LEKTIONA 21
Har well i menshenge o latcho lab anlo?
Ko tsiro wella sik, kai lell o Jehowah dran peskro Them i tsele probleme mari phubjatar krik. Ko hi sawo latcho lab, kai hunte djinenn wawar kowa ninna! Doleske kamas o Jesus ninna peskre malendar, te penenn le kowa hakeneske (Mateo 28:19, 20). Har rikrenn pen Jehoweskre Rakepangre ap ko lab, hoi o Jesus penas?
1. Har wenn i laba dran Mateo 24:14 an maro tsiro tchatcho?
O Jesus penas, “ap i tseli phub well i menshenge ko latcho lab” pral o Debleskro Them penlo (Mateo 24:14). Mer — Jehoweskre Rakepangre — ham bachteles, kai nai krah koi budi. O latcho lab well mendar ap i tseli phub an budeder har 1 000 tchipja anlo. Ko hi sawi bari budi, hoi kote organisieremen was, kai haiwah: Mendar haiwams kowa gar — pal koja budi hi o Jehowah tardo.
2. Hoi krah mer halauter, te nai rakras i menshentsa?
Mer anah o latcho lab pash i menshende kote, kai jon hi. Har i christe an o phuro tsiro djah mer kher pal kher, te nai rakras lentsa (Bitchepangre 5:42). Hoske hi sawi systematikti methoda mishto? Jaake nai rakrah hako bersh bud millione menshentsa. Doleske, kai djinah, kai hin ninna bud gar khere, rakrah ninna budentsa an o foro. Mer rodah pal chance, te nai penas lenge, koon o Jehowah hi un hoi job kamell te krell.
3. Koon hunte rakrell pral o latcho lab?
Koi budi, te rakras wawarentsa pral o latcho lab, well ap hako tchatcho christeste. Mer djinah: Jon te wenn ap o tchatcho drom, nai lenn jon ninna o djipen hake tsireske. Doleske hi menge koi budi ninna jaake bud moldo (Dik pal an 1. Timoteo 4:16). Mer krah o djiestar jaake bud, har mari situationa men mukell te krell. I bibla penella, kai lam halauter tchitcheske. “Doleske [krah] kowa ninna tchitcheske un [lah] kek lowe” (Mateo 10:7, 8). Ninna kai interessierell pes gar hakeno ap kowa, hoi kamah lenge te penell, krah mer mari Debleskri Budi dureder. Jaake sharah mer i Jehowes, shunah ap kowa, hoi job mendar kamella, un krah les bachteles.
RODAS DUREDER
Kanna dikeh, hoi mer halauter krah, te nai rakras i menshentsa ap i tseli phub pral o latcho lab, un har o Jehowah men pash koi budi ap o wast djala.
O latcho lab well mendar ap i tseli phub anlo: (A) Costa Rica, (B) USA, (C) Benin, (D) Thailand, (E) Yap, (F) Sweden
4. Mer krah halauter, te rakras i tsele menshentsa
Jehoweskre Rakepangre krenn halauter, te nai anenn le o latcho lab pash i tsele menshende ap i phub. Te dikan o VIDEO, rakrenn khetne pral:
-
Hoi his tuke pash kowa interessant, hoi i Jehoweskre Rakepangre halauter krenna, te nai rakrenn le pral o Debleste?
Dikenn pal an Mateo 22:39 un 1. Tessalonikarja 2:4, un rakrenn khetne pral:
-
Har sikrell mari Debleskri Budi, kai hi men kamlepen ap o wawareste?
-
Har dikell o Jehowah ap kolende, kai anenn o latcho lab?
5. Mer ham i Debleskre budepangre
Bud situatione sikrenn, kai hi o Jehowah pal mari budi tardo. Har kanna ninna pash maro phraleste Paul an o Newo Seelando. Pal o chapen djas job kher-pal-kher an i Debleskri Budi un rakras i djuwjah. Glan o chapen las koi djuwel an o mangepen ap o Debleste leskro lab Jehowah an o mui un mangas lestar, te mukell lo jekes pash late te well. “Triin kore pal kowa,” penas o Paul, “hums me glan lakro wudar tardo.”
Dikenn pal an 1. Korintarja 3:9, un rakrenn khetne pral:
-
Har sikrenn situatione, har kanna kaja dran o Newo Seelando, kai hi o Dewel pal koi budi tardo, hoi mer leske krah?
Dikenn pal an Bitchepangre 1:8, un rakrenn khetne pral:
-
Hoske hunte well o Jehowah ap mari rig, te krah leskri budi?
Djinal tu kowa?
An maro Khetnepen tel o kurko hi men i training, te djinas, har te anas o latcho lab. Tu te hals kote: Har his ko training an tire jaka?
6. Mer shunah ap o Debleste un anah o latcho lab
An o phuro tsiro dan tchilatche, kai kaman, te rakrenn i Jeseskre mala gar wawarentsa pral o latcho lab. I phure christe mukan pen pengro tchatchepen gar krik te lell un djan doleske ninna “glan i tchatchepangre” — jaake atchas kowa legal, te rakrenn le pral o patsepen (Filiparja 1:7). Jehoweskre Rakepangre krenn kowa an maro tsiro ninna. a
Dikenn pal an Bitchepangre 5:27-42, un rakrenn khetne pral:
-
Hoske dah mer mari Debleskri Budi gar pre (Dik pal an i verse 29, 38, un 39)?
JEK NAI PUTCHELLA: “Hoske djana Jehoweskre Rakepangre kher-pal-kher?”
-
Hoi penals tu ap kowa?
HOI KATE PENLO WAS
O Jesus penas ap peskre nashepangrende, te anenn le o latcho lab ap i tseli phub. O Jehowah hi ap i rig peskre menshendar, te nai krenn le koi budi.
Hoi penals tu?
-
Har well o latcho lab ap i tseli phub anlo?
-
Har sikrell mari Debleskri Budi, kai hi men kamlepen ap o wawareste?
-
Hoi penals tu: Nai krell i Debleskri Budi men bachteles? Hoske peneh tu kowa jaake?
BUDEDER
Kate dikeh, har Jehoweskre Rakepangre an bare forja pral o latcho lab rakrenn.
Kate well tuke sikedo, hoi Jehoweskre Rakepangre kolenge kran, kai hunte nashan dran pengro them.
O duchtiko trush kolendar, kai dran pengro them nashan, wella tchales kerdo (5:59)
Kate huneh, har shukar o djipen an i Debleskri Budi nai hi.
Kate hatseh, har latches menge kowa an mari Debleskri Budi his, kai djam glan i tchatchepangre.
“Rakepangre o Themestar djana glan i tchatchepangre” (O Debleskro Them Rajella!, Kotar 13)
a O Dewel hi maro pralstuno un kamell mendar, te kras koi budi. Doleske hunte putchas mer gar menshendar pal ko tchatchepen, te rakras pral o latcho lab.
