KʼUTUNEM 4
¿Jachin laʼ ri Jesucristo?
1. ¿Jachin xbʼanow ri Jesús xuqujeʼ jachiʼ xbʼan wi?
¿Jas e ubʼantajik ri Jesús xubʼan che areʼ kʼäx ta uchʼabʼexik? (MATEO 11:29; MARCOS 10:13-16)
Ri Jesús are ta junam kukʼ ri winaq, are jun ángel pa ri kaj chiʼ majaʼ kpe cho ri uwach Ulew (Juan 8:23). Areʼ ri nabʼe xbʼan rumal ri Jehová xuqujeʼ xutoʼ che ubʼanik ronojel ri jastaq. Ri Loqʼalaj Pixabʼ kubʼij che areʼ ri «xa jun» Ukʼojol ri Ajawaxel kʼolik rumal che xaq xiw ri Jesús qas utukel ri Ajawaxel xubʼano (Juan 1:14). Xuqujeʼ kbʼix «ri Tzij» che, rumal che are xubʼan ajqʼaxal utzij ri Utat. Chasikʼij uwach Proverbios 8:22, 23, 30 xuqujeʼ Colosenses 1:15, 16.
2. ¿Jasche xpe ri Jesús cho ri uwach Ulew?
Ri Ajawaxel xutaq lo ri Ukʼojol pa ri uwach Ulew. Rech xkunik xpetik, Jehová xuqʼaxej ri ukʼaslemal rukʼ María, jun qʼapoj ali judía. Rumal laʼ, ri utat ri Jesús are ta jun winaq (Lucas 1:30-35). Areʼ xpe cho ri uwach Ulew rumal oxibʼ jastaq: 1) xubʼij ri qastzij chirij ri Ajawaxel, 2) xuya jun kʼutbʼal rech kqapatanej ri Jehová, pa neʼ kʼo kʼäx kqariqo, xuqujeʼ 3) xuya ri tzʼaqatalaj ukʼaslemal «che kitorik kʼiʼalaj winaq». Chasikʼij uwach Mateo 20:28.
3. ¿Jasche rajawaxik jun tojbʼal?
Jun tojbʼal are ri kyaʼik rech kesax jun winaq pa kamikal (Éxodo 21:29, 30). Ri kamikal xuqujeʼ ri rijobʼik are ta ri xraj ri Ajawaxel chiʼ xeʼubʼan ri winaq. Kqachʼobʼo rumal ri xubʼij ri Jehová che ri Adán we kubʼan umak —o kniman täj—, kkamik. Rumal laʼ, wet xnimanik, mat xkam riʼ (Génesis 2:16, 17; 5:5). Ri Loqʼalaj Pixabʼ kubʼij, che are Adán «xukʼam» lo ri kamikal pa ri uwach Ulew. Wariʼ kraj kubʼij, che Adán xuqʼaxej ri mak chike ri e ralkʼwal, rukʼ wariʼ xeʼuya pa ri kamikal. Rumal laʼ rajawaxik jun tojbʼal rech kojesax pa ri mak. Chasikʼij uwach Romanos 5:12 xuqujeʼ 6:23.
Tekʼuriʼ, ¿jachin kkunik kuya ri tojbʼal rech kojkam täj? Chiʼ kojkamik, ktojtaj ri qamak. Rumal che öj ajmak, kʼot nijun kkunik kutoj umak jun chik. Chasikʼij uwach Salmo 49:7-9.
4. ¿Jasche xkam ri Jesús?
Ri Jesús, junam ta qukʼ öj, areʼ tzʼaqat ri ukʼaslemal xuqujeʼ xubʼan ta mak. Rumal laʼ xkam ta rumal ri umak areʼ, are rumal che xutoj ri kimak konojel ri winaq. Chiʼ ri Ajawaxel xutaq lo ri Ukʼojol rech kkam rumal qech, ri Ajawaxel xukʼutu che sibʼalaj kojuloqʼoqʼej. Xuqujeʼ ri Jesús xukʼutu che kojuloqʼoqʼej chiʼ xunimaj ri Utat xuya ri ukʼaslemal rech kojresaj pa ri mak xuqujeʼ pa kamikal. Chasikʼij uwach Juan 3:16 xuqujeʼ Romanos 5:18, 19.
Chawilaʼ ri video ¿Jasche xkam ri Jesús?
5. ¿Jas tijan kubʼan ri Jesús kimik?
Chiʼ xpe pa ri uwach Ulew, ri Jesús xeʼukunaj ri e yawabʼ, xeʼuwalajisaj ri kaminaqibʼ xuqujeʼ xeʼutoʼ ri xkiriq kʼäx, rukʼ wariʼ xukʼutu ri kubʼan na pa kiwiʼ ri e sukʼ rajpatanelabʼ ri Ajawaxel (Mateo 15:30, 31; Juan 5:28). Chiʼ xkam ri Jesús, ri Ajawaxel xuwalajisaj xuqujeʼ xuya chi jumul ri ukʼaslemal pa ri kaj (1 Pedro 3:18). Ri Jesús xreyej che uxukut ri Utat rech xyaʼ che, che kuqʼat tzij puwiʼ ri uwach Ulew (Hebreos 10:12, 13). Kimik, ri Jesús tijan chi kuqʼat tzij pa ri kaj, ri rajtijoxelabʼ tijan kkibʼij wariʼ pa ronojel ri uwach Ulew. Chasikʼij uwach Daniel 7:13, 14 xuqujeʼ Mateo 24:14.
Rumal che ri Ajawaxel uyaʼom qʼatbʼal tzij pa uqʼabʼ, wajun Ajawinel che nim uchoqʼabʼ naj ta chik kraj kusach na kiwach ri e itzel winaq xuqujeʼ ri kʼäx tijan kuya ri itzelal. Konojel ri kekojon che ri Jesús xuqujeʼ kkinimaj kkiriq jun kikʼaslemal rukʼ kikotemal pa ri uwach Ulew, che kubʼan na jun kotzʼiʼj uwach. Chasikʼij uwach Salmo 37:9-11.
