dad.
33 Len sama, așen uștiade, anda codoia că ci jianen cana avel o timpo alosardo.
34 Si sar cana iech manuș tiliarel dromeste ande iech aver them. Vo mechel pesco chăr andel vast le sclavengo, phenel fiesavesche so buchi trebul te cherel, hai phenel codolesche cai beșel ca i poarta te așel uștiado.
35 Cadea că așen uștiade, anda codoia că ci jianen cana avel o rai le chăresco: pi riat, ando mașcar la rachiaco, angla te ghilabel o bașno* sau cana pharol o ghies*,
36 ca na varesar te soven cana va avela bi te ajucăren tumen.
37 Tha so phenav tumenghe phenav savorenghe: Așen uștiade!”.
Note de subsol
^ Sau „jialas avri”.
^ Sau „te terminin-pe”.
^ Sau „războaie”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „anda mânri cauza”.
^ Sau „o zuralimos le Devlesco”. Dich o Dicționaro.
^ Lit. „po acoperișo le chăresco”.
^ Sau „harniarel”.
^ Lit. „gloria”.
^ Lit. „andal ștar barvalea la phuveache”.
^ Butivar i duma „generația” referil-pe ca-l manușa de diferime bărșa cai traisarde ande sa codo timpo.
^ Sau „cocoș”.
^ Sau „cana cărdiol ghies”.
