KʼUTUNEM 10
¿Jas kqabʼan che retaʼmaxik chirij ri qastzij kojonem?
1. ¿La xaq xiw jun qastzij kojonem kʼolik?
«Chichajij iwibʼ chkiwach ri winaq ri kakijaluj kibʼ chi e qʼaxal täq tzij.» (MATEO 7:15)
Ri Jesús xuqujeʼ ri rajtijoxelabʼ xekʼejeʼ chupam ri qastzij kojonem, ri Jesús xubʼij che xaq junam rukʼ jun bʼe che kukʼam wi pa ri kʼaslemal che kʼot ukʼisik, tekʼuriʼ xa e jujun ri winaq kekun che uriqik (Mateo 7:14). Ri Ajawaxel xaq xiw kukʼam ri qʼijilanik che kukʼut ri qastzij kʼo pa ri Utzij, ri Loqʼalaj Pixabʼ. Ri kkiya qastzij qʼijilanik che ri Ajawaxel xaq junam ubʼanom ri kichomanik chirij ri areʼ. Chasikʼij uwach Juan 4:23, 24; 14:6, xuqujeʼ Efesios 4:4, 5.
Chawilaʼ ri video ¿La utz kril ri Dios konojel ri e kojonem?
2. ¿Jas xubʼij ri Jesús chikij ri qastzij täj kojonelabʼ?
«Kakibʼij chi ketaʼm uwach ri Dios, rukʼ kʼu ri kichak kakiqʼalajisaj che man je täj.» (TITO 1:16)
Ri Jesús xubʼij kanoq che kewalij ajkojonelabʼ che kkikʼut täj ri qastzij. Kʼi chike ri winaq riʼ kkibʼij che e cristianos. Pa neʼ kkibʼij che kkikʼut ri qastzij, tekʼuriʼ xa kkisach ri winaq. Tekʼuriʼ, kojkunik kqariq ri qastzij kojonem, rumal che ri e kʼo pa ri qastzij kojonik kkibʼan pa ri kikʼaslemal ri kbʼix chikij ri qastzij kojonelabʼ. Chasikʼij uwach Mateo 7:13-23.
3. ¿E jachin e kʼo pa ri qastzij kojonem?
Chqilaʼ jobʼ jastaq che kkʼutuwik:
-
Nim kkil ri Loqʼalaj Pixabʼ rumal che are Utzij ri Ajawaxel. E areʼ ta kkibʼan ri kʼutunem che xa winaq e bʼinaq, are kikoj kichoqʼabʼ che unimaxik ri pixabʼ rech ri Utzij ri Ajawaxel (Mateo 15:7-9). Xuqujeʼ, kkibʼan pa kikʼaslemal ri kkitzijoj. Chasikʼij uwach Juan 17:17 xuqujeʼ 2 Timoteo 3:16, 17.
-
Nim kkil ri ubʼiʼ ri Ajawaxel, Jehová. Ri Jesús xukʼutu che nim krilo chiʼ xuya ubʼixik chirij ri ubʼiʼ ri Utat. Xutzijoj chike ri winaq chirij ri Jehová xuqujeʼ xukʼut chkiwach che kkitaʼ pa chʼawem che kbʼan nim che wajun bʼiʼaj riʼ (Mateo 6:9). ¿E jachin ri kojonelabʼ kkiya ubʼixik chirij ri ubʼiʼ ri Ajawaxel pa ri atinamit? Chasikʼij uwach Juan 17:26 xuqujeʼ Romanos 10:13, 14.
-
Kkitzijoj ri Rajawbʼal ri Ajawaxel. Ri Jesús xpe pa ri uwach Ulew che utzijoxik ri utz täq jastaq chirij ri Ajawbʼal, che kuya na utzilal chike ri winaq. Xubʼan wajun chak riʼ kʼa pa ri qʼij rech ri ukamikal (Lucas 4:43; 8:1; 23:42, 43, NM). Xuqujeʼ, xubʼij che ri rajtijoxelabʼ kkitzijoj wajun Ajawbʼal riʼ. Rumal laʼ we kʼo jun winaq kutzijoj chirij ri Ajawbʼal rech ri Ajawaxel chawe, ¿jas kojonik riʼ kʼo wi? Chasikʼij uwach Mateo 24:14.
-
Kkibʼan ta ri itzelal che kkibʼan ri nikʼaj chik winaq. Ri rajtijoxelabʼ ri Jesús kkibʼan ta ri jastaq rech ri política xuqujeʼ kkibʼan ta chʼoj kukʼ nikʼaj chik winaq (Juan 17:16; 18:36). Xuqujeʼ kkibʼan ta itzel jastaq che kkibʼan ri winaq che keniman ta che ri Ajawaxel. Chasikʼij uwach Santiago 4:4.
-
Ri loqʼoqʼenik kʼo chkixoʼl qas kqʼalajinik. Ri Utzij ri Ajawaxel ukʼutum chkiwach che nim kkil konojel ri winaq, pa neʼ jalajoj tinamit kepe wi. Ri e qastzij täj kojonem kkiya ri kitobʼanik che ri chʼoj, tekʼuriʼ ri qastzij cristianos kkibʼan täj (Miqueas 4:1-3). Are, kkiya kitiempo xuqujeʼ kipwaq che kitoʼik xuqujeʼ che uyaʼik kichoqʼabʼ ri winaq, kkitaʼ ta pwaq chiʼ kkibʼan wariʼ. Chasikʼij uwach Juan 13:34, 35 xuqujeʼ 1 Juan 4:20.
4. ¿La kachʼobʼo jachin laʼ ri qastzij kojonem?
¿Jas kojonem che ronojel ri kukʼutu resam pa ri Loqʼalaj Pixabʼ, kubʼan nim che ubʼiʼ ri Ajawaxel xuqujeʼ kuya ubʼixik chirij ri Ajawbʼal che kʼo pa ri kaj che xaq xiw are kkunik kukʼam lo utzilal pa kiwiʼ ri winaq? ¿Jas kojonem qas kukʼutu che ri e kʼo chupam qas kkiloqʼoqʼej kibʼ xuqujeʼ kebʼe ta che ubʼanik chʼoj? ¿Jas kachomaj? Chasikʼij uwach 1 Juan 3:10-12.
