Proverbs 15:1-33
15 Wanfala kaen* ansa hem katem daon kros,+Bat raf toktok* mekem man kros go moa.+
2 Tongue blo wise man hem iusim gud knowledge,+Bat mouth blo stupid man hem talem karangge toktok.
3 Eye blo Jehovah hem lukim evri samting,Hem lukluk lo nogud pipol and gud pipol.+
4 Tongue wea kaen* hem wanfala tree blo laef,+Bat toktok wea olketa twistim hem kosim sorre.*
5 Wanfala karangge man no respectim discipline blo dadi blo hem,+Bat wanfala wise man hem acceptim kaonsel.+
6 Lo haos blo raeteous man, staka treasure hem stap,Bat harvest* blo wicked man mekem hem for kasem trabol.+
7 Lips blo wise man hem sharem knowledge,+Bat heart blo stupid man hem no duim datwan.+
8 Jehovah barava heitim sakrifaes blo wicked man,+Bat Hem hapi lo prea blo man wea duim stret samting.+
9 Jehovah barava heitim wei blo wicked man,+Bat hem lovem man wea aftarem raeteous samting.+
10 Man wea lusim stretfala road hem ting lo discipline olsem nogud samting,*+Bat man wea heitim kaonsel bae hem dae.+
11 Jehovah hem lukim evriting insaed lo Grev,* ples wea olketa dead body hem rotten.*+
So haomas moa insaed heart blo olketa man!+
12 Praod man hem barava les lo man wea stretem* hem.+
Hem bae no askem help from olketa wea wise.+
13 Heart wea hapi hem mekem feis for shaen,Bat heart wea barava sorre hem mekem man feel daon tumas.*+
14 Heart wea garem wei for minim samting hem lukaotem knowledge,+Bat mouth blo stupid man hem hapi lo* karangge wei.+
15 Full laef blo man wea safa hem nogud nomoa,+Bat man wea heart blo hem hapi hem hapi evriday.*+
16 Hem beta for garem tu-thri samting and fraet lo Jehovah+Winim for garem staka riches and wari.*+
17 Hem beta for kaikaim pleit vegetable lo haos wea love hem stap+Winim fat buluka* lo haos wea heit hem stap.+
18 Man wea savve kros kwiktaem hem mekem raoa for worse go moa,+Bat man wea no savve kros kwiktaem hem mekem raoa for katdaon.+
19 Road blo lesy man hem olsem wanfala wall blo nila grass,+Bat road blo man wea duim stret samting hem olsem wanfala main road wea flat.+
20 Wanfala wise son hem mekem dadi blo hem hapi,+Bat wanfala stupid man hem ting daonem mami blo hem.+
21 Karangge fasin hem samting wea mekem man wea no garem gud tingting* for hapi,+Bat man wea garem wei for luksavve hem gohed wakabaot followim stretfala road.+
22 Olketa plan savve fail taem pipol no story tugeta,*Bat evriting bae gohed gud thru lo staka advaesa.*+
23 Man hem hapi taem hem givim stret ansa,*+And toktok wea man talem lo raet taem, hem gud tumas!+
24 Man wea garem wei for minim samting hem go ap followim road blo laef,+Hem no followim road wea go daon for Grev.*+
25 Jehovah bae distroem haos blo man wea praod,+Bat hem bae protectim olketa baondri blo land blo widow woman.+
26 Jehovah hem heitim olketa plan blo wicked man,+Bat Hem hapi tumas lo olketa naesfala toktok.+
27 Man wea ravem pipol for kasem selen hem mekem trabol for kasem* famili blo hemseleva,+Bat man wea heitim bribe bae hem gohed for laef.+
28 Heart blo raeteous man hem ting raonem samting firstaem bifor hem ansa,*+Bat mouth blo wicked man hem talemaot olketa nogud samting.
29 Jehovah hem stap farawe from wicked man,Bat hem herem prea blo raeteous man.+
30 Eye wea shaen* hem mekem heart for hapi.
Wanfala gud report hem strongim olketa bon.*+
31 Man wea lisin lo kaonsel wea savve givim man laefHem wanfala lo olketa wea wise.+
32 Eniwan wea les lo discipline hem ting daonem laef* blo hemseleva,+Bat eniwan wea lisin lo kaonsel hem kasem wei for minim samting.*+
33 Wei for fraet lo Jehovah hem trainim man for faendem wisdom,+And wei for hambol hem mekem man kasem honor.+
Olketa footnote
^ Or, “Soft.”
^ Or, “toktok wea pokem man.”
^ Or, “healim man.”
^ Lit., “pisisim spirit.”
^ Or, “income.”
^ Or, “samting wea ova tumas.”
^ Or, “Abaddon.”
^ Or, “kaonselem.”
^ Or, “pisisim spirit.”
^ Or, “aftarem.”
^ Or, “hem hapi olsem man wea mekem feast evriday.”
^ Or, “konfius.”
^ Lit., “buluka wea olketa feedim lo ples for olketa animal kaikai lo hem.”
^ Lit., “hem garem heart wea karangge.”
^ Or, “no storyim secret.”
^ Or, “man for givim kaonsel.”
^ Lit., “ansa from mouth blo hem.”
^ Or, “mek shame lo.”
^ Or, “ting raonem hao for ansa; tingting bifor hem toktok.”
^ Lit., “mekem olketa bon fat.”
^ Or, “Man wea smile.”
^ Lit., “heart.”
