Pala o Marcu 7:1-37
7 Atunci le farisei* hai chichiva sicaitori la Legeache* cai avile anda o Ierusalimo chidine-pe pașa o Isus.
2 Von dichle că chichiva mașcar lesche discipoli hanas le vastența melale, adică bi te aven halade*.
3 (Le farisei hai sea le iudei ci han bi te halaven penghe vast ji ca o coto* caște încăren so sicade-len lenghe phure,
4 hai cana aven anda i piața von ci han bi te halaven-pe. Hai si but aver buchia cai sicade-len lenghe phure hai cai încăren-len zurales, sar avelas te șion tela o pai le paharea, le urcioare hai le ciare anda harcum.)
5 Le farisei hai le sicaitori la Legeache pușle-les: „Sostar che discipoli ci încăren so sicade amen amare phure, hai han le vastența melale?”.
6 Vo phendea lenghe: „Mișto phendea o Isaia anda tumende, manușa hohamne*, cadea sar si scriime: «Cado poporo del man pachiv le uștența, tha lengo ilo silo zurales dur mandar.
7 De ivea den cianga angla mande, că lenghe sicaimata aven le manușendar».
8 Tumen mechen de iech rig so phenel o Del că trebul te cheren hai încăren zurales ca le sicaimata le manușenghe”.
9 Pala codoia mai phendea lenghe: „Tumen jianen sar te cheren te duriaren tumendar so phenel o Del caște încăren so sichilean tumare phurendar.
10 Sar avelas, o Moise phendea: «Te des pachiv che dadesche hai chia deiache» hai «Con prasal pesche dades sau pesca deia te avel mudardo».
11 Tha tumen phenen: «Iech manuș daștil te phenel pesche dadesche sau pesca deiache: „Orisavi buchi cai si man hai daștilas te avel ande chio miștimos si corban (adică iech daro dino le Devlesche)”»
12 hai cadea ci mai mechen-les te cherel chanci anda pesco dad sau peschi dei.
13 Cadea, tumen șion de iech rig o cuvânto le Devlesco caște încăren so sichilean tumare phurendar, hai sicaven vi averen te cheren sa cadea. Hai tumen cheren but buchia sar cadala”.
14 Atunci vo achardea pale peste le bute manușen hai phendea lenghe: „Așunen man savore hai hachiaren mișto so phenav tumenghe!
15 Le manușes ci meliarel-les so jial andre ande leste, tha so înclel avri anda leste, codoia meliarel-les”.
16 ——
17 Cana sas-le dur le manușendar hai găle andre ande iech chăr, lesche discipoli astarde te pușen-les anda cadai pilda.
18 Vo phendea lenghe: „Nici tumen ci hachiaren, cadea sar von? Ci jianen că chanci cai avel de avreal hai jial andre ando manuș ci daștil te meliarel-les?
19 Că ci jial andre ande lesco ilo, tha nachel prin o păr hai jial avri”. Cadea vo sicadea că sea le habena sile uje.
20 Hai mai phendea: „So înclel anda o manuș, codoia meliarel-les.
21 Că de andral, anda o ilo le manușengo, înclen le gânduri nasul: le buchia sexualo melale*, le ciorimata, le mudarimata,
22 o athaimos mașcar o rrom hai i rromni*, i lăcomia, le nasulimata, o athaimos, o phiraimos bilajiavuno, i invidia, o cușimos* contra o Del, o phuchiarimos hai o dilimos.
23 Sea cadala buchia nasul aven de andral hai meliaren le manușes”.
24 Pala codoia tiliardea hai gălea andel thana anda o Tiro hai o Sidono. Code gălea andre ande iech chăr. Vo ci camlea te jianel-pe cadai buchi, tha ci daisardea te nachel bi te avel dichlo.
25 Atunci, iech jiuvli cai lachi șeiorri sas tela o zuralimos ieche spiritosco neujo* așundea anda leste, avilea hai pelea ca lesche pânre.
26 I jiuvli sas grecoaica anda o neamo siro-feniciano. Voi manglea-les zurales te încalavel avri le benghes anda lachi șeiorri.
27 Tha vo phendea lache parpale: „Mech mai anglal te ciailiaren-pe le șiavorre, că na-i mișto te les o manro le șiavorrengo hai te șiudes-les le țâne jucălenghe”.
28 Voi phendea lesche parpale: „Da, raia, tha vi le țâne jucăla cai sile tela i meseili han le pușuca* cai peren le șiavorrendar”.
29 Atunci vo phendea lache: „Jia. Anda codoia că phendean cadai buchi, o beng înclistea avri* anda chi șeiorri”.
30 Voi gălea chăre hai arachlea la șeiorra ando pato; o beng înclistea avri anda late.
31 Cana avilea parpale anda o Tiro, o Isus nachlea prin o Sidono hai gălea caring i Marea Galileei, mașcar le thana anda Decapole*.
32 Cade andine leste ieche manușes cașuco cai delas duma phares hai mangle-les zurales te șiol o vast pe leste.
33 Vo lea le manușes de iech rig hai îngărdea-les dur le bute manușendar. Pala codoia șiutea pesche naia andel can le manușesche hai, pala so ciungardea, șiutea o vast pe leschi șib.
34 Hai dichlea caring o cerii, țârdea aero ando colin hai phendea: „Efata!”, adică „Pâtăr tut!”.
35 Atunci lesche can pâtărdile, leschi șib ci mai sas phangli hai vo astardea te del duma cadea sar trebul.
36 Atunci o Isus phendea le manușenghe te na phenen chanicasche chanci. Tha, chichi phenelas lenghe mai but, cadichi mai but denas duma anda cadai buchi.
37 Si ciaces, le manușa așile zurales uimime hai phenenas: „Sea so cherel si mișto. Vo cherel chiar vi le cașuchen te așunen hai codolen cai ci daștin te de den duma, te den duma!”.
Note de subsol
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „scribi”.
^ Sau „bi te aven thode”.
^ Sau „cui”.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.
^ Lit. „imoralitatea sexualo”. Dich o Dicționaro.
^ Lit. „adultero”. Dich o Dicționaro.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Sau „ieche benghesco”.
^ Sau „prușuca”.
^ Sau „gălea avri”.
^ Sau „le deș foruria”.
