Pala o Marcu 8:1-38

  • O Isus del te han 4 000 murșen (1-9)

  • Le farisei manghen lestar iech semno (10-13)

  • I drojdia le fariseienghi hai le Irodoschi (14-21)

  • Iech manuș corro silo sastiardo andi Betsaida (22-26)

  • O Petru phenel că o Isus si o Cristoso (27-30)

  • O Isus phenel că va avela mudardo (31-33)

  • So însemnol te aves iech ciacio discipolo (34-38)

8  Ande codola ghiesa chidine-pe pale but manușa. Anda codoia că le manușen ci sas-len so te han, o Isus achardea le discipolen hai phendea lenghe: 2  „Si manghe mila cadale manușendar, anda codoia că beșen manța de trin ghiesa hai na-i len so te han. 3  Dacă mechav-len te jian chăre bochale, va perena tele po drom; hai chichiva mașcar lende aven de durial”. 4  Tha le discipoli pușle-les: „Cai daștilas te arachel varecon ande cado than garado cadea de but manro caște ciailiarel cadale bute manușen?”. 5  Atunci o Isus pușlea-len: „Chichi manre si tumen?”. Von phende: „Efta”. 6  Atunci vo phendea le manușenghe te beșen tele pi phuv, lea le efta manre, andea mulțumiri, phaglea le manre hai dea-len pesche discipolenghe, hai von dine-len mai dur le bute manușenghe. 7  Sas-len vi chichiva țânorre mașe hai, pala so phendea iech manglimos le Devlesche*, o Isus phendea lenghe te den vi cadala le manușenghe. 8  Cadea că, von hale ji cana ciailile; hai sas chidine le cotora cai așile: efta coșuri bare, pherde. 9  Code sas cam 4 000 murșa. Pala codoia mechlea-len te tiliaren. 10  Vo gălea sigo opre andi barca hai tiliardea caring le thana andai Dalmuta. 11  Cade avile le farisei* hai astarde te han-pe lesa, hai mangle lestar te sicavel lenghe iech semno anda o cerii caște zumaven-les. 12  Atunci vo țârdea aero ando colin hai phendea: „Sostar le manușa cai train ande cadala ghiesa* manghen iech semno? Ciaces phenav tumenghe că ci va dela-pe lenghe niciech semno”. 13  Pala codoia mechlea-len, gălea pale opre andi barca hai tiliardea pi coaver rig le paieschi. 14  Tha le discipoli bâstărde te len manro hai ci sas-len chanci andi barca, numai iech corcoro manro. 15  Vo phendea lenghe caște hachiaren: „Pâtren tumare iacha; ferin tumen la drojdiatar le fariseienghi hai la drojdiatar le Irodoschi!”. 16  Hai von astarde te duma mașcar pende anda codoia că ci sas-len manro. 17  Cana dichlea cadaia, vo phendea lenghe: „Sostar den duma mașcar tumende că na-i tumen manro? Încă sea ci dichen hai ci hachiaren? Tumaro ilo încă ci daștil te hachiarel? 18  «Chiar cana si tumen iacha, ci dichen hai, chiar cana si tumen can, ci așunen?» Ci anen tumenghe amintea 19  cana phaglem le panji manre anda le 5 000 murșa, chichi coșuri pherde chidean anda so așilea?”. Von phende lesche: „Deșudui”. 20  „Cana phaglem le efta manre anda le 4 000 murșa, chichi bare coșuri pherde chidean anda so așilea?” Von phende lesche: „Efta”. 21  Atunci vo phendea lenghe: „Încă sea ci hachiaren?”. 22  Hai arăsle andi Betsaida. Cade andine leste ieche manușes corro hai mangle le Isusos te șiol o vast pe leste. 23  Vo lea le corre manușes vastestar hai îngărdea-les avri anda o gav. Pala so șiutea ciungar pe lesche iacha, vo șiutea pesche vast pe leste hai pușlea-les: „Diches vareso?”. 24  O manuș vazdea pesche iacha hai phendea: „Dichav manușen, tha fal-pe că si sar niște cașta cai phiren”. 25  O Isus șiutea pesche vast pale po-l iacha le manușesche, hai o manuș dichlea ujes. Vo sas-lo sastiardo hai daștilas te dichel sea le buchia mișto. 26  O Isus bișialdea-les chăre, hai phendea lesche: „Te na jias andre ande cado gav”. 27  Pala codoia o Isus hai lesche discipoli găle andel gava andai Cezareea le Filiposchi, hai po drom vo pușlea le discipolen: „Con phenen le manușa că som?”. 28  Von phende lesche: „O Ioan o Botezătorii; aver phenen o Ilie, hai aver, iech mașcar le profeți*”. 29  Pala codoia pușlea-len: „Tha tumen con phenen că som?”. O Petru phendea lesche: „Tu san o Cristoso!”. 30  Atunci o Isus phendea lenghe te na den duma chanicasa anda leste. 31  Sa cadea, astardea te sicavel-len că o Șiavo le manușesco trebul te nachel prin but ducha, te avel urâme le phurendar, le bare rașaiendar, le sicaitorendar la Legeache* hai te avel mudardo, hai pala trin ghiesa te uștiel andal mule. 32  Vo delas duma anda cadai buchi bi te garavel lendar chanci. Tha o Petru lea-les de iech rig hai astardea te ortosarel-les. 33  Atunci vo risailea, dichlea caring le discipoli hai ortosardea le Petros hai phendea lesche: „Duriar tut mandar, Satan! Anda codoia că gândis sar le manușa, na sar o Del”. 34  Pala codoia achardea peste le bute manușen hai pesche discipolen hai phendea lenghe: „Dacă varecon camel te avel pala mande, te na mai trail anda peste, tha te lel pesco stâlpo* hai te avel vi mai dur pala mande. 35  Că con camel te salvil peschi viața va hasarela-la, hai con hasarel peschi viața anda mande hai andai vestea lași va salvila-la. 36  Cadea că, so miștimos si ieche manușes dacă del peschi zor te avel-les sea i lumea hai hasarel peschi viața? 37  Hai so daștil te del iech manuș ando than pesca viațaco? 38  Dacă varecasche si lajiav manța hai sosa phenav me mașcar cadala manușa păcătoși cai mechle le Devles*, vi le Șiavesche le manușesco va avela lesche lajiav lesa cana va avela le îngerența sfânto ando zuralimos* pesche Dadesco”.

Note de subsol

^ Sau „phendea iech binecuvântarea”.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „cadai generația”.
^ Lit. „scribi”.
^ Cade o stâlpo referil-pe ca le pharimata hai ducha cai anel-len o fapto te aves iech discipolo le Isusosco. Dich o Dicționaro.
^ Lit. „cadai generația adultero”.
^ Lit. „gloria”.

Le drepturi de autor anda cadai publicația