Pala o Marcu 2:1-28
2 Tha, pala chichiva ghiesa, o Isus gălea parpale ando Capernaum hai așundea-pe că silo chăre.
2 Cadea că, chidine-pe cadea de but manușa, că ci mai sas than nici angla o udar. Atunci vo astardea te phenel lenghe o cuvânto le Devlesco.
3 Hai ștar murșa, andine leste ieche manușes cai ci daștilas te phirel.
4 Tha von ci daisarde te îngăren-les ji co Isus că but manușa sas-le chidine code. Anda codoia, von dine de iech rig o acoperișo cai sas o Isus hai cadea cărde than caște mechen tele i targa pe savi sas o manuș cai ci daștilas te phirel.
5 Cana dichlea lengo pachiamos, o Isus phendea codolesche cai ci daștilas te phirel: „Mânro șiavo, che păcatea sile iertime!”.
6 Atunci chichiva sicaitori la Legeache* cai beșenas code phenenas ande pengo ilo:
7 „Sostar del duma cado manuș cadea? Cușel* le Devles! Con daștil te iertil le păcatea, avreal iech corcoro, o Del?”.
8 Tha o Isus hachiardea sigo so denas duma mașcar pende hai phendea lenghe: „Sostar gândin cadea ande tumaro ilo?
9 So si mai ușoro: Te phenes le manușesche cai ci daștil te phirel: «Che păcatea sile iertime» sau te phenes: «Vazde tut opre, le chi targa hai phir»?
10 Tha, te jianen că le Șiaves le manușesco siles zuralimos pi phuv te iertil le păcatea . . .”. Pala codoia risailea caring o manuș cai ci daștilas te phirel hai phendea lesche:
11 „Me phenav tuche: Vazde tut opre, le chi targa hai jia chăre!”.
12 Atunci vo vazdea-pe opre, lea sigo peschi targa hai gălea avri angla le but manușa. Savore așile uimime hai astarde te den iech bari pachiv* le Devlesche hai phenenas: „Niciechdata ci mai dichleam iech buchi sar cadaia”.
13 O Isus gălea pale po malo le paiesco. Hai le but manușa avenas leste hai vo sicavelas-len.
14 Cana nachelas othar, vo dichlea ieche manușes cai bușiolas Levi, o șiavo le Alfeosco, sar beșelas ando than cai pochinenas-pe le love andal taxe hai phendea lesche: „Av pala mande!”. Atunci vo vazdea-pe hai gălea pala leste.
15 Mai târzio, o Isus halas ca i meseili ando chăr cai beșelas o Levi. But jene cai chidenas le love* hai vi manușa păcătoși hanas le Isusosa hai lesche discipolența, că but mașcar lende jianas pala leste.
16 Tha, cana le sicaitori la Legeache cai sas-le mașcar le farisei* dichle-les că hal le manușența păcătoși hai codolența cai chidenas le love pușle lesche discipolen: „Sostar hal codolența cai chiden le love hai le manușența păcătoși?”.
17 Cana așundea cadaia, o Isus phendea lenghe: „Na le manușen sasteveste trebul-len doctoro, tha codolen nasfale. Ci avilem te acharav codolen orta, tha codolen păcătoși”.
18 Le discipolen le Ioanosche hai le fariseien sas-len o obiceio te na han chanci caște încăren posto. Anda codoia, avile co Isus hai pușle-les: „Le discipolen le Ioanosche hai le discipolen le fariseienghe silen o obiceio te na han chanci caște încăren posto, tha che discipoli sostar ci încăren cado obiceio?”.
19 Cadea că o Isus phendea lenghe: „Si le amalen le jiamutresche* sostar te încăren posto chichi timpo o jiamutro silo lența? Chichi timpo o jiamutro silo lența, na-i len sostar te încăren posto.
20 Tha va avena ghiesa cana o jiamutro va avela lino lendar hai atunci, ande codo ghies, ci va mai hana chanci.
21 Chonic ci suvel ca iech hureaimos purano iech nevo cotor cai ci sas-lo șiuto ando pai. Dacă cherelas cadaia, o nevo cotor țârdelas o purano hureaimos hai o șinimos cărdiolas vi mai baro.
22 Sa cadea, chonic ci șiol mol nevi ande purane burdufuri*. Dacă cherelas cadaia, i mol pharavelas le burdufuri, hai hasardiolas-pe vi i mol hai vi le burdufuri. I nevi mol șiol-pe ande burdufuri neve”.
23 Ande iech ghies cana încărelas-pe o sabato, o Isus nachelas prin iech than cai bariolas o ghiv hai lesche discipoli astarde te len anda o ghiv ando timpo so jianas.
24 Atunci le farisei phende lesche: „Dich, von sostar cheren so na-i mechlo ando sabato?”.
25 Tha vo phendea lenghe: „Ci citisardean niciechdata so cărdea o David cana așilea bi habenesco, hai vo hai lesche manușa sas-le bochale?
26 O Abiatar, o baro rașai*, scriisardea sar o David gălea andre ando chăr le Devlesco hai halea le manre cai sas șiute angla o Del, chiar cana chanicasche na-i mechlo te hal-len, avreal le rașaia, hai dea anda lende vi le manușenghe cai sas lesa”.
27 Pala codoia phendea lenghe: „O sabato sas cărdo anda o manuș, na o manuș anda o sabato.
28 Anda codoia, o Șiavo le manușesco si Rai chiar vi le sabatosco”.
Note de subsol
^ Lit. „scribi”.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Lit. „gloria”.
^ Lit. „le jene cai chidenas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Sau „mire”.
^ Cadala sas gone cărde andai morci le animalenghi cai încărelas-pe i mol. Dich o Dicționaro.
^ Dich o Dicționaro.
