Ri Ajawaxel are xbʼanow ronojel ri jastaq. Areʼ ojer kʼolik xuqujeʼ kkam täj (Salmo 90:2). Areʼ ubʼim lo pa ri Loqʼalaj Pixabʼ chirij ri utz täq jastaq che kepe na (1 Timoteo 1:11). Rumal che xuya ri qakʼaslemal, xaq xiw areʼ taqal che kqapatanej xuqujeʼ kqaya uqʼij. Chasikʼij uwach Apocalipsis 4:11.

Kʼot nijun winaq rilom ri Ajawaxel rumal che areʼ are jun uxlabʼal, sibʼalaj nim ubʼanik chqawach öj, rumal che kʼo qabʼaqil (Juan 1:18; 4:24). Tekʼuriʼ, kojkunik kqetaʼmaj chirij ri ubʼantajik chiʼ kojchoman chirij ri jastaq che ubʼanom. Jun kʼutbʼal re, are ri uwach täq cheʼ ri kotzʼiʼj che e jalajoj uwach ubʼanom, kukʼutu che kojuloqʼoqʼej xuqujeʼ che sibʼalaj nim unojibʼal. Rumal che, sibʼalaj nim ri kajulew kukʼut chqawach che sibʼalaj kʼo uchoqʼabʼ. Chasikʼij uwach Romanos 1:20.

Jun chik jastaq che kojutoʼ che retaʼmaxik uwach ri Ajawaxel are usikʼixik uwach ri Loqʼalaj Pixabʼ. Kuya ubʼixik chaqe chirij ri kubʼan chike ri winaq, ri jastaq che utz krilo xuqujeʼ ri utz ta krilo, xuqujeʼ ri kubʼan che rilik ri jastaq che kkʼulmatajik. Chasikʼij uwach Salmo 103:7-10.

Ri Jesús xubʼij: «Qatat ri kʼo la pa ri kaj, chtastaj ri bʼiʼ la» (Mateo 6:9). Pa neʼ, che ri Ajawaxel kbʼix nikʼaj chik bʼiʼaj, tekʼuriʼ ri areʼ kʼo qas ubʼiʼ. Wajun bʼiʼaj riʼ jalajoj ubʼixik pa täq chʼabʼal. Pa kaxlantzij are Jehová, xuqujeʼ kbʼix Yavé che. Ri Loqʼalaj Pixabʼ kubʼij: «Rech ri winaq kketaʼmaj che at ri abʼiʼ are Jehová xiw at qas at nim puwiʼ ri uwach Ulew» (Salmo 83:18, NM).

Pa e kʼi Loqʼalaj Pixabʼ, kʼexom ri qas ubʼiʼ ri Ajawaxel, kojom Ajawaxel o Señor che. Tekʼuriʼ chiʼ qas xtzʼibʼax ri Loqʼalaj Pixabʼ ri  ubʼiʼ ri Ajawaxel weneʼ kʼo 7.000 mul chupam. Chiʼ ri Jesús xukʼut chkiwach ri winaq chirij ri Ajawaxel areʼ xukoj ri qas ubʼiʼ. Chasikʼij uwach Juan 17:26.

Chawilaʼ ri video ¿La kʼo ubʼiʼ ri Dios?

We qas kojraj ri Jehová, ¿jasche kuyaʼo che kʼo sibʼalaj kʼaxkʼolil? E kʼo jujun kkichomaj che areʼ kyaʼow ri kʼäx rech kukʼajsaj qawach. Wariʼ qastzij täj. Chasikʼij uwach Santiago 1:13.

Ri Jehová uyaʼom chaqe che kqachaʼ ri kqabʼano pa qakʼaslemal. Ri qas utz kqabʼano are kqachaʼ upatanexik (Josué 24:15). Tekʼuriʼ, e kʼi winaq kkichaʼ ubʼanik jastaq che utz täj, rumal laʼ kʼo kʼaxkʼolil. Ri Jehová sibʼalaj kbʼisonik chiʼ kril ri itzelal tijan kbʼanik. Chasikʼij uwach Génesis 6:5, 6.

Jehová kojraj xuqujeʼ kraj kqariq kikotemal pa ri qakʼaslemal, xa jubʼiqʼ chik kraj rech kresaj ri kʼaxkʼolil xuqujeʼ ri itzelal. Ri rumal che majaʼ kubʼano, kʼo utz täq rumal che uyaʼom che ri kʼaxkʼolil kʼolik. Pa ri kʼutunem 8 kbʼix ri rumal. Chasikʼij uwach 2 Pedro 2:9 xuqujeʼ 3:7, 13.

Rumal ri chʼawem Jehová kuya chaqe che kojqebʼ rukʼ. Areʼ kok il chaqe pa qajujunal (Salmo 65:2; 145:18). Kraj kusach ri qamak xuqujeʼ kril ri choqʼabʼ kqakojo rech kqabʼan ri kraj, pa neʼ qas ta kojkun che ubʼanik. Rumal laʼ, pa neʼ öj ajmakibʼ, kojkunik kqabʼan rachiʼl. Chasikʼij uwach Salmo 103:12-14 xuqujeʼ Santiago 4:8.

Rumal che are xyaʼow ri qakʼaslemal, qas yaʼtal che ri Ajawaxel che xaq xiw areʼ kqaloqʼoqʼej (Marcos 12:30). Kqakʼutu che kqaloqʼoqʼej chiʼ kqetaʼmaj chirij xuqujeʼ kqanimaj ri utaqonik. Chiʼ kqabʼano, kubʼan nim ri qachilanik rukʼ. Chasikʼij uwach 1 Timoteo 2:4 xuqujeʼ 1 Juan 5:3.